Lukasi 23
23
1Na mbuto zyose zya vanhu vavukaga na vamutongekaga kumwa Pilato. 2Na vavukizaja kumuvula, vuhaya, Uyu twamuvonaga alivagomesya va chalo kiswe na alivagizya kumulipa Kaisari kodi, na aliyomba ati ali Kristo mutemi. 3Pilato wamuvuzaja, uhaya, Veve uli mutemi wa Vayahudi? Nawe wamwitavukaga, 4uhaya, Veve uliyomba. Pilato wavawilaga vahozya vahanya na mbuto zya vanhu, Nene nkaguwine musango ha munhu mwenuyu. 5Alisi avo valambaga muno, vuhaya, Alivagomesya va chalo, alihembeka mu nsi yose ya Uyahudi, wavukizaja mu Galilaya kusika henaha. 6Aho Pilato wayigagwa, wavuzaja ulu munhu uyu ali Mugalilaya; 7na aho wigagwa ati ali hansilili na vukovozi wamwa Herode, wamutumizaja kumwa Herode, homwene wavagimo mu Yerusalema mu nsiku zyenizyo.
8Aho Herode wamuvonaga Yesu wadehaga muno, kwisi nsiku ningi wakovaga kumuvona, kunguno wigagwa kunguno yakwe na wisigizaja kuvona mugaka gumo guliveziwa nawe. 9Na wamuvuzaja mihayo mingi, alisi nawe akamwitavukile ninga muhayo gumo 10ngʼo. Na vahozya vahanya na vamanicha fitabu vimagaho na vajamaga kumuvula na nguzu. 11Alisi Herode, hamohene na valugaluga, wamusimangaga na wamufusaga, wamuzwikaga mwenda musoga munogwene na wamusyokaja kumwa Pilato. 12Alisi Herode na Pilato vanwanaga lusiku lwenulo, kwisi hambele wanisi wavagimo mugati navo.
13Na Pilato wavitanaga vahozya vahanya na vakovozi 14na vanhu, uvawila, Inwe mwandetelaga munhu mwenuyu kitisi umo alivapuvya va chalo, na lolagi, nene namuvuzaja hambele ninwe na nkawine musango ha mwenuyu kunguno yago inwe mwamuvulaga. 15Ninga Herode mwene ngʼo, kwisi wamusyokaja kuwiswe, na lolagi, akavezizye kinhu hochene kiligelanila mu kumuvulaga. 16-18Sisyo nkumutulagula na nkumulekula. Alisi yamudimaga ha sikukulu kuvatungulila umo. Haho vose swe vahamukaga hamohene, Umwinje uyu, na 19ututungulile Baraba, homwene watulagwa mu jela kunguno ya vugome wavukile mu kaya na kunguno ya vuvulagi. 20Alisi Pilato wakovaga kumutungula Yesu na wayombaga navo hangi. 21Alisi avo valambaga 22kuhamuka, vuhaya, Umukomele, umukomele! Nawe wavawilaga ka vudatu, Mwenuyu witaga kavi ki? Nkakiwine kinhu hawakwe hochene kiligelanila kumuvulaga; nkumutulagula na nkumutungula. 23Alisi avo vamuhomangizaja na kilaka kihanya, vakovaga akomelwe, na ibubu lyavo lyakindaga. 24Na Pilato wayangulaga ati yikwile kitisi vakovaga. 25Na wamutungula mwenuyo watulagwa mu jela kunguno ya vugome na vuvulagi, homwene vamukovaga; alisi wamufumaja Yesu ku kikowa chavo.
26Na aho vamutongekaga, vamudimaga Simoni mbati muna Kirene, homwene wafumaga mwihala, na vamuvagazaja musigiti agusombe hanuma na Yesu. 27Na mbuto nhanya ya vanhu na vakima vamulondaga, hovene valilaga na vamulililaga. 28Alisi Yesu wavikevelaga, uhaya, Vanike va Yerusalema, muleke kundilila nene, sumbwa mwililile inwe venekili na vana vinwe. 29Kwisi lolagi, nsiku zikwiza aho vakuyomba, Velukilwa vagumba na nda hozyene zikavyalile, na mavele hogene 30gakongʼhizye. Haho vakuvukizya kugawila malugulu, 31Mutugwile iswe, na ku tulugulu, Mutukumbe! Kwisi ulu valita genaya ha muti mudoto, yikukwilaki ha muti mumu?
32Na vangi vavili vene, vakenaguzi, vatongekagwa hamohene nawe, kigele vavulagwe.
33Na aho vafikaga henaho halitanwa hakapanga, vamukomelaga uyu na vakenaguzi, umo ha mulila na mwiye ha lumoso. 34Na Yesu wayombaga, Vava, uvatondole venava, kwisi vakamanikizye cheniki valita. 35Na vazigavanaga myenda zyakwe na vesaga kavale kunguno yazyo; na vanhu vimagaho na vilolelaga. 36Na vahanya vamusyolaga, vuhaya, Vangi wavapizaja, ipizye mwenekili, ulu ali Kristo, Musogolwa wa Mulungu. 37Na valugaluga vene vamufusaga hovene vizaga na vamuletelaga siki, vuhaya, Ulu veve uli mutemi 38wa Vayahudi, wipizye mwenekili! Na vutone wene wavagiho kwigulya nawe, MWENUYU ALI MUTEMI WA VAYAHUDI.
39Na umo wa venava vakenaguzi vasungilwe nawe wamufusaga, Veve ukavile Kristo? Wipizye mwenekili na utupizye niswe! 40Alisi ungi witavukaga, wamudakilaga, uhaya, Veve naʼho ukavile kumogoha Mulungu, kunguno wafikile mu kitanga cheniki savasava? 41Na iswe na loleyene, kwisi twapivagwa vusyokeziwa vuligelanila na milimo yiswe, alisi uyo akitile kinhu hochene kikagelanilile. 42Na wayombaga, Yesu, unizukile ulu ukwiza mu vutemi wako. 43Nawe wamuwilaga, Loleyene, ndikuwila veve, lelo ukuviho hamohene nane mu Paradisi.
44Na itungo lya saa sita hilavulaga nsi yose kusika 45saa kenda, na limi lilavulaga, na mukingo gwʼisengelo gwatandukaga mapande avili. 46Na Yesu wahamukaga na muzwi muhanya, uhaya, Vava, mu makono gako ndilagila myuye yane. Na aho wamalaga kuyomba 47genaya, wadahaja moyo. Alisi aho muteko wavonaga genayo gakwilaga. wamukuzaja Mulungu, uhaya, Loleyene, munhu mwenuyu wavagi mugololoku. 48Na vose venavo hovene vivilingaga hʼilolelo lyenili, aho vagilolelaga genaya gakwilaga, vitulaga ha kikuva na vasyokaga. 49Na avo vamumanikaja vimaga kufuma kule valigilolela hamohene na vakima, hovene vamulondaga kufuma Galilaya.
50Na mugosya mbati, lina lyakwe Yosefu, munamhala wa baraza, munhu musoga na mugololoku, homwene 51akayizumizye ndaka na milimo yavo, muna Arimatia, kaya ya Vayahudi, homwene wavulindilaga vutemi wa 52Mulungu, mwenuyu wajaga kumwa Pilato kumulomba muvili gwamwa Yesu. 53Na wagusungulaga, wagutungaga mu mwenda gwa pe na wagutulaga mu kivimbi chadulilwe mwitale, umo kuduhu munhu atali kulalamo. 54Na lwavagi lusiku lwa kwivezelezya, na sabato yegelaga. 55Alisi vakima avo vafumaga ku Galilaya nawe, valondagako na vavonaga kivimbi na kitisi mulambo gwalalikizivagwa. 56Na vasyokaga kuwavo na vavezaja manukato na mugazu; na ha sabato vikalaga sele kitisi yalagilagwa.
Voafantina amin'izao fotoana izao:
Lukasi 23: Nym51
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyamwezi New Testament © Bible Society of Tanzania, 1951.
