Lukə̀ 17

Ndwuumə̀ nɨ mbə̀ʼə ɨ̀zùŋə̀ ndzùmə̀ Yěsû chyə̂

(Mat 18.6-7, 18.21-22; Mrk 9.42)

1Yěsû à lə̀ chi nshwəŋə̀ ambo ɨ̀zùŋə̀ ndzùmə̀ ɨ̀pe lo, “Ɨ̀nwùə̀ pa nɨ pèrə pa nkwàʼnə̀ pə̀ənə̀ lo pobə̂ ghɨ̀rə̀ a tɨ̀pòŋə̀ la chyə̂ a nɨ tô. La ngəʼə̀ yɨ̀noʼnə ɨ̌ pə aŋunə ŋònə̀ nɨ ɨ̀ làŋə̀nə a ndzùmə̀ ze ntô. 2A pòŋə̀ lo mbə̀ʼə pɨ korə̀ nɨ̀ghòorə a loŋə ze, mmàʼà e amwuə nchyə ghù ẅùunə, ntsàarə̀ amwuə mbuurə̀ nɨ mbə̀ʼə pɨ myàʼtə̀ e a ghɨ̀rə̀ moonə̀ nkɨ̂ wə̀ ɨ̀tse a ghɨ̀rə̀ a tɨ̀pòŋə̀. 3Lenəla, nɨ̀ zhìʼtə̀ a wɨghə! Mbə̀ʼə momaa o a fàntə̀ ànwùə̀ ambo ghò, wə̀ saʼà e, a pə̀ŋə̀ ntɨŋmə̀ e wə̀ lə̀ənə̀ a tɨ̀pòŋə̀ e. 4A pə la nfàntə̀ ànwùə̀ ambo ghò nkwùə̀ sàmbaa aŋunə taʼà njyə̂ nkɨ mmə ntô tyìʼə̀ nkwùə̀ ɨ̀tsùmə̀ nshwəŋə̀ ambo ghò lo, ‘Ǹsòmnə̀, mbɨ kẅebə̀, lə̀ənə̀ ɨ̀fàntə̀ ɨ̀nwùə̀ ɨ̀pâ,’ yi wə̀ chyə̂ a nɨ lə̀ənə̀ ɨ̀fàntə̀ ɨ̀nwùə̀ ɨ̀pe.”

Ànwùə̀ mbə̀ʼə Àpyiimə̀ ntɨŋmə̀

5Ngàŋə ntwuumə̀ Ndòʼnə̀mbyə̂ Yěsû za lə̀ shwəŋə̀ ambo ze lo “Ghɨ̀rə̀ pəə tsùŋə̀ nnùŋə̀ ntɨŋmə̀ ɨwəə aŋunə ghò.”

6Ndòʼnə̀mbyə̂ a shwəŋə̀ ambo pobə lo, “Nɨ̀ tə mbə nɨ àpyiimə̀ ntɨŋmə̀ yè kɨ̂nə tsaʼa mbyə̀ àloonə̀, yi mbə̀ʼə nɨ shwəŋə̀ ambo àtɨ̀ghə nɨpyə zə̀ lo, ‘Tsoʼnə̀ a nɨ̀ghə̂ ngə̀ ntəəmə̀ amwuə nchyə ghù ẅùunə!’ a pɨ zuʼnə̀ a wɨghə.

Ànwùə̀ nɨ ngàŋə̀ àfàʼà chyə̂nə a nɨ ghɨ̀rə̀

7“Ŋwùə̀ wɨghə ghùtse à tə mbə nɨ ngàŋə̀ àfàʼà e nɨ à mənə ndyiʼə̀ mɨ̀swùumə kə̀ mbyabə̀ mɨ̀mbyə̂, a pəla nfurə̀ a atwurə nkwə̂, mbə̀ʼə ghò masàa e wa wə̀ shwəŋə̀ lo, ‘Faʼa ntô nwuunə̀ a ɨ̀shyə̂ ndzɨghə̀ mɨ̀zɨghə̀ ɨ̀mô?’ 8Ka wə̀ pə shwəŋə̀ o pə lo, ‘Faʼa ndaamə̀ mɨ̀zɨghə̀, ngẅî ɨtsəʼə àfàʼà ɨ̀pô ntə̂ mɨ̀zɨghə̀ ɨ̀mâ mbə̀ʼə n̂dzɨghə̀ nkɨ nnô, wə̀ pòŋə̀ zɨghə̀ kɨ nô àzô?’ 9Wə̀ kwàŋə̀ lo mbə̀ʼə a ŋâ a mɨyàa ambo ngàŋə̀ àfàʼà wa ntiinə à zuʼnə̀nə e ngɨ̀rə̀ ànwùə̀ àtsùmə̀ nɨ à shwəŋnə̀? 10A kɨ mbə tyìʼə̀ a lenə ambo pɨghə, nɨ̀ tə mə ngɨ̀rə̀ ànwùə̀ àtsùmə̀ nɨ pɨ shwəŋə̀nə lo nɨ̀ ghɨ̀rə̀, nɨ̀ shwəŋə̀ pə lo, ‘Pəə pə mbə wəə la ndàʼà ngàŋə àfàʼà; pəə ghɨ̀rə̀ pə ànwùə̀ nɨ pəə pyə̀nə mbə ghɨ̀rə̀.’”

Yěsû a parə̀ ngàŋə àkɨ̀kẅinə nɨ̀ghumə̀

11Nkwùə̀ nɨ Yěsû a lə̀ mənə nkoʼò ndèrə̀ Yèrusalèmə̀ la, a lə̀ làŋə̀ amwuə àndànə̀ Sàmariyà ghobə Galìlyə̂, 12ngə̀ mmə nkwuunə̀ amwuə àlaʼà àtse, ngàŋə àkɨ̀kẅinə nɨ̀ghumə̀ tô ntsirə̀ e ntəəmə̀ a ndyə̌ sàa, 13nkyiinə̀ nshwəŋə̀ lo, “Ndòʼnə̀mbyə̂, Yěsû, koorə̀ mɨ̀lɨŋə̀ ɨ̀məə!” 14Nkwùə̀ nɨ à lə̀ zəənə̀nə a ghobə, à lə̀ shwəŋə̀ ambo pobə lo, “Nɨ̀ ghə̀ nnèrə̀ mbɨ̀ŋmə̀ ɨ̀zɨghə ambo ngàŋə màʼà Nẅùə̀.”

Nkwùə̀ nɨ Pobə lə̀ mənə ndèrə̀, àkɨ̀kẅinə àzobə a lə̀ zùŋə̀ myə̀. 15Taʼà ŋwùə̀ amwuə pobə a zəənə̀ lo mbɨ̀ŋmə̀ e ɨ̀ laanə̀, mbə̀ŋə̀ nkwə̂ ntyiʼə̀ mmə nkyiinə̀ ngyetə̀ a Nẅùə̀. 16Mmàʼà mbɨ̀ŋmə̀ e a mɨ̀kwùə̀ Yěsû ŋŋâ a mɨyàa ambo ze. Ŋònə̀ ẅèrə wə̀ a lə̀ pə ŋwùə̀ Sàmariyà. 17Yěsû a zəənə̀ e, mbyiitə̀ e lo, “Yi pɨ tô mbarə̀ la a wɨghə nɨ̀ghumə̀? Pɨ̀nɨ̀pwùʼə ghə? 18A ghɨ̀rə̀ àkə lo a kɨ ntô e pə ŋwùə̀ àtwuumə̀ wə̀ lo ŋâ a mɨyàa ambo Nẅùə̀?” 19Yěsû à lə̀ chi nshwəŋə̀ ambo ŋwùə̀ àtwuumə̀ wa lo, “Lòo a ɨ̀shyə̂ ndèrə̀ o, àpyiimə̀ o ghɨ̀rə̀ mə̀ wə̀ tɨ̀ŋnə̀.”

Nkwùə̀ nɨ ànwùə̀ Nɨ̀fò Nẅùə̀ a ghǎ tô

(Mat 24.23-28, 24.37-41)

20Pɨ̀Farìsî pɨ̀tse lə̀ pyiitə̀ a Yěsû nɨ nkwùə̀ nɨ ànwùə̀ Nɨ̀fò Nẅùə̀ a ghǎ tô. A kẅùə̀ ambo pobə lo, “Ka ànwùə̀ Nɨ̀fò Nẅùə̀ a pə ghǎ tô e pɨ̀ mə ndzəənə̀. 21Ka ŋònə̀ ɨ̀tse a pə ghǎ shwəŋə̀ e lo, ‘Zəənə̀, zèrə a zə̀!’ kə̀, ‘Zèrə a zhyə̀!’ ntiinə Nẅùə̀ à wə̀ pɨghə pɨ pobə.” 22Yěsû a chi shwəŋə̀ ambo ɨ̀zùŋə̀ ndzùmə̀ ɨ̀pe pa lo, “nkwùə̀ ɨ̀ zə̀ ntô nɨ nɨ̌ yìi a nɨ zəənə̀ Moonə̀ Ŋwùə̀ aŋunə mətùmə nkwùə̀ la zəənə̀ a wɨghə apə̀. 23Pànə̀ pə̀ ghu nɨ pɨ ghǎ tyiʼə̀ shwəŋə̀ ambo pɨghə lo, ‘Zəənə̀, à wə̀ a nɨ̀ghə̂! Kə̀ zəənə̀, à ẅùə̀ a nɨ̀yî!’ La, kò nɨ̀ zùŋə̀ a ghobə lo ghə̀ zəənə̀. 24Ǹshwəŋə̀ lə ntiinə; tsaʼnə mbə̀ŋə̀ ɨ̀ za ŋŋwàŋə̀ nfurə̀ a pàa ghə mbyàa a pàa yì, la tsaʼnə Moonə̀ Ŋwùə̀ à ghǎ pə amwuə njyə̂ nɨ à ghǎ kẅirə̀ tô. 25La à chyə̂ a nɨ zəənə̀ ngəʼə̀ noʼnə zaʼà, mbə̀ʼə ɨ̀waanə̀ pə̀ənə̀ pə̀ twuunə̀ e. 26Tsaʼnə a lə̀ pənə amwuə nkwùə̀ Noà la, ǎ tsaʼnə a ghǎ kɨ pə amwuə nkwùə̀ Moonə̀ Ŋwùə̀. 27A lə̀ pə amwuə mɨ̀njyə̂ mɨ̀ghu la, pànə̀ mə ndzɨghə̀, nnô, ndzoʼò, ŋŋâ ɨ̀poonə̀ amwuə mɨ̀ndâ mɨ nɨ̀zoʼò tə mbyàa amwuə njyə̂ nɨ Noà à lə̀ kwuunə̀nə amwuə àpaŋə̀, mbə̀ŋə̀ ntɨ̀ŋnə̀ ɨ̀ tyiʼə̀ ndô, nchyə ɨ koʼò mbyaatə̀ a ghobə pɨ̀tsùmə̀. 28A lə̀ kɨ mbə la tyìʼə̀ a lenə amwuə nkwùə̀ Lot; pànə̀ lə̀ pə ndzɨghə̀, nnô, nshwùunə̀, ndzwuunə̀, mmə mbyə̀, nkɨ mənə nkorə̀ mɨ̀ndâ. 29La njyə̂ nɨ Lot à lə̀ furə̀nə àlaʼà Sodòmə̀, ɨ̀mǔ pobə solfòo lə̀ furə̀ a nɨ̀pwuurə̀ nshwuʼə̀ mbyaatə̀ a ghobə pɨ̀tsùmə̀.

30“A tyìʼə̀ ndwuumə̀ nɨ a ghǎ pə amwuə njyə̂ nɨ Moonə̀ Ŋwùə̀ à ghǎ tô. 31À ghǎ pə njyə̂ ghu, ŋònə̀ nɨ à pənə àtwuə̀ ndâ kò a chyə̂ shwuʼə̀ e lo lòo ɨ̀pwuumə̀ ɨ̀pe nɨ pənə amwuə ndâ; ŋònə̀ nɨ a pənə amwuə ɨ̀swùumə a chyə̂ nkwə̂ e a ɨmwuə alyiʼə apə̀. 32Nɨ kẅempə̀ ànwùə̀ nɨ a lə̀ ghɨ̀rə̀nə a ngẅùə Lot! 33Ŋònə̀ nɨ à tàʼnə lo pyatə̀ a nɨ̀chyə̂mbyə̂ e, ǎ pî ẅèrə; ŋònə̀ nɨ à pînə a nɨ̀chyə̂mbyə̂ e, à pɨ pə nɨ ẅèrə. 34Ǹshwəŋə̀ a wɨghə lo, A ghǎ pə nɨ ɨ̀twuʼə̀ njyə̂ ghu, pànə̀ pɨpaa nwùunə̀ aŋunə ɨ̀kwùunə pɨ̀ lòo a taʼà ngwaʼà a taʼà. 35Pə̀ngyə̌ pɨpaa pə ghòʼò àpaanə̀ pɨ̀ tô ndòo a taʼà ngwaʼà a taʼà. 36[Mbyàŋnə̀ ɨpaa ghǎ pə amwuə ɨ̀swùumə pɨ̀ tô ndòo a taʼà ngwaʼà a taʼà.]”

37Ɨ̀zùŋə̀ ndzùmə̀ Yěsû pa pyiitə̀ e lo, “Pèrə pə ɨ̀nwùə̀ ghǎ furə̀ la ɨghə, Ndòʼnə̀mbyə̂?” Yěsû a kẅùə̀ lo, “Alyiʼə nɨ àkwuə̀ ŋwùə̀ a nwùunə̀nə ghu la, pɨ̀məsaŋə pa nshwatə̀ alyiʼə ghu.”

Voafantina amin'izao fotoana izao:

Lukə̀ 17: pny

Asongadina

Hizara

Dika mitovy