यूहन्ना 21
21
तिबिरियास झील इन किनारा चेलागोळ मा प्रगट आगोद
1ई मातगोळ बाद्दा यीशु तान तान इक तिबिरियास झील इन किनारा चेलागोळ मा प्रगट माळदुन, अदिक ई रीति देल प्रगट माळदुन: 2शमौन पतरस, अदिक थोमा जो दिदुमुस कहलुस्तान, अदिक गलील इन काना नगर इन नतनएल, अदिक जब्दी अन पार, अदिक आऊन चेलागोळ दा टु येढ्ढ मुंदुर जमा ईरोर. 3#लूका ५:५शमौन पतरस आंदुर से अंदुन, “ना मेन हुडुली होगेतीन.” आंदुर आऊन से अंदुर, “नाव भी नीन सांगुळ बरतेव.” इदुरसाटी आंदुर होटकु ड्वांगा मा येरदुर, लेकीन आ ईळ्लकी येनु हुळदीदील. 4व्हातुर आगतेला अच यीशु किनारा मा बंदकु निदुरदुन; तरी चेलागोळ पहचानसीदील कि ईव यीशु हुन. 5आग यीशु आंदुर से अंदुन, “हे चिकोरगोळा, येन नीम हात्ती येनारा मेनगोळ आव?” आंदुर उत्तर कोट्टुर, “ईला.” 6#लूका ५:६आव आंदुर से अंदुन, “ड्वांगा अन ऊमा कय इन दी जार हाक्की रा सिक्केव.” इदुरसाटी आंदुर जार हाकदुर, अदिक सप्पा मेनगोळ बहुतायत इन कारण अदरी जेडु सकिदील. 7आग आ चेला यार से यीशु प्यार ईटतोगोन, पतरस से अंदुन, “ईव रा प्रभु हुन!” शमौन पतरस ईद केळकु कि आव प्रभु हुन, नेळु मा गमछा कसुसदुन, यतिकी आव बिना कपळा नव ईरोन, अदिक झील दा हारेदुन. 8लेकीन दुसरा चेलागोळ ड्वांगा मा मेनगोळ देल तुमकु जार जेडुतेला बंदुर, यतिकी आंदुर किनारा टु यक्कुल दुर ईला ईरोर, लेकीन येनारा येढ्ढ सौ कय मा ईरोर.
9याग आंदुर किनारा मा ईळदुर, रा आंदुर कॉरसा अन बेक्की अदिक अदुर मा मेन ईटकु, अदिक रोट्टी नोळदुर. 10यीशु आंदुर से अंदुन, “जो मेनगोळी नीव ईगल्या हुळदीर, अऊर दा टु येनारा तरी.” 11रा शमौन पतरस ड्वांगा मा येरकु ऊंद सौ तिरूपन धोड्डेव मेनगोळ देल तुमकु जार किनारा मा जेळदुन, अदिक ईस मेनगोळ ईत्तुर मा भी जार हरदीदील. 12यीशु आंदुर से अंदुन, “बरी, भोजन माळी.” चेलागोळ दा टु यारूकु साहस आगीदील कि आऊन से केळुल, “नी याव हुय?” यतिकी आंदुर जानसोर कि ईव प्रभु अच हुन. 13यीशु बंदुन अदिक रोट्टी हुळकु आंदरी कोट्टुन, अदिक हांग अच मेन भी. 14ईद तिसरा बार हुन कि यीशु सोत्तुर दा टु जित्ता आगदुर बाद्दा चेलागोळी कांळ्सदुन.
यीशु अदिक पतरस
15भोजन माळदुर बाद्दा यीशु शमौन पतरस से अंदुन, “हे शमौन, यूहन्ना अन पार, येन नी इंदुर से वाळुसकु नान से प्यार ईटत्या?” आव आऊन से अंदुन, “हव, प्रभु; नी रा जान्सत्या कि ना नीन से प्यार ईटतीन.” आव आऊन से अंदुन, “नान म्यांडा अन पाड्डागोळी आळ्स.” 16आव मात्त दुसरा घन आऊन से अंदुन, “हे शमौन, यूहन्ना अन पार, येन नी नान से प्यार ईटत्या?” आव आऊन से अंदुन, “हव, प्रभु; नी रा जान्सत्या कि ना नीन से प्यार ईटतीन.” आव आऊन से अंदुन, “नान म्यांडागोळ रखवाली माळ.” 17आव तिसरा घन आऊन से अंदुन, “हे शमौन, यूहन्ना अन पार, येन नी नान से प्यार ईटत्या?” पतरस उदास आदुन कि यीशु आऊन से तिसरा घन अंदुन, “येन नी नान से प्यार ईटत्या?” अदिक आऊन से अंदुन, “हे प्रभु, नी रा सप्पा येनारा जान्सत्या; नी ईद जान्सत्या कि ना नीन से प्यार ईटतीन.” यीशु आऊन से अंदुन, “नान म्यांडागोळी आळ्स. 18ना नीन से सही सही अनतीन, याग नी हारोदव ईर्या रा तान नेळु कटकु येल चाहस्या अल टेटाळ्या; लेकीन नी याग हाळाबाट आद्या रा तान कय फैलुस्या, अदिक दुसरा नीन नेळु कटकु येल नी चाहासतीदील अल नीनी वोतान.” 19आव ई मातगोळ देल इशारा कोट्टुन कि पतरस ह्यांग मृत्यु देल परमेश्वर उन महिमा माळ्यान. अदिक आग आव आऊन से अंदुन, “नान हिंद आगेग.”
यीशु अदिक आऊन प्रिय चेला
20 #
यूहन्ना १३:२५
पतरस पलटुस्कु आ चेला अक हिंद बरतेला नोळदुन, यार से यीशु प्यार ईटतोगोन, अदिक याव भोजन इन समय आऊन याद्दा अन दी बांगकु केळीदुन, “हे प्रभु, नीनी हुळसुसावाळा याव हुन?” 21आऊक नोळकु पतरस यीशु से अंदुन, “हे प्रभु, ईऊंद येन हाल आदीत?” 22यीशु आऊन से अंदुन, “अगर ना चाहासाईन कि आव नान बरासताका रूक्सकु ईरूल, रा नीनी इदुर से येन? नी नान हिंद आगेग.” 23इदुरसाटी वार्टुर दा ईद मात फैलुसेत कि आव चेला सायतीदील, तरी यीशु आऊन से ईद अंदिदील कि आव सायतीदील, लेकीन ईद कि “अगर ना चाहासाईन कि आव नान बरासताका रूक्सकु ईरूल, रा नीनी इदुर से येन?”
24ईव आवा चेला हुन जो ई मातगोळ गवाही कोळतान अदिक याव ई मातगोळी लिखस्यान, अदिक नाव जान्सतेव कि आऊन गवाही खरा आद.
उपसंहार
25अदिक भी हापाळ सा क्याल्सा आव, जो यीशु माळदुन; अगर अव ऊंद ऊंद माळकु लिख्सकु आगायदव, रा ना सम्सतीन कि किताबगोळ जो लिख्सकु आगायदव अव दुनिया दा भी ईला समुसयदव.
Voafantina amin'izao fotoana izao:
यूहन्ना 21: NTHaa20
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
