लूका 16
16
ओबाथैं ल्यो य़ेन दाज़्याव मिँ
1नकिन येसुए फरी उसिसरालाई तोबो घर्ती झाःद है यादोक्यो, “तोबो धनी मिँए ओय़ेन चलैन्या मिँ तोबो ओनैज़्याव दी। नोए ओघरपतीए ओपैसा ओओदोइज़्याव छुतराए रँःद, धनीलाई है यादोक ते, 2नो धनीए नोलाई खुल्द, ‘नय़ेन जाँ माचाव ङाथैज़्या, नँसकाव हिसाप भरी ङालाई याव ताके। आकिनी नँ आव य़ेन दाव दैन्या नमाले,’ है ओदोक ते, 3नो य़ेन चलैज़्यावए, ‘ङाघरपतीए आव ङाय़ेननी पले·नारिक्यो, ङा कै लिन्या ओताव? कीन्या घोन्या ङार्सा माले, ऩिद ज़्यान्या ङालाज हुज़्या। 4है जैद आनी ओपले·नावत मिँराए ङालाई याझ़िमक नैन्याए जूँनी तोबो बुद्धी पले·द अइ ची ङाजैया ब’ लिद, 5ओघरपतीए उरिन लाँव भरिलाई तोबो तोबोनी खुल्द प़ाइँरानी ङ़ातावलाई, ‘ङाघरपतीए ओकाछ नँस खा उलिज़्याव?’ है ओदोक ते, 6‘म़ास तसय गाधु लिज़्या,’ है दोक्यो दी। ‘हुकी नतुम्सुक रैकेदा, तसयकाव पचास वाज़ गिन्जैया,’ है दोक्यो दी। 7नकिन फरी छुतलाई खुल्द, ‘नँस ङाघरपतीए ओकाछ खा उलिज़्याव?’ है ओदोक ते, ‘गेदा तसय धु लिज़्या,’ है दोक्यो दी। ‘हुकी नतुम्सुक रैकेदा, तसयकाव असी वाज़ गिन्जैया,’ है दोक्यो।
8“छींनी ओघरपतीए ओय़ेन भरी ओसैंवत, ओबाथैंनिकाव ओदोव सामा ते चाव ज़ रँःक्यो दी। है जैद परमेस्वरए ओपाँताव मिँराए अजम्बरी जुनीए जूँनी यादोज़्याव सामाकिन आव मानुवाताव मिँराए याजूँनी वाज़ यादोज़्याव सामा झन ज़ ओबाथैं ल्यो रैंःज़्या।
9“है जैद ङा जेलाई है ङादाचिज़्या, जे ते आव मानुवाताव जेधनए बुरू जेनैंर याराजैचिके। हो ताकिन ची सिन्या बेलाक पैसाए ओचाहित भरी ओखेमोत स्वर्गताव एकम्न्या लिन्या पोल जेलाई सुम्न्या लेर।”
परमेस्वरए ओसेवा स़ोनो पैसाए ओसेवा
10“जोए तकेज़ा य़ेनत सतस दोज़्याव, होए घेप्पा य़ेनत ब सतस दान्या ले। फरी जोए तकेज़ा य़ेनत असत दोज़्याव, होए घेप्पा य़ेनत ब असत दान्या ले। 11है जैद जे आव मानुवाताव धन असतस जेचलैकिन, परमेस्वरए ल्योङाव साचो धन कातानी जेदैरिज़्याव? 12जेलाई यासिउ छुतए उमींलाई चावस जेमाचलैकिन, जे दैव परिन्या सुए ची ओयाचिरिज़्याव? 13है जैद तोबो बाँदाए ऩेब्लो साहुनी निय़ेन मादोधुव। दाव उपरिकिन नोए तोबोलाई सोद तोबोलाई चाव रँःन्या ले, कितर तोबोए ओपाँ भैंःद तोबोलाई ओलेखा नैद्यान्या माले। हिताव ज़ जे मनी परमेस्वरए ओसेवा स़ोनो पैसाए ओसेवा तखेप्त जेमादोधुइ।”
14नकाव ओपाँ थैज़्याव फरिसीर, यायुँ जम्मा पैसा कमैन्यादा वाज़ ओतावए येसुस याः दोकेर। 15है जैद येसुए नोरालाई, “जे फरिसीर मिँराए ङ़ाक वाज़ धर्मी जैसिज़्यावर, जेयुँलाव पाँ भरी परमेस्वरए सैंज़्याव। है जैद मिँराए घेप्पा यारँःचिदी ब परमेस्वरए ल्योनी ते जेय़ेन युँ माजामो ज़ लिज़्या,” है यादोक्यो।
मोसाए ओकानुन स़ोनो परमेस्वरए ओराज्या
(मत्ती ११:१२-१३)
16“यूहन्नाए ओपालाक पै मोसाए ओकानुन स़ोनो अगमबक्ताराए यापाँ उलिज़्याव। हाःकिन परमेस्वरए ओराज्यालाव पाँ हुद नल पसिन्या मिँर बनै छुइसिज़्यार। 17हैदी मनी नाम नम ओखेम्दी ब नो कानुनलाव पाँ तोबो ब खेर बान्या माले। 18है जैद मोसाए ओकानुनलाव सर्सिउ मिताव, तोबोए ओज्यालाई ऱास्द छुतलाई ओरैकिन जारी य़ेन ओदोव ज़ गनिसिज़्या। फरी ओरेलाई ऱासो मेंमालाई ओरैकिन नो ब हितावल ज़ गनिसिज़्या।”
धनी मिँ स़ोनो लाजरस
19फरी ब येसुए घर्ती तोबो झाःद है यादोक्यो, “तोबो धनी मिँ चाव चाव ज़्याद चाव चाव क्वाइसिद दिनकाव ज़ बनै थाँतस उलिज़्याव। 20तोबो ऩिद ज़्याज़्याव लाजरस यादोज़्यावलाई दिनकाव ज़ नोए ओसाँबिलाक यारैज़्याव। नोए ओक्याँ भरी खतेरा वाज़ उलिज़्याव। 21नोए ओखतेरार काःराए लेप्हुद याएज़्याव। नोए ‘नो धनी मिँए ओसतेवर ज़्याव ङादैकिन ताखेहो’ लिद आस ओदोज़्याव।
22“तछा नो ऩिद ज़्युज़्याव लाजरस सिके। उसिउ प़ाइँना ज़ परमेस्वरए ओचाकर्यार हुद छींद स्वर्गताव अब्राहामए ओल्योक लाँकेर। फरी नो धनी मिँ ब सिके। मिँर हुद लाँद गादैनाकेर। 23नो मिँ नर्गल बाद नलाव मेंःए ओसचप्क नमदा ओभाल्सिक नो लाजरस अब्राहामस उलिज़्याव रँःद, 24अइ लिद बनै चोइस क़िके, ‘अ अब्राहाम बाबु, ङालाई नयुँ ओनाक। नँस लिज़्याव लाजरसलाई ओआङुला ऱील झाःद ङासेत सथेप्द्यान्याए जूँनी परींद्याँके। आव मेंःए सचप्द धो सहिउ ताद ङाले,’ है ओदोक ते, 25अब्राहामए, ‘अ बाबुज़ा, नँ मानुवात नलेवा भरी बनै थाँतस नलिके, अब ते नल दुखस नलिज़्या। लाजरस ते बनै दुखस लिके, अब ते सन्चस लिज़्या। 26फरी नँस गेखार्ल बनै घ्योःव भल्खादा नैसिउ लिज़्या। है जैद गे नल्योदा हुव गेपैंदी ब गेमाहुधुइ, नँ ब गेल्योदा नमाहुधुइ,’ है ओदोक ते, 27नो धनीए, ‘हो ची ताकिन्दा बाबु, नँस ङाबिन्ती लिज़्या। नोलाई ङाबाबुए उझ़िमदा परींद्याव ताके। 28ङाभाइर पाँच जना लिज़्यार। नोरालाई घरासथैनावक, म़ानी आव ङापरिउल परिन्या ओछ्यास लिज़्या,’ है ओदोक ते, 29अब्राहामए, ‘नोर नल मापरिन्याए जूँनी यास मोसाए ओकानुन ब लिज़्या, अगमबक्ताराए यासरो पोस्तोको ब लिज़्या। नो ज़ ओथैरक,’ है दोक्यो। 30नो धनीए फरी, ‘हिताव ते माता, अब्राहाम बाबु। तोबो सिउनी बावए है ओरादोकिन वाज़ परमेस्वरए ल्योदा यायुँ फर्कैन्या लेर,’ है ओदोक ते, 31अब्राहामए, ‘मोसाए ओकानुन स़ोनो अगमबक्ताराए यापाँ यामाभैंःकिन सिउनी सैंसिद बावए ओपाँ कातानी याभैंःरिज़्याव?’ है दोक्यो।”
Voafantina amin'izao fotoana izao:
लूका 16: NKham
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2015, Wycliffe Bible Translators, Inc. All rights reserved.
