Maʼtɛ́as 27

Pámɛ́ɛn na Yə́sus a nó Pɛláad

(Mə́l 15.1-2; Lóʼk 22.66; 23.1; Sɛ́a 18.28)

1A koany kaáyɛnɛ, puʼkúm pó payaaganɛʼ pɛfɔny na ponnom pó nigúu póyágɔ́nyɛ́dɛ́ɛ́ agoyɔm kɛbán kɛ́ Yə́sus, páábaasɛ lɛ́ pógóódi lɛ́ pámoyóon. 2Pə́yímuusúŋ tuwoo a ombɔg, pámɛ́ɛn na nyɔ́lɛ́ a nó Pɛláad nyɔ́ ayɛ́ɛ ngɔ́mɛnaʼ yɛ́ nkóʼkóón yɛ́ a Ɔlɔ́ma.

Siudáa ayáyónɛ́ɛ́

3Ná Siudáa nyɔ́ ayɛ́ɛ́n amoólɛg yɛɛ́dála náan lɛ́ páʼkobaasɛ lɛ́ páagoon Yə́sus, əə́bə́ə́ kəə́lə́ʼkəni. Əyúúlíni ná puʼkúm pó payaaganɛʼ pɛfɔny pólɛɛ́, na ponnom pó nigúu, əgubuyúúlisini mɔɔnɛ́ má páyɛ́moyɛ́ʼkɛn. 4Ayɛ́bodɛánɛ ɔnɔ́: «Mbɛ́ɛ́lɛ kɔbɛ́ agoboólɛgɛn mɔɔd nyɔ́ adiɛlɛnɛɛ́ kɔbɛ́ lɛ́ pómoyóon.» Pə́yímuyúlísíni pɔ́nɔ́: «Kɛ́ɛg kɛándɛ kɛáŋ óo! Kɛ́dɛábɛdɛ́ʼtɛg pəsi!» 5Siudáa aáság kudi ámádó mɔɔnɛ́ móom kɔ a yoog ɛ Táán, amɛ́ɛn agaádoŋ. 6Puʼkúm pó payaaganɛʼ pɛfɔny poáság kusiəd mɔɔnɛ́ móom, náa poɔ́nɔ́: «Pɛcɛm piə́s pɛ́lɛ agosáŋɛnɛ lɛ́ ombod ó mɔɔnɛ́ wɔnɔ́ wóow ódɛsɔ́d a igóó ɛ́ mɔɔnɛ́ má a Yoog ɛ Táán lɛ́ málɛ mɔɔnɛ́ má maŋɔ́#27.6 «mɔɔnɛ́ má maŋɔ́.» Áay lɛ́ mɔɔnɛ́ má mámáʼpɛ́lɛ́ɛ́ a oʼto ó mɔɔd.» 7Pááság kaáyóbanan lɛ́ póoŋɛnɛ kɛsom kɛ́ nsí na mɔɔnɛ́ móom, na ommaaŋan muyə́sə́n. Páyóóŋɛ́nɛ kɛ́lɛ́ lɛ́ ná pə́niəŋən pəən kɔ. 8Náan aa, əgiim əgiig na nɛ́gɔŋ kɛ́, pálɛ agodɔ́ŋɔn əgín kɛsom kɛ́ nsí kɛ́ɛg lɛ́: «Kɛsom kɛ́ nsí kɛ́ maŋɔ́». 9Taa, náan aa nkə kɛ́ Siələmíi, ɔndɔɛgɛʼ pɛbán o Táán yiísə́ə́, kɛ́yáás. Yiísə́ə́ lɛ́: «Píísiə́d pisúg niʼtin na pɛówád pɛ́ pɔɔ́n pá Ɛ́sɛlayɛl páyáyóóbánánɛ́ɛ́ a oʼto wə́ə́ŋ. 10Pámóóŋɛ́nɛ kɛsom kɛ́ nsí na ommaaŋan muyə́sə́n, na mɔɔnɛ́ móom əgín wɔnɔ́ ná Sə́dúk yiísə́ə́#27.10 Pə́ə́bulə kɔ lɛ́ na nkə kɛ́ kɛ́lɛɛ́ a kálaʼtaʼ ɛ Saʼk 11.12-13, na nkə kɛ́ kɛ́lɛɛ́ a ɛ Siə 18.2-3; 19.1-2; 32.6-15 »

Pɛláad aándalóoya Yə́sus

(Mə́l 15.2-15; Lóʼk 23.2-5,13-25; Sɛ́a 18.28—19.16)

11Yə́sus aáság kɛɛn adɛ́lɛm a pɛyɔm a udi wo ngɔ́mɛnaʼ yɛ́ nkóʼkóón. Ngɔ́mɛnaʼ əə́bə́ə́ komolóoya ɔnɔ́: «Olɛ nkúm ɛ Yúdɛn a, ngɔ́ɔ́?» Yə́sus əyímuyúlísíni ɔnɔ́: «Náan ó! Kɛ́lɛ náan wɔnɔ́ ná olɛɛ́ əgusəə.» 12Náa, adɛʼkɛ́ɛ agogáaŋanan a nkə kiim kɛ́ puʼkúm pó payaaganɛʼ pɛfɔny na ponnom pó nigúu páyɛ́ɛ amoosóman a nkó. 13Náa Pɛláad ɔnɔ́ na nyɔ́lɛ́: «Tuə́! Odɛɔ́gɔ agoob pɛsɔ́mɛn pɛ́ɛnɛ piim pɛ́ pálɛɛ́ əgusuginə a nkó yaaŋ á?» 14Ɔmbɔ́ pɛbɛɛ a kɛbán əgín kímuʼ, Yə́sus adɛʼkáabaalɛ. Ngɔ́mɛnaʼ yɛ́ nkóʼkóón ɛyáfɛ́máá kɛ́fɔlɛ́ na kaásab kóog kó ayásábɛ́ɛ́ náan. 15A wɔɔ́n ó Páska ungim kɛ́yɛ́ɛlanɛ lɛ́ ngɔ́mɛnaʼ yɛ́ nkóʼkóón yəəlis mɔɔd o yoog yɛ njaan úmmuʼ nyɔ́ nigúu níəŋíən lɛ́ ə́lis. 16Náan aa a kɛnɛŋ kɛ́go kɛ́ɛg, mɔɔd nyummú ayɛ́ɛ a yoog yɛ njaan, niiŋ lɛ́ Yə́sus Palábas. Páyɛ́ɛ agomoyɔ́gɔ́dɛla kɛ́fɔlɛ́ lɛ́ ayɛ́ɛ agɛɛlanɛ pɛbán pɛ́ pɛbɛ́. 17Pɛláad aáság kuŋíən na kiʼtúú kɛ́ pɔɔd kɛ́ kíyə́yiilin kɔ áay ɔnɔ́: «Poanyɔ́ŋɛn lɛ́ ndis ánɛ ə́? Yə́sus Palábas#27.17 Pə́ʼtilən a pagálaʼtaʼ pə́mmú náan lɛ́ «Yə́sus Palábas». Kɛ́lɛ kɔ əgín lɛ́ «Palábas», «Yə́sus» fiɛ́d. oóm, Yə́sus nyɔ́ pɔ́ɔdɔ́ŋɔn lɛ́ Məsíi əə́?» 18Pɛláad yiísə́ə́ náan lɛ́ yɛɛ́lɛŋɛn lɛ́ a yaág yɛ́ əngis aa puʼkúm pó Yúdɛn puígúmin Yə́sus əgiim amosɔ́mɛn na nyɔ́lɛ́. 19Pɛláad alɛ anɛ́ɛ́n kɔ agolóoya Yə́sus ə, oʼkán aáság kiim ámodómɛn mɔɔd lɛ́ yíim amodɛ́anɛ lɛ́ adɛnjáág unuʼ a kɛbán kɛ́ sáád ɛ mɔɔd yɛ́ɛy lɛ́, kɛlɛm kímə́muyə́bi kɛ́fɔlɛ́ na udúg ó naánɛ́ a oʼto wə́ə́ŋ. 20Puʼkúm pó payaaganɛʼ pɛfɔny na ponnom pó nigúu pɛ́ɛ́báya kiʼtúú kɛ́ pɔɔd kɛ́ɛg lɛ́ pádɛ́anɛ na ngɔ́mɛnaʼ yɛ́ nkóʼkóón, ə́buúlisin Palábas, yɛ́ʼkɛn toɛn pɛ́ɛn agoon Yə́sus. 21Náa ngɔ́mɛnaʼ yɛ́ nkóʼkóón yɔ́nɔ́ na pɔ́lɛ́: «A pɔɔd póonɛ pábaan ə́ə, oyaán áa poányɔ́ŋɛn lɛ́ ndis əə́?» Náa pɔ́nɔ́ na nyɔ́lɛ́: «Lis Palábas o!» 22Náa ɔnɔ́ na pɔ́lɛ́ əə: «Nyɛ́ɛlɛ anɛ́ɛ́n tuə́ na Yə́sus nyóonɛ nyɔ́ pɔ́ɔdɔ́ŋɔn lɛ́ Məsíi əə́?» Ungim əyímuyúlísíni ɔnɔ́: «Tɛánɛ́ pɛ́ɛn amoóbaŋan a ɔmbásá o!» 23Náa ɔnɔ́ na pɔ́lɛ́: «Kɔbɛ́ igə anɛ́ɛ́n áa amɛ́ɛ́lɛ ə́?» Pə́ə́bə́ə́ agá kosása kə́mmú na toɛn pɔ́nɔ́: «Ɛ́ʼkɛn toɛn pámoóbaŋan a ɔmbásá o!» 24Pɛláad aáság kodála lɛ́ ngə́ yɛndɛ́ŋ ɛdɛɔ́gɔ. Pɔɔd páyɛ́ɛ agoyáa agá kə́mmú na toɛn. Aáság kusiəd məní agaásog ɔmbɔg a udi o pɔɔd piim#27.24 Pódála tɛn náan a kálaʼtaʼ ɛ Tɛʼt 21.6-8 , ɔnɔ́: «Táá, ɔmbɔg aa yɛ́ɛnɛ ndágaásog. Maŋó má mɔɔd nyóonɛ mádɛnjɛ́ɛ́n a oʼto wáam oo! Mɛ́ɛn a nto yaaŋan!» 25Náa ungim ɔnɔ́: «Ɛɛ́ɛ óo, timə́líʼtíníí náan! Maŋó mə́ə́ŋ mɛ́ɛn a nto yəəs na a nto ɛ pɔɔ́n pə́ə́s!» 26Pɛláad aáság kubuúlisin Palábas, amáboyɛ́ʼkɛn Yə́sus lɛ́ pámobáam ná pámoóbaŋan a ɔmbásá.

Pasɔ́njaa píídə́əŋ ɛnyɛɛŋɛʼ a nkó ɛ Yə́sus

(Mə́l 15.16-20; Lóʼk 23.11; Sɛ́a 19.2-3)

27Pasɔ́njaa páyɛ́ɛ́n na Yə́sus a yoog ɛ Nɛlaamɛʼ yɛ ngɔ́mɛnaʼ yɛ́ nkóʼkóón. Pɔ́lɛ́ piim páyágɔ́nyɛ́dɛ́ɛ́ kɔ́gɔ́ɔg kɛnɔ kɛ́ páyɛ́ɛ́n na Yə́sus. 28Pə́yímudíŋínə pilə́ə́, pə́mə́muníígi ntaa yɛ́ mbógógó. 29Píísiə́d nuwoo nó pɔsɛ́n, páánog, pámámosɔ́nɛg a oʼto, wɔnɔ́ nodám nó nkúm, pə́ə́siə́d niob pámámoyɛ́ʼkɛn lɛ́ ə́gumin a ombɔg ó nɛnom. Páyɛ́ɛ əgiim ədúmə əndu a udi wə́ə́ŋ, páamoónyɛɛŋanɛ pɔ́nɔ́: «Timə́gusóyídi o! Nkúm ɛ Yúdɛn, calɛʼ calɛʼ calɛʼ!» 30Páyɛ́ɛ əgumudúəŋənən pɛda, pə́əsiəd niob, páyɛmoogo na nɛ́lɛ́ a oʼto. 31Ná páyɛ́ɛ páʼkoman ɛnyɛɛŋɛʼ yɛ́ɛy náan a nkó yəəŋ, pááság kumudíŋin ntaa yɛ́ pə́yímuníígi, pə́mə́muyúlísíni pilə́ə́ piə́ŋ. A ngim yɛ́ɛy aa pə́yímusíəd, pámɛ́ɛn amoóbaŋan a ɔmbásá.

Pɛ́ɛ́báŋan Yə́sus a ɔmbásá

(Mə́l 15.21-32; Lóʼk 23.26-43; Sɛ́a 19.16-24)

32Ná páyɛ́ɛ pándaalon pálɛ́ɛg na nyɔ́lɛ́, pə́yə́búníí na mɔɔd nyummú niiŋ lɛ́ Simɔ́ɔŋ, mɔɔd nyɔ́ a pálɛ́ɛg ɛ Silɛ́ɛn. Pasɔ́njaa pááság komoogóda ambaan lɛ́ ógóomin Yə́sus konyáŋɛn ɔmbásá. 33Pááság kɛɛn, pámɛ́ɛn əgiig na Yə́sus a kɛnɔ kímmú pɔ́ɔdɔ́ŋɔn a tɔgɛ́ɛ́ tó Əbələ́ə lɛ́ Kologóʼta. Áay lɛ́: «Kɛnɔ kɛ́ kɛ́yɛ́ɛ wɔnɔ́ kɛlɛ́ʼtɛ́g kɛ́ oʼto». 34Páyɛ́moyɛ́ʼkɛn maloʼ məbuúbúlə́ na yoom yímmú yáanɔ, pɔ́ɔdɔ́ŋɔn lɛ́ míil#27.34 Kɛ́lɛ náan a kálaʼtaʼ ɛ Pɛʼk 69.22 , pɔ́nɔ́ áŋo. Ná ayóʼtɛn, yɛɛ́sáŋɛ́nɛ lɛ́ nyɔ́lɛ́ adɛáŋo. 35Páyɛ́mobáŋan a ɔmbásá. A ngim yɛ́ɛy, agɛɛlɛ lɛ́ páabanan pilə́ə́ piə́ŋ, pɛ́ɛ́lá ntɔŋ#27.35 Kɛ́lɛ náan a kálaʼtaʼ ɛ Pɛʼk 22.19 , 36pə́ə́ləndin a kinuŋ kiə́ŋ. 37Kɔ a ɔmbásá, a oʼto ó Yə́sus a mɔɛn, píídílid a igúg igə aa páyɛ́moyóón a yɛ́lɛ́. Náan aa píídílid pɔ́nɔ́: «Táá, Yə́sus aa nyóonɛ, nkúm ɛ Yúdɛn.» 38Pɛ́ɛ́báŋan tɛn pɔɔd pə́mmú kɔ áay pábaan a ɛbá ɛ́ Yə́sus. Páyɛ́boyáágan lɛ́ ɛ́nɛ́ sɔ́g a ɔmbásá wə́ə́ŋ lɛ́ nyóonɛ a ombɔg ó Yə́sus ó nɛnom, nyummú a oó kɛmɛs#27.38 Pódála tɛn náan a kálaʼtaʼ yɛ Ɛsa 53.12 Pɔ́lɛ́ páyɛ́ɛ piíbən pá pagóón, páagoóna pɔɔd. 39Pɔɔd pá páyɛ́ɛ agosánan kɔ áay, páyɛ́ɛ agodam pámoodóga tɛn, pə́əgəə́liʼtəni na nto#27.39 Kɛ́lɛ náan a kálaʼtaʼ ɛ Pɛʼk 22.8 , 40pɔ́nɔ́: «Ɛɛ́ɛ, Wɛ nyɔ́ oyɛ́ɛ əgusəə wɔʼkɔ́ wəəbugə Tɛ́mpɛl, wíiʼkini kowáag yɛndɛ́ŋ a mɔɔ́s mádáád súg, ɔ́yɔ́yɛ́ɛ́ wɛɛ́nyɔ́amɔɛ́d anɛ́ɛ́n, wə́díŋin a ɔmbásá wóow, úsuu, nga fɔ́lɔ́b olɛ Mɔɔ́n o Táán!» 41Yoom tɛn náan ímuʼ na puʼkúm pó payaaganɛʼ pɛfɔny, na Palɛŋ pɛcɛm, na ponnom pó nigúu. Pɔ́lɛ́ tɛn páyɛ́ɛ agomoónyɛɛŋanɛ pɔ́nɔ́: 42«Iíi, ayɛ́ɛ ɔgɔɔyɔnɛ pɔsɔ́g. Nɛ́gɔŋ anɛ́ɛ́n óoʼ, ɔdɛɔ́gɔ ogɔɔ́yɔ́ɔyɛ nyɔ́lɛ́nyɔ́amɔɛ́d! Nga fɔ́lɔ́b alɛ nkúm ɛ nigúu nɛ́ Ɛ́sɛlayɛl, ə́suu a ɔmbásá wóow nɛ́gɔŋ. Əməʼkusuu, tɛagaag oʼto na nyɔ́lɛ́! 43Oyɛ́ɛ əgusəə lɛ́ waágɛn oʼto wááŋ ungim na Táán. Táán ágoyɔ́ɔyɛ anɛ́ɛ́n áay nɛ́gɔŋ yi nga amágɔɔnyɔ́ŋɛn#27.43 Kɛ́lɛ náan a kálaʼtaʼ ɛ Pɛʼk 22.9 , lɛ́ oyɛ́ɛ əgusəə wɔʼkɔ́ olɛ Mɔɔ́n wəəŋ!» 44Ɔmbɔ́ tɛn piíbən pá pɛ́ɛ́báŋan kɔ áay a yɔɔbɔn mbásá, páyɛ́moyágásɛ́nɛ́ɛ́ tɛn agomoodóga wɔnɔ́ pɔsɔ́g.

Yə́sus yiígú a ɔmbásá

(Mə́l 15.33-39; Lóʼk 23.44-48; Sɛ́a 19.28-30)

45Ná tóɛf iyííg, mbin yiídə́əŋ a nsí ngim pilíb, súʼtə́ə́ a mangɛn mádáád. 46Ná mangɛn mádáád máyɛ́ɛ mə́ndəgiim əgiig, Yə́sus yiídóʼtin kiʼkíŋ na toɛn, ɔnɔ́: «Ɛlɛ́as, Ɛlɛ́as, lɛ́má sabágtáni?» Áay lɛ́: «Táán yaam, Táán yaam, tuə́ áa umíʼtúmín ngim náan#27.46 Kɛ́lɛ náan a kálaʼtaʼ ɛ Pɛʼk 22.2 ?» 47Ná ngab ɛ pɔɔd yɛ́ ɛyɛ́ɛ kɔ áay ɛyóób náan, pə́ə́bə́ə́ kosɔyɔ pɔ́nɔ́: «Pomóób ə́, ɔɔ́ndɔdɔ́ŋɔn Ɛlɛ́as.» 48Sɔ́g nyummú kɔ áay a ondáŋ wɔ́ɔ́bɔn aáság kɛɛn na ɔʼtɛ́d, əə́nyum ɛʼpɔ́ɔnsɛ a pɛŋwáŋwáŋá pɛ́ maloʼ, əmíim áfanyɛg a oʼto ó niob, amɛ́ʼkɛn na Yə́sus lɛ́ ɔ́sɔ́sɔ#27.48 Pódála tɛn náan a kálaʼtaʼ ɛ Pɛʼk 69.22 49Náa pɔsɔ́g pɔ́nɔ́ na nyɔ́lɛ́: «Póŋ, tɛ́dála nga Ɛlɛ́as əəgiim amoyɔ́ɔyɛ.» 50Yə́sus aáság kiiʼkini kudóʼtin kiʼkíŋ na toɛn, əmíísímid, aádó oʼto. 51Əgín a kɛnɛŋ kɛ́go kɛ́ɛg, sanjaʼ yɛ́ pɛ́ɛ́sandɛgɛnɛ a Tɛ́mpɛl#27.51 Kɛ́lɛ náan a kálaʼtaʼ yɛ Ɔsa 26.31-33 yaáság kosaalɛg pɛsaa pɛ́baan paáám, kəə́bə́ə́ a oʼto agɛɛn əgiig a nsun. Nsí iyə́nyígídíí, aʼtáán yásasáa, 52pəgəəniʼ pə́əgəə́buənə, pɛlóŋ pɛ́ pɔɔd piíŋ pá páyɛ́ɛ sáád pɛ́móndɛ́gan. 53Ná Yə́sus ayóndɛg, pɛlóŋ pɛ́ pɛ́ɛ́lónan a pəgəəniʼ pɛ́ɛ́sɔ́d a Yolósalɛm, pálɛ́ɛg yɛ́ ɛlɛɛ́ pulúʼkə́n pó Táán. Pɔɔd piíŋ páyɛ́boodála. 54Ná nkúm ɛ pasɔ́njaa, na pɔɔd pá páyɛ́ɛ kɔ áay a kinuŋ kɛ́ kɛlóŋ kɛ́ Yə́sus pɛ́ɛ́dála wɔnɔ́ ná nsí iyə́nyígídíí, na nkə kiim kɛ́ kɛ́yɛ́ɛ agaásan, ngililiʼ iyíbugúmin, pə́ə́bə́ə́ kosɔyɔ pɔ́nɔ́: «A fɔ́lɔ́b, mɔɔd nyóonɛ ayɛ́ɛ Mɔɔ́n o Táán!» 55Pagɛ́ɛd páyɛ́ɛ kɔ áay piíŋ. Pɛ́ɛ́dɛ́lɛ́man laálá, pə́ədíin pánadɛna agá pɛnág agodɛ́ʼtɛg kiim kɛ́ kɛ́yɛ́ɛ agaásan. Páyɛ́ɛ pagɛ́ɛd pá pə́yíím pə́yə́njən Yə́sus əgín kɔ́gɔ́ɔg a Kalilə́ə, páamoyɛ́ɛlanɛ maʼtóʼtóm. 56Kɔ a ondáŋ ó pagɛ́ɛd wóow, Malɛ́a nyɔ́ a Magdala ayɛ́ɛ kɔ, na Malɛ́a tɛn nyummú, ŋŋí ɛ pa Sɛ́ag pɔ́lɛ́ ná Yósɛb, na ɔʼkɛ́ɛd tɛn nyummú, ŋŋí ɛ pɔɔ́n pá Səbədə́ə.

Pándagɛɛn əni Yə́sus

(Mə́l 15.42-47; Lóʼk 23.50-56; Sɛ́a 19.38-42)

57Na niób, mɔɔd nyummú niiŋ lɛ́ Yósɛb, kibíəniʼ kɛ́ pálɛ́ɛg yɛ Əliməʼtə́ə aáság kiim alon. Ayɛ́ɛ mɔɔd tɛn nyɔ́ ayɛ́ɛ lɛ́ amaʼkosɔyɛd a ɛgɔny yɔ́ɔ́bɔn yɛ́ ɛgóón yɛ́ɛy, páyɛmoyóob. Nyɔ́lɛ́ tɛn ayɛ́ɛ aándɛ a ondáŋ ó paaʼkan pá Yə́sus. 58Ayɛ́ɛ́n əŋíən na Pɛláad lɛ́ ámoyɛ́ʼkɛn kɛlóŋ kɛ́ Yə́sus nyɔ́lɛ́ yɛ́ɛn əni. Pɛláad aáság kɛɛ́ʼkɛn toɛn lɛ́ pámoyɛ́ʼkɛn kɛlóŋ. 59Yósɛb yiísiə́d kɛlóŋ, aágóda na ombɔ́m ó lɛ́ɛŋ ongwa, wə́əfúŋə púyúŋ púyúŋ. 60Əyímuúní a kəəniʼ ká káyɛ́ɛ kɔ áay kawa. Yiídím kəəniʼ kágo kóog lɛ́ pálɛ́ɛ́ kumuúni nyɔ́lɛ́nyɔ́amɔɛ́d kɔ. Káyɛ́ɛ kədímə́ə́n a kɛgon wɔnɔ́ kɛbaŋ. Ná ayɛ́ɛ əə́ʼkumuúni, aáság kusiəd kɛa kɛ́ kɛdám kɛ́ nɛdáán, əə́míngílídə́ni agolɔ́g unuʼ ó kəəniʼ na nɛ́lɛ́. 61Pɛbán pɛ́ɛb piim pɛ́yɛ́ɛ agaáyɛ́ɛlɛ, pa Malɛ́a nyɔ́ a Magdala pɔ́lɛ́ na Malɛ́a tɛn nyummú páyɛ́ɛ kɔ áay a udi ó kəəniʼ, páadɛ́ʼtɛg.

Pasɔ́njaa páyɛ́ɛ ənuŋ kəəniʼ ká Yə́sus

62A koany kaáyɛnɛ, áay lɛ́ a wɔɔ́s wó wə́əyə́ən wɔɔ́s ó kaáboŋɛn kisúgiʼ#27.62 «wɔɔ́s ó kaáboŋɛn kisúgiʼ» óyɛ́ɛ a wɔɔ́s ó júmbə́. Wɔɔ́s wóow aa Yúdɛn ɛyɛ́ɛ yɛɛlɛ nkə kiim agaáboŋɛn lɛ́ kisúgiʼ kɛ́lɛ na koany, pádɛ́agɛɛlɛ yoom na yoom., puʼkúm pó payaaganɛʼ pɛfɔny na Pafalɛsɛyɛ́ɛŋ páyɛ́ɛ́n ondáŋ a nó Pɛláad, 63pɔ́nɔ́ na nyɔ́lɛ́: «Ngɔ́mɛnaʼ, tɛmáyóŋɛ́ɛ́ nkə kɛ́ mɔɔd o pɛnyaʼ nyóon yiísə́ə́ ná ayɛ́ɛ əligi ongóm. “Yiísə́ə́ lɛ́, əgiig a mɔɔ́s mádáád, nyɔ́lɛ́ əgiiʼkini kiim álon a kəəniʼ ongóm”. 64Kólɛ́ aa timíim agodɛ́anɛ lɛ́ úsəə, pálɛŋ kunuŋ kəəniʼ kə́ə́ŋ, agɛɛn əgiig a mɔɔ́s móom mádáád lɛ́ paaʼkan pə́ə́ŋ pálɛ pə́giim əgiib kɛlóŋ kiə́ŋ ná pə́səə lɛ́ amóndɛg. Ná pɛ́ɛb a pɛnyaʼ anɛ́ɛ́n pɛ́agɛɛn kɛlaŋanan agaáyɛn pɛ́ yuudi.» 65Náa Pɛláad ɔnɔ́ na pɔ́lɛ́: «Ooo, táá pasɔ́njaa a póob, todáan na pɔ́lɛ́, pálɛŋ kunuŋ kəəniʼ wɔnɔ́ ná poányɔ́ŋɛn.» 66Pááság kɛɛn, páálɛŋ kofɛnya nɛdáán nɛ́ píígúb unuʼ ó kəəniʼ na nɛ́lɛ́, pə́ə́dí pə́mə́dí pasɔ́njaa kɔ a kinuŋ.

Voafantina amin'izao fotoana izao:

Maʼtɛ́as 27: yatDBL

Asongadina

Hizara

Dika mitovy