San Mateo 2

Ñayóꞌo káꞌa̱n xa̱ꞌa̱ nandíchí na nákoni ki̱mi ki̱vi̱ ki̱xaa̱ na xi̱to na ta̱Jesús

1Ta̱Jesús ka̱ku ra ñoo Belén ña ndáꞌvi ndaa estado Judea, ta ta̱Herodes xi̱kuu rey ñoo estado Judea. Ta saá ki̱xaa̱ nandíchí na nákoni ki̱mi ñoo Jerusalén; nayóꞌo ki̱xi na chí no̱o̱ va̱xi kana ño̱ꞌo. 2Ta saá ki̱xáꞌá na ndáka̱ to̱ꞌon na nañoo Jerusalén, káchí na siꞌa:

―¿Míkía̱ ka̱ku ta̱loꞌo ta̱ kuu rey no̱o̱ ndóꞌó najudío?#2:2 Najudío kúu nasa̱ꞌya ñani síkuá ta̱Israel ta̱ xi̱naní Jacob xi̱na̱ꞌá. Chí no̱o̱ va̱xi kana ño̱ꞌo xi̱ni ndi̱ ñii ki̱mi, ta saá ku̱nda̱a̱ ini ndi̱ xa ka̱ku ra, ta vitin va̱xi ndi̱ yóꞌo ña kasa to̱ꞌó ndi̱ ra ―káchí nandíchí.

3Ki̱vi̱ xi̱ni̱ so̱ꞌo ta̱rey Herodes to̱ꞌon ña ni̱ka̱ꞌa̱n nandíchí yóꞌo, ta ni̱ndiꞌi ní ini ra. Ta ñii ki̱ꞌva saá ni̱ndiꞌi ini nañoo Jerusalén. 4Ta saá ta̱rey Herodes ka̱na ndiꞌi ra nanáꞌno no̱o̱ nasu̱tu̱, ta ka̱na ra ndiꞌi na sánáꞌa nda̱yí Ndios, ta ki̱xaa̱ ndiꞌi nayóꞌo no̱o̱ ra. Ta ni̱nda̱ka̱ to̱ꞌon ra nayóꞌo, míkía̱ kaku Cristo. 5Ta nayóꞌo nda̱kuii̱n na, káchí na saá:

―Ñoo Belén ña ndáꞌvi ndaa estado Judea yóꞌo kaku ra, chi saá káchí to̱ꞌon Ndios ña ni̱taa ta̱profeta xi̱na̱ꞌá, káchí ña saá:

6Ñoo Belén, ña ndáꞌvi ndaa estado Judea,

kúu ña ñii ñoo ña ndáya̱ꞌví ní ka̱ no̱o̱ ndiꞌi ñoo;

chi nda̱ ñoo yóꞌo kixi ta̱ kuiso chiño,

ta kundaa ra nañoo Israel,

káchí to̱ꞌon Ndios ña ni̱taa ta̱profeta ―káchí na ndíso chiño no̱o̱ nañoo judío xíꞌin ta̱rey Herodes.

7Ta saá ta̱Herodes ka̱na seꞌé ra nandíchí na nákoni ki̱mi, ta nayóꞌo ki̱xaa̱ na no̱o̱ ra, ta ni̱nda̱ka̱ to̱ꞌon ra na, ndá ki̱vi̱ kúu ña ni̱ti̱vi na̱yeꞌe ki̱mi xi̱ni na. Ta saá nda̱to̱ꞌon na xíꞌin ra, ta ku̱nda̱a̱ ini ra. 8Ta ti̱ꞌví ra na kua̱ꞌa̱n na ñoo Belén, ta ni̱ka̱ꞌa̱n ra siꞌa xíꞌin na:

―Kua̱ꞌa̱n ndó ñoo Belén, ta nandukú ndó míchí yóo ta̱loꞌo. Tá xi̱ni ndó ra, ta saá ndikó tuku ndó yóꞌo ta ndato̱ꞌon ndó xíꞌin i̱, ta saá yi̱ꞌi̱ ko̱ꞌo̱n i̱ kasa to̱ꞌó i̱ ra ―káchí ta̱Herodes xíꞌin na.

9Ta ki̱vi̱ ndi̱ꞌi xi̱ni̱ so̱ꞌo na ña ni̱ka̱ꞌa̱n ta̱rey, ta saá ke̱e na kua̱ꞌa̱n na. Ta ki̱mi tí xi̱ni na, kua̱ꞌa̱n siꞌna rí no̱o̱ na, ta ni̱xaa̱ rí ta xi̱kanóo rí no̱o̱ kándúꞌu̱ ta̱loꞌo. 10Tá xi̱ni na xi̱kanóo tíki̱mi yóꞌo, ta saá ku̱sii̱ ní ini na. 11Ta ni̱ki̱ꞌvi na ini veꞌe, ta xi̱ni na ta̱loꞌo xíꞌin siꞌí ra ñáMaría. Ta saá xi̱kuxítí na no̱o̱ ta̱loꞌo, ta ki̱sa to̱ꞌó na ra. Ta na̱kuiná na xa̱to̱n válí na, ta sa̱níꞌi na ra ñaoro, xíꞌin xuxa va̱ꞌa ña yáꞌví ní, xíꞌin nduta̱ va̱ꞌa tá támi xáꞌan na̱ní rá mirra. 12Ta Ndios ti̱ꞌví ra xa̱ni no̱o̱ nandíchí yóꞌo, ta saá ku̱nda̱a̱ ini na ña o̱n ndikó na ñoo no̱o̱ yóo ta̱rey Herodes. Ta saá ndi̱kó na kua̱noꞌo̱ na inka̱ yichi̱, ta o̱n vása ní‑ndikó ka̱ na yichi̱ no̱o̱ ki̱xi na.

Ñayóꞌo káꞌa̱n xa̱ꞌa̱ naveꞌe ta̱Jesús ki̱vi̱ kua̱ꞌa̱n na ñoo Egipto

13Tá ke̱e nandíchí na nákoni ki̱mi kua̱noꞌo̱ na, ta ñoó ni̱ki̱si̱n ta̱José ta ni̱xa̱ní ra ñii ñaángel ke̱e no̱o̱ Ndios ki̱xi ña no̱o̱ ra, ta káchí ña saá xíꞌin ra:

―Ndakoo ún, ta nakiꞌin ún tikuáꞌá loꞌo xíꞌin siꞌí ra, ta kama kee ndó ko̱ꞌo̱n ndó a̱nda̱ ñoo Egipto, ta kán kundo̱o ndó a̱nda̱ ki̱vi̱ ka̱ꞌa̱n i̱ xíꞌin ún, saá ndikó ndó. Chi ta̱rey Herodes nandukú ra tikuáꞌá loꞌo, chi kóni ra kaꞌni ñaꞌá ra ―káchí ñaángel xíꞌin ta̱José.

14Ta xa̱ndi̱ko̱n ñoó saá ta̱José xíꞌin ñáMaría nda̱koo na, ta na̱kiꞌin na tikuáꞌá loꞌo, ta ke̱e na kua̱ꞌa̱n na a̱nda̱ ñoo Egipto. 15Ta ñoo yóꞌo ni̱xi̱yo na a̱nda̱ kui̱ya̱ ni̱xiꞌi̱ ta̱rey Herodes. Saá ku̱ndivi to̱ꞌon Ndios ña ni̱taa ta̱profeta xi̱na̱ꞌá, káchí ña saá: “Ka̱na i̱ sa̱ꞌya i̱ va̱xi ra ña kee ra ñoo Egipto, ta noꞌo̱ ra ñoo ra”, káchí to̱ꞌon Ndios.

Ñayóꞌo káꞌa̱n xa̱ꞌa̱ ta̱rey Herodes ki̱vi̱ xa̱ꞌnda chiño ra kaꞌni na ndiꞌi naválí

16Tá ta̱rey Herodes ku̱nda̱a̱ ini ra nandíchí na nákoni ki̱mi sa̱ndáꞌví na ra, ta ni̱saa̱ ní ra. Ta saá na̱káꞌán ra ña nda̱to̱ꞌon na xíꞌin ra ama ka̱ku ta̱loꞌo. Ta saá xa̱ꞌnda chiño ra no̱o̱ natropa ña kaꞌni ndiꞌi na nata̱a válí na o̱vi̱ kui̱ya̱ ta chí ni̱no̱ na ndóo ñoo Belén xíꞌin inka̱ na ñoo yatin. Ta saá kua̱ꞌa̱ ní naválí ni̱xiꞌi̱, ki̱sa natropa. 17Ta saá ku̱ndivi ña ni̱taa ta̱profeta Jeremías, ka̱chí ra saá:

18Xi̱ni̱ so̱ꞌo na xáku ní ñaꞌa̱ ñoo Ramá,

ndeé ní xáku ñá, ta kúchuchú ní ini ñá;

ñáRaquel kúu ñá, xáku ní ñá xa̱ꞌa̱ sa̱ꞌya ñá,

ta o̱n vása xi̱in ñá kindo̱o ini ñá ña kua̱ꞌa̱ ní nata̱a válí ni̱xiꞌi̱,

káchí to̱ꞌon Ndios, ña ni̱taa ta̱Jeremías xi̱na̱ꞌá.

19Ta ni̱xiꞌi̱ ta̱rey Herodes, ta ta̱José yóo ra ñoo Egipto, ta ñoó ni̱ki̱si̱n ra ta ni̱xa̱ní ra ñii ñaángel ke̱e no̱o̱ Ndios ki̱xi ña no̱o̱ ra, ta nda̱to̱ꞌon ña xíꞌin ra:

20―Ndakoo ún, ta nakiꞌin ún tikuáꞌá loꞌo xíꞌin siꞌí ra, ta noꞌo̱ ndó ñoo Israel, chi xa ni̱xiꞌi̱ na kóni kaꞌni tikuáꞌá loꞌo ―káchí ñaángel xíꞌin ra, ti̱xin xa̱ni ki̱xi no̱o̱ ra.

21Ta saá nda̱koo ta̱José xíꞌin ñáMaría, ta na̱kiꞌin na tikuáꞌá loꞌo, ta kua̱noꞌo̱ na ñoo Israel. 22Ta ki̱vi̱ xi̱ni̱ so̱ꞌo ta̱José to̱ꞌon ta̱Arquelao sa̱ꞌya ta̱Herodes kúu ta̱ na̱kuiso chiño no̱o̱ estado Judea, ta ni̱yi̱ꞌví ní ra ko̱ꞌo̱n ra ñoo yóꞌo. Ta tuku ni̱xa̱ní ra ñii ñaángel ni̱ka̱ꞌa̱n ña xíꞌin ra, ña o̱n ko̱ꞌo̱n ka̱ ra estado Judea, ta saá ki̱ꞌin ra kua̱ꞌa̱n ra inka̱ yichi̱ ña kua̱ꞌa̱n estado Galilea. 23Ta ni̱xaa̱ ra estado yóꞌo, ta na̱kani ini ra va̱ꞌa ka̱ ko̱ꞌo̱n ra koo ra ñoo Nazaret, ñii ñoo ndíko̱n ndaa estado Galilea. Ta saá ku̱ndivi to̱ꞌon ni̱ka̱ꞌa̱n naprofeta, ka̱chí na saá xa̱ꞌa̱ ta̱ tiꞌví Ndios saka̱ku ra na ñoyívi: “Ñii ta̱ñoo Nazaret kuu ra”, káchí to̱ꞌon Ndios ña ni̱taa na xi̱na̱ꞌá.

Voafantina amin'izao fotoana izao:

San Mateo 2: mim

Asongadina

Hizara

Dika mitovy