Mateu 2
2
Ukuawawaita umaa Jesus ipiri
1Jesus umaa ara Belẽ Judeya kiti aintaruixawa ramere kua Erudi asui apigawaita ukuawawaita uri kurasi usemuwaa banda sui Jeruzalẽ kiti.
2Yawe aintaupurandu:
—Mametaa kua pisasuwaa unaseriwaa judewita ruixawa? Yamaa iyara estrela yanerendawa Urienti sui, ape yayuiriana yamunya arama ixupe arama benditu.
3Usendu rame aintaumbeuwaa tiupuderi uiku timaarese kua aintaruixawa Erudi, nẽ kuaita yuiri Jeruzalẽwaraita panye.
4Asui Erudi usenui ainta muiri kuaita saserdutita ruixawa umpinimawaita yuiri upurandu arama usendu aintairumu mametaa unaseri umaa ara kua aintausaruwaa Kristu.
5Asui aintaumbeu ixupe:
—Unaseri kuri umaa ara tetama upe sera Belẽ Judeya kitiwaa, kuaye umpinimawaa yawe papera upe kua utitikawaa,
6Yawe umbeu: "Inde Belẽ, inde tetama Judeya kitiwaa timaa kuaira xingawaa inde aintasui Judeya kitiwaita, nyãse uri kuri nesui kua usaruwaa usaru aramawaa semiraita Israelitaita".
7Asui Erudi usenui rire uyumimisawa upe kuaita ukuawawaita upurandu arama ainta mairametaa uyupiru umuturi kua estrela?
8Asui umundu aintausu Belẽ kiti umbeu ainta supe:
—Pesu pesikari kua taina, asui pewasemu rire kuri ae peyuiri kuri pembeu ixe arama hasu arama kuri ipiri hamunya arama yuiri ixupe arama benditu.
9Aintausendu rire Erudi inyenga aintausu aintarapee rupi, asui kua estrela aintaumaa aintarendawa urienti sui usu aintarunde kiti aintauwasemu arama kua taina, asui kua estrela uyari iwate kuayentu taina iarupi.
10Asui aintaumaa irumu kua estrela suuri aintapia turusu.
11Asui aintauwike uka upe aintaumaa kua taina imaya Maria irumu, asui aintauwapika aintarinipia irumu aintaumee ixupe purangawaa, asui aintaupirari aintamaleta aintaumee ixupe uru prezenti, insensu sakuenawaa yuiri, pumada yuiri serawaa mirra.
12Asui Deus umbeu ainta aintakerupiwaa upe tiarama aintauyuiri aintaumaa Erudi ipiri, ape aintauyuiri arama aintarendawa kiti amu pee rupi.
Juze uyawawa Egitu kiti
13Asui aintauyuiri rire kuaita ukuawawaita yaneruixawa anju upuamu Juze umaa ikerupiwaa upe umbeu ixupe:
—Repuamu resuana rerasu kua taina imaya irumu reyawawa Egitu kiti reiku arama akiti ate mairame hasenui inde, nyãse kua Erudi uputari uyuká kua taina.
14Asui Juze upuamu urasu kua taina pituna rame imaya irumu Egitu kiti.
15Ape uiku ate mairame umanu kua Erudi kuaye yaneruixawa umbeuwaa yawe iyuru sui kua utitikawaa yawe umbeu, hasenui seraira Egitu sui.
Erudi uyuká tainaita
16Asui ipiaiwa kua Erudi umaa rame aintauganani ae kuaita ukuawawaita ape umundu aintauyuká panye tainaita apigawaita Belẽ upe panye suakintuwaraita yuiri kuaita urikuanawaita mukuĩ akayu kuaita yuiri ipuiwaitare kuaye usenduwaa yawe estrela resewara aintauyupiru irumu aintaumaa ae kuaita ukuawawaita.
17Aintaumunya kuaye umbeuwaa yawe kua utitikawaa serawaa Jeremia,
18Yawe umbeu yapuderi yasendu aintausasemu Rama upe, aintauyaxiu kirimbawa Rakel uyaxiu imembiraita rese tiawa upuderi umusuuri ainta nyãse tiana aintaumaa aintamembiraita.
Uyuiri Egitu sui
19Asui umanu rire kua Erudi yepe anju upuamu Juze ruaki ikerupiwaa upe Egitu upe.
20Umbeu ixupe:
—Repuamu rerasu kua taina Israel kiti imaya irumu kuxima umanu kua uputariwaa uyuká kua taina.
21Asui upuamu urasu kua taina imaya irumu aintausu arama Israelitaita retama kiti.
22Asui usendu rame aintaruixawa kua Arkelau ipaya ambira Erudi rakakuera Juze usikie usu akiti, asui usu Galileya kiti kuaye Deus umbeuwaa yawe ixupe ikerupiwaa upe.
23Asui usuana uiku arama tetama kiti sera Nazare kuaye aintautitikawaa yawe kuaita utitikawaita, yawe aintaumbeu, aintaumuseruka kuri ae Nazare suiwara.
Voafantina amin'izao fotoana izao:
Mateu 2: BBp
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
