Amangʼana agha Abhatomwa 7
7
Sitefaano araraghërrya ribharasa
1Mbe, omonene uwa abhasëngëri akabhöörya Sitefaano igha, “Amangʼana ghano ghonswe igho bhaaghambirë hano, m-maheene?” 2Sitefaano akaghamba igha, “Abhamura abhëëtö na bhaataata, munyitegherre bhuuya mbatëëbhi! Waryobha uwa ubhuhika, yaabhööshökëëyë ghuuka uwëëtö Ibhurahimu, hano yaarenga mu-kyaro keno kyaabherekerwanga igha Mesopotamia, ataraangʼanyera mu-mughi ghono ghwaabherekerwanga igha Haraani. 3Waryobha akamötëëbhya igha, ‘Karwe ku-kyaro ikyaho kono, utighe-mo abha wëënyu, oghende ku-kyaro keno ndaakwöröki.’#7:3 Maaha mo-ketabho ikya Okosemoka 12:1. 4Mbe, Ibhurahimu akangʼaanya ukurwa mu-kyaro ikya Abhakaridaayo, akaghya komenya mu-mughi ghono ghwaabherekerwanga igha Haraani, okohekera hano suwaabho yaakuurë. Waryobha akamoreeta hano, mu-kyaro keno mömënyirë-mo bhoono igho.
5“Waryobha tiyaahaayë Ibhurahimu umwandö ghoghonswe igho mu-kyaro mono, kora ahasë ahake igho hë. Kasi, yaaraghaini okomohaana ikyaro keno, okore kebhe ikyaye, na abheebhorwa bhaaye, nokaanyoora enkaagha iyö, tiyaarenga na omoona hë. 6Waryobha akatëëbhya Ibhurahimu igha, ‘Abheebhorwa abhaaho mbarebha abhaghëni mu-kyaro ikya abhantö abhandë. Na abhantö abha ikyaro kiyö, mbarebhakora abhaghorwa bhaabho, mbarebhanyankya bhököngʼu, ku-ribhagha irya imyoka amaghana ane. 7Kasi nendebhotorra ikiina abhantö abha ikyaro kiyö. Abheebhorwa bhaaho bhano bhariisha, mbarirwa mu-kyaro kiyö, bhaashe okonsaasaama hano.’#7:6-7 Maaha mo-ketabho ikya Okosemoka 15:13-14; Ukurishoka 3:12. 8Hano Waryobha yaamarrë, akakora imuuma na Ibhurahimu, ko enshera iya okosaara kera omoona uwa ikishaasha.#7:8 Maaha mo-ketabho ikya Okosemoka 17:9-14. Ku bhuyö hano Ibhurahimu yaaibhööyë Isaaka, akamosaara urusikö urwa monaane. Na Isaaka wonswe akeebhora Yaakobho, akamosaara. Yaakobho wonswe, akeebhora abhamura ikömi na abhabhërë, akabhasaara. Bhayö mbo abhakörö abhëëtö.
9“Abhakörö abhëëtö bhayö, bhakamaahera mura uwaabho rikenge, ono yaabherekerwanga igha Yusufu. Bhakamöghörya, abhe omoghorwa mu-kyaro ikya Miisiri. Kasi Waryobha n-hamwë yaabhanga na Yusufu. 10Akamötöörya inyaanyi iyaaye yonswe igho eno yaarë nayo. Akamohaana obhongʼaini na okosakëribhwa na Farao#7:10 Farao ti-riina irya ömöntö ryaarë hë, ne-mberekerro iya omokama uwa Miisiri yaarë. omokama uwa Miisiri. Farao, akakora Yusufu abhe ömötöngi ku-kyaro kya Miisiri, na akabha umwimërërri uwa amangʼana ghonswe igho mu-ghunyumba ughwaye ughwa ekekama.
11“Mbe, inshara ëndörö kai, ekabha ku-kyaro kyonswe igho ikya Miisiri, na ku-kyaro ikya Kaanaani, abhantö bhakanyanka bhököngʼu. Abhakörö abhëëtö, bhakabhorwa ibhyakorya. 12Hano Yaakobho yaaighuurë igha engano yaatookanga mu-kyaro ikya Miisiri, akatoma-yo abhaana bhaaye. Oroghendo ruyö, ndwo rwaarë urwa mbere, urwa abhakörö abhëëtö bhayö ukughya Miisiri. 13Hano bhaaghëëyë Miisiri urwa kabhërë, Yusufu akaitobhora ko-bhamura abhaabho, abheene bhonswe bhakamanyekana ko-Farao. 14Yusufu akatomana amangʼana ukughya ku-Yaakobho igha, aghende Miisiri, hamwë na abhahiiri bhaaye bhonswe igho, abhantö merongo muhungatë na bhataano. 15Yaakobho akaghya Miisiri, akakwera-yo. Abhakörö abhëëtö abhandë bhonswe, m-Miisiri bhaakwera. 16Mbe, ëmëbhërë ighyabho, ghekahirwa mu-mughi ughwa Shëkëëmu, ghekabheekwa mo-mbeehera iya mu-risana, eno Ibhurahimu yaaghörrë-yo ko seehera nyabhorebhe, ko-bhamura abha Hamööri.
17“Mbe, hano enkaagha yaahikirë haangʼë iya riraghaniö reno waanyöörrë Waryobha araghaini Ibhurahimu, ekerengere ikya abhantö bhayö Miisiri iyö, kiyëngëryanga bhököngʼu. 18Ho omokama uwöndë yaatöngirë ikyaro ikya Miisiri, ono ataamanyirë Yusufu. 19Omokama uyö, akainogha abhakörö abhëëtö, akabhangʼeerehera, ko okoraghërrya igha, ebhengʼerre ibhyaho, bhetabhutwenga kebhara iyö, okore bhikwe.
20“Enkaagha iyö, yo Mosa yaaibhööywë. Mosa uyö, yaatëghëryanga Waryobha bhököngʼu. Abhaibhöri abhaaye, bhakamorera imyëri etatö ka hayö. 21Hano abhaibhöri abhaaye bhaakërrwë okomobheserra, bhakamotoora kebhara. Akabhooshwa na umwisëkë uwa omokama Farao. Umwisëkë uyö, akamutugha kya omoona uwaaye. 22Mosa akëëghibhwa obhongʼaini bhwonswe igho ubhwa Abhamiisiri, akabha na obhotoro ko mangʼana ghano yaakoranga, na ko bhoghambi ubhwaye.
23“Hano Mosa yaahikiri imyoka merongo ene, amaigha agha okomaahana na Abhaisiraëri bharikyaye, ghakamorya, akaghya okobhamaaha. 24Akanyoora Umumiisiri uwöndë, aranaaha Umwisiraëri bhusheema igho. Ku bhuyö Mosa akaitanera muhiiri uwaaye uyö, akaita Umumiisiri, akahaka ikisiiyomba. 25Mosa yaakanyanga igha, Abhaisiraëri mbakaamanyirë igha, Waryobha we yaamuhirrë okore abhahöni. Kasi tebhaangʼurrë hë. 26Hano bhwaakëëyë, akasikana na Abhaisiraëri abhabhërë, bharaitana. Akashaashya okobhaahokania arabhatëëbhya igha, ‘Ndarra bhëënyu m-bamwë mörë! N-kwakë mukunyahaarana igho?’ 27Mbe, Umwisiraëri ono yaanyahaaranga murikyaye, akahunia Mosa, na eno aramöbhöörya igha, ‘N-nawë yaakotoora-ho obhe ömötöngi na umwahokania uwëëtö? 28Kasi nkutuna örë unyite kya Umumiisiri ono waitirë isho?’#7:28 Maaha mo-ketabho ikya Ukurishoka 2:14. 29Hano Mosa yaaighuurë amangʼana ghayö, akangʼosera mu-kyaro ikya Miidiani, akamenya iyö. Akeebhora-yo abhaana abhabhërë.
30“Hano yaamarrë imyoka merongo ene Miidiani, akabhooshokerwa na maraika ku-riköngö, haangʼë na inguku iya Sinai. Maraika uyö, yaarë mo-kesaka keno kyookanga omorro. 31Hano yaarööshë ekesaka kiyö kerooka omorro, akaroghoora bhököngʼu. Akaghya haangʼë, okore akiitaahe bhuuya, akaighwa engamba iya Omonene Waryobha, eramötëëbhya igha, 32‘Öni, nö-öni Waryobha uwa abhakörö abhaaho, Ibhurahimu, Isaaka, na Yaakobho!’#7:32 Maaha mo-ketabho ikya Ukurishoka 3:6. Hano Mosa yaaighuurë amangʼana ghayö, akarighita, akoobhoha okomaaherra ekesaka kiyö. 33Omonene akamötëëbhya igha, ‘Ruusya ebheraatö ibhyaho, ko bhoora ahasë hayö wimërëëyë n-hahörëëru. 34Obhoheene ni-igha, ndööshë kya bhono abhantö abhaane bhakunyankibhwa mu-kyaro ikya Miisiri. Nighuurë ikikuuro ikyabho, kiyö nkyo këghërrë niikirë ukurwa mu-ryobha, mbatöörri. Bhoono, ni-igha nkotome oghende Miisiri.’#7:33-34 Maaha mo-ketabho ikya Ukurishoka 3:5, 7, 8, 10.
35“Mosa uyö bhaangirë kö ökömöbhöörya igha, ‘N-nawë yaakotoora-ho obhe ömötöngi na umwahokania uwëëtö?’ Uyö, we Waryobha yaatömirë akabha ömötöngi na ömötöörya uwaabho, kö ökötööribhwa na maraika ono yaamöbhööshökëëyë mo-kesaka keno kyookanga omorro. 36Mosa akabhatangata ukurwa ku-kyaro ikya Miisiri, ko okokora amakono na ebhemanyërryö ibhyaru mu-kyaro ikya Miisiri, ku-Nyansha Enkangaaru, na ku-riköngö, ku-ribhagha irya imyoka merongo ene. 37Mosa uyö, we yaatëëbhëri Abhaisiraëri bhayö igha, ‘Omonene Waryobha uwëëtö, arebhaahorra ömörööti kya öni mö-bhëënyu muyö.’#7:37 Maaha mo-ketabho ikya Eheetoko iya Etoraati 18:15. 38Mosa uyö, we yaarenga hamwë na abhakörö abhëëtö, enkaagha eno bhaasangeraini ku-riköngö, hano maraika uwa Waryobha yaashumaashirë nawe ku-nguku iya Sinai haara. Akaghegha amangʼana agha öbhöhöru ghano yaahaaywë, akatöhërrya.
39“Kasi abhakörö abhëëtö bhayö, bhakaanga ukwighwera Mosa, bhakamutigha hayö, bhakaighomba mo-senkoro isyabho igha, hano bhakakyora Miisiri. 40Abhakörö bhayö, bhakatëëbhya Haruuni igha, ‘Otokorre ëbhëtöndö, bheno bheraatotangate. Mosa uyö yaatotangatirë ukurwa Miisiri, tetomanyirë amangʼana ghano ghamunyöörrë iyö hë.’#7:40 Maaha mo-ketabho ikya Ukurishoka 32:1. 41Mbe, bhakakora ritöndö reno ryaatuubhaini kya rikööhë irya engʼombe. Bhakarimwensera, bhakashengera ërëntö reno bhaakörrë na amabhoko aghaabho abheene! 42Ku bhuyö Waryobha akabhashibhya, akabhatigha bhasaasaamenga iryobha, umwëri na sinyota isya ighörö iyö, kya bhono yandëkirwë mo-ketabho ikya abharööti igha,
‘Bhëënyu bhare Abhaisiraëri, hano mwaaikaayë ku-riköngö imyoka merongo ene,
tö-öni mwaamwenseranga hë.
43Ahasë hohonswe igho hano mwaaghyanga,
mwaagheghanga righutu irya risambwa iryënyu Mörëki,
na ekesosa ikya inyota ya risambwa iryënyu Reefaani,
ëbhëtöndö bheno mwaaikörëëyë igha mobhesaasaamenga.
Ku bhuyö, nendaabhangʼanyëri hare iyö,
okoheteera ikyaro keno kekobherekerwa igha Bhaabhëëri.’#7:42-43 Maaha mo-ketabho ikya Amöösi 5:25-27.”
44Sitefaano akaghëndërrya okoghamba igha, “Ku-riköngö iyö, abhakörö abhëëtö bhayö mbaaghëëyë na righutu irya ubhwimaahëri, ubhwa okobha-ho ukwa Waryobha. Okanyoora Waryobha araghërrëëyi Mosa, arekore rebhe kya bhono Waryobha yaamwörökëri. 45Yoshua yaatangatirë abhakörö abhëëtö, ku-riihë reno bhaaitaini na abhantö abha ibhyaro ibhyëndë, bhano Waryobha yaarughiri ukurwa ku-kyaro keno. Bhakaghegha righutu riyö, bhakaghya naryo ku-kyaro ikyabho ekehya kiyö bhaanyöörrë. Righutu riyö, rekabha muyö igho, okohekera enkaagha iya omokama Daudi. 46Daudi uyö, yaarë na örööbhö urwa Waryobha. Daudi akasaasaama Waryobha uwa ömökörö Yaakobho igha amwikërërri, okore amohaghaashere inyumba. 47Kasi ono yaahaghaashirë inyumba iyö, no-mokama Seremaani, mura uwa Daudi.
48“Kasi Waryobha ono arëngë kighörö iya bhyonswe, takomenya mu-nyumba yoyonswe eera hë. N-kya bhono ömörööti yaaghambirë igha,
49‘Omonene aghambirë igha,
mu-ryobha nkyo ikitumbë ikyane ikya ekekama,
na ekebhara kyonswe igho, nkyo ahasë aha okotoora amaghörö aghaane.
Bhoono mbe möntëëbhi, n-nyumba kë moraahaghaashere?
Handë ahasë ahaane aha okomoonyera-ho n-hano hanga iyakë?
50Ëbhëntö bhiyö bhyonswe igho, tö-öni naabhebhomba?’#7:49-50 Maaha mo-ketabho ikya Isaaya 66:1-2.”
51Sitefaano akaghëndërrya okobhatëëbhya igha, “Bhëënyu n-sentama ukwighwa mörë! Mo-senkoro isyënyu, m-bapaghaani mörë. Kora amatwë aghëënyu, m-make ko engʼana iya obhoheene. Morashaashya okorebherra Umwika Ömöhörëëru sinsikö syonswe igho, kya bhoora abhakörö abhëënyu bhonswe bhaamorebherranga. 52Kasi aaho ömörööti kora ömwë ono bhaatanyankëri? Bhaaitirë bhano bhaaraarekanga ukuusha ukwa Ömöntö uwa Heene uwa Waryobha! Ömöntö uwa Heene uyö, we bhoono bhëënyu mwaanyëërëëyë inikö, mokamwita! 53Bhëënyu mwaahaaywë amaraghërryö agha Waryobha, ku ukwörökërribhwa na abhamaraika abhaaye, kasi temwaighwërëëyë Waryobha hë.”
Ukwitwa ukwa Sitefaano
54Hano abhanene abha Abhayahudi bhaaighuurë amangʼana agha Sitefaano ghayö yaaghambirë, bhakarerra bhököngʼu, bhakamokaaraatërya amaino. 55Kasi Sitefaano, akagharamera mu-ryobha, na eno aishööyë Umwika Ömöhörëëru, akamaaha ubhuhika ubhwa Waryobha, na Yëësu aimërëëyë-ho bhoryo ubhwa Waryobha. 56Mbe, akaghamba igha, “Momaahe! Nkomaaha ndë mu-ryobha hahönyökirë, na Omoona uwa Ömöntö,#7:56 Omoona uwa Ömöntö. Maaha mo-faharaasa. nikaayë bhoryo ubhwa Waryobha!”
57Kamwë igho, abhanene abha Abhayahudi, bhakaribha ibhyara mo-matwë aghaabho, na eno bharashaghana. Bhakakenyerra Sitefaano, bhakamoghoota. 58Bhakamuhira kebhara iya umughi ughwa Yërusarëëmu, bhakasimya okomotema na amaghena. Abhaimërërri abha engʼana iyö, bhakaruusya singibho isyabho, bhakasetoora ko-maghörö agha umumura uwöndë, ono yaabherekerwanga igha Sauri, okore asenaghi.
59Hano bhaatemanga Sitefaano na amaghena, akasaasaama igha, “Omonene Yëësu, ghegha omooyo ughwane!” 60Ho yaamarrë, akatema hansë ibhiru, akakuura bhököngʼu igha, “Omonene, otakaabhashibhya kö ëkëbhë ikyabho keno!” Hano yaamarrë okoghamba ghayö, ghokahwa-mo.
Voafantina amin'izao fotoana izao:
Amangʼana agha Abhatomwa 7: ssc
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021, Wycliffe Bible Translators, Inc. All rights reserved.