Yohana 3
3
1Wavagiho munhu umo wa Vafarisayo, lina lyakwe 2Nikodemo, muhanya wa Vayahudi; mwenuyu wizaga kumwa Yesu ha vuziku na wamuwilaga, Rabi, tulimanicha ati uli muhembeki wafumile kumwa Mulungu, kwisi kuduhu munhu alikovola kuvezya migaka yeniyi veve ulivezya, ulu Mulungu akavile hamohene nawe. 3Yesu witavukaga, umuwila, Yalole, yalole ndikuwila veve, ulu munhu akavyalilwe hangi akakovolile kuvuvona vutemi wa Mulungu. 4Nikodemo wamuwilaga, Lumehoki munhu alikovola kuvyalwa hangi ulu ali munamhala? Alikovola kwingila hangi mu nda yamwa 5nina na kuvyalwa? Yesu witavukaga, Yalole, yalole ndikuwila veve, ulu munhu akavyalilwe na minzi na Roho akakovolile kwingila mu vutemi wa Mulungu. 6Cheniki chavyalilwe na muvili kili muvili, na cheniki chavyalilwe na Roho kili Roho. 7Ukakumye ngʼo kunguno nakuwilaga ati kolaga muvyalwe hangi. 8Muyaga gulilulumila uko gulikova na ulikwigwa kululumila kwago, alisi ukamanikizye uko gulifuma na uko gulija; 9sisyo mwenuyo wavyalilwe na Roho. Nikodemo witavukaga, umuwila, Na lumehoki genaya galikovola kukwila? 10Yesu witavukaga, umuwila, Veve uli muhembeki wa Israeli na ukamanikizye genaya? 11Yalole, yalole ndikuwila veve, tuliyomba genayo tuligamanicha na tuligasangilwa genayo twagawine, na vusangilwa wiswe mukavile kuwanukula. 12Ulu ndimuwila inwe genaya ga liwelelo na mukasanizizye, lumehoki mukusanizya, ulu ndimuwila genaya ga mwilunde? 13Na kuduhu umo walinile kwilunde, sumbwa mwenuyo wikile kufuma kwilunde, Mwana wa Munhu, homwene alimo mwilunde. 14Na kitisi Mose wayisungaga nzoka mwibalangu, 15sisyo sisyene Mwana wa Munhu asungwe, kigele homwene alimusanizya apiwe vuzuvuku wa hanahana. 16Kwisi sisyo Mulungu walitogilwe liwelelo ati wamupanaga Mwana wakwe umo inene, kigele homwene alimusanizya aleke kuzimila, sumbwa apiwe vuzuvuku wa hanahana. 17Kwisi Mulungu akamutumizizye Mwana wakwe mu liwelelo kigele ateme kitanga liwelelo, sumbwa kigele liwelelo lipiziwe mugati nawe. 18Homwene alimusanizya kutemelwa ngʼo kitanga, na homwene akavile kusanizya wamalile kutemelwa kitanga, kunguno akalisanizizye lina lya Mwana umo inene wa Mulungu. 19Na cheniki kili kitanga: mwanga gwafikile mu liwelelo, alisi vanhu vayitogagwa giti kukila mwanga, kwisi milimo yavo yavagi mivi. 20Kwisi homwene alita tuvi aligugaya mwanga na akavile kwegela ha mwanga, kwigela ngʼo milimo yakwe yihilimilwe. 21Alisi homwene alimazya hanayene uwegela ha mwanga, kigele milimo yakwe yifumbulwe ati yitilwe mugati na Mulungu.
22Hanuma na genaya Yesu na vahemba vakwe vajaga ku nsi ya Uyahudi, na kwenuko wikalaga hamohene navo na wogaja. 23Na Yohana nawe wogaja mu Enoni bihi na Salim, kunguno minzi mingi gavagiko, na vanhu vegelagaho na vogivagwa. 24Kwisi Yohana wavagi atali kutulwa mu jela. 25Na lwanilo lwavukaga mugati na vahemba vamwa Yohana na Muyahudi kunguno ya kwikalava. 26Na vizaga kumwa Yohana na vamuwilaga, Rabi, uyo homwene wavagiho hawako kumwambu na Yordani kunguno yakwe veve wasangilagwa, lolaga, aliwoja na vose valija kuwakwe. 27Yohana witavukaga, uhaya, Munhu akakovolile kusola kinhu hochene akapivilwe kufuma kwilunde. 28Inwe venekili mwasangilagwa, hawane ati nayombaga, Nene nkavile Kristo, sumbwa natumizivilwe hambele nawe. 29Homwene ali nawe mutolwa ali mutozi, alisi munwani wa mutozi homwene aliwimaho, aligudehela na kudeha muzwi gwa mutozi; syenisyo kudeha kwane kwenuku kokalile pa. 30Yamudima uyu akule isima, alisi nene nadohe isima. 31Uyu alifuma mwigulya ali kwigulya na vose; uyu alifuma ku liwelelo ali wa liwelelo na aliyomba ga liwelelo. 32Uyu alifuma mwigulya ali kwigulya na vose; na alisangilwaho genayo wawine na wigilwe, na kuduhu umo aliwanukula vusangilwaho wakwe. 33Homwene wawanukulaga vusangilwaho wakwe, wazumaja vuliko ati Mulungu ali wa lole. 34Kwisi mwenuyu Mulungu wamutumizaja aliyomba mihayo ya Mulungu, kwisi Mulungu akavile kupana Roho mugati na fipimo. 35Vava alimutogwa Mwana na wagatulaga gose mu makono gakwe. 36Homwene alimusanizya Mwana ali na vuzuvuku wa hanahana; alisi homwene akamudonhokile Mwana kuvuvona ngʼo vuzuvuku, sumbwa kisila cha Mulungu kikumwikalila.
Voafantina amin'izao fotoana izao:
Yohana 3: Nym51
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyamwezi New Testament © Bible Society of Tanzania, 1951.
