ທິນ ເຕີ່ຍ ໂຕ້ວ 42
42
ໂຢເຊບ ເຍີຍ ກໍ໋ ບົວ ມີ່ງ ອີຢິບ ມ໌າຍ ເບຢົ້າ
1ຢາໂຄບ ໄຮ໌ ກ໊ອງ ອີຢິບ ເຕີ່ຍ-ປູງ ມ່າຍ ເບຢົ້າ ເຍີຍ. ນິ່ນ ຕສ່ຽວ ບົ໋ວ ນິ່ນ ເຍີຍ ຕອນ, “ເມີ່ຍ ບົວ ໂຕສ໋ວ ຫາຍ ຫຍູ່ງ ງີ່ ງ່ອງ ງ໌ອງ ໜ່າຍ? ເມີ່ຍ ໝັ່ງ ເຢຍ, ເຢຍ ໝັ່ງ ເມີ່ຍ ຮນັ້ງ! 2ເຢຍ ໄຮ໌ ກ໊ອງ ອີຢິບ ເຕີ່ຍ-ປູງ ມ່າຍ ເບຢົ້າ ເຍີຍ. ເມີ່ຍ ບົວ ມີ່ງ ມ໌າຍ ເຕີ໋ຍ ຕ້າຍ ຫຍັ່ນ ມ່າະ! ເຖງ ບົວ ໄມ້ ຕສຸ ຫງໍ່ ຫຮນາງ ໄຕ່.” #ກົງ-ໂຕສ້ 7:12
3ໂຢເຊບ ເຍີຍ ຕສຽບ ເຕົ້າ ກໍ໋ ຕສ່ຽວ ມີ່ງ ອີຢິບ ເຕີ່ຍ-ປູງ ມ໌າຍ ເບຢົ້າ ອ໊ະ. 4ມປ່າ ໂຢເຊບ ເຍີຍ ໂຢ໌ວ, ເບນຢາມິນ, ຢາໂຄບ ໄມ້ ປຸນ ກັນ ນິ່ນ ກໍ໋ ບົວ ມີ່ງ. ກ້ຳ ເດສ໋ຍ ໄຮ່ ປວັ້ງ ຕສຸ ຫາຍ ຫຍູ່ງ ຫ່ອຍ ນິ່ນ ມເປີຍ. 5ຢາໂຄບ ເຍີຍ ຕອນ ບົວ ເຖສົາ ຈ໊ຽນ ມ່ຽນ ທສ້ຳ ມີ່ງ ອີຢິບ ເຕີ່ຍ-ປູງ ມ໌າຍ ເບຢົ້າ ເຫວີ່ຍ ຕສຸ ຄານາອັນ ເຕີ່ຍ-ປູງ ຢ່າ ປວັ້ງ ຕົ້ມ ຫງໍ່. #ກົງ-ໂຕສ້ 7:11
6ໂຢເຊບ ໂຕສ໋ວ ອີຢິບ ເຕີ່ຍ-ປູງ ເຍີຍ ຕສູ໋ງ, ໝ່າຍ ເບຢົ້າ ປຸນ ແປະ ຝີງ. ນິ່ນ ເຍີຍ ກໍ໋ ບົວ ມີ່ງ ເຖົາ ວົ້ວ ຕສ່ຽວ ພົວະ ເອຈ່ຍ ເຖົາ ເດົາ ປ໋າຍ ໂຢເຊບ. 7ໂຢເຊບ ເຕສັ໊ຍ ຕຸ໊ ນິ່ນ ເຍີຍ ກໍ໋ ບົວ ມປ່າ ນິ່ນ ໂຕສ໋ວ ຮນັ້ງ ໄມ້ ຮິ້ວ ນໍ. ນິ່ນ ເຖສົາ ນິ່ນ ບົວ ກ໊ອງ ຫວ່າ ເປ໊ະ ເຍີຍ ໜ່າຍ ກ໋າ, “ເມີ່ຍ ບົວ ຢຽມ ຫາຍ ຕ້າຍ?”
ນິ່ນ ບົວ ເຕົາ, “ເຢຍ ບົວ ຢຽມ ຄານາອັນ ເຕີ່ຍ-ປູງ ຕ້າຍ ມ໌າຍ ເບຢົ້າ.”
8ໂຢເຊບ ເຕສັ໊ຍ ຕຸ໊ ນິ່ນ ກໍ໋ ບົວ ເຍີຍ, ມປ່າ ນິ່ນ ເຍີຍ ກໍ໋ ບົວ ເຕສັ໊ຍ ໄມ້ ຕຸ໊ ນິ່ນ. 9ໂຢເຊບ ຈັ໋ງ ຕສຸ ນິ່ນ ຕສິ້ນ ດ່າງ ເບີ໋ຍ ເຍີຍ ເບີ໋ຍ. ນິ່ນ ແອ໋ງ ກ໊ອງ, “ເມີ່ຍ ບົວ ຕ້າຍ ທສ້າຍ ຈົ໊ວະ ຕສ້າ ໝັ່ງ ເຢຍ ບົວ ເຍີຍ ເຕີ່ຍ-ປູງ ເມົາ ເຍີຍ ຕ໋ອງ ຮນັ້ງ.” #ທິນ ເຕີ່ຍ ໂຕ້ວ 37:5-10
10ນິ່ນ ບົວ ເຕົາ, “ຕສ໊ຽວ ອ້າ! ເກ້ງ ໄມ້ ເຕສີ໌ຍ! ເຢຍ ບົວ, ເມີ່ຍ ເຍີຍ ໂປວ, ຕ້າຍ ມ໌າຍ ເບຢົ້າ ຮນັ້ງ. 11ເຢຍ ບົວ ຢຽດ ຕສູ໊ງ ເປ໋ນ ຢຽດ ເຕົ້າ ເຕຍ ເຍີຍ ຕອນ. ເຢຍ ບົວ ຢຽດ ຕສູ໊ງ, ເມີ່ຍ ເຍີຍ ໂປວ, ໂຮຍ້ວ ຕສີ໋ງ ເຍີຍ ມ່ຽນ. ເຢຍ ບົວ ໄມ້ ເຕສີ໌ຍ ຕ້າຍ ຕສ້າ ເຕີ່ຍ-ປູງ.”
12ໂຢເຊບ ແອ໋ງ ກ໊ອງ, “ໄມ້ ເຕສີ໌ຍ ອ໊ະ. ເມີ່ຍ ບົວ ຕ້າຍ ສຳ ໝັ່ງ ເຢຍ ບົວ ເຍີຍ ເຕີ່ຍ-ປູງ ຫາຍ ນອມ ຕ໋ອງ ເຜຍ ຮນັ້ງ.”
13ນິ່ນ ບົວ ກ໊ອງ, “ເຢຍ ບົວ, ເມີ່ຍ ເຍີຍ ໂປວ, ຢຽມ ຄານາອັນ ເຕີ່ຍ-ປູງ. ຢຽດ ຕສູ໊ງ ມ່າຍ ຕສຽບ ເຫຍີ່ຍ ມົ໌ວ-ຕອນ ຈວັ່ງ ເຕົ້າ ເຕຍ. ໂຢ໌ວ-ລາຍ ເຖສົາ ເຢຍ ບົວ ເຍີຍ ເຕຍ ຢຽມ ເປຢົ໊າ. ແອ໋ງ ມ່າຍ ເຕົ້າ ໂຢ໌ວ ໄຕ່ ໝີ່ ອ໊ະ.”
14ໂຢເຊບ ແອ໋ງ ເຕົາ, “ຕສະເກ້ງ ຮນັ້ງ ເຢຍ ກ໊ອງ ນໍ. ເມີ່ຍ ບົວ ຕ້າຍ ຕສ້າ ເຕີ່ຍ-ປູງ ຮນັ້ງ. 15ເຢຍ ຮນັ້ງ ນ້າຍ ນໍ ເສີຍ ເມີ່ຍ ບົວ. ເຢຍ ຕສຢັ໊ງ ຈ໊ຽນ ຟາໂລ ຮູ່ງ ເຍີຍ ແໝ່ງ ໂຮ້ວ ຫວ່າ. ທສວດ ລິ໌ວ ເມີ່ຍ ບົວ ເຍີຍ ໂຢ໌ວ-ລາຍ ຕ້າຍ ເຖົາ ນ້າຍ, ເມີ່ຍ ບົວ ໄມ້ ຕຸ໊ ທສວດ ນ້າຍ ນອມ ຕ໋ອງ. 16ປຸນ ເຕົ້າ ດສ໋ວນ ມີ່ງ ຕໍ້ ເມີ່ຍ ບົວ ເຍີຍ ໂຢ໌ວ-ລາຍ ຕ້າຍ. ເຕສ່ງ ເອຈ່ຍ ນ້າຍ ເຕີ໋ຍ, ເຢຍ ຫວວນ ຈ໊ຽນ ຕສົ໊ວ ເຖົາ ເຢຍ ບົວ ຮິ້ວ ຕຸ໊ ເມີ່ຍ ບົວ ເຍີຍ ຫວ່າ ຕສະເກ້ງ ຕສຽນ ໄຟ ໄມ້ ຕສຽນ. ເຊ ກ໊ອງ ເມີ່ຍ ບົວ ເຍີຍ ຫວ່າ ໄມ້ ຕສຽນ, ເຢຍ ຕສ່ຽວ ຮິ້ວ ຕຸ໊ ຕີ່ງ, ດົ່ງ ເຢຍ ຮິ້ວ ຕຸ໊ ຟາໂລ ຮູ່ງ ຕສຢັ້ງ ຈ໊ຽນ ນໍ, ເມີ່ຍ ບົວ ຕສະເກ້ງ ຕ້າຍ ຕສ້າ ເຕີ່ຍ-ປູງ ຮນັ້ງ.” 17ກ໊ອງ ລິ໌ວ, ໂຢເຊບ ເຕສ໊າະ ນິ່ນ ບົວ ຕໍ້ ມີ່ງ ຫວວນ ຈ໊ຽນ ໂລ່ ປົວ ຮນອຍ.
18ເຖົາ ຕະຟາມ ຮນອຍ, ໂຢເຊບ ກ໊ອງ ບົ໋ວ ນິ່ນ ກໍ໋ ບົວ, “ເຢຍ ເຊ ຕສັ່ງ ທິນ-ຮູ່ງ ເຍີຍ ມ່ຽນ. ເຊ ກ໊ອງ ເມີ່ຍ ບົວ ຕສິ໋ວ ເຢຍ ເຍີຍ ຫວ່າ ໂຕສ໋ວ, ເມີ່ຍ ບົວ ຕສ່ຽວ ຕຸ໊ ເມີ່ຍ ບົວ ເຍີຍ ແໝ່ງ ທສວດ. 19ເມີ່ຍ ບົວ ຕສະເກ້ງ ໂຮຍ້ວ ຕສະ ເຍີຍ ມ່ຽນ ນໍ, ອ໋ອຍ ຕສຸ ປຸນ ເຕົ້າ ຫວວນ ຈ໊ຽນ ນ້າຍ ໂລ່. ວົ້ວ ເຕີ໋ຍ ຕໍ້ ເບຢົ້າ ດສ໋ວນ ປຸນ ຢຽມ ເປຢົ໊າ ຫງໍ່ ຫຮນາງ ເຍີຍ ຮມວັ້ງ ຕ່ອຍ ຫຍັ່ນ. 20ມປ່າ ເມີ່ຍ ບົວ ອ໋ອຍ ຕສຸ ຕໍ້ ເມີ່ຍ ບົວ ເຍີຍ ໂຢ໌ວ-ລາຍ ຕ້າຍ ເຢຍ ນ້າຍ. ຮນັ້ງ ນ້າຍ ຕສ່ຽວ ປຸນ ທສີງ ເມີ່ຍ ບົວ ເຍີຍ ຫວ່າ ເຊ ຕສຽນ. ເມີ່ຍ ບົວ ຢ່າ ໄມ້ ຕສຸ ໄຕ່.” ນິ່ນ ບົວ ຕສ່ຽວ ແລ໌ງ ເອີຍ ຈ໊ຽນ ໂຕສ໋ວ.
21ລ່ານ ກ໊ອງ ບົ໋ວ ລ່ານ, “ຕສິ້ນ ດ່າງ ບົວ ໂຕສ໋ວ ໂຕະ ບົວ ເຍີຍ ໂຢ໌ວ. ວົ້ວ ຕສັ່ນ ບົວ ປວັດ ນິ່ນ ດົ່ງ ຫາຍ ໂຄ້ວ, ນິ່ນ ເອຈ່ຍ ທຈະ ໂທ້ ບົວ, ບົວ ຢ່າ ໄມ້ ໝວັງ. ເຫວີ່ຍ ນ້າຍ, ບົວ ອີ້ ຕສັ່ນ ຖສີງ ປວັ້ງ ຕສຸ ນ້າຍ ເຕີ໋ຍ ສີ່.”
22ລູເບນ ກ໊ອງ, “ເຢຍ ປ໊າ ເມີ່ຍ ບົວ ໄມ້ ຕູ໋ງ ໂຕສ໋ວ ຫ່ອຍ ວົ້ວ ເຕົ້າ ຕອນ, ມປ່າ ເມີ່ຍ ບົວ ໄມ້ ໝວັງ. ອີ້ ຕສັ່ນ ຫລາຍ ໄຕ໋ ນິ່ນ, ບົວ ຖສີງ ຕ້າຍ ອ໋ອຍ ຕສຸ ສ່ຽວ ຕສຸ໌ຍ ດົ່ງ ນ້າຍ ໂຄ້ວ.” #ທິນ ເຕີ່ຍ ໂຕ້ວ 37:21-22 23ນິ່ນ ບົວ ໄມ້ ຮິ້ວ ຕຸ໊ ໂຢເຊບ ເມ່ງ ແປະ ນິ່ນ ບົວ ກ໊ອງ ເຍີຍ ຫວ່າ ເຫວີ່ຍ ຕສຸ ນິ່ນ ຫາຍ ຕສັ່ນ ເຖສົາ ນິ່ນ ບົວ ກ໊ອງ ຫວ່າ ມ່າຍ ມ່ຽນ ເຖງ ຟານ.
24ໂຢເຊບ ໄຮ໌ ນ້າຍ ເຕີ໋ຍ ຫວ່າ, ນິ່ນ ຕສ່ຽວ ທສວດ ມີ່ງ ຍ້ຽມ. ຍ້ຽມ ລິ໌ວ, ນິ່ນ ແອ໋ງ ເປັຍ ມີ່ງ ເຖສົາ ນິ່ນ ບົວ ກ໊ອງ ຫວ່າ ຢ່າ ເຕສ໊າະ ສິເມໂອນ ທສວດ ຕ້າຍ ຕອງ ຈ໊ຽນ ນິ່ນ ບົວ ໂດ້ ຈ໊ຽນ ອ໊ະ.
25ໂຢເຊບ ເຫ່ວ ມ່ຽນ ເຕສ໊າະ ເບຢົ້າ ຕັ໊ບ ປວັ໊ງ ນິ່ນ ກໍ໋ ບົວ ເຍີຍ ບົວະ, ແອ໋ງ ເຕສ໊າະ ເກ໊າະ-ມ່ຽນ ມ໌າຍ ເບຢົ້າ ເຍີຍ ຍ່ານ ຕັ໊ບ ເກ໊າະ-ມ່ຽນ ເຍີຍ ບົວະ ດສຸ້ຍ, ແອ໋ງ ເຖງ ນິ່ນ ບົວ ຫລິ່ວ ເລີ໌ຍ ດ໊າມ-ເຈົ໊າ ຫຍັ່ນ ເຍີຍ ປ້ຽນ ຝຸຍ ປຸນ ນິ່ນ ບົວ. ມ່ຽນ ຕສ່ຽວ ເອີຍ ຈ໊ຽນ ນິ່ນ ເຍີຍ ຫວ່າ ໂຕສ໋ວ.
ໂຢເຊບ ເຍີຍ ກໍ໋ ດສ໋ວນ ຄານາອັນ ເຕີ່ຍ-ປູງ
26ໂຢເຊບ ເຍີຍ ກໍ໋ ບົວ ເບ່ນ ຕສຢັ໋ງ ປຸນ ລໍ່ ທໍ ຈ໊ຽນ ເບຢົ້າ ຕສ່ຽວ ທສວດ ເຈົ໊າ ດສ໋ວນ. 27ວົ້ວ ມ໌ວນ ເຖົາ ນິ່ນ ບົວ ຮິດ ເຍີຍ ຕ໋ອງ, ມ່າຍ ເຕົ້າ ຄອຍ ນິ່ນ ເຍີຍ ບົວະ, ອ໋ອຍ ເຕສ໊າະ ເຕີ໋ຍ ເບຢົ້າ ຫວຸຍ ລໍ່, ຢ່າ ປວັດ ມ໌າຍ ເບຢົ້າ ເຍີຍ ຍ່ານ ຢຽມ ວົ້ວ ບົວະ ດສຸ້ຍ. 28ນິ່ນ ກ໊ອງ ບົ໋ວ ນິ່ນ ເຍີຍ ມົ໌ວ-ຕ່ອຍ, “ເຢຍ ເຍີຍ ຍ່ານ ນິ່ນ ບົວ ແອ໋ງ ປຸນ ດສ໋ວນ ຕ້າຍ ແອ໋! ຢຽມ ນ້າຍ ເຢຍ ເຍີຍ ບົວະ ດສຸ້ຍ.”
ນິ່ນ ບົວ ໄຮ໌ ໂຮຍ້ວ ຫວ່າຍ ເດສ່ງ, ເມີ່ຍ ໝັ່ງ ເຢຍ, ເຢຍ ໝັ່ງ ເມີ່ຍ, ຊິນ ຕສິ໋ນ ຈ໊ຽນ ກ໊ອງ, “ທິນ-ຮູ່ງ ຮນັ້ງ ຫາຍ ນໍ ໂຕສ໋ວ ປຸນ ບົວ ມເປີຍ?”
29ດສ໋ວນ ເຖົາ ຄານາອັນ ເຕີ່ຍ-ປູງ, ນິ່ນ ບົວ ເຍີຍ ເຕຍ, ຢາໂຄບ ວົ້ວ, ນິ່ນ ບົວ ເຕສວີ້ຍ ຢ໊ຽດ ເຕສວີ້ຍ ເຫຍີ່ຍ ເຍີຍ ກ໊ອງ ເດສ່ງ ນິ່ນ ບົວ ປວັ້ງ ເຍີຍ ສີ່ ປຸນ ນິ່ນ ໝວັງ. 30ນິ່ນ ບົວ ກ໊ອງ, “ວົ້ວ ນອມ ເຕີ່ຍ-ປູງ ເຍີຍ ຕສ໊ຽວ ກ໊ອງ ທສ້ຽວ ເຍີຍ ປຸນ ເຢຍ ບົວ, ຮນັ້ງ ເຢຍ ບົວ ໂຕສ໋ວ ຕສ້າ ເຕີ່ຍ-ປູງ ເຍີຍ ມ່ຽນ. 31ເຢຍ ບົວ ເຕົາ, ‘ເຢຍ ບົວ ໄມ້ ເຕສີ໌ຍ ຕ້າຍ ຕສ້າ ເຕີ່ຍ-ປູງ. ເຢຍ ບົວ ເຊ ໂຮຍ້ວ ຕສະ ເຍີຍ ມ່ຽນ. 32ຢຽດ ຕສູ໊ງ ມ່າຍ ຕສຽບ ເຫຍີ່ຍ ມົ໌ວ-ຕອນ ຈວັ່ງ ເຕົ້າ ເຕຍ. ມ່າຍ ເຕົ້າ ໂຢ໌ວ ໄມ້ ຢຽມ ອ໊ະ. ໂຢ໌ວ-ລາຍ ຖສໍ່ ເຖສົາ ນິ່ນ ເຍີຍ ເຕຍ ຢຽມ ຄານາອັນ ເຕີ່ຍ-ປູງ.’
33“ວົ້ວ ນອມ ເຕີ່ຍ-ປູງ ເຍີຍ ຕສ໊ຽວ ກ໊ອງ, ‘ເຢຍ ຮນັ້ງ ນ້າຍ ນໍ ໂຕສ໋ວ ເສີຍ ໝັ່ງ ກ໋າ ເມີ່ຍ ບົວ ຕສະເກ້ງ ໂຮຍ້ວ ຕສະ ໄຟ ໄມ້ ຕສະ. ເມີ່ຍ ບົວ ອ໋ອຍ ຕສຸ ປຸນ ເຕົ້າ ເຖສົາ ເຢຍ ຢຽມ ນ້າຍ. ວົ້ວ ເຕີ໋ຍ ຕໍ້ ເບຢົ້າ ດສ໋ວນ ມີ່ງ ປຸນ ຫງໍ່ ຫຮນາງ ເຍີຍ ຮມວັ້ງ ຕ່ອຍ ຫຍັ່ນ. 34ອ໋ອຍ ຕສຸ ຕໍ້ ເມີ່ຍ ບົວ ເຍີຍ ໂຢ໌ວ-ລາຍ ຕ້າຍ ປຸນ ເຢຍ ໝັ່ງ. ເຢຍ ຕສ່ຽວ ຮິ້ວ ຕຸ໊ ເມີ່ຍ ບົວ ໂຮຍ້ວ ຕສະ ເຍີຍ ມ່ຽນ, ໄມ້ ເຕສີ໌ຍ ຕ້າຍ ຕສ້າ ເຕີ່ຍ-ປູງ. ເຢຍ ຕສ່ຽວ ປູ໋ງ ເມີ່ຍ ບົວ ເຍີຍ ກໍ໋ ປຸນ ເມີ່ຍ ບົວ. ເມີ່ຍ ບົວ ຢຽມ ນ້າຍ ເຕີ່ຍ-ປູງ ໂຕສ໋ວ ແຊງ-ເອີ໋ຍ #42:34 ໂຕສ໋ວ ແຊງ-ເອີ໋ຍ ໄຟ ເຈ໋ຍ ນ້າຍ ເຈ໋ຍ ວົ້ວ. ຢ່າ ຕຸ໊ ເຍີຍ.’”
35ນິ່ນ ບົວ ໂຕ໋ ເບຢົ້າ ທສວດ ວົ້ວ ຕສັ່ນ, ເກ໊າະ-ມ່ຽນ ປວັດ ເກ໊າະ-ມ່ຽນ ເຍີຍ ຍ່ານ ເປວ ຢຽມ ວົ້ວ ເບຢົ້າ ບົວະ ກະຍົ໌ວ. ນິ່ນ ບົວ ເຖສົາ ນິ່ນ ບົວ ເຍີຍ ເຕຍ ປວັດ ຍ່ານ ເປວ, ນິ່ນ ບົວ ຕສ່ຽວ ກ້ຳ ເດສ໋ຍ ໄຫ່. 36ນິ່ນ ບົວ ເຍີຍ ເຕຍ, ຢາໂຄບ, ກ໊ອງ ບົ໋ວ ນິ່ນ ບົວ, “ເມີ່ຍ ບົວ ອ໋ອຍ ໂຕສ໋ວ ປຸນ ເຢຍ ເຍີຍ ຝຸຈ໊ວຍ ໄມ້ ເຕສ່ງ ຢຽດ ເຕົ້າ? ໄມ້ ມ່າຍ ໂຢເຊບ ອ໊ະ. ຢ່າ ໄມ້ ມ່າຍ ສິເມໂອນ. ອີ້ ຕສັ່ນ ເມີ່ຍ ບົວ ແອ໋ງ ອ໋ອຍ ຕໍ້ ເບນຢາມິນ ມີ່ງ. ຫາຍ ຫຍູ່ງ ສີ່ ຢ່າ ຂູງ ຫ່ອຍ ເຢຍ ເຕ໊ຍ ຮນັ້ງ.”
37ລູເບນ ກ໊ອງ ບົ໋ວ ນິ່ນ ເຍີຍ ເຕຍ, “ເຊ ກ໊ອງ ເຢຍ ໄມ້ ຕຸ໊ ຕໍ້ ເບນຢາມິນ ດສ໋ວນ ຕ້າຍ ປຸນ ເມີ່ຍ, ເມີ່ຍ ກຸ໊ນ ເຕສ໊າະ ເຢຍ ເຍີຍ ອີ ເຕົ້າ ຕອນ ໄຕ໋ ກວັ່ງ ຕຸ໊ ເຍີຍ. ກຸ໊ນ ປຸນ ເຢຍ ໂກ໋ວ ເບນຢາມິນ. ເຢຍ ແອ໋ງ ຕໍ້ ນິ່ນ ດສ໋ວນ ຕ້າຍ ປຸນ ເມີ່ຍ.”
38ມປ່າ ຢາໂຄບ ກ໊ອງ, “ເຢຍ ດົ່ງ ຫາຍ ຕສູ໊ງ ໄມ້ ປຸນ ເຢຍ ເຍີຍ ຕອນ ເຖສົາ ເມີ່ຍ ບົວ ມີ່ງ. ນິ່ນ ເຍີຍ ກໍ໋ ໄຕ່ ໝີ່ ອ໊ະ. ຂູງ ເຕສ່ງ ນິ່ນ ກັ້ນ ຮນັ້ງ. ກ້ຳ ເດສ໋ຍ ດ໊າມ-ເຈົ໊າ ປວັ້ງ ຕສຸ ຫາຍ ຫຍູ່ງ ສີ່ ຫ່ອຍ ນິ່ນ, ເມີ່ຍ ບົວ ຕສ່ຽວ ປຸນ ເຢຍ, ອົງ-ມອກ໊ອງ-ແປະ, ເດສົ້າ ຕຸ໊ ໄຕ່ #42:38 ໄຕ່ ຮິບລູ ຫວ່າ ກ໊ອງ ມີ່ງ ຢຽມ ຢ້ຽມ ເກນ. ເຍີຍ.”
Voafantina amin'izao fotoana izao:
ທິນ ເຕີ່ຍ ໂຕ້ວ 42: IuMiLAO
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Mien Bible (Lao Script) © 2007 Thailand Bible Society, 2007.