Tekang Kbuten 2
2
1Duhen yó, deng gotu deng ne kedlimun Dwata du yóm longit ne yóm tonok ne yóm kdéen ton ta le. 2Bè yóm ghituhen kdaw là buden mò nmò Dwata, deng gotu deng ne kedlimunen du yóm kentihen. 3Ne wen oluhen du yóm ghituhen kdaw yó, htólóngen mò kun abay se hegnô bè yóm kdaw yó bè yóm kedlimunen du yóm kentihen. 4Yó se tehe kmò kedlimun Dwata du yóm longit ne yóm tonok ne yóm kdéen ton.
Yóm hungul koyu lamang boluyen Idin
Bè yóm tehe kedlimun yóm sana Dwata hol gónó mogot yóm longit ne yóm tonok, 5laen kô dù hulu tonem tahen yóm tonok duhen ke laen dù lem hulu lemsob tahen, abay se là deng hkulón Dwata du he, lelen laen deng tau mò hulu. 6Okóm balù yóm là deng kehkulón Dwata du, wen él tembul gu lem tonok mò hméfê du. 7Bè yóm tehe kmò Dwata tau, wen tonok nwahen ne nifilen, henbalingen tau. Ominen myuf lem ilungen yóm nawa mò hlowil du ne tódô mnawa se yóm tau nifilen yó ne sen-gengen se mowil.
8Ne wen hungul koyu nmò Dwata bè yóm benwu boluyen Idin fi dmata kdaw ne bè yó gónón hemnô du yóm tau deng nifilen. 9Tódô kentihen koyu alì tilob mton du gotu htowok Dwata bè yó, hono kem koyu tilob kbungu le. Bè hol gónón sóól yóm hungul nmoen yó, wen sotu koyu mteg bè yó ke gken tau bunguhen tódô hlós mowil. Ne wen bud sotu koyu mteg bè yó ke gken tau bunguhen, tódô tngónen yóm hyu ne tódô tngónen se yóm sidek.
10Bè yóm hungul Idin yó, wen él bong mlel gu lemen mò hméfê du. Yóm él yó, fat gónón mesgólól bè senbwak yóm hungul. 11Yóm tanay lelen, boluyen Pisun, mlel etu lem yóm benwu boluyen Habila. 12Bè yóm benwu yó gónón nô yóm tahu blówón laen kô dù bolen ne yóm sotu kay litok koyu alì tilob boohen ne yó kem botu tilob alì mebtes. 13Ne yóm gewu lel yóm él yó, boluyen Gihon, mlel etu lem yóm benwu boluyen Kus. 14Ne yóm getluhen, boluyen Tigris, mlel etu fi dmata kdaw yóm benwu Asirya. Ne yóm gfat lelen, boluyen Yufratis.
15Ne yó nmò Dwata, hnóen bè yóm hungul Idin yó yóm tau nifilen mò fen mò hulu bè yó ne mò mentey du. 16Yó mon Dwata bè yóm tau nifilen yó, “Hyu mken du balù kihu bungu koyu bè nim hungul ni. 17Okóm béem abay ken yóm bungu koyu gónóm temngón du yóm hyu ne yóm sidek. Ke sok kenem yóm bunguhen tódói matay.”
18Yó bud mon Dwata, “Là hyuhen béléen nim tau nifilu ni ke tek sotuhen. Na mò béléen dumuhen seklóón mò tóbóng lówóhen.” 19Tahu se, gotu nwit Dwata ebè yóm tau nifilen yóm kentihen deng tehe dlimunen lemwót bè tonok, kentihen ógóf nô te tonok ne kentihen onuk móyóng te kmawang. Ne hmoen du boluy le. Ne yó se buten yóm kwen kul mdengen boluy yóm kdê le. 20Tahu se, gotu nmò yóm tau nifil Dwata yó boluy yóm kentihen onuk móyóng te kmawang ne kentihen ógóf nô te tonok. Okóm balù sotu bélê le ke wen dumun seklóón mò tóbóng lówóhen. 21Omin Dwata henga htungô yóm tau yó, ne bè yóm igoen lemnga tódô dilot Dwata béléen sotu tiol lohoken ne kendel hekdimolen yóm ungeden. 22Tódô henbaling Dwata libun yóm tiol lohoken yó koni, ominen mit du ebè yóm logi.
23Ne yó mon yóm logi yó, monen,
“Ni dii hol dou dumu seklóón.
Dou tiol yóm kun tiol ne dou unged se yóm kun unged.
Boluyu du libun abay se bè logi gónón lemwót.”
24Yó gónóm mon, yóm tau ke myehen gtagaken maen ne yéen ne tódô le setlomin yóm kun tuha libun, ne baling le ssotu yóm lewu le. 25Bè yóm kdaw yó, tódô mógów hlówó yóm logi ne yóm libun yó, okóm là kô le myak du.
Voafantina amin'izao fotoana izao:
Tekang Kbuten 2: tbl
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2007, Wycliffe Bible Translators, Inc. All rights reserved.