Yohane 17
17
Yesu Ɔ́kpali Katɔ
1Ka Yesu ɔ́su-ma ala amɛni ɔ́wɔlɔ ni, ɔ́kɔliku anumi ɔ́nu katɔ na ɔ́su ɔnini, “Ati, uwi ɔmmɔ údu. Kɔliku ami ƒ'ubidi katɔ kalɛ na ami lɛnɔ lɛ́kɔliku ƒula lɛnyi katɔ. 2Ɔsika éti ɔyikun unengudi éte-mi na kayawi bekyuli ƒui akɔ kalɛ na lɛya na bani ƒui na éti éte-mi ni, belie ngba bɔni nsɔ naaadubo bɔsa kudii. 3Na ngba bɔni nsɔ naaadubo bɔsa kudii mɛni kalɔ ndi ka bekyuli bamɛni bati awɔ, na bati ka awɔ lɛti pɛ ndi Katɔti geen ɔmmɔ, na bati ami Yesu Kristo ɔni na átala. 4Lɛ́kɔliku ƒula lɛnyi katɔ na bekyuli akɔ na kalɔ lɛlɔ. Na lɛ́wɔlɔ kabla kani na éte-mi ka mbabla. 5Ɔƒɛni ni, Ati, sɔ kɔliku mina lɛnyi katɔ na ƒula anumi aani kalɛ na nse ɔni na lɛ́kya-a kudɔ asa na édie kayawi.
Yesu Ɔ́kpali Katɔ Na Nwuna Batɛyane Lili
6“Lɛ́ɛya na bekyuli bani na áƒuna álɛku kayawi bekyuli akɔ éte-mi báti-ɔ. Awɔ ɔdi na badi, na éti-ma éte-mi. Bádi ƒula etemila ƒui lɛlɔ. 7Na bagyi ɔƒɛni ka lɛla biala na éte-mi ni, ƒula kudɔ na lɛ́si. 8Kenye kani na ásu-mi ka mabasu-ma ni, bégyingya enu báƒɔ-ka. Na bagyi ka sɔsɔ na ɔdi ka ƒula kudɔ na lɛ́si, na awɔ nátala-mi. 9Mɔɔkpali katɔ na bana lili, na ɔɔɔdi kayawi bekyuli ƒui lili. Mmomu bani na éti éte-mi lili, ɔsika awɔ ɔdi na badi.
10“Bani ƒui na mbo ni, awɔ badi na badi. Na bani ƒui na ebo ni, ami badi na badi. Na bekyuli baakɔliku-mi lɛnyi katɔ ɔkɛnku ama ɔsu. 11Na ɔƒɛni ni, lɛ́tɔlɔ ndubo-ɔ kudɔ. Na nsɔ lɛɛɛkya kayawi kamɛni kemmo. Nsu ama bamu bakya kayawi. Ati Kedee, gyumana-ma ɔkɛnku ɔyikun ala ani mɔɔlɛ́ si bákpali-ɔ lɛnyi. Na lɛnyi lɛmmɔ kani na éti éte-mi. Ɔmɛni ndubɔya na babla unwi aani kalɛ na ami ku awɔ bɔdi benwi. 12Uwi ɔni na nkya-ma kudɔ ni, lɛ́da-ma kɔkɔɔkɔ na lɛ́gyumana-ma ɔkɛnku ɔyikun ɔni nkya lɛnyi lɛni na éte-mi kemmo. Ńtayila bana akɔ ɔdi, amu ntu anwu ɔni básu bese ka ayila-nwu udu. Ɔmɛni ndubɔya na Bunweni Kedee Ɔku kemmo etemila ebo-nwu kemmo kalɛ na básu.
13“Na ɔƒaani ni, lɛ́tɔlɔ ndubo-ɔ kudɔ na muuvele-ɔ ɔmɛni lite-ma na kayawi kalɛ na mina ebiti aƒɔ-ma kayi kemmo ƒui na edu awɔlɔ. 14Líboku-ma ƒula linyesia na kayawi bekyuli békisi-ma, ɔsika ɔɔɔdi kayawi kamɛni ɔdi na badi kalɛ kani na ami lɛnɔ lɛɛɛdi kayawi kamɛni ɔdi.
15“Na ɔɔɔdi buvele na nda-a nnii da-ma die kayawi kamɛni kemmo. Mmomu buvele na nda-a ka agyumana-ma alɛku ukisine ɔmmɔ enu kemmo. 16Kalɛ kani na lɛɛɛdi kayawi kamɛni ɔdi ni, lɛni kani na ama lɛnɔ baaadi kayawi kamɛni badi. 17Bla-ma kedee te ƒula lɛlɔ ɔkɛnku ƒula etemila geen ani na bénu lɛlɔ. Ɔsika ƒula litemi lɛdi litemi geen. 18Lɛ́tala-ma mɔɔkya kayawi bekyuli aani kalɛ kani na átala-mi ákya kayawi bekyuli. 19Na ama ɔsu ni, lɛ́bla lɛlɔ kedee lite-ɔ kalɛ na akana abla ama lɛnɔ kedee.
Yesu Ɔ́kpali Katɔ Na Baƒɔtaadine Ƒui Lili
20“Ɔɔɔdi ama lɛti lili na mɔɔkpali-ɔ teevele lɛla lɛdi. Mmomu ku bekyuli bani ƒui ndubɔƒɔ-mi badi ɔkɛnku ƒula litemi buni lɛni badubɔsu-ma kemmo lili lɛnɔ na muuvele. 21Ati, muuvele ka aya na bana ƒui babla unwi aani kalɛ kani na awɔ eliku-mi na ami lɛnɔ nliku-ɔ. Ya na belieku-bu kalɛ na kayawi bekyuli baƒɔ badi ka awɔ nátala-mi.
22“Líte-ma lɛnyi buni lɛni na éte-mi kalɛ na bana ƒui babla unwi kalɛ kani na ami ku-ɔ bɔdi unwi. 23Ami nliku-ma, na awɔ eliku-mi. Ya na babla unwi bawɔlɔ kalɛ na kayawi bekyuli banu bati ka awɔ nátala-mi, na aayɔ́-ma kalɛ kani na aayɔ́-mi.
24“Ati, awɔ néti-ma éte-mi. Na mɔɔwia ka belie-mi kudɔ na kesii kani na nkya kalɛ na banu kalɛ na ákɔliku-mi lɛnyi katɔ. Ɔmɛni ndi lɛnyi lɛni na éte-mi. Ɔsika aayɔ́-mii kukuuku asa na édie kayawi ku kana lɛla biala.
25“Ati, ese siin. Na kayawi bekyuli baaagyi-ɔ, nsu ami ngyi-ɔ. Na ƒula badi lɛnɔ bagyi ka awɔ nátala-mi. 26Lídie-ɔ lɛ́tina-ma. Na ndubo butaabla lɛni kalɛ na bati ka aayɔ́-ma aani kalɛ na aayɔ́-mi, na bati ka nliku-ma.”
Voafantina amin'izao fotoana izao:
Yohane 17: lef
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
