Mt 17

Yeso nyaʼa bèŋ sɨə teə

(Mk 9.2-13; Lk 9.28-36)

1Ənɨ ɨni nyaʼa che rɨ̀fuə, Yeso nyaʼa nɨŋ ə Pità mbɨ Jems fɔrɨ ə Jɔ̌n nɨ nyaʼə aŋgɔb Jems. Wɨ̀ nyaʼa nɨŋ əne mbɨ kɔʼ wò ɨkaŋ ɨwum se mɔʼɔ əsɨ nɨ àmei mɨ̀mə̌d nyaʼa əŋgu. 2Ənɨ mbɨ nyaʼa pe əŋgu, ɨnyod məd nyaʼa kwepə ɨfě mɨ̀mə̌d. Ɨfě məd nyaʼə te ɨghabɨ ə nyumə̀, ngywɨ̌ rɨ məd bə̀ fuə teenɨə. 3Mbɨ nɨ zə, Mose mbɨ Èlaijà nyaʼa jwɨ̀ ɨfě mɨ̀mə̌d. Mbɨ nyaʼa jwɨ̀ əne kɔ ghambɨ mbɨ Yeso. 4Pità nyaʼa zə əne, ghà əmbɨ Yeso ni, “Ə̀nùŋɨ̀sɨg! Zɨə bɔ̀ŋ ni tɨ̀ wɨ əgha. À mɨ ghaʼ, mə bɨrɨ kod mɨŋwenɨ tad əgha, wɨ fibɨ̀ ɨ ne, wɨ fibɨ̀ əmbɨ Mose, wɨ fibɨ̀ əmbɨ Èlaijà.”

5Ənɨ wɨ̀ nyaʼə kɨrɨ ghàmə̀, pàʼ nɨ nyaʼə fuə bə̀ teə nyaʼa kubrɨ mɨ̀mə̌d mɨjìm. Gɨ̂ mɔʼɔ rɨŋga pàʼ ze nyaʼa ghà ni, “Wɔ̂ yɨ mɨ Wan nɨ mə̀ ghaʼi kwàʼ rɨŋgəʼ, mɨ fîŋ ə bɔ̀ŋ əku ɨmbə̀ʼ əməd. Mbə̀ zu ənû ze nɨ wɨə ghàə̀!”

6Ənɨ mə̀mə̀ə̀nɨ̀-ɨnû mbe nyaʼa zu gɨ̂ ze, mbɨ nyaʼa bɔ kwàʼ rɨŋgəʼ əne gù nòkɨ̀ ə si rəkubə. 7Yeso nyaʼa wò bètɨ̀ mɨ̀mə̌d ghà ni, “Mbə̀ nɔʼ rətiə. Tɨ mbə̀ bɔ ə.” 8Ənɨ mbɨ nyaʼa nɔɔrɨ ə əghə, chəi mbɨ nyaʼa wɨrɨ zə wə̀d cherə chè rɨ ənɨ Yeso təzìʼ wi.

9Ənɨ mbɨ nyaʼə swiʼ rɨkaŋ ɨwum we, Yeso nyaʼa patɨ mɨ̀mə̌d ghà ni, “Tɨ mbə̀ tɔ gha ə tɨ̀taanɨ njə̀m zɔ̂ əmbɨ wə̀d mɔʼɔ, pè ənɨ Ŋwìə̀ fə zwemnɨ Wan Wə̀d.”

10Mə̀mə̀ə̀nɨ̀-ɨnû mbe nyaʼa biirɨ ɨ bɔ ni, “Məchwiə̀ rɨ̀kə̌ kɨə ghàə̀ ni Èlaijà berɨ be yeʼe ɨmbə̀ʼ ə yè ə?”

11Wɨ̀ nyaʼa wììrɨ̀ ni, “Èlaijà berɨ be yeʼe ɨmbə̀ʼ wɨrɨ tekɨ ɨnû jìm ɨchî nɨ mbɨ nyaʼa bèi. 12Mə ghà ɨ nən ni Èlaijà nyaʼa fə yeʼe, àyɨə chəi bə̂d nyaʼa kyerɨ əməd. Mbɨ nyaʼa ghɨ̀ mbɨ məd ɨchî nɨ zɨə nyaʼa bɔŋ əmbɨ mɨ̀mə̌d. À yɨə bə̀ ɨchî nɨ Wan Wə̀d bɨrɨ zə ŋgəʼ ɨŋga tɨkyerɨ-ɨbɔ mɨ̀mə̌d.” 13Ənɨ wɨ̀ nyaʼa ghà əne, ɨtu mə̀mə̀ə̀nɨ̀-ɨnû mbe nyaʼa kɨ zeŋ ni ɨ wɨə kə̀ʼə̀ ghàm ɨ nən yeʼ ɨmbə̀ʼ ə Jɔ̌n we nɨ nyaʼə nàʼ mɨnib.

Yeso nyaʼa vɨ̀ wan mbaŋə̀ nɨ əzwî rɨbɔ̀ŋ ə nyaʼa ɨŋga məd

(Mk 9.14-29; Lk 9.37-43a)

14Ənɨ mbɨ nyaʼa wɨrɨ bə̀ndɨ̀ wò əsɨ ɨnɔ̂n bə̂d we, wə̀d mɔʼɔ nyaʼa wò əsɨ Yeso pè chìndɨ̀ ɨtu ɨnywɨ ɨfě ɨ bɔ, ghà ni, 15“Masà, diirɨ mɨ wan. Ɨ wɨə gù ə̀fìrɨ̀. Ɨ wɨə bə̀ kàŋə̀ zəə ŋgəʼ əku. Ɨ wɨə sàʼə̀ gù ɨjə̀ŋ, bə̀ sàʼə̀ gù ɨŋga mɨnib. 16Mə kəʼ nɨŋ əməd yeʼe əsɨ mbe mə̀mə̀ə̀nɨ̀-ɨnû, àyɨə chəi ənɨ tɨ̀ mbɨ vɨ əməd.”

17Yeso nyaʼa wììrɨ̀ ni, “Chəi ɨghəm bə̂d wɔ̂ rɨ̀nîn berɨ ɨbenɨ. Ɨ mbɨə ghɨ̀ ɨnû nɨ chəi mbɨ kuʼu. Mə̀ kɨə wò chubɨ mbɨ nən ənɨ əgha nɨ sa rɨ ye ə? Mə̀ kɨə wò yim fîŋ mbɨ nən ənɨ əgha nɨ sa rɨ ye ə? Mbə̀ nɨŋ wan mbaŋə̀ we yeʼe naʼ ɨ num.” 18Ənɨ mbɨ nyaʼa nɨŋ wò nàʼ ɨ bɔ, wɨ̀ nyaʼa ghàm əbɔʼ əzwî rɨbɔ̀ŋ ze, zɨə jwɨ̀ rɨŋga wan we. Əne wan we nyaʼa bɔtɨ i àmei əwu əwən.

19Mə̀mə̀ə̀nɨ̀-ɨnû mbe nyaʼa wò əsɨ Yeso ənjìm ənjìm pè biirɨ ɨ bɔ ni, “Chəi tɨ̀ chɨ̀ əzwî rɨbɔ̀ŋ zɔ̂ ɨmbə̀ʼ ə yè ə?” 20Wɨ̀ nyaʼa wììrɨ̀ əmbɨ mɨ̀mə̌d ni, “À yɨ ɨmbə̀ʼ ɨghəm nɨ mbə̀ berɨ ɨbenɨ nɨ kə. Mə ghà rəsìʼ ɨ nən ni, mbə mɨ berɨ ɨbenɨ nɨ kə ɨghabɨ sǎm ə̀wɔ̀mɨ, mbə bɨrɨ gha əmbɨ ɨwum wɔ̂ ni, 'Nɔʼ rɨ əgha wò ə yɨə,' wɨ bə̀ nɔ̀ʼ wò. Chəi ənû ə mɔʼɔ bɨrɨ chè əwən.” 21[Ka ɨkwɨ əzwî rɨbɔ̀ŋ wɔ̂ bɨrɨ jwɨ i, zɨ rɨ tɨ mbə̀ chub rɨ jɨg, kɔ̀ŋgɨ̀ ə Ŋwiə̀.]

Yeso nyaʼa bə yì ghà ɨmbə̀ʼ i ɨvɨ

(Mk 9.30-32; Lk 9.43b-45)

22Ənɨ mə̀mə̀ə̀nɨ̀-ɨnû mbe nyaʼa wo fetɨ ə Galiliî, Yeso nyaʼa ghà əmbɨ mɨ̀mə̌d ni, “Mbɨ bɨrɨ fen Wan Wə̀d əmbɨ ə bə̂d. 23Bə̂d mbe bɨrɨ zwiirɨ əməd, àyɨə Ŋwìə̀ bɨrɨ zwemnɨ əməd ənɨ ɨni pe tad.” Ənɨ mə̀mə̀ə̀nɨ̀-ɨnû mbe nyaʼa zu ənû, zɨə nyaʼa tɔb mɨ̀mə̌d.

Yeso nyaʼa maʼ tagsɨ̀ mbàn Ŋwìə̀

24Ənɨ Yeso mbɨ mbi mə̀mə̀ə̀nɨ̀-ɨnû nyaʼa pe ə Kàpenàhom, bə̂d mbe nɨ nyaʼə fetɨ mɨ̀tagsɨ̀ mbàn Ŋwìə̀ nyaʼa wò əsɨ Pità pè biirɨ ɨ bɔ ni, “Ɨmbə̀ʼ əchwiə̀-ɨnû wɔ̂ ɨ nən wɨə màʼə̀ tagsɨ̀ mbàn Ŋwìə̀ ə?”

25Pità nyaʼa ben ni, “Ee! Ɨ wɨə màʼə̀.”

Ənɨ Pità nyaʼa wo nyɨ ə nəb, Yeso nyaʼa bè ghàm ɨ bɔ biirɨ ni, “Saimòn, à kɔn ə ze ni yè ə? Mɨfɔ̂n mbe rɨ ɨgwɨ ə si kɨə nɨŋə ŋgòmɨ̀ kɨ̀ mɨ̀tagsɨ̀ rɨ əmbɨ mɨ̀we ə? Mbɨ kɨə nɨŋə rɨ əmbɨ ə bə̂d əbeŋ kɨ̀ rɨ əmbɨ ə bə̂d rɨ̀sɔ̀ʼɔ̀ ə?”

26Ənɨ Pità nyaʼa gha ni, “Tɨ əmbɨ ə bə̂d rɨ̀sɔ̀ʼɔ̀,” Yeso nyaʼa ghà ɨ bɔ ni, “Əne yɨ ni chəi bə̂d əbeŋ berɨ nɨ maʼ tagsɨ̀ we. 27Àyɨə ɨmbə̀ʼ tɨ fîŋ bə̂d mbɔ̂ bə i, ndə̀ wò màʼ saʼ ɨŋga ə sà. Ɨgwi rɨtu we nɨ à gywɨ̌, fiʼ ɨchû ɨməd, à bɨrɨ zə ɨkab ətənɨ ɨŋga. Chɨ ɨkab we wò nàʼ əmbɨ mɨ̀mə̌d ənɨ e ɨghəm bə̀ fɔrɨ ənɨ wum.”

Voafantina amin'izao fotoana izao:

Mt 17: mgo

Asongadina

Hizara

Dika mitovy