Ruka 16
16
Naqah Seediq Mpqlahang
1Rmengo tnugsaan na ka Yesu: “Niqan 1 mpqlahang na ka mbleyaq seediq. Yahan daha rmengo tnpusu sapah quri smeeliq ba dnoi ka heya. 2Kiya de splawa na ma rngagan na: ‘Maanu ka nii mu qbhangan quri sunan so nii ho? Peeyah kana ka ndaan su qmlahang. Ado ini su tduwa qmeepah mpqlahang sapah mu ka isu.’ 3Rmengo heya nanak ka mpqlahang: ‘Wada ku na laxun ka tnpusu sapah, uxe ku na pqpahun qnpahan mu de mpphuwa ku mesa da ho? Kiya de ini baka beyax mu kmari dxeral ma mesa uqun we so smsiqa. 4Kiya de klaun mu mphuwa ku da. Ani ku na plaxan qpahun we maha smterung psteme kenan sapah daha ka seediq.’ 5Kiya de skngalun na mlawa ka ga pkusa tnpusu sapah na. Kiya de rngagan na ka tgplaale: ‘Piya ka kusa su tnpusu sapah mu ho?’ 6Rmengo ka heya: ‘1'00 kbegax abura.’ Kiya de rngagan na: ‘Aangal ka pnatis su pnsdhegan ma tleung nhari ma 50 kesa marah matis.’ 7Kiya de rngagan na ka 1 dungal: ‘Piya kusa su ka isu ho?’ Rmengo ka heya: ‘1'00 lubuy mugi.’ Rngagan na: ‘Aangal ka pnatis su pnsdhegan ma 80 kesa marah matis.’ 8Tnpusu sapah we stndahu na ka mpqlahang ini ksderux tnqliyan na niqan ba knkela na meepah. Ado mgkala lqlaqi ledax mkala tunux daha ka lqlaqi bobo dxeral mknexal saya. 9Kiya de rngage maku. Daani ini ksderux dnoi smdangi ka seediq. So kiya de uka brihan ciida ka qnbleqan de strengun namu daha psteme uka psteqan nniqan ka yamu. 10Mtduwa stmaan qmeepah biciq qpahun ka seediq we ida mtduwa stmaan qmeepah paru qpahun uri. Ini ksderux qmeepah biciq bale qpahun ka seediq we ida ini ksderux qmeepah paru qpahun uri. 11Nasi namu wada ini tduwa stmaan dmoi ini ksderux dnoi we ima ka pstama bale ba dnoi yamu ho? 12Nasi namu wada ini tduwa stmaan meniq dmoi ntaxa we ima ka pstama mege nnamu nanak ho? 13Qmeepah 2 tnpusu sapah ka 1 tnqliyan we ini tduwa. Pqnqihun na ka 1 ma sgaalu na ka 1. Uxe uri we spruun na ka 1 ma sbciqun na ka 1. Qmeepah namu Utux Baro we, ini namu tduwa qmeepah Mamon uri.”
Gaya Ma Qnlhangan Utux Baro
(Mat 5:31-32, 11:12-13. Mrk 10:11-12)
14Seediq Parisay we smkuxul bale pila. Mbahang so nii de phlisan daha ka Yesu. 15Kiya de rmengo dheya ka Yesu: “Yamu we ngalan namu msderux ooda berah seediq ka yamu nanak. Kiya de mkela lhebun namu ka Utux Baro. Ado spruun ckceka seediq we kika pqnqihun berah Utux Baro. 16Betaq Yohane ka gaya pndakar ma dmpgeela kari. Sgarang peeyah ciida ka malu kari quri qnlhangan Utux Baro ma meyux mremux heya ka kana seediq. 17Mtuting ka ani 1 nemu pusu patis gaya pndakar we nuuqu msleexan pkuuka ka karac ma dxeral. 18Qmada mqedil na ma mangal 1 dungal ka ani ima we kika mmhemuc msuupu. Kiya de so ka mangal mqedil qnada rseno na uri we kika mmhemuc msuupu uri.
Mbleyaq Seediq Ma Rajaros
19Niqan ka 1 mbleyaq seediq. Heya we mlukus mtgdiyuc ma tninun malu ware keguy ma tbbleyaq mqaras klaali. 20Niqan ka 1 mesa uqun seediq. Ngayan na we Rajaros. Mluqah kana ka heyi na ma ga daha psaun berah rhengun mbleyaq seediq nii. 21Mntengi peeyah pntuting bobo psaan uqan mbleyaq seediq. Kiya uri ma meyah cmehak luqah na ka huling. 22Bobo na, mhuqil ka mesa uqun ma wada desun snkgulan baro ma psaun daha berah Abraham. Mhuqil ka mbleyaq seediq uri ma wada reesun. 23Moda mqraqil meniq tuxan mnkuung ka heya ma mita baro ma taan na peeyah theya ka Abraham ma qmita Rajaros ga berah na. 24Kiya de mdiras rmengo: ‘Abraham, rudan mu, glaani ku hiya! Skguli ka Rajaros gghuriq na qsiya tluding baga na ma eeyah na pstleetu hema mu! Ado gisu ku mqraqil bale ckceka rana puniq hini!’ 25Rmengo ka Abraham: ‘Laqi! Lnglungi ka muudus su ciida han we wada su mbleyaq. Mnoda mqraqil ka Rajaros. Kiya de nii sqrasun hini saya ka heya ma ga pqrqilun ka isu. 26Uxe wano kiya, mnoda sneengan ma nii psaun ckceka ita ka paru bale ebun truma. Kiya de uxe ptduwa mntaril peeyah hini ka mkmosa sunan ma uxe tduwa mntaril peeyah hiya ka mkmeyah menan hini uri.’ 27Rmengo ka mbleyaq seediq: ‘Tama, so kiya de ani su ba rabang, skguli sapah tama mu ka Rajaros. 28Ado niqan 5 ka mtswai mu na, tduwa pgkela dheya ka heya ma so daha uxe eeyah mqraqil hini.’ 29Rmengo ka Abraham: ‘Dheya we ga niqan patis Moseh ma patis dmpgeela kari tduwa daha bhangun.’ 30Rmengo ka heya: ‘Abraham, rudan mu. Uxe so nii. Nasi mosa dheya hiya seediq mnuudus pneyah hnqilan we ida mpriyux lnglungan ka dheya.’ 31Rmengo ka Abraham: ‘Nasi daha ini bhangi ka kari Moseh ma kari dmpgeela kari ge, ani mosa dheya hiya ka mnuudus peeyah hnqilan we ida uxe mpsnheyi ka dheya.’”
Voafantina amin'izao fotoana izao:
Ruka 16: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
