Yohane 13
13
Trima Papak Tnugsaan Na ka Yesu
1Berah smseman hrnasan ciida. Yesu we klaun na dehuk ka ali hhiti na malix bobo dxeral ma oosa na tama. Ida na sgaalu bale ka seediq nheya meeniq bobo dxeral ma qmhedu gmaalu dheya. 2Mekan uqun keeman ciida, Qbsuran Bgihur Naqah we tena na wada psaun lhebun Yehudah laqi Simon seediq Iskariot ka bbaruy na Yesu. 3Yesu we klaun na wada sbege baga na ka kana ani maanu. Klaun na uri heya we pneeyah Utux Baro ma maha Utux Baro dungal ka heya. 4So kiya de mtutuy peeyah pnuqan ma malix lukus mgbaro na, maangal galiq sqiri na hwinuk. 5Kiya de sheruy na psaan qsiya ka qsiya de prading trima papak tnugsaan na ma sresan na galiq ga na sqiri hwinuk na. 6Dehuk Simon Petros de rmengo heya ka Petros: “Bukung! Mpsino su papak mu ho?” 7Cmiyuk heya ka Yesu: “Qneepah mu nii we uxe su klaun saya, klaun su hiti da.” 8Rmengo heya ka Petros: “Uxe ku mpsruwa isu ka ptrima papak mu!” Cmiyuk ka Yesu: “Nasi ku ini trima isu, maha uka pnugluban ta da.” 9Rmengo heya ka Simon Petros: “Bukung! Uxe wano papak mu, trmai ka baga mu ma tunux mu uri”. 10Rmengo heya ka Yesu: “Tnrima ka seediq we ani ini trima kiya da. Wano papak truma na de mpsbgurah kana ka heyi na da. Yamu we bgurah namu da, ani so kiya uxe namu gaga bgurah kana.” 11Tena mkela ka Yesu ima ka maha maruy heya. Kiya ka rmengo: “Uxe namu gaga bgurah kana.”
12Mhedu trima papak daha ka Yesu de mlukus lukus na mgbaro ma tleung dungal. Rmengo dheya: “Qneepah mu yamu nii we klaun namu ho? 13Mptgesa ma Bukung mesa namu kenan we ini qnuuqu ka kari namu, ado ida ku kiya ka yaku. 14Bukung namu ma mptgesa namu ka yaku we betaq ku ptrima papak namu. Kiya de yamu we naka namu pttrima papak namu uri. 15Wada ku hmiti ppyugun namu ka yaku, so namu ppyugun ma dai ka qneepah mu dyamu. 16Bale ba rngage maku. Ini pgkala tnpusu sapah knparu na ka tnqliyan. Ini pgkala smnkagul heya knparu na ka snkgulan uri. 17Nasi namu klaun ka nii ma daan namu qmeepah de mbleyaq namu da! 18Kari mu nii we uxe yamu ka srengo mu. Klaun mu ima ka gneegan mu. Ani so kiya we ida pbale ba kari ga spatis Patis: ‘Seediq mnsuupu yaku mekan ka mpqleqah papak yaku.’ 19Ini eyah ka ooda so nii na ma psnama ku rmengo yamu. Dehuk ka ooda so nii ciida de so maha namu snhii yaku ka kiya. 20Bale ba rngage maku, psteme snkgulan mu ka seediq we kika psteme yaku. Psteme yaku we kiya ka psteme smnkagul yaku uri.”
Kari Pgeela Bbrigun ka Yesu
(Mat 26:20-25. Mrk 14:17-21. Ruk 22:21-23)
21Rmnengo kari nii ka Yesu de naqah kuxul na ma truura ba rmengo dheya: “Bale ba rngage maku, 1 ckceka namu we mbaruy yaku.” 22Kiya de mqqita ka tnugsaan na ma ima ka gaga na srengo we ini kela ka dheya. 23Sdahar berah Yesu tleung ka 1 tnugsaan sgaalu na. 24Maanu so kiya de Simon Petros we slgelu na heya ka tunux na ma so maha smiling ima ka gaga srengo Yesu. 25Kiya de sdahar berah Yesu ka heya ma smiling heya: “Bukung! Ima kiya ho?” 26Kiya de cmiyuk ka Yesu: “Srebu mu pang sbege mu ima we kiya ka heya.” Maanu so kiya de srebu na ka pang ma sbege na Yehudah laqi Simon seediq Iskariot. 27Mnangal pang ka Yehudah de mremux lhebun na ka Satang da. Kiya de rmengo heya ka Yesu: “Qnqpahun su we nuggehi qmeepah!” 28Ani ima ga tleung hiya we uka ani ima ka mkela ma rmengo so kari nii ka Yesu. 29Lmngelung ka duma, ado dmoi psaan pila ka Yehudah de ida ba gaga rmengo heya ka Yesu: “Osa maruy ddooyun ta smseman.” Uxe uri we yani mesa “Biqi tikuh ka seediq qrinuc.” 30Kiya de mnangal pang ka Yehudah de wada asi latac da. Ceka rabi ka ciida.
Bgurah Pnosa Kari
31Bobo wada mlatac ka Yehudah de rmengo ka Yesu: “Saya maangal knledax ka Laqi seediq. Maangal knledax peeyah Laqi seediq ka Utux Baro. 32Nasi mooda Laqi seediq maangal knledax ka Utux Baro. Kiya de Utux Baro we ado pldaxun na ka Laqi seediq ma maha na asi pldaxi ka heya. 33Lqlaqi, uxe ku pqbsiyaq ka mtheyaq ku yamu da. Migin namu kenan. Kiya de, ssaun mu we uxe namu saun. Kari nii we rmnengo ku dseediq Yudaya, saya we ida ku mprengo yamu uri. 34Bege mu yamu ka 1 bgurah pnosa kari. Kiya de pggaalu. Ptnaani so wada ku gmaalu yamu, yamu uri we pggaalu. 35Nasi namu mggaalu we maha klaun kana seediq ka yamu we tnugsaan mu da.”
Kari Pgeela Mpdeqo ka Petros
(Mat 26:31-35. Mrk 14:27-31. Ruk 22:31-34)
36Smiling Yesu ka Simon Petros: “Bukung! Maha su inu?” Cmiyuk ka Yesu: “Ini su tduwa smnegul ssaun mu saya ka isu. Mpsnegul su hiti da.” 37Rmengo ka Petros: “Bukung! Maku ini tduwa smnegul sunan ka saya ho? Ida isu mpsruwa ku qmada knuudus mu.” 38Cmiyuk heya ka Yesu: “Ida yaku mpsruwa su qmada knuudus su ho? Bale ba rngagi misu, berah qmqugu ka rodux we maha su mn3 dmeqo yaku.”
Voafantina amin'izao fotoana izao:
Yohane 13: Stgdaya
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The Bible Society in Taiwan, 2020
© 台灣聖經公會版權所有，2020
