Maʼtɛ́as 2

Pabógán pə́yíím anyáadɛ Yə́sus

1Yə́sus əyə́biə́níí a Pɛ́ʼtɛlɛɛm, pálɛ́ɛg yimmú yɛ́ a nigúu nɛ́ Siudə́ə. A kɛnɛŋ kɛ́go kɛ́ɛg, Ɛlóod aa ayɛ́ɛ nkúm. Náan aa pɔɔd pə́mmú pə́yíím pádɛ́ɛmɛn kɔ́gɔ́ɔg a noá nó ándɛ koany kóagaáyɛnɛ, pááság kiim alon a Yolósalɛm. Páyɛ́ɛ pɔɔd pá páyɛ́ɛ agobógɛla na muə́dədəʼ. 2Ná pə́yíím əgiig a Yolósalɛm, pááság kəə́bə́ə́ kiim pə́ŋíənə, pɔ́nɔ́: «Nkúm ɛ Yúdɛn ɛgo yɛ́ imə́biə́níí ə́lə́ə́ áa ɛlɛɛ́ ə́? Tɛádála yəə́dədəʼ yə́ə́ŋ əgín kɔ́gɔ́ɔg a nigúu nɛ́ koany yáanom, kólɛ́ aa tɛlɛɛ́ əgumuyúunə lɛ́ ná tɛ́monyáadɛ.» 3Ná Ɛlóod ayóób náan, əə́bə́ə́ kaáságɛma, na pɔɔd piim pá a Yolósalɛm kɛ́. 4Ɛlóod yɛɛ́dɔ́ŋɔ́nɔ puʼkúm pó payaaganɛʼ pɛfɔny puim na palɛŋ pɛcɛm piim aáság kubuŋíən ɔnɔ́ na pɔ́lɛ́ ə: «Ɛ́ʼtɛánɛ́an áŋ. Kɛ́lɛ kidiídílə́ kɔmɔɛ́d lɛ́ ə́lə́ə́ áa Məsíi ɛlɛ́ɛ́ kəə́bíən əə́?» 5Náa pɔ́nɔ́ na nyɔ́lɛ́: «Kɛ́lɛ kidiídílə́ lɛ́ Məsíi ɛlɛ́ɛ́ kəə́bíən a Pɛ́ʼtɛlɛɛm, a nigúu nɛ́ Siudə́ə lɛ́, ɔndɔɛgɛʼ pɛbán o Táán nyummú yiísə́ə́ lɛ́:

6«Wɛ Pɛ́ʼtɛlɛɛm, pálɛ́ɛg yɛ́ a nigúu nɛ́ Siudə́ə,

odɛɔ́gɔ iyənjə́g ɛ́ pálɛ́ɛg a pálɛ́ɛg ngim yɛ́ a Siudə́ə

lɛ́ áay aa nkúm yɛ́ ɛlɛ́ɛ́ kodáŋananɛɛ́ Ɛ́sɛlayɛl ndɛg yaam, ɛlɛ́ɛ́ kolónɛ́ɛ́#2.6 Kɛ́lɛ náan a kálaʼtaʼ ɛ Misə́ə 5.1 »

7Ná páyɛ́ɛ páʼkomodɛ́anɛ náan, Ɛlóod aáság kodɔ́ŋɔn pabógán póob kə́mmú ɔgɔɔ́dɔɔgɛ na pɔ́lɛ́, ɔnɔ́: «Poɛ́ʼtɛ́anɛ kɔŋɛʼ kɔŋɛʼ naanɛ́g áa yəə́dədəʼ ɛgo yɛ́báá, poɛ́dála.» 8Pááság komodɛ́anɛ. Ná páyɛ́modɛánɛ, yiísə́ə́ ɔnɔ́ na pɔ́lɛ́: «Todáan a Pɛ́ʼtɛlɛɛm, pólɛŋ kuunə kɛnɔ kɛ́ mɔɔ́n ogo əmə́biə́níí. Pomɔʼkɔɔŋ, púim agɛʼtɛ́anɛ, mɛ tɛn nyɛ́ɛn amonyáadɛ.»

9-10Ná nkúm ɛyɛ́ɛ yaáʼkoman kosɔyɔ náan na pɔ́lɛ́, pááság kodɛ́ɛmɛn agɛɛn. Ná páyɛ́ɛ pándɛ a ngə́, yəə́dədəʼ ɛgo yɛ́ pɛ́ɛ́dála kɔ́gɔ́ɔg a nigúu nɛ́ koany, yááság kiiʼkini kiim ɛ́lon. Ná pɛ́ɛ́dála yəə́dədəʼ yɛ́ɛy, tɔnyɔ́g túyíbuyə́ə́g a ɔʼtɛ́m síɛ́ɛ́d. Pə́ə́bə́ə́ kɛɛn, yəə́dədəʼ yuudi, pɔ́lɛ́ ngim. Agɛɛn əgiig a yoog ɛgo yɛ́ mɔɔ́n nyóon əyə́biə́níí, yəə́dədəʼ yááság kodam ɛ́dɛ́lɛm kɔ cág. 11Pɔ́lɛ́ tɛn pááság kɛɛn, pɔ́ɔ́sɔ́d a yoog ɛgo. Pɛ́ɛ́dám páboan lɛ́ na mɔɔ́n, na ŋŋí Malɛ́a. Pááság kudə́əŋ a nsí na əndu agomonyáadɛ. Pə́ə́bə́ə́ kondinə pɛnó pɛɔ́bɔn, páálónánɛ moom mó pə́yíímən na mólɛ́ agɛɛ́ʼkɛnan na mɔɔ́n nyóon. Moom mógo móyɛ́ɛ lɛ́ na kóol, na ɛdɛm, na Míilə. 12Udúg ogo wóow, Táán aáság kububúnigi kɛlɛm ɔnɔ́ na pɔ́lɛ́: «Pudinjíʼkíni kuúlini yɛ́ a nó Ɛlóod.» Náan aa píísiə́d ngə́ yɛndɛ́ŋ əguúlini a nigúu nɛɔ́bɔn. 13Ná pabógán pá na muə́dədəʼ páyɛ́ɛ páʼkɛɛn, uŋun ó maʼtom ó Sə́dúk wááság kiim əbúnigi Yósɛb kɛlɛm wɔ́nɔ́ na nyɔ́lɛ́: «Tɛ́ɛ́mɛn, siəd lɛ́ na mɔɔ́n na ŋŋí, póɛn ɔgɔɔsɛm a Əsíibtə, Ɛlóod əəguunə kiim agoon mɔɔ́n nyóon. Púləndin kɔ́gɔ́ɔg agɛɛn əgiig əgín a kɛnɛŋ kɛ́ ndɛ́ɛ́ kiiʼkini kiim agodɛ́anɛɛ́ lɛ́ poándɛ pə́gimbuúlini.» 14Yósɛb aáság kodɛ́ɛmɛn udúg ogo wóow na pɔ́lɛ́ agɛɛn a Əsíibtə. 15Píílə́ndin kɔ́gɔ́ɔg agɛɛn əgiig əgín a kɛnɛŋ kɛ́ Ɛlóod ayɛ́ɛ əə́ʼkugu. Kɛ́yáyɛ́lɛ́ɛ́ náan lɛ́ ná a ngim yɛ́ɛy, nkə kɛ́ Sə́dúk yiísə́ə́ a unuʼ wó ɔndɔɛgɛʼ pɛbán o Táán nyummú kɛ́as, lɛ́ ɔndɔɛgɛʼ pɛbán o Táán ogo nyóon yiísə́ə́ lɛ́ Táán ɔnɔ́:

«Nyɛɛ́dɔ́ŋɔn mɛ mɔɔ́n lɛ́ yíim álon

kɔ́gɔ́ɔg a kɛnɔ kɛ́ ayɛ́ɛ, a Əsíibtə#2.15 Kɛ́lɛ náan a kálaʼtaʼ yɛ Osə́ 11.1 »

Ɛlóod ayɛ́ɛ́lɛ lɛ́ pɛ́ɛn əsíŋini poómbaa a Pɛ́ʼtɛlɛɛm

16Ná Ɛlóod ayálɛ́mbɛ́dɛ́ɛ́ lɛ́ pabógán póob páyɛ́moyɔ́ndɔ́nɔn, ilúún yááság komoosan oʼto, aádóm pɔɔd a Pɛ́ʼtɛlɛɛm, na a əʼkúu yɛ́ a mobá, lɛ́ póóna pɔɔ́n pá panɔ́mɛɛd piim, kəə́siəd a monyɛɛnyɛgɛʼ, agɛɛn əgiig a pɔsɔ́g pá pándɛɛ́ pɛag pɛ́baan. Yɛɛ́sóm náan əguyə́ən osom wó pabógán Píísə́ə́. 17Náan aa pɛbán pɛ́ɛb pɛ́yásánɛ́ɛ́ əgín wɔnɔ́ ná Siələmíi, ɔndɔɛgɛʼ pɛbán o Táán, yiísə́ə́, ɔnɔ́:

18«Nɛŋo níyíím nɛ́dɛ́ɛmɛn a Lááma.

Nɛ́yɛ́ɛ nɛŋo nɛ́ ɔndɛɛ, nɛányam.

Ɛlásɛl aa alɛɛ́ agolɛɛ pɔɔ́n pə́ə́ŋ.

Ɔdɛɔ́gɔ əgəə́liʼtini lɛ́ pə́mugídigi lɛ́ pɔɔ́n pə́ndigi a ɔlaa#2.18 Kɛ́lɛ náan a kálaʼtaʼ Siə 31.15 »

Kɛnɛŋ kiə́ʼkiig kɛ́ɛnɛ lɛ́ Yósɛb yúúlini a Ɛ́sɛlayɛl na mɔɔ́n na oʼkán

19Kɛnɛŋ kɛ́ Ɛlóod kɛáság kiim əgiig, əə́gú. Uŋun ó maʼtom ó Sə́dúk wááság kiiʼkini kiim əbúnigi Yósɛb kɛlɛm a Əsíibtə, 20wɔ́nɔ́ na nyɔ́lɛ́: Tɛ́ɛ́mɛn, siəd na mɔɔ́n na ŋŋí, púúlini a nigúu nɛ́ Ɛ́sɛlayɛl lɛ́ pɔɔd pá páyɛ́ɛ əguunə koon mɔɔ́n nyóon pə́ʼkuguə́ʼkən. 21Yósɛb aáság kodɛ́ɛmɛn, əə́siəd na mɔɔ́n na ŋŋí, pááság kaag a ngə́ əguúli a Ɛ́sɛlayɛl. 22Ná páyɛ́ɛ pándɛ ndúmiʼ na kiig, Yósɛb aáság koob lɛ́ Aʼkɛláos aa alɛɛ́ nkúm ɛ Siudə́ə, a oʼkɔɔ ó sɛ Ɛlóod. Wɛɛ́y wááság kumuúgumin. Na udúg, Táán aáság kiim əmuuləb a kɛlɛm. Yósɛb yiísiə́d ngə́ yɛ ndɛ́ŋ, amɛ́ɛn agá ələndin a Kalilə́ə, 23a pálɛ́ɛg yimmú pɔ́ɔdɔ́ŋɔn lɛ́ Násalɛd. Pɛbán pɛ́ɛb piim pɛ́yɛ́ɛ agodáŋana náan agɛɛlɛ lɛ́ nkə kɛ́ palɔɛgɛʼ pɛbán pá Táán Píísə́ə́, kɛ́as lɛ́ Píísə́ə́ pɔ́nɔ́: «Pálɛ́ɛ́ komoodɔ́ŋɔn lɛ́: “Mɔɔ́n ó Násalɛd”.»

Voafantina amin'izao fotoana izao:

Maʼtɛ́as 2: yatDBL

Asongadina

Hizara

Dika mitovy