Yaaya 7

Seneetee Iisa amanna ɗa oko gata

1Maa gu gaari kooko ƴiiliɗe pa, gaa Iisa tan̰awɗo oko diyargee ku kiɗa ta Galilee. Gata pa aŋakke ɗa kaato kiɗa ta Yudee, asan gu taattuweeco Yawudigeyyo aŋka diyawti. 2Wikinne kaaka pa, gi laalanco Yawudigeyyo ta zubiŋgeyyo#7.2 Laalane ta zubiŋgeyyo taata pa, gu Yawudigee leewaca ku maa gu mooyicca samaaniti Mellayi maa ga leyyoo oko kookuweeco wikinne maa gu oomiɗe min Masir gu tan̰awɗo goosigeyyo. Iŋaa pa ga Mella biryoo ammi o tiyaw o suuɗu. Oko laalane taata pa, gu Yawudigee kaate geegar ka Zerizalem gu deeɗe pana zubiŋgee ma tappi, guu nuntiɗe meeni poppoɗi kayni. Elloŋ Soƴoowee ku Saɗikaŋgeyyo 23.33-36,39-43 o Ɗillico Hukumnigeyyo 16.13-16 o Neyemi 8.14. katta. 3Guu seneetee Iisa beneyyiyyee goo: «Wacu min iŋee, ki kaatiɗo kiɗa ta Yudee, ku maa gu jobookeecam kutik deeɗiya ella lubbicum maa ki leewa. 4Lekka ɗa gimu ma leewa maatiki ma kiilo ka, gaa aŋka gu giimi ibiniyya. Kii leewa gaari ku ajjibiti, ki leyyiy saa ku maa gu giimi paracco elliɗiy, guu ibinɗum.» 5Guta pa, seneetee Iisa ku katta saa kulla dowwiy ɗa galbigeeco oko gata.

6Gaa Iisa tiiliyyoo gaa: «Naa, ga wikinnitu asee ɗa missa. Kuŋ soopa ga wikinne paratti wagaatoŋ kaatiti. 7Kuŋ, gu giimi ku dunuune teete lekka ɗa botol maa gu ɗakittitoŋ. Naa soopa, gu ɗakattinoo, asan na beneyya naa gu gaarco maa gu leewa miɗɗa ka. 8Kuŋ aɗoŋ laalanti, naa soopa kataa ɗa missa, asan ga wikinnitu asee ɗa missa maa na deeɗiyooca gaara darjantu oko giimo.» 9Maa ga Iisa beneyyiɗe goŋŋa pa, gaa nuntiɗe pe kanti Galilee.

10Maa gu seneetee ku katta kaatiɗe paaɗe laalanti, gaa Iisa kulla joboɗɗiy Zerizalem ma gubbo ka. 11Guu taattuweeco Yawudigeyyo deyeɗɗiya Iisa wikinne ka laalanti kaaka, guu enewɗo goo: «Gata ay ŋa?»

12Guu giimi ma aaye laalanti kotti melewɗo maani ma gaartee Iisa. Daare ƴa goo: «Gata ay gimu ma leewa samaane.» Daare pa goo: «Gata daɓallay gonek ka giimi.» 13Gaa alɗo lekka ɗa soo gimu saa ma beneyya ma raɗɗa asan gu ɓayakka taattuweeco Yawudigeyyo.

Iisa garaa beneyti Mellayi meene ta laalanti

14Ɗaɗɗakkico meeni ku laalanti, gaa Iisa deeɗe un̰n̰a girti Mellayi, gaa diiliɗe ga beneyɗiyo gaartee Mellayi oko giimo. 15Guu taattuweeco Yawudigeyyo ajjibiɗe ta tirta, guu beneyɗo aacco goo: «Gimu keeke ibiniy gaa me gaari ku Kitamniti Mellayi o ga ɓeleddiy ɗa ta kaw?» 16Gaa Iisa tiiliyyoo gaa: «Beneytu keeke maa na garaatoŋ asaa ɗa min oko naata, innasoopa, ga asaa min oko Mella ma n̰akamminoo. 17Gaa gimu oyaa ga lewɗiya lubbi maa ga Mella aŋka, ga ebenna ka pe baŋ ga beneytu keeke asaa min oko Mellayi e baŋ ga asaa min oko naa ka. 18Gimu ma beneyya beneyyi ma okomma min kayaati ka, deyekka cipilo ta semeetee oko gata ka. Gimu soopa ma deyekka darjanti oko ma n̰akammiya, ga beneyti okomma min oko gimu ma n̰akammiya ka, o ga beneyti ay seene. Gata kaaka borolla ɗa. 19Muusa gaaritoŋgu hukumnigee ku Kitamniti Mellayi, o ga lekka ɗa gimu kaƴi min aattoŋ ma jobbiy. Gaa ayme ku aŋkiɗo diyawtu kuu ga naa jobokkiy ɗa?» 20Guu giimi tiiliyyee goo: «Kii lekka aarinne. Ay we ma aŋka diyawcum?»

21Gaa Iisa beneyyiyyoo gaa: «Na leetoŋ latta ka ajjibiti kaƴi ka#7.21 Elloŋ Yaaya 5.1-15. meene ta nambiti, kuu ajjibiɗe parattoŋ! 22Muusa beneyyitoŋ gaa ku taharraniyo oko rontoŋ ku miɗitta guu weyya ga leeɗe meeni poppoɗi#7.22 Taharro teete pa ay maatiki ma garaa liŋganti Biraayim ma Mella.. A gita pa, aadane ta taharriti taata asaa ɗa min oko Muusa, ay min oko kookuweetee. Ay ɗakko appe, ga ma meene ta nambiti kulla ku taharɗiyo oko rontoŋ. 23Ku taharrayo oko rontoŋ ma meene ta nambiti kulla, asan ku aŋka ɗa ku kaawiɗiy hukumnigee ku Kitamniti Muusa. Gaa ayme pa, ku boŋosɗinaw oko naata, maa na rayyidiyya gimu caŋ caŋ min parayti ma meene ta nambiti? 24Aɗoŋ caɗaa ɗa parlane aleŋ ta giimo maa gu caɗawɗiyo parlane oko gicco. Caɗawwoŋ ma ka seene.»

Iisa ay Masi aɗɗe?

25Maa gu giimi daare ku Zerizalem elliyya Iisa, guu beneyɗo goo: «Ay keeke appe ay gimu maa gu taattuweeco Yawudigeyyo aŋka diyawti. 26Elloŋga ƴa! Ay gata appe keeke beneyya saa pe unco giimi paracco, guu taattuweeco Yawudigeyyo ƴapawɗe kanco gu alɗe telaa ɗa. Walaŋ pe gu ibinya ma seene kadar ga ay Masi, gata maa ga Mella aparre? 27Gimu keeke ke ibinca saa darriti maa gu wewɗiya. A Masi soopa, gata maa ga Mella aparre, wikinne maa gaa ase asa, ga lekka ɗa gimu ma akkiya ibina wikirti maa ga asawɗo.»

28Gaa maa ga Iisa garawɗiyo beneyti Mellayi oko giimo dooranti girti Mellayi, gaa inniɗiy ma raɗɗa gaa: «Ku ibinno aɗe ma ka tirta baŋ na ay we, o baŋ na ay min taŋaa? Ay naa milco ɗa ka ase, ay gata maa ga beneyti ay tirta ma n̰akamminoo. Ay seene ku ibinya ɗa. 29Naa soopa ibinya, asan na asaa min oko gata, o ga gata ma n̰akamminoo.»

30Maa gu giyyiya beneyti kaaka guu aŋkiɗe baamiti. Gaa alɗo lekka ɗa soo ma eesiya asan ga wikinniti asee ɗa missa. 31Gaa were kaaka gu giimi maani duwɗiy galbigeeco oko gata. Guu beneyyiɗe goo: «Gaa Masi ase asa, ga akka lee garaawi ku ajjibiti ƴiila payya min oko gimu keeke e?»

Pariziyennigee n̰akamma taraakee gu deeɗiya baama Iisa

32Guu Pariziyennigee giyyicca ŋor̰omr̰umco giimo taata ma gaartee Iisa. Gaa ma gicco taattuweeco soƴoowee ku saɗikaŋgeyyo gu n̰aamiɗe taraakee ku girti Mellayi, ku maa gu deeɗiya baama Iisa. 33Maa gu asiɗe, gaa Iisa beneyyiyyoo gaa: «Na aaye missa ma kuŋ wikinne paalta. Naa asiɗo yooka ka pe wikirti oko gata ma n̰akamminoo. 34Ku akkino diyya o ku gasakkano ɗa, asan ku gederra ɗa ku kaatiɗo were maa na katawɗo.» 35Maa ga Iisa beneyyiɗe goŋŋa, guu taattuweeco Yawudigeyyo beneyɗo aacco goo: «Gata pa kataa pe taŋaa soo, namma ke alɗiya gassa ɗa? Aŋka ga kaatiɗo ma Yawudigee ma tacalle kiɗaayeeco giimi ma ay Yawudigee ɗa ga deeɗiyooga gaara beneyti Mellayi e? 36Beneyti maa gaa ke akkiya diyya ke alɗiya gassa ɗa, o gaa ke gederra ɗa ke kaatiɗo were maa ga katawɗo keeke, garaa ini me beneyta?»

37Meene ta gaamití laalanti pa, ay gita appe ma ay meene ta daana ƴiila. Ay meene taata appe, ga Iisa waciɗe payya unco giimi paracco, gaa beneyyiɗe ma raɗɗa gaa: «Gaa gimu gu ibini deyya, ga asu wikirtu ga asiɗo aar̰a. 38Gaa gimu duwca galbanti oko naata, gu ammi ma beraa hayaatane ma gakamma ɗa ta kaw sorotta min galbanti aleŋ maa gi Kitamniti Mellayi beneyye#7.38 Elloŋ Esaya 58.11 o Ezekiyel 47.1 o Zakariya 14.8..» 39Oko beneyti keeke pa, ga Iisa beneyya ma gaari ku Ruuhanti Mellayi maa gu giimi ma dowwiy galbigeeco oko gata akka gassa. Oko wikinne kaaka pa, gi Ruuhanti Mellayi birenta ɗa missa, asan gu giimi papawwiya ɗa missa Iisa kuruwayi o ga gasakkica ɗa missa darjanti samaani.

40Maa gu giimi giyyiyya beneyti Iisa kaaka, gu daare beneyye goo: «Ay ma tirta pe ga gimu keeke ay Nabiinice maa gu beneyye min tippa goo ga akka asa.» 41Daare pa min aacco goo: «Gata ay Masi, gata maa ga Mella aparre.» A daare payya pa goo: «Masi pa asaa ɗa min kiɗa ta Galilee! 42Kitamniti Mellayi beneyye gee ga Masi gu akkiya wee geegar ka Beteleyem darriti sultan Dawud, o ga akka dee kulla ka balti Dawud#7.42 Elloŋ 2 Samiyel 7.12 o Misee 5.1..» 43Ay ɗakko appe gu giimi darɗe saananti Iisa. 44Guu daare min aacco aŋkiɗo gu baamiyya, gaa alɗo lekka ɗa soo ma eesiya.

Taattuweeco Yawudigeyyo amanna ɗa

45Gaa maa gu taraakee ku girti Mellayi koo yookiɗe, guu taattuweeco soƴoowee ku saɗikaŋgeyyo o Pariziyennigee inniɗiy goo: «Ayme ku alɗiya baama ɗa Iisa ku asikki?» 46Guu taraakee ku girti Mellayi guta kotti pa, tiiliyyoo goo: «Lekka ɗa gimu kaytiŋ ma beneyye aleŋ beneyti kinno.» 47Guu Pariziyennigee tiiliyyoo goo: «Kuŋ kulla oyye ga daɓallittoŋ e? 48Lekka ɗa gimu kaƴi kaytiŋ min taattuweeco Yawudigeyyo o min Pariziyennigeyyo ma duwca galbanti oko gata! 49Illa ay giimi ma ibiniy ɗa hukumnigeetee Muusa, ma duwiy galbigeeco oko gata. Guta kotti ay giimi maa ga Mella bolee.»

50Gaa lekkiɗo giico kaƴi maa gu kolaa goo Nikodem ma deyya gassa Iisa meene kaƴi aɗe. Gata pa beneyyiyoo oko gittee gaa: 51«Hukumnigeetine toɗɗokkine ke baagiya ma parlane gimu maa ke geewiya ɗa beneyti o ke ebenniy ɗa gaartee maa ga leewe.» 52Guu tiiliyyee goo: «Kii kulla ay min kiɗa ta Galilee e? Diyyu ƴa Kitamniti Mellayi! Lekka ɗa ya nabiinice kaƴi ma ay ka Galilee.»

53Gaa min iŋaa, gu tacilɗe kulla kaƴi aɗe kaate girti.

Voafantina amin'izao fotoana izao:

Yaaya 7: mmy

Asongadina

Hizara

Dika mitovy