Matiyò 5
5
Yerzù à mà òkòlɛ hwatò ò mòòlì
(5.1-7,29)
1Nà òma Yerzù à mà ɛnɛ è ŋgìndì rzìi à agba ò ŋmanyu yà mòòlì à lìya ò rze. Hwà-òkòwèlì hwa eni wɔ̀ hvɛ hwa mà agba lì mò ùŋmanɛlɛ aŋga. 2Rzìi à wòteya lì hwa òkòlɛ̀ nà lì òhwa nanù ema,
3“Mònàmɛ̀ nà hwatò ema hwa hwèlì mòlìrzà ò èlìŋgɛ̀, èhwanja hwa hwèlì ò rze yà Likànèyà la ama Lohwɛ̀.
4Mònàmɛ̀ nà hwatò ema hwa ɛhwɛ, èhwanja Lohwà à ò gbèya hwa òhva mɔ̀nyɛ̀ŋgì hvɛ.
5Mònàmɛ̀ nà hwatò ema hwa arzìhwìrzɛ̀yi, èhwanja è rze ya arzɛ è ò hwɛ ndi è yà awu.
6Mònàmɛ̀ nà hwatò ema hwa òhvi è njàwò nà è nyìrzɛ̀ ò lì gbèya hwèyà ema Lohwà arza nanù ema hwa gbèèye èhwanja Lohwɛ̀ à ò hwa ujirzɛ̀.
7Mònàmɛ̀ nà hwatò ema hwa uŋmɛ̀lɛ̀ hwahvɛhvɛ hwatò ììlì, èhwanja Lohwɛ̀ mɔ̀ hvɛ à ò hwa ùŋmɛlɛ ììlì.
8Mònàmɛ̀ nà hwatò ema hwa rzàŋgi mèèmà, èhwanja wɔ̀ hwa ò ɛnɛ Lohwɛ̀.
9Mònàmɛ̀ na hwatò ema hwa jàneyà hwahvɛhvɛ hwatò ɛ̀yɔ̀lɛ̀, èhwanja Lohwɛ̀ à ò hwa hwɛlɛ hwàànà hwa eni.
10Mònàmɛ̀ nà hwaŋga hwatò ema hwa ò hwɛnɛ mètàkà, èhwanja hwa gbèya mamɛ ema Lohwɛ̀ arza nanù ema hwa gbèèye. Hwa hwèlì ndi ò rze yà Likànèyà la ŋmanyu yà lohwà.”
11Mònàmɛ̀ mò hwɛ nà inyɔ hwatò ema hwatò hwa hwɛnyɛ, inyɔ ema hwa tàkirzɛ̀, rzìi hwa è òhwàna inyayi ja hwèyà hwe wòhwe na lì è tɛmeya imbòŋgì ja mòlàŋgà ò lìnà la ami. 12È hwɛ gbamù, è òhve mɔ̀nyɛ̀ŋgì èhwanja etaŋgi ema è ò luwɛ ò ŋmanyu yà lohwà jò ò kòka. Nanù ndi hwatò hwa ma hwɛ lì tàkìrzɛ̀ hwà-òhwèlì hwa hwèlìŋgɛ̀ hwa kòòhwa.
Ikpa ema i wɔ̀lɛ̀nɛ wɔ̀tɛ̀wu wò eni nà ètùlù ema è utàhwi
(Mak 9.50; Luk 14.34-35)
13“È hwèlì wòlitò ò mòŋgɛ mà hwatò hwa ene rze ŋgànà hvɔ̀kɔ nà òmà ikpa hvɛ i hwɛni wòlitò ò mòlèlì. Ndi ikpa i wɔ̀lɛ̀nɛyi tɛ̀ wòtɛ̀wu wò eni, nɛ i tànɛyi lì tɛ̀yirzɛ hvɛ e? Jɔ̀ i rzà hwɛnɛ hvɛ tɔ̀ eyà yà gbamù ò lì gbèya. O èŋgànɛ̀lɛ̀ i hvimbahwa ɔ̀nɛyi rzi hwatò hwa ji laala. 14È gbeyi ndi nàa ètùlù ema e uŋmɛ̀lɛ̀ hwatò hwa arzɛ hwa ene rze e njiya ya ama Lohwɛ̀. Mbòwà e ma e òŋgàhwi ò ŋmanyu ya mòòlì e rza tanɛ lì utàmà. 15Mòtò a rza tànɛyi lì hvààlɛ̀ ètùlù rzi à è ika ò rze yà èwòki. À hwɛnì ndi lì è tɛ̀yìrzɛ̀ ò ŋmanyu yà è mbòkò ema hwètùlù hwe tɛ̀mɛ̀. Aŋga nanù e uŋmɛ̀lɛ̀ ŋmàye ò hwatò hwa arzɛ ema hwa hwèlì ò ndawò. 16Inyɛ̀ inyɔ hvɛ è pànye ndi ŋgàna hvɔ̀kɔ nàa ètùlù. Hwatò hwa ɛni tɛ hwèwòlò hwe anyu hwe gbamù ema è gbèya, hwa eka Lohwɛ̀ Tatɛ̀ hwa anyu ema à hwèlì ò ŋmanyu yà lohwà.”
Lì òkòlɛ̀ lì hvòmɛ̀nɛ̀ è mbendà
17“È rza ɔ̀ŋgɛ̀lɛ̀ nanù ema nà jelì ndi ò rze ò lì limirzɛ imbenda ja ama Mòrzè nà hwèyà ema hwà-òhwèlì hwa hwèlìŋgɛ̀ hwa mà è òkòlɛ. Nà rza jelì ndi ò lì hwe limirzɛ̀ ndi nà jelì ndi ò lì hwe òndìrzɛ̀. 18Nà è òhwèyà ndi è jɔ̀kɛ̀, natɛ̀ɛ è ŋmanyu yà lohwà nà e rze hwe è ò uka ò lìrzùkù, tɔ̀ ŋmanà mbumbu wà lìtɔ̀ti là mòtìla ema lì tìlahwì ò mbenda yà Lohwà è rza tànɛyi lì wuŋguhwèyà ò èki ya eni natɛ̀ɛ hwèyà hwe arzɛ hwe òndìrzɛ̀hwɛ. 19O èŋgànɛ̀lɛ̀ rzɔ tɔ̀ ima mòtò ema à undi tɔ̀ mbenda tɔ̀ hvɔ̀kɔ ò ini mbenda ja ama Lohwɛ̀, tɔ̀ eŋge mbenda ema hwa ɔ̀ŋgɛ̀lɛ̀ nanù ema è rza òhvi wòlìtò, rzìi à è òkòlɛ̀ hwahvɛhvɛ hwatò ema wɔ̀hvɛ hwa gbèye nanù mɛnɛ, eŋge tumba mòtò è hwɛ ndi è wà lìrzùkù ò likànèyà là ama Lohwɛ̀. Ndi tɔ̀ njɛnɛ ema à gbèyi mamɛ ema è mbenda è òhwa rzìi à a òkòlɛ̀ hwahvɛhvɛ hwatò nanù mɛnɛ, à ò hwɛ̀nɛ̀ wòlìtò rzayi-rzayi ò ìtììtènì ja hwatò ema hwa hwèlì ò rze yà likànèyà là ama Lohwɛ̀. 20O èŋgànɛ̀lɛ̀ rzɔ, na e òhwèyà nanù ema natɛ̀ɛ inyɔ è gbèèyà Lohwɛ̀ lì aka Ihvàlìrzàyì, nà Hwà-òkòlèlì hwa mbenda, inyɔhvɛ è rza ò kpèèyà a kpèèyà ò Likànèyà là è ŋmanyu yà lohwà.”
Hwèyòkòlelì hwe ama Yerzù lì hvòmɛ̀nɛ̀ hwètàtò
(Luk 12.57-59)
21Yerzù à hwatɛ hvɛ nanù ema, “Inyɔ è mà hweya nanù ema imbamba ja arzu ì mà òhwawɛlɛhwɛ nanù ema, ‘Mòtò à rzi òŋwa mòtò. Tɔ̀ ima mɔ̀ ema à òŋwi mòtò à ò ikahwa ò hwèkàyìrzelèlì.’ 22Ndi nà è òhwèyà ema tɔ̀ ima mòtò ema à tatani òhvɛhvɛ mòtò, mɔ̀hvɛ à ò ikahwa ò hwèkàyìrzelèlì. Tɔ̀ ima mòtò hvɛ ema à hwɛnyi ŋmànyàŋgò wà eni nanù ema, ‘Èleŋgè’ à hwɛnì lì alàhwɛ̀ è ndawò yà hwèkàyìrzelèlì yà hwa ndɛnɛ. Ndi tɔ̀ njɛnɛ hvɛ ema à hwɛlɛ ŋmànyàŋgò wà eni nanù ema, ‘Ò wà èèti yà mòtò,’ à ò aŋgbahwa ò mùnya ema mò rza lìma. 23Ò arzi tɛ lì ŋgbà Lohwɛ̀ làhwèya là aŋgɔ̀ ò lììyɔ̀ là màkanɛ̀, rzìi ò ɔ̀ŋgɛ̀lɛ̀ ema è à òhvanɛ lùùrzè nà mòtò, 24ò àŋgàmɛ̀nɛyi lì lìya làhwèya là aŋgɔ̀ aŋga wòrzò wò lììyɔ̀ là màkanɛ̀. Ò lòma lì ɛ̀ndɛ lì gbèya ɛ̀yɔ̀lɛ̀ nà oŋgo mòtò. Rzìi ò ja ò ahwèya làhwèya là aŋgɔ̀ òma Lohwɛ̀. 25‘O rzeeya hwèyà nà è mɔ̀kɔ̀ɔ̀yèlì wà aŋgɔ̀ ema àrza lì ò ɛ̀ndɛnɛ ò ndawò yà hwèkàyìrzèlì. O gbèèyè nanù ndèŋgànà è uka ò hwèkàyìrzèlèlì. È rza enje tɛ nanù, mɔ̀ à ò rzɔ̀mɔ̀nɔ̀ ò kòti. Oma è kòti è mà ò akɛlɛ̀lɛ i pòlìrzi, òma ò mà aŋgɛhwɛ ò hwèwòwà. 26Nà ò òhwèyà ndi è jɔ̀kɛ̀ nanù ema ò rza tanɛ lì anjiya ò tenì yà hwèwòwà natɛ̀ɛ ò rzààwà lìyɛmɛ là aŋgɔ̀ là arzɛ.’”
Hwèyòkòwèlì lì hvòmɛ̀nɛ̀ mòrzònje ò lìhwa
27“È mà hweya nanù ema è òhwàhwi nanù ema, ‘O rzi gbèya mòrzònje ò lìhwa.’ 28Ndi nà è òhwèyà ema, tɔ̀ ima mòtò ema à ɔ̀ŋgɔ mòlanà nà màlùtèyà ema mɔ̀ à mò naŋgane, mɔ̀ à mà màa lì mò gbèyana mòrzònje ò ŋmèma mò eni. 29È hwèlì tɛ ema lìirzɔ̀ là aŋgɔ̀ lì ò gbèya ema ò gbèyè wòhwe, ò lì tɔ̀ŋge, ò lì hvimbe ɔ̀nɛyi. O lɔ̀wu ema ò lì wɔ̀lɛ̀nɛ̀, lì aka ema è nyò yà aŋgɔ̀ yà arzɛ è hvimbahwe ò mùnya. 30È hwèlì hvɛ tɛ nanù ema lìya là aŋgɔ̀ là mòmɛ̀ lì gbèya ema ò gbèye wòhwe, ò lì kɛ ò lì hvimbe ɔ̀nɛyi. È hwèlì gbamù ema ò wɔ̀lɛ̀nɛ̀ èhvarzù yɔ̀kɔ yà aŋgɔ̀ yà nyò, lì aka ema è nyò yà aŋgɔ̀ yà arzɛ è aŋgbawe ò mùnya.”
Lì òkòlɛ là ama Yerzù lì hvòmɛ̀nɛ̀ lì hvaŋga là lìhwa
(Mat 19.9; Mak 10.11,12; Luk 16.18)
31“È kààtì yà lohwà è òhwa hvɛ nanù ema, ‘Tɔ̀ ima mòtò ema a hvayi jòjìyɛ̀ wà eni ò lìhwa, à hwɛnì lì mò ŋgbà lìhvahve ò lì uŋmɛ̀lɛ̀ nanù ema à mò hvayì ò lìhwa.’ 32Ndi imba nà è òhwèyà nanù ema, tɔ̀ ima mòtò ema à hvayì jòjìyɛ̀ wà eni ò lìhwa, è rzi hwɛ ema à mò lùwànì njɔ̀mi yà mòrzònje, rzi òŋgò mòlanà à hwààhwà òhvɛhvɛ munyanà, nanù òma è mòjòmɛ̀ wà eni ema à mò hvayi ò lìhwa mɔ̀ ndi à mò gbèyi ema à gbèyè mòrzònje. Tɔ̀ ima mòtò hvɛ ema à hwàà è mòlanà ema à hvayahwi ò lìhwa nanù òma mɔ̀ hvɛ à undi ò mòrzònje mò lìhwa.”
Hwèyòkòlelì hwe ama Yerzù lì hvòmɛ̀nɛ̀ è Hweyi
33“Inyɔ ema hwèya hvɛ nanù ema hwa mà òhwèyà hwatò hwa kòhwa nanù ema, ‘È rzi àtɛ̀ɛ̀ ò ŋgundu, ndi è gbèèye mamɛ ema inyɔ è àtɛ̀ɛ è hweyi ò lì gbèèyà Lohwɛ̀.’ 34Ndi imba nà è òhwèyà nanù ema, è rzi keka lì ààtɛ̀, è rzì keka hvɛ là ààtɛ̀ ò lìnà là likànèyà là ŋmanyu, èhwanja aŋga ndi Lohwɛ̀ à òhvi likànèyà là eni. 35Tɔ̀ lì ààtɛ̀ hvɛ ò rze, èhwanja aŋga ndì matàŋgà mà ama Lohwɛ̀ ma mà ìkahwɛ̀. Tɔ̀ lì àtɛ̀lɛ̀lɛ̀ hvɛ ò lìnà là è mbòwà ya Jèrurzalɛ̀mù, èhwanja yɔ ndi e hwèlì e mbòwà ya ama e Kìŋgɛ ndɛnɛ. 36È rzi keka hvɛ tɔ̀ lì àtɛ̀lɛ̀lɛ̀ inyɔ hwiti èhwanja inyɔ e rza tànɛyi lì tanìrzɛ̀ tɔ̀ lì indìrzɛ̀ rzòwe hvɔ̀kɔ ya lìhvumbu la anyu. 37È òhwi tɛ nanù ema e gbèya eyà, e òhwe ndi ema, ‘Ɛ̀ɛ, na e gbèya.’ Tɔ e ò hwɛ ndi nanù ema, ‘Jàyɛ̀, na rza e gbèya.’ Tɔ̀ mamɛ ema e òhwi lì aka nanù, e uhwɛ̀lɛ̀lɛyi ndi na Mòkarzɛ̀.”
Hwèyòkòlelì lì hvòmɛ̀nɛ̀ lì timbirzɛlɛlɛ la wòhwe
(Luk 6.20,30)
38“È ma hwèya ema e ma òhwahwa nanù ema, ‘Mòtò a tuhwi tɛ lìrzɔ la ama ò hvɛhvɛ mòtò, hwa mò tuhwe mɔhvɛ e la eni lìrzɔ. Mòtò a hvɔ̀ki tɛ lìrzòŋga la mòtò mɔhvɛ hwa mò hvɔ̀kɔ e la eni lìrzòŋga.’ 39Ndi imba na e òhwèyà nanù ema, mòtò à è gbèyi tɛ wòhwe, è rzi timbirzɛlɛ. È hwèlì tɛ ema mòtò à ò rzamì tɛ lùùmbɛ̀ ò lìyamà lì aŋgɔ̀ lɔ̀kɔ, ò mò uŋmɛ̀lɛ̀ hvɛ lìnɛyi lìyamà. 40Ndèŋgànɛ̀lɛ̀ hvɛ mòtò à àrzi tɛ lì ò rzɔ̀mɔ̀nɔ̀ kòti, ò lì ò wòwàna è rziŋgɛ̀lɛ̀tì yà aŋgɔ̀, ò mò ŋgbe hvɛ è rzɔ̀tì yà aŋgɔ̀. 41Mòtò à inyàmɛnɛ tɛ ema ò ɛ̀ndɛ nà mɔ̀ hvòka yà mayelì mɔ̀kɔ, ò ɛ̀ndɛ nà mɔ̀ mayelì mahwakɛ. 42O ŋgbe òŋgò mòtò ema à ò ɔ̀mbɔ̀, ndèŋgànɛ̀lɛ̀ hvɛ ò bàlɛ̀ òŋgò ema à arza lì ò bàlɛ̀nɛ̀.”
Yerzù à òkòlɛ lì hvòmɛ̀nɛ̀ hwàkɔ̀yèlì
(Luk 6.27-28,32-36)
43“È ma hwèya ema è mà òhwahwa nanù ema, ‘Lìŋgàna ŋmànyàŋgò wà aŋgɔ̀, kɔ̀ɔ̀ hvɛ è mòtò ema à ò kɔ̀ɔ̀.’ 44Ndi imba nà è òhwèyà nanù ema, è lìŋgàne hwatò ema hwa è kɔ̀wu. È kanɛ̀lɛ̀lɛ̀ hvɛ hwaŋga hwatò ema hwa è tàkìrzɛ̀. 45È gbèyi tɛ nanù, è ò hwɛ ndi hwàànà hwa ama Tatɛ̀ wà anyu ema à hwèlì ò ŋmanyu yà lohwà. Mɔ̀ à gbèya igbèyi ì hvanyeya nà è mbuwà ò lì yɔ̀yèyà hwatò hwa wòhwe nà hwatò hwa gbamù, nyàyi hvɔ̀kɔ. 46O lìŋgàni tɛ ndi hwaŋga hwatò mɛnɛ ema hwa ò lìŋgàni, eŋge eyà è rza ò jànèyà tɔ̀ mɔ̀rzɛ̀ŋgì. Tɔ hwàrzàŋgèlì hwa è njàŋge yà lìkànèyà wɔ̀ hvɛ hwa gbèya ndi nanù mɛnɛ 47O kɔmɔ̀ tɛ hwatò hwà aŋgɔ̀ mɛnɛ, òma ò wà hvɛ ò mà gbèya ndi nà òma hwahvɛhvɛ hwatò hwa gbèya. Tɔ̀ hwaŋga hwatò ema hwa rza enje wònyà Yudà hwa gbeyà nanù mɛnɛ. 48È gbèèyè ndi hweyà hwe gbamù, nà òmà Tatɛ̀ wa anyu wa ŋmanyu yà lohwà mɔ̀hvɛ à hwe gbeyà.”
Voafantina amin'izao fotoana izao:
Matiyò 5: bri
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
