Maʼtɛ́as 4

Sáʼtan ayɛ́ɛ́n agaásɔsɛn Yə́sus

(Mə́l 1.12-13; Lóʼk 4.1-13)

1Ayɛ́ɛ əgín Sɛ́aŋ aáman kɔsɔgɛn Yə́sus, Uŋun ó Táán wááság komoyɛ́ɛlɛ lɛ́ yɛ́ɛn a kɛnɔ kɛ́ kifələ́ə́n lɛ́ ná omɔlɛɔ́g ámoyásɔsɛn. 2Yə́sus ayɛ́ɛ́lɛ kɔ əʼtin á mədúg ábaan annɛ́ɛ́nɛ. Njaan yəə́bə́ə́ komoobany. 3Alɛ kɔ́gɔ́ɔg náan a, ongaásɔsɛnaʼ pɔɔd nyóon aáság kaáyɛʼtɛnɛ a ɛbá yə́ə́ŋ, ɔnɔ́ na nyɔ́lɛ́: «Nga olɛ Mɔɔ́n o Táán, ɛɛlɛ lɛ́ aʼtáán yɛ́ɛy yáán moom mó konɛ, ónɛ yi.» 4Yə́sus əyímuyúlísíni ɔnɔ́ na nyɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́ ɔlaa ó mɔɔd ódɛɔ́gɔ əgín a moom mó konɛ, náa ólɛ a tɔgɛ́ɛ́ tó tóalon a unuʼ ó Táán#4.4 Kɛ́lɛ náan a kálaʼtaʼ Tɛʼt 8.3 »

5Omɔlɛɔ́g aáság kɛɛn anɛ́ɛ́n na Yə́sus a Yolósalɛm, pálɛ́ɛg yɛ́ ɛlɛɛ́ pulúʼkə́n pó Táán. Ayɛ́ɛ́n əmudə́nigi a ɛnɔn ɛ́ Tɛ́mpɛl a mɔɛn 6náa ɔnɔ́ na nyɔ́lɛ́: «Nga olɛ Mɔɔ́n o Táán, ə́lísíí a ɛnɔn yɛ́ɛnɛ a mɔɛn, úcilib a nsí lɛ́ kɛ́lɛ tɛn kidiídílə́ a Kálaʼtaʼ ɛ Táán lɛ́: Táán alɛ́ɛ́ kodɛ́anɛ na məŋun mə́ə́ŋ má maʼtom lɛ́ mágonyáŋɛn kogonyáŋɛ́náán a ɔmbɔg yɔ́ɔ́bɔn agɛɛlɛ lɛ́ udimbúʼtən ɔmbɔ́ kubúʼtən a nɛdáán#4.6 Kɛ́lɛ náan a kálaʼtaʼ ɛ Pɛʼk 91.11-12 » 7Yə́sus əyímuyúlísíni ɔnɔ́: «Ɛɛ́ɛ, kɛ́lɛ náan! Náa, áyóŋɛ́ɛ́ tɛn lɛ́ kɛ́lɛ kidiídílə́ kɔ lɛ́, “Odɛyásɔ́sɛ́nɛ́ɛ́ Sə́dúk Táán waaŋ”#4.7 Kɛ́lɛ náan a kálaʼtaʼ Tɛʼt 6.16 »

8Omɔlɛɔ́g aáság kumuúsiəd kə́mmú, amɛ́ɛn na nyɔ́lɛ́ a kɛa kɛ́ oʼkon a mɔɛn lóóŋ, əmə́mulóódi nsí ngim na əʼkúu əngim yá álɛɛ́ kɔ, na tugúm tuim tó tólɛɛ́ kɔ. 9Náa ɔnɔ́ na nyɔ́lɛ́: «Taa, uməʼkiʼtúmin əndu agɛnyáadɛ, nkə kɛ́ɛg kiim kɛ́ olɛɛ́ agodɛ́ʼtɛg, ndagoyɛ́ʼkɛn kiim.» 10Náa Yə́sus ɔnɔ́ na nyɔ́lɛ́: «Índiogin a əngis, Sáʼtan! Kɛ́lɛ kidiídílə́ a Kálaʼtaʼ ɛ Táán lɛ́: “Əgín Sə́dúk Táán waaŋ nyɔ́lɛ́nyɔ́əsíŋ áa ónyádɛɛ́. Əgín nyɔ́lɛ́nyɔ́əsíŋ áa úmudúminií əndu agomonyáadɛ#4.10 Kɛ́lɛ náan a kálaʼtaʼ ɛ Tɛʼt 6.13 ”» 11Áay anɛ́ɛ́n áa Omɔlɛɔ́g əyímuudí, məŋun má maʼtom má Táán mááság kiim mə́suu, máyɛ́ɛ amooyáabɛna.

Yə́sus ayɛ́ɛ́n əgəə́ʼtum pigólí piə́ŋ a Kalilə́ə

(Mə́l 1.14-15; Lóʼk 4.14-15)

12Ná Yə́sus ayóób náan lɛ́ páʼkaag Sɛ́aŋ a yoog yɛ njaan, ayɛ́ɛ́n a Kalilə́ə. 13Yɛɛ́dɛ́ɛ́mɛn tɛn áay a Násalɛd amɛ́ɛn ələndin a Kaʼpɛlɛnáyum, pálɛ́ɛg yimmú yɛ́ a ɛbá ɛ́ noom nó ɛbá fiɛ́d nó a Kalilə́ə, a əʼkúu á Səbulóon na Nɛftalíi. 14Nkə kɛ́ Táán yiísə́ə́ a unuʼ wó Ɛsayíi, ɔndɔɛgɛʼ pɛbán wəəŋ a kɛ́ɛg kɛ́yáás lɛ́, yiísə́ə́ ɔnɔ́: 15«Pɔɔd póonɛ piim lɛ́ na pɔsɔ́g pá a Səbulóon, na pá a Nɛftalíi, na pɔsɔ́g pá a nsɛ́ɛ́ ɛ noom nó Siuludɛ́ɛŋ, na pá a Kalilə́ə, a ngə́ ɛgɛɛn a noom nó ɛbá fiɛ́d, kɛnɔ kɛ́ mɔnɔŋ miim málɛɛ́ əgiim əgəə́búnən. Pɔ́lɛ́ póob piim pálɛŋ lɛ́ 16pɔɔd pá páyɛ́ɛ a mbin, pándɛ a kɛa kɛ́ kisəə. Kisəə kɛ́ɛg kɛándaanom a əʼkúu yɛ́ mbin ɛ liɛ́d ɛyɛ́ɛ kɔ#4.16 Kɛ́lɛ náan a kálaʼtaʼ yɛ Ɛsa 8.23—9.1 » 17Əgəə́bə́ə a kɛnɛŋ kɛ́ɛg aa Yə́sus əyə́ʼtúmíí kiim álɔɛgɛ ɔnɔ́: «Ə́súʼkíən óo! Nɛlaamɛʼ nɛ́ a mɔɛn áa nɛ́ɛnɛ nɛándɛɛ́ a ɛbá yááŋan!»

Yə́sus əmə́ʼtúmíí kusiədə pɔɔ́n pə́ə́ŋ pá maʼtom

(Mə́l 1.16-20; Lóʼk 5.5-11)

18Wɔnɔ́ ná Yə́sus ayɛ́ɛ agosan a ɛbá ɛ́ noom nó a Kalilə́ə, yɛɛ́dála pɔɔd pábaan, niŋŋí lɛ́ na Simɔ́ɔŋ nyɔ́ ayɛ́ɛ tɛn niiŋ lɛ́ Píɛ na Əndələ́ə móŋŋí wəəŋ, páadagɛdɛ nibúnjə́ lɛ́ pigólí pɛɔ́bɔn aa pɛ́ɛb pɛ́yɛ́ɛ lɛ́ nibuəd. 19Náa ɔnɔ́ na pɔ́lɛ́: «Mɛ́naan puínjə́ən, ndaboyɛ́ɛlɛ púbə́ə́ agá kiim póɛnnɔ́bɛnɛ pɔɔd.» 20Əgín ná yiísə́ə́ náan, pa Simɔ́ɔŋ pɔ́lɛ́ na móŋŋí pááság kudi pámáyáyɛ́dɛ́ɛ́ əmbúnjə́ yɔ́ɔ́bɔn əguyə́ən Yə́sus. 21Pə́ə́bə́ə́ kɛɛn. Əgiig yuudi sɔɔŋ, Yə́sus aáság kodála tɛn nto yimmú ɛ́baan, niŋŋí lɛ́ na Sɛ́ag na móŋŋí wəəŋ Sɛ́aŋ, pɔɔ́n pá Səbədə́ə. Páyɛ́ɛ a kɛʼkɔ́m kɛɔ́bɔn a kaadɛ, póosóboni əmbúnjə́ yɔ́ɔ́bɔn ondáŋ na sɛ wɔɔbɔn. Yə́sus ayɛ́boodɔ́ŋɔn tɛn pɔ́lɛ́, ɔnɔ́: «Mɛ́naan tɛn puínjə́ən.» 22Əgín ná pɔ́lɛ́ tɛn páyóób ntɔ́ŋɔ́nɔ́n ɛ Yə́sus, píídí pə́mə́dí sɛ wɔɔbɔn na kɛʼkɔ́m kɛ́, pə́ə́yə́ə́n Yə́sus.

Yə́sus alɛ agaaʼkananɛ Tɔsɔm tó Táán aágoómanɛ mabámbany

(Mə́l 1.39; Lóʼk 4.44; Lóʼk 6.17-18)

23Yə́sus ayɛ́ɛ əgiim ádáŋana a nigúu nɛ́ Kalilə́ə niim, əə́giim yáaʼkananɛ pɔɔd a puog pó pɛɔ́sɔ́gɔ́lɔ́n poɔ́bɔn, aálɔɛgɛ Tɔsɔm Tólaŋ tó a Nɛlaamɛʼ nɛ́ a mɔɛn, aágoómanɛ pɔɔd a mbod ɛ mabámbany ngim yɛ́ páyɛ́ɛ agobányɛla. 24Nugəm nuə́ŋ noáság kaálam a nigúu nɛ́ Silíi niim. Náan aa pɔɔd pə́yíímən pányáŋɛna pabámbany piim, na mbod ɛ mabámbany ngim lɛ́ na pɔsɔ́g pá məŋun má mabɛ́ máyɛ́ɛ na pɔ́lɛ́, na pá pidiʼ kɛ́, na pɛgɔd kɛ́. Yə́sus aáság koómanɛ pabámbany póob. 25Pɔɔd páyɛ́ɛ a ngim ɛ Yə́sus súuu, kiʼtúú kilúd. Pə́yíím pádɛ́ɛman lɛ́, póonɛ a Kalilə́ə, pə́mmú a nigúu nɛ́ pálɛ́ɛg yówád, pə́mmú tɛn a Yolósalɛm na a Siudə́ə na a nigúu nɛ́ a nsɛ́ɛ́ ɛ noom nó Siuludɛ́ɛŋ.

Voafantina amin'izao fotoana izao:

Maʼtɛ́as 4: yatDBL

Asongadina

Hizara

Dika mitovy