Mak 1
1
Eyɔɔ Andɛʼndim Ngwe, ndèerè aghɛʼ ebe Yeso Kristo
(Mat 3:1-12; Luk 3:1-18; Eyɔ 1:19-28)
1Ewunɔ ne eklada ene ekɔn ǹchwɔ̀ Yeso kristo ŋwɔ Ngwe. 2Na aŋu e me ŋwɛʼrɛ efwɔ aŋwɛʼrɛ Azaya Àmɛnɛkɔn Ngwe ngɛ kpe
“Ngwe à ga kpe mmɛ wa ngo sàa ghontɔm ngu wɛ è ma ngo tse embè ndzɔn
é ndèerè aghɛʼ endɔn ngɛ.
3Gho deʼ wa flaba gà edɔm eguńked kpe
ndèerè aghɛʼ ebe Masakɛ, nɔɔrɔ aghɛʼnji ebe engɔ.”
4Eyɔɔ à ngɔɔ eguńked, e sa zɔzɔ engɔ sa ndɛ̀ʼ ndim gɛ̀rɛ̀ sa sɛ̀ɛrɛ̀ ebe bɔ kpe, “Mbɔn kobo ńtara ntsɔn, nu ndim gɛ̀rɛ̀ sàarà abwa bɔɔbɔɔ mbɔʼtye Ngwe dzɛd abwa bɔɔbɔɔ ndzɔn.” 5Bɔ akɛkɛ abɛɛ abɛ Judeya mane antiri abɛ Jerusalɛm â zeʼ é zo ebwa wɛ engɔ à ma sɛ̀ɛrɛ̀ ngɛ. Angɔ à bɛrɛ abwa bɔɔbɔɔ àmɔ̀, Eyɔɔ ndɛʼ ndim ebe angɔ eji Joodan. 6Â ne ndèerè ǹdiri Eyɔɔ ene nyɔrɔ m̀pwɔ̀ eguńked yɛ a ma zɔʼrɔ kpe kamɛl ngɛ. Engɔ à ne koro ekwo gôb nyɛm etiri mɔ, ende ngɔ me ǹglibi mane abliʼi. 7Ekɔn wɛ engɔ à ma sɛ̀ɛrɛ̀ ngɛ à ne ga kpe, “Gho deʼ wa zeʼe achim ndza wɛ è me kama fɔɔ angu ngɛ. Mmɛ de ke koʼro é gunu angu é zɛ̀ɛrɛ̀ anduʼbla ngɔ bo. 8Mmɛ na ndɛʼ endɔn me ndim kɛɛ, bɛʼngɛ engɔ wa ngo ndɛʼ mɔ̀ me ndim Azhwɛɛrɛ pɛ.”
Yeso nu ndim, Asatan kwa̧ʼra engɔ
(Mat 3:13–4:11; Luk 3:21, 22; 4:1-13)
9Èndzobo chɛ Yeso à nyɛrɛ efwɔ antiri abɛ Nazarɛd efwɔ abɛɛ abɛ Galilii ngɛ, engɔ ngɔɔ ebe Eyɔɔ, è ndɛʼ ndim ebe engɔ eji Joodan. 10Aŋu Yeso à sa gli efwɔ ndim ngɛ, engɔ zɔ ezob fuʼ, Azhwɛɛrɛ pɛ kla zeʼe ne ḿblɔ̂m nɔ ekwa engɔ. 11Etsoʼ deʼ ga nyɛ̀rɛ̀ à zeʼe ezob kpe, “Ngwo na ŋwɔanɔm etaa ngu, etaa mfu me gɛnɛ amɔ ene ngwo ghɛʼ.” 12Ekyɛ ŋwaʼ, Azhwɛɛrɛ pɛ nu engɔ sàa eguńked. 13Engɔ tsɔmɔ eguńked efwɔ enji èsama fyee, asatan ma kwà̧ʼrà engɔ. Nyɛmɛrɛ ǹgɛ̀ twatwa à gɛrɛ na aŋu, bɛʼngɛ engere Ngwe ma kpèdè Yeso ma kɔ̀ʼ engɔ.
Yeso zɔ̀ʼ bɔ bɛɛrɛ abwa mbèmbè mɔ
(Mat 4:12-22; Luk 4:14, 15; 5:1-11)
14Â bere Eyɔɔ gè efwɔ ndɔdzɔm efwɔ antiri endzobo yɛ Yeso à ngɔɔ efwɔ abɛ Galilii sa sɛ̀ɛrɛ̀ ekɔn ǹchwɔ̀ mbɔʼ ebwa m̀fɔ̀ Ngwe ngɛ. 15Yeso ma sɛ̀ɛrɛ̀ kpe, “Endzobo yɛ Ngwe à me tɔ̧ɔrɔ ngɛ shi koʼo, ebwa m̀fɔ̀ Ngwe shi mbin. Mbɔn kobo ńtara ntsɔn gɛ̀rɛ̀ bɛ̀rɛ ene ekɔn ǹchwɔ̀ mbɔʼ ebwa m̀fɔ̀ Ngwe!” 16Aŋu Yeso à ma zhìrì eba angli Galilii ngɛ, è zɔ Shimun mane ghongwaanɔm mɔ Andere e ma ndwa jɛ̂ efwɔ angli mɔmbwo ma sòʼ shuuru. 17Yeso gâ ebe angɔ kpe, “Mbɔn zeʼ kìrì angu, mmɛ wa ngo tee angɔn é sa sòʼ ma bɔ.” 18Angɔ saara jɛ̂rɛ àmɔ̀ gɛ̀rɛ̀ kìrì engɔ ekyɛ ŋwaʼ. 19Aŋu Yeso à zhiri ngɔ̀ɔ embè mpiʼ ngɛ, è zɔ Jems mane ghongwaanɔm mɔ Eyɔɔ bwɔ Zɛbɛdii, e mwɔ efwɔ ekpe ma ndèerè jɛ̂rɛ àmɔ̀. 20Yeso zɔʼ angɔ ekyɛ ŋwaʼ, angɔ saara àtɛ àmɔ̀ Zɛbɛdii efwɔ ekpe mane bɔ afwɛʼ gɛ̀rɛ̀ kìrì Yeso.
Yeso chi azhwɛɛrɛ bɔɔbɔɔ ekwa gho deʼ
21Yeso mane bɔ bɛɛrɛ abwa mɔ kwɛ̀ â ngɔɔ a Kapɛnaum. À shi anji ku̧ru bɔ Juu, Yeso ngɔɔ efwɔ ndɔ bɛ̀ɛrɛ atsɛrɛ klada sa tee abwa. 22Abɔ byɛ kɔ̂n ene aghɛʼ yɛ engɔ à ma tee abwa ngɛ mbɔʼnga engɔ à na tee nè ekama. Engɔ à ke ma tee na bàtee atsɛrɛ à ma lè ngɛ bo. 23Aŋu engɔ à ma bli àtee abwa ngɛ, gho deʼ efwɔ ndɔ bɛ̀ɛrɛ atsɛrɛ bɔ Juu wɛ à me le azhwɛɛrɛ bɔɔbɔɔ ngɛ gɛ̀rɛ̀ tsɛɛ kpe, 24“Yeso gho Nazarɛd, Ngwo ne le ebwa yɛ nè mbyɛɛ? Ngwo ne zeʼe anɔ é nyiimi angbɛɛ? Mmɛ we nɛɛ awɛ, na ngwo wɛ ngwo me pɛ me zeʼe ebe Ngwe ngɛ.” 25Yeso bwe ebe engɔ kpe, “Ba! Gli efwɔ ekwa gho wɛngɛ.” 26Azhwɛɛrɛ bɔɔbɔɔ yɛ njiʼi egho wɛ ene ekama, tsɛɛ, è glì efwɔ ekwa ngɔ. 27Abɔ byɛ kɔ̂n, sa biiri àmɔ̀ àmɔ̀ kpe, “Ewunɔ ne ewe? Abwa fe tsɛrɛ? Engɔ na tee abwa nè ekama! Engɔ ga, ká de mwɔ ezhwɛɛrɛ bɔɔbɔɔ, e ba zhuru gɛ̀rɛ̀ fwɛ̀ʼ.” 28Éngɛ ekɔn mbɔʼ Yeso zamma sɛ̀ʼ efwɔ abɛɛ abɛ Galilii gimkpaʼ.
Yeso glì bɔ akɛkɛ
29Aŋu angɔ à nyɛrɛ efwɔ ndɔ bɛ̀ɛrɛ atsɛrɛ bɔ Juu ngɛ, Yeso mane bɔ bɛɛrɛ abwa mɔ Jems mane Eyɔɔ ngɔɔ a ndɔ Shimun mane Andere. 30Aghoo Shimun à ne bwɛrɛ edɔ̀m etan mà gwɔ̀rɔ̀ efɔɔ. Aŋu Yeso à bwɛrɛ ngɛ, è toʼro ebe engɔ kpe aye wɛ wa gwɔ̀rɔ̀. 31Éngɛ Yeso ngɔɔ ebe engɔ, klini abwo ngɔ, taama engɔ ekere, ekwa ngɔ bwada, engɔ tam ekere sa fwɛʼ ebe angɔ. 32À shi etiʼdi, aŋu etaranchwe à sa turu ngɛ, bɔ zeʼ ebe Yeso nè bɔ aŋwan akɛkɛ mane bɔ ezhwɛɛrɛ bɔɔbɔɔ. 33Bɔ à ne ba akwâ enduʼndɔ. 34Yeso à gli bɔ akɛkɛ ene m̀pèrè eŋwan gimkpaʼ. À gɛrɛ chì ezhwɛɛrɛ bɔɔbɔɔ ne bɛrɛ kpe ezhwɛɛrɛ bɔɔbɔɔ byɛ gɛʼɛ eklo àmɔ̀ bo, mbɔʼnga â me nɛɛ engɔ.
Yeso sɛɛrɛ ekɔn ǹchwɔ̀ a Galilii
(Luk 4:42-44)
35Aŋu ese à sa tòʼrò ngɛ, Yeso tam glì a ndɔ ngɔ̀ɔ afwɔ deʼ zhiʼ é tsàʼrà Ngwe. 36Shimun mane asɔrɔ mɔ ngɔɔ é zɛ̀ʼ Yeso. 37Aŋu â zɔ́ engɔ ngɛ, angɔ ga ebe engɔ kpe, “Bɔ gimkpaʼ ba kɔ̀ʼrɔ̀ awɛ.” 38Yeso gíì kpe, “Ntsɔ ngɔɔ efwɔ ashimabɛ tsɛrɛ ebara anɔ mbɔʼtye mmɛ gɛrɛ sɛ̀ɛrɛ̀ ega Ngwe aŋu mbɔʼnga ne ǹji yɛ mmɛ à zeʼ ngɛ.” 39Éngɛ angɔ zhiri kɛɛrɛ abɛ Galilii sɔ̀, mà sɛ̀ɛrɛ̀ ega Ngwe efwɔ ndɔrɔ bɛɛrɛ atsɛrɛ bɔ Juu gɛ̀rɛ̀ mà chì ezhwɛɛrɛ bɔɔbɔɔ akwa bɔ.
Yeso gli gho akɔ̂m
(Mat 8:1-4; Luk 5:12-16)
40Gho akɔ̂m deʼ à ngɔɔ kla Yeso gunu etongu mɔ a chwâ sa bii gà kpe, “Ma ngwo me bɛrɛ ngwo we né le mmɛ pɛ.” 41Yeso klasɔn, ndɛ̀rɛ̀ abwo mɔ mɔ̀mɔ̀ engɔ gà kpe, “Mmɛ we bɛrɛ éngɛ, pɛ!” 42Akɔ̂m myɛ ekwa ngɔ ekyɛ ŋwaʼ ekwa ngɔ pɛ. 43Yeso gâ ebe engɔ, gbeʼre ato ngɔ kpe, 44“Ke kpe ngwo sɛɛrɛ ebwa wunɔ ebe gho deʼ bo, ngɔ̀ɔ tee awɛ ebe àtɛ zhiri shi è kede awɛ, ngwo gɛrɛ ndɛ̀ʼ etɔ̧ɔrɔ yɛ Mose à tsɛrɛ kpe e ndɛʼɛ na ala zhid é sò awɛ nɔ. Ewùnɔ wa ngo mwɔ na antsɛ ebe angɔ é tee kpe ngwo a shi pɛ.” Aŋu Yeso à mɛɛrɛ ngɛ, è sàa engɔ ngɔɔ. 45Bɛʼngɛ egho wɛ ghɛɛbɛ sa zhiri à sɛ̀ɛrɛ̀, è sɛ̀ʼ ebwa mɔmbwo akwâ gimkpaʼ. Éngɛ Yeso nè we nɛɛ tyè è zhiri efwɔ afwɔ deʼ apɛpɛ bo. Yeso à na tsɔmɔ ese efwɔ akwâ zhiʼ, bɔ à dama zeʼe ebe engɔ akwâ gimkpaʼ.
Voafantina amin'izao fotoana izao:
Mak 1: nbt
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
