यूहन्ना 18
18
यीशु उक हुळसुसकु आगोद
(मत्ती २६:४७-५६; मरकुस १४:४३-५०; लूका २२:४७-५३)
1यीशु ई मातगोळी अनकु तान चेलागोळ सांगुळ किद्रोन नाला अन आप्पाटी होदुन. अल ऊंद बेली ईरोद, यदुर्दा आव अदिक आऊन चेलागोळ होदुर. 2आऊक हुळसुसावाळा यहूदा भी अद जागा जानसोन, यतिकी पयले हापाळ घन यीशु तान चेलागोळ सांगुळ अल होगीदुन. 3आग यहूदा, सैनिकगोळ्द ऊंद दल इक अदिक प्रधान याजकगोळी अदिक फरीसीगोळ दी टु चौकीदारगोळी हुळकु, कंदीलगोळ, मशालगोळी अदिक हथियारगोळी हुळकु अल बंदुन. 4आग यीशु, आ सप्पा मातगोळी जो आऊन मा बरावाळा ईरव जान्सकु, होट्टुन अदिक आंदुर से अंदुन, “यारी ढुंढ्सतीर?” 5आंदुर आऊक उत्तर कोट्टुर, “यीशु नासरी अक.” यीशु आंदुर से अंदुन, “ना हुईन.” आऊक हुळसुसावाळा यहूदा भी आंदुर सांगुळ निदुरकु ईरोन. 6आऊंद ईद अनतेला अच, “ना हुईन,” आंदुर हिंद सरकुसकु जागा मा बिदोदुर. 7आग आव मात्त आंदुर से केळदुन, “नीव यारी ढुंढ्सतीर.” आंदुर अंदुर, “यीशु नासरी अक.” 8यीशु उत्तर कोट्टुन, “ना रा नीम से अंद कोडींन कि ना हुईन, अगर नानी ढुंढ्सतीर रा इंदरी होगगोळी.” 9ईद इदुरसाटी आत कि अद वचन पुरा आगुल जो आव अंदिदुन: “यारी नी नानी कोट्या आंदुर दा टु ना ऊंद इक भी खोऊसीदील.” 10आग शमौन पतरस तलवार, जो आऊन हात्ती ईरोद, जेळदुन अदिक महायाजक उन दास मा नळ्सकु आऊन ऊमा किव हार्स बुटुन. आ दास उन हेसुर मलखुस ईरोद. 11#मत्ती २६:३९; मरकुस १४:३६; लूका २२:४२आग यीशु पतरस से अंदुन, “तान तलवार म्यान दा ईट. जो कटोरा आप्प नानी कोटान, येन ना अदरी कुडुतीदील?”
हन्ना अन पयले यीशु
12आग सैनिकगोळ अदिक आंदुर सूबेदार अदिक यहूदीगोळ चौकीदारगोळ यीशु उक हुळकु कट बुटुर, 13अदिक पयले आऊक हन्ना अन हात्ती ओतुर, यतिकी आव आ वर्ष इन महायाजक कैफा अन मॉव ईरोन. 14#यूहन्ना ११:४९,५०ईव आवा कैफा ईरोन, यार यहूदीगोळी सलाह कोटीदुन कि नाम लॉकुर साटी ऊंद मंळसा अन सायोद वळ्लीद आद.
पतरस उन इनकार
(मत्ती २६:६९,७०; मरकुस १४:६६-६८; लूका २२:५५-५७)
15शमौन पतरस अदिक ऊंद अन्य चेला भी यीशु उन हिंद आगेदुर. ईव चेला महायाजक उन जाना पयचाना ईरोन, इदुरसाटी आव यीशु उन सांगुळ महायाजक उन आंगुळ दा होदुन, 16लेकीन पतरस व्हार्या दरवाजा मा निदुरकु ईत्तुन. आग आव दुसरा चेला जो महायाजक उन जान पयचान इनव ईरोन, व्हार्या होट्टुन अदिक चौकीदारगीत इन से अनकु पतरस उक बुळ्क तंदुन. 17आ दासी जो चौकीदारगीत ईरोर, पतरस से अंदुर, “येनारा नी भी ई मंळसा अन चेलागोळ दा टु रा हैलेच?” आव अंदुन, ईला “ना आल्लच.” 18दास अदिक चौकीदार सोळ इन कारण कॉरसा होत्ताकु निदुरकु बेक्की सेकसोर, अदिक पतरस भी आंदुर सांगुळ निदुरकु बेक्की सेकसोन.
महायाजक उन द्वारा यीशु उन जाँच
(मत्ती २६:५९-६६; मरकुस १४:५५-६४; लूका २२:६६-७१)
19आग महायाजक यीशु से आऊन चेलागोळ बारा दा अदिक आऊन उपदेश इन बारा दा जाँच माळदुन. 20यीशु आऊक उत्तर कोट्टुन, “ना दुनिया अन सांगुळ खुल्सकु मातगोळी हेळदीन; ना सभागृहगोळ अदिक मंदिर दा, यल सप्पा यहूदी जमा आगतोगोर, सदा उपदेश माळदीन अदिक गुप्त दा येनु अंदिदील. 21नी नान से येती केळत्या? केळावाळेर से केळ कि ना आंदुर से येन अंदीन. नोळ, आंदुर जान्सतार कि ना येन येन अंदीन.” 22याग आव ईद अंदुन, रा चौकीदारगोळ दा टु ऊंद जो हात्ती निदुरकु ईरोन, यीशु उक क्याबरा बळकु अंदुन, “येन नी महायाजक उक ईत्ता प्रकार देल उत्तर कोळत्या?” 23यीशु आऊक उत्तर कोट्टुन, “अगर ना बुरा अंदीन, रा आ बुराई अन गवाही कोळ; लेकीन अगर भला अंदीन, रा नानी येती बडुत्या?” 24हन्ना आऊक कटकु कैफा महायाजक उन कळु बुटुन.
पतरस उन दुबारा इनकार
(मत्ती २६:७१-७५; मरकुस १४:६९-७२; लूका २२:५८-६२)
25शमौन पतरस निदुरकु बेक्की सेकसोन. आग आंदुर आऊन से अंदुर, “येनारा नी भी रा आऊन चेलागोळ दा टु रा हैलेच?” आव इनकार माळकु अंदुन, “ना आल्लच.” 26महायाजक उन दासगोळ दा टु ऊंद, जो परिवार दा टु ईरोन यार्द किव पतरस कोद बुटीदुन, अंदुन, “येन ना नीनी आऊन सांगुळ बेली दा ईला नोळीदिन?” 27पतरस मात्त इनकार माळदुन, अदिक तुरन्त हुंज कुग्त.
पिलातुस उन मुंद यीशु
(मत्ती २७:१,२,११-१४; मरकुस १५:१-५; लूका २३:१-५)
28आग आंदुर यीशु उक कैफा अन हात्ती टु किला अक ओतुर, अदिक व्हातुर इन समय ईरोद, लेकीन आंदुर खुद किला अन बुळ्क होगीदील ताकी अशुध्द आगबाळुल लेकीन फसह तिन सकुल. 29आग पिलातुस आंदुर हात्ती व्हार्या होटकु बंदुन अदिक अंदुन, “नीव ई मंळसा मा याता मात इन आरोप हचतीर?” 30आंदुर आऊक उत्तर कोट्टुर, “अगर आव कुकर्मी ईला ईरायदुन रा नाव आऊक नीन कय दा ईला कोळायदेव.” 31पिलातुस आंदुर से अंदुन, “नीव अच ईऊक वोतकु तान व्यवस्था अन अनुसार आऊंद न्याय माळी.” यहूदीगोळ आऊन से अंदुर, “नामी अधिकार हैलेच कि यारदारा जीव ताकोंडेव.” 32#यूहन्ना ३:१४; १२:३२ईद इदुरसाटी आत कि यीशु उन अद मात पुरा आगुल जो आव ईद संकेत कोळाहोती अंदिदुन कि आऊंद मृत्यु ह्यांग आदीत.
33आग पिलातुस मात्त किला अन बुळ्क होदुन, अदिक यीशु उक कारूकु आऊन से केळदुन, “येन नी यहूदीगोळ राजा हुय?” 34यीशु उत्तर कोट्टुन, “येन नी ईद मात तान दी टु अनत्या या दुसरागोळ नान बारा दा नीन से ईद अंदार?” 35पिलातुस उत्तर कोट्टुन, “येन ना यहूदी हुईन? अपमान अच जाती अदिक प्रधान याजकगोळ नीनी नान कय दा कोटार. नी येन माळ्या?” 36यीशु उत्तर कोट्टुन, “नान राज्य ई दुनिया अन आल्लच; अगर नान राज्य ई दुनिया अन आगाईत, रा नान सेवकगोळ लळाई माळायदुर कि नानी यहूदीगोळ कय दा कोटकु आगबाळुल: लेकीन नान राज्य ईल ईद आल्लच.” 37पिलातुस आऊन से अंदुन, “रा येन नी राजा हुय?” यीशु उत्तर कोट्टुन, “नी अनत्या कि ना राजा हुईन. ना इदुरसाटी पैदा आदीन अदिक इदुरसाटी दुनिया दा बंदीन कि सच्चाई इन गवाही कोळाईन. जो यावारा सच्चाई नव आन, आव नान आवाज केळतान.” 38पिलातुस आऊन से अंदुन, “सही येन आद?”
मृत्यु दण्ड इन आग्या
(मत्ती २७:१५-३१; मरकुस १५:६-२०; लूका २३:१३-२५)
ईद अनकु आव मात्त यहूदीगोळ हात्ती होदुन अदिक आंदुर से अंदुन, “नानी रा आऊन दा येनु दोष सिक्कीदील. 39लेकीन नीम्द ईद रीति आद कि ना फसह दा नीम्द साटी ऊंद मंळसा अक बिट बुळाईन. इदुरसाटी येन नीव चाहासतीर कि ना नीम साटी यहूदीगोळ राजा अक बिट बुळाईन?” 40आग आंदुर मात्त चिल्ळासकु अंदुर, “ईऊक ईला, लेकीन नाम साटी बरअब्बा अक बिट बुळ.” अदिक बरअब्बा डाकू ईरोन.
Voafantina amin'izao fotoana izao:
यूहन्ना 18: NTHaa20
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
