Ruka 22
22
Migin Phqilan Yesu
(Mat 26:1-5. Mrk 14:1-2. Yoh 11:45-53)
1Smdaling ka smseman pang ini psai tgeda, tduwa kesun smseman hrnasan uri. 2Dpusu msapuh ma dmptpatis we lmngelung huwa mesa pphuqil Yesu. Ado miicu seediq ka dheya. 3Ciida, mremux lhebun Yehudah seediq Iskariot kesun ka Satang. Heya we ida 1 spegan 12 heyi tnugsaan. 4Mosa mpprengo dpusu msapuh ma dmpqlahang Sapah Thmkuwan, huwa na kesun mege dheya ka Yesu. 5Mqaras ka dheya ma smdehu mege pila heya. 6Smruwa ka Yehudah ma pkelu ini eeniq hiya ka hbaro seediq ciida we migin ali bbege na dheya ka Yesu.
Psramal Uqan Smseman Hrnasan
(Mat 26:17-25. Mrk 14:12-21. Yoh 13:21-30)
7Dehuk ka ali smseman pang ini psai tgeda. Ali nii asi ka phuqil wawa miric rudu ka smseman hrnasan. 8Smkagul Petros ma Yohane ka Yesu ma rmengo: “Osa psrmali uuqan ta smseman hrnasan, so maha niqan ka uqun ta.” 9Rmengo heya ka dheya: “Maha nami psramal inu ho?” 10Rmengo ka Yesu: “Mremux namu alang de mpsterung yamu ka seediq madis rusuq ga niqan qsiya. Kiya de snegul heya ma mremux sapah tmayan na. 11Rngagi ka tnpusu sapah: ‘Rmengo ka mptgesa, inu ka tqiyan dadal? So maha mpsuupu tnugsaan mu mekan smseman hrnasan hiya.’ 12Mptiyu yamu 1 mttuku ani maanu paru nniqan baro, kiya de psramal hiya ka yamu.” 13Mosa ka dheya ma ida so rnengo Yesu ka sntreengan daha. Kiya de mhedu psramal smseman hrnasan hiya ka dheya.
Pheyu Hnpure Gbiyan Nbukung
(Mat 26:26-30. Mrk 14:22-26. 1 Kor 11:23-25)
14Dehuk ka ali, tleung uqan ka Yesu ma msuupu heya tleung ka snkgulan na uri. 15Rmengo dheya ka Yesu: “Berah ooda mu mqraqil we kmsuupu ku bale yamu mekan smseman hrnasan nii. 16Rngage maku. Uxe ku meekan ka smseman nii, betaq mpbale meniq qnlhangan Utux Baro.” 17Mangal pngerah mahan, mhedu mqaras de rmengo: “Aangal yamu ka nii ma psaasu mimah. 18Rngage maku. Kndalax sayan uxe ku miimah ka beyuq lipas nii, betaq tmara eeyah qnlhangan Utux Baro.” 19Maangal pang dungal ma mhedu mqaras de gbingun na ma sbege na dheya, rmengo: “Nii ge heyi mu. Ririh yamu bege mu ka heyi mu. Uxe namu cchungi kenan we dai ka nii.” 20Mnekan de, mntena so nii uri maangal pngerah mahan ma rmengo: “Pngerah mahan nii we bgurah pnsdhegan mooda dara mu. Ririh yamu ka ssdara na. 21Tai, baga seediq mbaruy kenan we nii msuupu kenan bobo uqan nii! 22Ani ida mpuyu so sneengan mphuqil ka Laqi seediq. Kiya de smtali bale ka seediq mbaruy heya!” 23Kiya de, ima ka mooda so nii, mesa mssiling ka dheya.
Mqqheruy Ima Ta ka Ma Paru
24Mqqheruy ima ta ka ngalan so tgparu ckceka daha ka tnugsaan. 25Rmengo ka Yesu: “Dseediq qnlhangan icil we niqan qbsuran paru qmlahang dheya. Qbsuran mpghuwe kesun daha tmngayan ka dmoi beyax qmlahang. 26Kiya de yamu we iya so kiya. Ga ma paru ckceka yamu we asi ka so mntena laqi. Ma mdudul na we asi ka so tnqliyan. 27Ima ka paru na ho? Ye mptleung na, ye mpmiyak na ho? Yaa uxe ga tleung uqan ka paru peni? Kiya de yaku we mtena ku so seediq mpmiyak meniq ku ckceka namu.
28Mooda ku pnseengan ciida we ida yamu ka theyaq kenan. 29Bbege mu yamu ka qlhangan. Mntena so tama mu wada mege kenan. 30So namu maha tleung mekan ma miimah uqan mu meeniq qnlhangan mu. Kiya de mptleung namu tluungan qbsuran paru psgeegan lqlaqi 12 lutuc Israel.”
Kari Pgeela Mpdeqo ka Petros
(Mat 26:31-35. Mrk 14:27-31. Yoh 13:36-38)
31“Simon! Simon! Mkmangal yamu ka Satang, ttebus na ka yamu mntena so ttebus na mugi. 32Kiya de tena ku wada dmurun isu so su uxe mptuting snhiyan su. Bobo su wada mspgeriq de pgdhegi ka mtswai su.” 33Rmengo ka Petros: “Bukung! Ani ku msuupu sunan mosa sapah kuung ma msuupu isu mhuqil we tena ku psramal da!” 34Rmengo ka Yesu: “Petros, rngage su mu. Berah qngqugu rodux ali saya, maha su mn3 dmeqo kenan.”
Psaan Pila ma Lubuy ma Puting
35Rmengo dheya ka Yesu: “Smkagul ku yamu ciida we ini ku pdoi psaan pila, uka ka lubuy, uka ka ramil. Maanu ka ini namu pttuku na?” Rmengo ka dheya: “Uka.” 36Rmengo ka Yesu: “Kiya de saya we so ka dmoi psaan pila we adis. Ga dmoi lubuy adis uri. So ka uka hlmadac we sai maruy ka lukus ma baruy hlmadac. 37Rngage maku, Patis we ga matis kari nii: ‘Heya ge gaga pspuun ckceka smeeliq gaya.’ Kari nii we ida mooda heyi mu. Ado quri kenan we ida mmaha bale.” 38Rmengo ka dheya: “Bukung! Qtai! Nii hini ka 2 hlmadac.” Cmiyuk ka Yesu: “Baka da.”
Dmurun Dgiyaq Curung ka Yesu
(Mat 26:36-46. Mrk 14:32-42)
39Peeyah alang ka Yesu we ida so ooda na klaali mosa Dgiyaq Curung. Smnegul heya ka tnugsaan na uri. 40Meyah dxeral hiya de rngagan na ka tnugsaan na: “Druni so namu uxe ddudul quri naqah.” 41Kiya we tgkiwax peeyah dheya betaq so dhekun qmada btunux ka Yesu ma tmbqelic dmurun hiya. 42Rmengo: “Tama, nasi su smruwa we ngali ku hiya ka pngerah mahan nii. Kiya de iya pooda lnglungan mu, pooda nanak lnglungan su nanak.” 43Kiya de meyah mtqita heya ka snkgulan peeyah baro ma pkbeyax beyax na. 44Mqraqil bale ka Yesu duma krinah dmurun. Mntena paru hebuy dara mtuting dxeral ka mering na. 45Mnhedu dmurun ma mtutuy de mosa tnugsaan na hiya ka Yesu. Taan na nii mtaqi qnnaqah kuxul daha ka dheya. 46Kiya de rmengo dheya: “Hmuwa, ma namu mtaqi na ho? Tutuy ma druni so namu uxe psrdilun quri naqah.”
Wada Sbaruy Qrapun ka Yesu
(Mat 26:47-56. Mrk 14:43-50. Yoh 18:3-11)
47Ida kiya rmengo nana ka Yesu, meyah ka hbaro ba seediq. Tgeela dheya ka Yehudah kesun 1 seediq ckceka daha 12 tnugsaan. Meyah smdaling Yesu ttunguh na heya. 48Rmengo heya ka Yesu: “Yehudah, tmunguh su quwaq bbrigun su ka Laqi seediq ho?” 49Qmita so nii ka tnugsaan msuupu heya de rmengo: “Bukung! Paqo miyan hlmadac ho?” 50Smipaq tnqliyan pusu msapuh ka 1 ckceka daha ma slapi na hiya ka narac birac na. 51Rmengo ka Yesu: “Uqu naq, gmelux ka baga!” Kiya de tlengun na ka birac na ma pklmeun na ka hiya. 52Kiya de Yesu we rngagan na ka dpusu msapuh ma dmpqlahang Sapah Thmkuwan ma rdrudan meyah heya: “Mntena namu so mqerac seediq mpgeeluk gmeeguy maadis namu hlmadac ma qhuni meyah namu qmerac kenan ho? 53Mnsuupu ku yamu meniq Sapah Thmkuwan klaali we ini namu qerac kenan han. Kiya de saya we ali namu ma ga dmoi beyax mpqlahang ka kuung di.”
Mn3 Dmeqo Yesu ka Petros
(Mat 26:57-58, 69-75. Mrk 14:53-54, 66-72. Yoh 18:12-18, 25-27)
54Kiya de qrapun daha ka Yesu ma desun daha sapah paru msapuh. Smtheya smnegul ka Petros. 55Mtahu ckceka nganguc ka dheya ma msuupu tleung hiya. Tleung ckceka daha hiya ka Petros uri. 56Niqan 1 mdayo ka weewa we mita Petros tleung ledax puniq hiya ma tgleus mita heya ma rmengo: “Seediq nii we mnsuupu Yesu uri.” 57Kiya de dmeqo ka Petros ma rmengo: “Weewa, ini ku kela heya.” 58Ini qbsiyaq de mita heya ka 1 dungal ma rmengo: “Isu uri we mnsuupu dheya.” Rmengo ka Petros: “Seediq isu nii, Uxe yaku.” 59Bobo yaa 1 cenga toke, mkere ba kari na rmengo ka 1 dungal seediq: “Bale ba ida mnsuupu dheya ka seediq nii. Ado seediq Galil ka heya uri!” 60Rmengo ka Petros: “Seediq isu nii! Ini mu klai maanu ka rnengo su!” Ida kiya rmengo ka heya nana we asi qqugu ka rodux. 61Mspgeriq heyi na ma mita Petros ka Bukung. Kiya de Petros we sbgrnahun na lmngelung ka rnengo Bukung: “Berah qmqugu ali saya ka rodux we maha su mpn3 dmeqo kenan.” 62Kiya de mlatac nganguc ma lingis paru ka heya.
Srhqelan ma Pghlisan ka Yesu
(Mat 26:67-68. Mrk 14:65)
63Qmlahang Yesu ka seediq we tghulis ma smebuc heya. 64Bungan daha ka doriq na ma rmengo heya: “Rengo kari mpgeela ka isu! Tgsai nami, ima ka smnebuc sunan ho?” 65Dheya we egu ba snngayan daha heya.
Psiling Berah Prngagan ka Yesu
(Mat 26:59-66. Mrk 14:55-64. Yoh 18:19-24)
66Mgrebu de meyah msseli ka pnspuwan rdrudan seediq, dpusu msapuh ma dmptpatis. Desun daha pnssliyan daha hiya ka Yesu, 67rngagan daha: “Nasi su Kiristo ka isu we rngagi nami.” Cmiyuk ka Yesu: “Nasi ku rmengo yamu we uxe namu mpsnheyi. 68Nasi ku smiling yamu we uxe namu mciyuk uri. 69Peeyah saya, mptleung narac Utux Baro mdoi kana beyax ka Laqi seediq.” 70Rmengo ka dheya: “So kiya de laqi su Utux Baro ka isu ho?” Rmengo ka Yesu: “Ida so rnengo namu.” 71Rmengo ka dheya: “Hmuwa, ma ta lux asi ka niqan dungal ka mpgkela rutiq na ho? Wada ta qbhangan peeyah quwaq na nanak da.”
Voafantina amin'izao fotoana izao:
Ruka 22: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
