यूहन्ना 12
12
यीशु उन कालगोळ मा अत्तर हाक्कोद
(मत्ती २६:६-१३; मरकुस १४:३-९)
1यीशु फसह हाब्ब इन आर दिन पयले बैतनिय्याह दा बंदुन यल लाज़र ईरोन, यारी यीशु सोत्तुर दा टु जित्ता माळीदुन. 2अल आंदुर आऊन साठी भोजन तयार माळदुर; अदिक मार्था स्यावा माळोर, अदिक लाज़र आंदुर दा टु ऊंद ईरोन जो आऊन सांगुळ भोजन माळली कुरतीदुन. 3#लूका ७:३७,३८आग मरियम जटामांसी इन आर्धा लीटर किमती शुद्ध अत्तर तनकु यीशु उन कालगोळ मा हाकदुर, अदिक तान चुट्टीगोळ देल आऊन काल सिटदुर; अदिक अत्तर इन वास देल सप्पा मान्ना सुगन्धित आगेत. 4लेकीन आऊन चेलागोळ दा टु यहूदा इस्करियोती हेसुर ईनव ऊंद चेला जो आऊक हुळसुसदुर मा ईरोन, अनली कुरतुन, 5“ईद अत्तर मुर सौ दीनार दा मारकु कंगालगोळी येती कोटकु आगीदील?” 6आव ईद मात इदुरसाटी अंदिदील कि आऊक कंगालगोळ्द चिन्ता ईरोद लेकीन इदुरसाटी कि आव काळ्ल ईरोन, अदिक आऊन हात्ती आंदुर्द झ्वारा ईरतोगोद अदिक अदुर्दा जो येनारा भी हाक्कु आगतोगोद, आव तेगु कोम तोगोन.
7यीशु अंदुन, “आऊक ईरगोळी. आऊक ईद नांद नळसा दिशी इन साठी ईटगोळी. 8यतिकी कंगाल रा नीम सांगुळ सदा ईरतार, लेकीन ना नीम सांगुळ सदा ईरतीदील.”
लाज़र इन विरूद्ध साजीश
9याग यहूदीगोळ्द धोळ्द भीळ जान्सेत कि आव अल आन, रा आंदुर ना सिर्फ यीशु उन कारण बंदुर लेकीन इदुरसाटी भी कि लाज़र उक नोळुल, यारी आव सोत्तुर दा टु जित्ता माळदुन. 10आग प्रधान याजकगोळ लाज़र उक भी कोंद बुळोद साजीश रचुसदुर. 11यतिकी आऊन कारण हापाळ सा यहूदी होटोदुर अदिक यीशु मा विश्वास माळदुर.
यरूशलेम दा विजय-प्रवेश
(मत्ती २१:१-११; मरकुस ११:१-११; लूका १९:२८-४०)
12दुसरा दिशी हापाळ सा लॉकुर जो हाब्ब दा बंदीदुर ईद केळदुर कि यीशु यरूशलेम दा बरेत्यान. 13इदुरसाटी आंदुर खजुर इन डगालगोळी हुळदुर अदिक आऊन से भेंट माळोर साठी होट्टुर, अदिक कारूली कुरतुर, “होशाना#१२:१३ प्रभु अन्द जय! धन्य इस्त्राएल ईनव राजा, जो प्रभु उन हेसुर देल बरतान.”
14याग यीशु उक गधा अन्द पाड्डा सिक्त; रा आव अदुर मा कुरतुन, ह्यांग शास्त्र दा लिख्सकु आद,
15“हे सिय्योन इन पोरी, अंजबाळ;
नोळ, नीन राजा
गधा अन्द पाड्डा मा येरकु नीन हात्ती बरेत्यान.”
16आऊन चेलागोळ ई मातगोळी पयले सम्स सकिदील, लेकीन याग यीशु उन महिमा प्रगट आत रा आंदरी याद बत्त कि ई मातगोळ आऊन बारा दा लिख्सकु ईरोव अदिक लॉकुर आऊन से ईदा प्रकार इन व्यवहार माळीदुर. 17आग भीळ इन आ लॉकुर गवाही कोट्टुर, जो आ समय आऊन सांगुळ ईरोर याग आव लाज़र उक कब्र दा टु कारूकु सोत्तुर दा टु जित्ता माळदुन. 18ईदा कारण लॉकुर आऊन से मुलाकात माळली बंदीदुर यतिकी आंदुर केळीदुर कि आव ईद आश्चर्यकर्म तोरस्यान. 19आग फरीसीगोळ आपस दा अंदुर, “सोची रा सही कि नीम से येनु बनसाल. नोळी, दुनिया आऊन हिंद आगेत्याद.”
गैरयहूदीगोळ्द यीशु उक ढुंढसोद
20जो लॉकुर आ हाब्ब दा आराधना माळली बंदीदुर आंदुर दा टु येनारा गैरयहूदी ईरोर. 21आंदुर गलील इन बैतसैदा नोर ईरावाळेर फिलिप्पुस उन हात्ती बंदकु आऊन से विनती माळदुन, “श्रीमान, नाव यीशु से मुलाकात माळोद चाहासतेव.”
22फिलिप्पुस बंदकु अन्द्रियास से अंदुन, आग अन्द्रियास अदिक फिलिप्पुस होगकु यीशु से अंदुन. 23ईदुर मा यीशु आंदुर से अंदुन, “आ समय होट बंदाद कि मंळसा अन पार उन महिमा आगुल. 24ना नीम से खरा खरा अनतीन कि यागासताका गोदी इन बींजा जमीन मा बिदकु सोतोगाल, अद आबना ईरतद; लेकीन याग सोतोगतद, रा हापाळ फसल तरतद. 25#मत्ती १०:३९; १६:२५; मरकुस ८:३५; लूका ९:२४; १७:३३जो तान जीव इक प्रिय जान्सतान, आव अदरी खोऊस बुळतान; अदिक जो ई दुनिया दा तान जीव इक अप्रिय जान्सतान, आव अनन्त जीवन इन साठी अदुर्द रक्षा माळ्यान. 26अगर यावारा नान स्यावा माळ्यान, रा नान हिंद आगेगुल; अदिक यल ना आईन, अल नान सेवक भी ईत्तान. अगर यावारा नान स्यावा माळ्यान, रा नान आप्प आऊन आदर माळ्यान.
क्रूस इन मृत्यु इन इशारा
27“ईग नान जीव व्याकुल आद. इदुरसाटी ईग ना येन अनाईन, ‘हे आप्पा, नानी ई घळी देल ऊळ्स?’ ईला, यतिकी ना ईदा कारण ई घळी इक पोहचुसीन. 28हे आप्पा, तान हेसुर इन महिमा माळ.”
“आग ईद आकाशवाणी आत, ना आऊंद महिमा माळीन, अदिक मात्त माळाईन.”
29आग जो लॉकुर निदुरकु केळोर आंदुर अंदुर कि बादल गरजुस्त. दुसरागोळ अंदुर, येनारा स्वर्गदूत आऊन से माताळदुन.
30ईदुर मा यीशु अंदुन, “ईद आवाज नान साटी ईला, लेकीन नीम साटी बंदाद. 31ईग ई दुनिया अन न्याय आगतद, ईग ई दुनिया अन सरदार तेगुकु आदान; 32अदिक ना अगर पृथ्वी मा टु म्याकुच येर्सकु आगाईन, रा सप्पा मुंदुरी तान हात्ती जेडाईन.” 33हिंग अंदकु आव ईद प्रगट माळ बुट्टुन कि आव ह्यांग मृत्यु देल सोत्तान.
34इदुर मा लॉकुर आऊन से अंदुर, “नाव व्यवस्था अन्द ईद मात केळेव कि मसीह हमेशा ईत्तान, बाक नी येती अनत्या कि मंळसा अन्द पार उक म्याकुच येरसोद जरूरी आद? ईव मंळसा अन पार याव हुन?”
35यीशु आंदुर से अंदुन, “ज्योति ईग थ्वाळासा देर ताका नीम बीच दा आद. यागासताका ज्योति नीम सांगुळ आद आगासताका नळुतेला ईरी, हिंग आगबाळुल कि अंधकार नीमी बंदकु घेर्सुल; जो अंधकार दा नळुतान आव जानसालुन कि यात्त होगतान. 36यागासताका ज्योति नीम सांगुळ आद, ज्योति मा विश्वास माळी ताकी नीव ज्योति अन औलाद आगी.”
यहूदीगोळ अविश्वास दा बन्सकु ईरेतीर
ईव मातगोळी अंदकु यीशु ओळेदुन अदिक आंदुर से होचकु ईत्तुन 37आव आंदुर मुंद ईस चमत्कार#१२:३७ चमत्कार तोर्सदुन, तरी आंदुर आऊन मा विश्वास माळीदिल; 38ताकी यशायाह भविष्यवक्ता अन्द वचन पुरा आगुल जो आव अंदुन:
“हे प्रभु, नाम बातणी इन याव विश्वास माळ्यान?
अदिक प्रभु अन्द ताकत यार मा प्रगट आग्याद?”
39ई कारण आंदुर विश्वास माळ सकिदील, यतिकी यशायाह ईद भी अंदान:
40“आव आंदुर कण्णगोळी कुढ्ढ,
अदिक आंदुर मन कठोर माळ बुटुन;
येल्यारा हिंग आगबाळुल कि आंदुर कण्णगोळ देल नोळुल,
अदिक मन देल समसुल,
अदिक तिर्गुल,
अदिक ना आंदरी चंगा माळाईन.”
41यशायाह ई मातगोळी इदुरसाटी अंदुन कि आव आऊन महिमा नोळदुन, अदिक आव आऊन बारा दा मातगोळी हेळदुन.
42तरी अधिकारीगोळ दा टु हापाळ लॉकुर आऊन मा विश्वास माळदुर, लेकीन फरीसीगोळ कारण प्रगट दा ईला मानसोर, येल्यारा हिंग आगबाळुल कि आंदुर यहूदी लॉकुर्द सभागृह दा टु तेगुकु आदार: 43यतिकी मंळसागोळ दी टु प्रशंसा आंदरी परमेश्वर उन दी टु प्रशंसा अन्द अपेक्षा यक्कुल प्रिय हततोगोद.
यीशु नव वचन: न्याय इन आधार
44यीशु कारूकु अंदुन, “जो नान मा विश्वास माळतान, आव नान मा ईला उलटा नान कळावाळा मा विश्वास माळतान. 45अदिक जो नानी नोळतान, आव नान कळावाळा अक नोळतान. 46ना दुनिया दा ज्योति आगकु बंदीन, ताकी जो यावारा नान मा विश्वास माळुल आव अंधकार दा ईरबाळुल. 47अगर यावारा नान मातगोळी केळकु मान्सालुन, रा ना आऊक दोषी ठहरूसालीन; यतिकी ना दुनिया अक दोषी ठहरूसोर साटी ईला, लेकीन दुनिया अन्द उद्धार माळोर साटी बंदीन. 48जो नानी तुच्छ जानस्तान अदिक नान मातगोळी ग्रहण माळालुन आऊक दोषी ठहरूसावाळा रा ऊंद आन: मतलब जो वचन ना अंदीन, अदा हिंदळोव दिन दा आऊक दोषी ठहरूसीत. 49यतिकी ना तान दी टु मातगोळी माळीदिल; लेकीन आप्प याव नानी कळ्यान आवा नानी आग्या कोटान कि येन येन अनाईन अदिक येन येन माताळाईन? 50अदिक ना जान्सतीन कि आऊन आग्या अनन्त जीवन आद. इदुरसाटी ना जो येनारा माताळतीन, अद ह्यांग आप्प नान से अंदान हांगा माताळतीन.”
Voafantina amin'izao fotoana izao:
यूहन्ना 12: NTHaa20
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
