ທິນ ເຕີ່ຍ ໂຕ້ວ 39
39
ໂຢເຊບ ແຫງ່ງ ໂປທິຟາ ເຍີຍ ເອົ໊າ
1ອິສະມາເອນ ມ່ຽນ ຕໍ້ ໂຢເຊບ ມີ່ງ ອີຢິບ ເຕີ່ຍ-ປູງ ໝ່າຍ ປຸນ ເຕົ້າ ອີຢິບ ມ່ຽນ, ເຊ ຟາໂລ ຮູ່ງ ເຍີຍ ຕົ້ມ ຈຽນ, ຕົ້ງ ໂກ໋ວ ຮູ່ງ ຕິ່ນ ເຍີຍ ຕົ້ມ ແປງ-ເປຢີ໊ຍ, ໂປທິຟາ.
2ນິ່ນ ຢຽມ ນິ່ນ ເຍີຍ ອີຢິບ ມ່ຽນ ເປຢົ໊າ-ຕສ໊ຽວ ເຍີຍ ເປຢົ໊າ. ຕສ໊ຽວ ເຖສົາ ໂຢເຊບ ຢຽມ, #ກົງ-ໂຕສ້ 7:9 ປຸນ ນິ່ນ ຕຸ໊ ຫລົງ. 3ວົ້ວ ເຕົ້າ ເປຢົ໊າ-ຕສ໊ຽວ ປວັດ ຕສ໊ຽວ ເຖສົາ ໂຢເຊບ ຢຽມ. ຕສ໊ຽວ ຢ່າ ປຸນ ໂຢເຊບ ຢຽມ ນິ່ນ ໂຕສ໋ວ ເຍີຍ ຫຍູ່ງໆ ຕຸ໊ ຫລົງ. 4ໂຢເຊບ ໂຕສ໋ວ ຕຸ໊ ຫອບ ໂປທິຟາ ເຍີຍ ໂຮຍ້ວ ຢ່າ ຕຸ໊ ໂຕສ໋ວ ນິ່ນ ເຍີຍ ເຫລ່ງ ເຈີ໊ຍ ໂປວ. ໂປທິຟາ ຕສ່ຽວ ປຸນ ນິ່ນ ໂກ໋ວ ເປຢົ໊າ ຕສົງ ເຖສົາ ຈາ-ຕີ້ງ ຢຽດ ຕສູ໊ງ ກະນ້າຍ. 5ຢຽມ ໂປທິຟາ ພ້າຍ ໂຢເຊບ ໂກ໋ວ ຈ໊ຽນ ນິ່ນ ເຍີຍ ເປຢົ໊າ ຕສົງ ຢຽດ ຕສູ໊ງ ຈາ-ຕີ້ງ, ຕສ໊ຽວ ເຫວີ່ຍ ໂຢເຊບ ເຖສີຍ ຟຸ ປຸນ ວົ້ວ ເຕົ້າ ອີຢິບ ມ່ຽນ ເຍີຍ ຈາ-ຕີ້ງ. ຕະຟ່ານ ຢຽມ ເປຢົ໊າ ຢຽມ ເດີ່ຍ ເຍີຍ ຢຽດ ຕສູ໊ງ ຕສ່ຽວ ທສ້ຳ ຈ໊ຽນ ຝາວ. 6ໂປທິຟາ ເຍີຍ ຢຽດ ນອມ ຈາ-ຕີ້ງ ຫຍູ່ງໆ ກະນ້າຍ ນິ່ນ ຈິວ ປຸນ ໂຢເຊບ ໂກ໋ວ ເດສ່ງ. ທສວດ ລິ໌ວ ນິ່ນ ກັ້ນ ເຍີຍ ຫຍັ່ນ ຮົບ, ນິ່ນ ໄມ້ ຕສຸ ເດສົ້າ ຫາຍ ຫຍູ່ງ.
ໂຢເຊບ ເຍີຍ ຊິນ-ເພີຍ ຕສຢັ້ງ ຕຸ໊ ຫລົງ, ຮມຽນ-ເໝວີ່ຍ ຢ່າ ເດສວີ່ຍ. 7ຢຽມ ເກົາ, ນິ່ນ ເຍີຍ ຕສ໊ຽວ ເຍີຍ ເອົ໊າ ໝັ່ງ ໂຢເຊບ ໄຮ໌ ຫັ່ນ ໄຫ່, ຕສ່ຽວ ຢົວະ ນິ່ນ ກ໊ອງ, “ເມີ່ຍ ຕ້າຍ ເຖສົາ ເຢຍ ເປວີ໋ຍ ໂອ່.”
8ມປ່າ ໂຢເຊບ ໄມ້ ໝວັງ. ນິ່ນ ກ໊ອງ ບົ໋ວ ນິ່ນ ເຍີຍ ຕສ໊ຽວ ເຍີຍ ເອົ໊າ, “ເຢຍ ເຍີຍ ຕສ໊ຽວ ໄມ້ ຕສຸ ເດສົ້າ ຢຽມ ເປຢົ໊າ ກະຍົ໌ວ ເຍີຍ ຫາຍ ຫຍູ່ງ. ຢຽດ ຕສູ໊ງ ຈາ-ຕີ້ງ ນິ່ນ ຈິວ ປຸນ ເຢຍ ໂກ໋ວ. 9ຢຽມ ນ້າຍ ເປຢົ໊າ ເຢຍ ມ່າຍ ຫັດ ມ໌າ ດົ່ງ ນິ່ນ ໂຮລ. ເຢຍ ເຍີຍ ຕສ໊ຽວ ໄມ້ ແດສງ ຫາຍ ຫຍູ່ງ ທສວດ ລິ໌ວ ເມີ່ຍ ເຫວີ່ຍ ຕສຸ ເມີ່ຍ ໂຕສ໋ວ ນິ່ນ ເຍີຍ ເອົ໊າ. ເຢຍ ຝູ່ງ ໄຮ່ ໂຕສ໋ວ ຫວ່າຍ ສີ່ ດົ່ງ ໜ່າຍ ໂຮລ, ປ໌າມ ຕສຸ໌ຍ ຕ່ອງ ທິນ-ຮູ່ງ?” 10ໄມ້ ກຸ໊ນ ວົ້ວ ເຕົ້າ ເອົ໊າ ຮນອຍໆ ຢົວະ ໂຢເຊບ, ໂຢເຊບ ໄມ້ ຄັ້ງ ເຖສົາ ນິ່ນ ເປວີ໋ຍ, ລ່ຽມ ໄມ້ ເຖສົາ ນິ່ນ ຢຽມ ຢຽດ ນອມ ຕ໋ອງ.
11ມ່າຍ ຮນອຍ ນໍ, ໂຢເຊບ ເປັຍ ເປຢົ໊າ ໂຕສ໋ວ ນິ່ນ ຫອບ ຕສຸ ໂຕສ໋ວ ເຍີຍ ກົງ, ຢ່າ ໄມ້ ມ່າຍ ຢຽດ ເຕົ້າ ເປຢົ໊າ ເຍີຍ ໂປວ ຢຽມ ວົ້ວ. 12ໂປທິຟາ ເຍີຍ ເອົ໊າ ເຍົາ ຈ໊ຽນ ໂຢເຊບ ເຍີຍ ລຸຍ ກ໊ອງ, “ຕ້າຍ ເຖສົາ ເຢຍ ເປວີ໋ຍ ມ່າະ!” ມປ່າ ໂຢເຊບ ກວັ່ງ ຈ໊ຽນ ນິ່ນ ເຍີຍ ລຸຍ ຢຽມ ວົ້ວ ເຕົ້າ ເອົ໊າ ເຍີຍ ປົ໌ວ, ເປຢົ໋າ ທສວດ ກະເຫຍ່ຍ ຕສິ ເປຢົ໊າ ມີ່ງ.
13ວົ້ວ ເຕົ້າ ເອົ໊າ ປວັດ ໂຢເຊບ ກວັ່ງ ຈ໊ຽນ ນິ່ນ ເຍີຍ ລຸຍ ເປຢົ໋າ ທສວດ ກະເຫຍ່ຍ, 14ນິ່ນ ຕສ່ຽວ ເໜົ່າໆ ເຍີຍ ເຫ່ວ ຢຽມ ນິ່ນ ເຍີຍ ເປຢົ໊າ ວົ້ວ ເຕີ໋ຍ ມຈັ່ງ ໂປວ ຕ້າຍ. ນິ່ນ ກ໊ອງ, “ໝັ່ງ ກ໋າ ໜ່າຍ! ເຢຍ ເຍີຍ ໂອກ໋ ຕໍ້ ນ້າຍ ເຕົ້າ ຮິບລູ ມ່ຽນ ຕ້າຍ. ອີ້ ຕສັ່ນ ນິ່ນ ໝັ່ງ ເຜຍ ເຢຍ ບົວ. ນິ່ນ ເປັຍ ຕ້າຍ ອ໋ອຍ ເຢຍ ເຖສົາ ນິ່ນ ເປວີ໋ຍ, ມປ່າ ເຢຍ ທຈະ ເໜົ່າ. 15ນິ່ນ ໄຮ໌ ເຢຍ ເຫ່ວ, ນິ່ນ ຕສ່ຽວ ກວັ່ງ ຈ໊ຽນ ນິ່ນ ເຍີຍ ລຸຍ ຢຽມ ເຢຍ ນ້າຍ ແອ໋ງ ເປຢົ໋າ ທສວດ ເປຢົ໊າ ໝີ່ ອ໊ະ.”
16ວົ້ວ ເຕົ້າ ເອົ໊າ ເຕສ໊າະ ໂຢເຊບ ເຍີຍ ລຸຍ ອັນ ຈ໊ຽນ ນິ່ນ ເຍີຍ ກະເຮລນ ຕສົ໊ວ ໂຢເຊບ ເຍີຍ ຕສ໊ຽວ ດສ໋ວນ ຕ້າຍ. 17ນິ່ນ ຕສ່ຽວ ຮນັ້ງ ນ້າຍ ນໍ ກ໊ອງ, “ຕົ້ງ ເມີ່ຍ ຕໍ້ ຕ້າຍ ບົວ ນ້າຍ ວົ້ວ ເຕົ້າ ຮິບລູ ໂນ່ວ ເກົ໊າ ເປັຍ ຕ້າຍ ໝັ່ງ ເຢຍ ໄມ້ ເຈ໌ຍ, ອ໋ອຍ ເຖສົາ ເຢຍ. 18ເຢຍ ທຈະ ເຫ່ວ, ນິ່ນ ຕສ່ຽວ ກວັ່ງ ນິ່ນ ເຍີຍ ລຸຍ ຢຽມ ເຢຍ ນ້າຍ ເປຢົ໋າ ທສວດ ແກ້ງ ຂະເດົາ ໝີ່ ອ໊ະ.”
19ໂຢເຊບ ເຍີຍ ຕສ໊ຽວ ໄຮ໌ ນິ່ນ ເຍີຍ ເອົ໊າ ກ໊ອງ, “ເມີ່ຍ ເຍີຍ ໂນ່ວ ຮນັ້ງ ນ້າຍ ນໍ ໂຕສ໋ວ ປຸນ ເຢຍ,” ນິ່ນ ຕສ່ຽວ ເຖຈຍ ເຈ໌ຍ! ໄຫ່, 20ເຕສ໊າະ ໂຢເຊບ ຫວວນ ຈ໊ຽນ ໂລ່, ຕົ້ງ ຫວວນ ຮູ່ງ ເຕ໋ຍ ເຍີຍ ຕສຸ໌ຍ-ມ່ຽນ ວົ້ວ ນອມ ໂລ່.
ໂຢເຊບ ຕສຸ ຫວວນ ຈ໊ຽນ ວົ້ວ 21ມປ່າ ທິນ-ຮູ່ງ ເຖສົາ ນິ່ນ ຢຽມ, #ກົງ-ໂຕສ້ 7:9 ຢ່າ ໂຕສ໋ວ ຫລົງ ປຸນ ນິ່ນ, ປຸນ ນິ່ນ ໂຕສ໋ວ ຕຸ໊ ຫອບ ໂກ໋ວ ໂລ່ ວົ້ວ ເຕົ້າ ຈຽນ ເຍີຍ ໂຮຍ້ວ. 22ໂກ໋ວ ໂລ່ ຈຽນ ຕສ່ຽວ ປຸນ ໂຢເຊບ ໂກ໋ວ ຢຽດ ຕສູ໊ງ ຢຽມ ໂລ່ ເຍີຍ ຕສຸ໌ຍ-ມ່ຽນ. ຕະຟ່ານ ຢຽມ ໂລ່ ກະຍົ໌ວ ເຍີຍ ສີ່, ໂຢເຊບ ກັ້ນ ກຸ໊ນ ເດສ່ງ. 23ໂຢເຊບ ໂກ໋ວ ຈ໊ຽນ ເຍີຍ ຢຽດ ຕສູ໊ງ ສີ່, ໂກ໋ວ ໂລ່ ຈຽນ ໄມ້ ຕສຸ ເດສົ້າ ເຫວີ່ຍ ຕສຸ ຕສ໊ຽວ ເຖສົາ ໂຢເຊບ ຢຽມ. ນິ່ນ ໂຕສ໋ວ ເຍີຍ ຫຍູ່ງໆ ຕສ໊ຽວ ເຖງ ນິ່ນ ໂຕສ໋ວ ຕຸ໊ ຫລົງ.
Voafantina amin'izao fotoana izao:
ທິນ ເຕີ່ຍ ໂຕ້ວ 39: IuMiLAO
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Mien Bible (Lao Script) © 2007 Thailand Bible Society, 2007.