Jònə 7
7
Yěsû pobə ɨ̀zùŋə̀ ndzùmə̀ ɨ̀pe
1Zèrə zə̀ ànwùə̀ a lə̀ làŋə̀, Yěsû a ghə̀ mmə nkarə̀ amwuə ɨlyiʼə pɨ̀tse a Galìlyə̂. Ka à lə̀ tàʼà e a nɨ yìinə̀ amwuə Judyà ntiinə pɨ̀Jew lə̀ pə ntàʼà zhwuutə̀ e. 2Njyə̂ nɨ̀ghaʼà ɨ̀zuŋə̀ pɨ̀Jew#7.2 À lə̀ pə ɨ̀zuŋə̀ nɨ pobə lə̀ mənə ndòo ngyìinə̀.ɨ̀ lə̀ paatə̀. 3Lenəla, pɨlyimə pɨ Yěsû shwəŋə̀ ambo ze lo, “Lòo myàʼtə̀ alyiʼə zə ndèrə̀ a Judyà mbə̀ʼə ɨ̀zùŋə̀ ndzùmə̀ ɨ̀pô zəənə̀ ɨ̀nwùə̀ nɨ wə̀ wə̀ nfàʼà. 4Ntiinə mbə̀ʼə ka ŋwùə̀ a lə̀əmə̀ e ɨ̀fàʼà ɨ̀pe mbə̀ʼə a mə ntàʼà lo pɨ̀ zhyə̂ e. Tsaʼnə wə̀ ghɨ̀rə̀nə mɨ̀nwùə̀ la, ghɨ̀rə̀ pànə̀ pɨ àtwuə̀ ɨ̀shyə̂ zhyə̂ o.” 5Ntiinə tyìʼə̀ pɨlyimə ɨ̀pe lə̀ ka nùŋə̀ a ghobə ntɨŋmə̀ ɨ̀ghobə aŋunə ze.
6Yěsû a shwəŋə̀ ambo pobə lo, “Ɨ̀zà nkwùə̀ ɨ̀ pirə̀ tɨ kùʼù, ngə̀ ambo pɨghə nkwùə̀ ntsùmə̀ a nkwùə̀. 7Ka pànə̀ pɨ àtwuə̀ ɨ̀shyə̂ pə mbàanə̀ e a wɨghə la mmə mbàanə̀ mə̀ ntiinə ngwa nshwəŋə̀ lo pobə pa ngɨ̀rə̀ mɨ̀nwùə̀ mɨ tɨ̀pòŋə̀. 8Nɨ̀ koʼò ndèrə̀ a alyiʼə nɨ̀ghaʼà gha. Ka mbə ghə̀ mə̀ alyiʼə nɨ̀ghaʼà ghə̀, ntiinə ɨ̀zà nkwùə̀ ɨ̀ pirə̀ tɨ kùʼù.” 9A lə̀ shwəŋə̀ a lenə la, ngoŋə̀ e a Galìlyə̂.
10La, tsaʼnə pɨlyimə ɨ̀pe lə̀ lèrə̀nə alyiʼə nɨ̀ghaʼà ghu, Yěsû à lə̀ tyiʼə̀ nnyaʼtə̀ ndèrə̀ àze lo kò pɨ zəənə̀ e a ye. 11Ɨ̀twuə̀ pɨ̀Jew lə̀ pə nga ntàʼà e alyiʼə nɨ̀ghaʼà ghu mmə mbyiitə̀ lo, “À ghə.”
12Pànə̀ nɨ pɨ lə̀ pənə alyiʼə ghu lə̀ pə ndẅùmpə̀ mbə̀ʼə e ka mɨ̀zùŋə, pɨ̀tse lə̀ shwəŋə̀ lo, “Ŋònə̀ wə̀ a pòŋə̀,” pɨ̀tse chi nshwəŋə̀ lo, “Ngaŋə, à wa nfɨ̀kə̀ pə̀ənə̀.” 13La ka ŋwùə̀ a mə ntəəmə̀ nshwəŋə̀ e ànwùə̀ mbə̀ʼə e a sàŋə̀ sàŋə̀ ntiinə pobə lə̀ mənə mbô pɨ̀Jew.
Yěsû a nèrə̀ mɨ̀nwùə̀ alyiʼə nɨ̀ghaʼà ghu
14Njyə̂ nɨ̀ghaʼà ghu ɨ̀ lə̀ ghàbrə̀, Yěsû a lèrə̀ a Ndâ Mɨ̀shwàʼà Nẅùə̀ mbìʼnə̀ a nɨ nèrə̀ mɨ̀nwùə̀. 15Pɨ̀Jew lə̀ yerə̀ ntyiʼə̀ mbyiitə̀ lo, “Ŋònə̀ wə̀ à lòo àzhìʼtə̀ lə ɨghə tɨghu à ghə̀ a ndâ àŋwàʼnə̀?”
16Yěsû a kẅùə̀ ambo pobə lo, “Ànwùə̀ nɨ ngwə̀ nnèrə̀ ka a pə e àzâ, a furə̀ ambo ŋònə̀ nɨ à twuumə̀nə a mə̀. 17Ŋònə̀ ɨ̀tse à tə mbəla mmə ntàʼà ghɨ̀rə̀ ànwùə̀ nɨ Nẅùə̀ à tàʼnə, yi ǎ tàʼà a nɨ zhyə̂nə lo ànwùə̀ nɨ ǹshwəŋə̀nə lə a furə̀ pə ambo Nẅùə̀ kə̀ ambo mɨ̀ŋə̀ lo. 18Ŋònə̀ nɨ à wa nshwəŋnə̀ pə nɨ ɨ̀tɨ̀ŋnə̀ e, à tàʼà la àghuʼtə̀ e; la ŋònə̀ nɨ à wa nshwəŋnə̀ pə nɨ ɨ̀tɨ̀ŋnə̀ ŋònə̀ nɨ à twuumə̀nə e à wa nshwəŋə̀ la nkǔŋə nkuŋə, ka chwìrə̀ a pə e amwuə. 19Ka la a lə̀ ŋâ Mǔsî ŋŋâ a mbòomə ambo pɨghə? La ka tàʼà ŋwùə̀ wɨghə ɨ̀tse a nùŋə̀ e a mbòomə ghu. Nɨ̀ tyiʼə̀ ntàʼà nzhwuutə̀ mə̀ lo àkə?”
20Pànə̀ pa kẅùə̀ lo, “Àzhyə̂ a zə a nɨ̀pùmə̀ ghò! A ghò tàʼà zhwuutə̀ ɨ̀wə̌?”
21Yěsû a kẅùə̀ ambo pobə lo, “Ndə̀ ghɨ̀rə̀ pə a taʼà ànwùə̀ moʼo, pɨghə pɨ̀tsùmə̀ tyiʼə̀ ngyerə̀. 22Mǔsî à lə̀ ŋâ a wɨghə nɨ mbòomə a nɨ zə̀ərə̀ ɨ̀poonə̀. La ka mbòomə ghu à lə̀ furə̀ e la ambo Mǔsî, à lə̀ furə̀ pə ambo pɨ̀tǎ pɨ̀tǎ. La nɨ̀ kùmə̀ mmə mbirə̀ ndzə̀ərə̀ ɨ̀poonə̀ aŋunə njyə̂ àlaʼà. 23Pɨ lə̀ pəla mmə ndzə̀ərə̀ a moonə̀ aŋunə njyə̂ àlaʼà ntiinə ka pɨ mə ntàʼà pəʼə̀ e a mbòomə Mǔsî, a tyiʼə̀ ngɨ̀rə̀ àkə nɨ̀ zaŋə̀ a loŋə aŋunə mɨ̀ŋə̀ ntiinə m̀barə̀nə a ŋwùə̀ a fiitə̀ aŋunə njyə̂ àlaʼà? 24Kò nɨ̀ kɨ nsaʼà mɨ̀sàʼa nnaŋə̀ pə tsaʼnə pànə̀ pənə. Nɨ̀ saʼà mɨ̀sàʼa mɨ pə̀ənə̀ ndzùŋə̀ a nkǔŋə nkuŋə.”
Yěsû la Ghù Ndzoʼnə wa?
25Pànə̀ pɨ̀tse nɨ pobə lə̀ pənə a Yèrusalèmə̀ lə̀ pìʼnə̀ a nɨ pyiitə̀ lo, “Ka lə pə e ŋònə̀ nɨ pɨ lə̀ tàʼnə a nɨ zhwuutə̀ la? 26Lə̌ ze nshwəŋnə̀ e a sàŋə̀ sàŋə̀ la ka ŋònə̀ ɨ̀tse a mə nshwəŋə̀ ànwùə̀ àtse ambo ze. Mbə̀ʼə a pə lə lo pɨ̀kùmə pɨ àlaʼà zhyə̂ nkǔŋə nkuŋə lo ŋònə̀ wə̀ la Ghù Ndzoʼnə wa? 27Pəə zhyə̂ alyiʼə nɨ ŋònə̀ wə̀ à furə̀nə. La nkwùə̀ nɨ Ghù Ndzoʼnə wa à ghǎ tô, ka ŋwùə̀ a pə ghǎ zhyə̂ e alyiʼə nɨ à furə̀nə.” 28Tsaʼnə Yěsû à lə̀ pirə̀nə mmə nnèrə̀ mɨ̀nwùə̀ amwuə Ndâ Mɨ̀shwàʼà Nẅùə̀, à lə̀ kyiinə̀ nɨ mɨ̀tɨ̀ŋnə̀ nshwəŋə̀ lo, “Ee, nɨ̀ zhyə̂ mə̀ nkɨ nzhyə̂ alyiʼə nɨ ǹfurə̀nə. Ka ǹtô mə̀ a nɨ̀ghə̂ la àtwuə̀ nɨ mɨ̀ŋə̀. Ŋònə̀ nɨ à twuumə̀nə mə̀ à chyə̂ nɨ nkǔŋə nkuŋə, la ka nɨ̀ zhyə̂ a wɨghə a ye. 29Ǹzhyə̂ e ntiinə ǹfurə̀nə pəə ze. Lenəla a kɨ ntwuumə̀ mə̀.”
30Pobə lə̀ tàʼà lo kô e, la ka ŋònə̀ nɨ mbə̀ʼə a pètə̀ e nɨ àpô ntiinə nkwùə̀ e lə̀ pirə̀nə tɨ kùʼù. 31Pànə̀ pɨ̀noʼnə lə̀ nùŋə̀ ntɨŋmə̀ ɨ̀ghobə aŋunə ze, ntyiʼə̀ mbyiitə̀ e lo, “Nkwùə̀ nɨ Ghù Ndzoʼnə wa à ghǎ tô, à ghǎ ghɨ̀rə̀ ɨ̀lènə̀ mɨ̀nwùə̀ pɨ̀yerə̀nə yerə̀nə tsàarə̀ a ŋònə̀ wanə?”
Pɨ twuumə̀ pànə̀ nɨ pobə mənə mbyabə̀ Ndâ Mɨ̀shwàʼà Nẅùə̀ lo pobə̂ tô nkô a Yěsû
32Pɨ̀Farìsî lə̀ zuʼù tsaʼnə àpùŋə̀ pə̀ənə̀ a lə̀ pənə nchùmpə̀ nshwəŋə̀ mɨ̀nwùə̀ mbə̀ʼə Yěsû. Lenəla, pobə pɨ̀fò màʼà Nẅùə̀ twuumə̀ pànə̀ nɨ pobə lə̀ mənə mbyabə̀ Ndâ Mɨ̀shwàʼà Nẅùə̀ lo pobə̂ ghə̀ nkô e. 33Yěsû a shwəŋə̀ ambo àpùŋə̀ pànə̀ za lo, “Mbɨ pə pə̀ənə̀ tyìʼə̀ aŋunə mətùmə nkwùə̀, lenəla lèrə̀ ambo ŋònə̀ nɨ à lə̀ twuumə̀nə mə̀; 34nɨ̀ ghǎ tàʼà mə̀ la zəənə̀ a wɨghə a gha apə̀, ntiinə mbə̀ʼə nɨ̀ tô a wɨghə alyiʼə nɨ m̀bənə ghu apə̀.” 35Pɨ̀Jew pìʼnə̀ a nɨ shwəŋə̀ a tɨ̀tɨ̀rə̀ pobə lo, “Ŋònə̀ wə̀ à tàʼà lèrə̀ lə ɨghə lo kò pə̀ənə̀ gha nchi ndzəənə̀ a wəənə̀ a ye? À tàʼà lèrə̀ lə àlaʼà àtwuumə̀ nɨ ngàŋə àlaʼà àzəənə̀ chyə̂nə ghu a nɨ nèrə̀ mɨ̀nwùə̀ ambo pànə̀ pɨ àlaʼà ghu? 36Zə ànwùə̀ a chi mbə lə lo àkə ambo ze a nɨ shwəŋə̀ lo, ‘Nɨ̀ ghǎ tàʼà mə̀ la zəənə̀ a wɨghə a gha apə̀, kɨ tô a wɨghə alyiʼə nɨ ngǎ lèrə̀ apə̀?’”
Yěsû a kàʼà a nɨ ŋâ Àzhwùə̀ Nẅùə̀
37À lə̀ pə amwuə ndẅùutə njyə̂ nɨ̀ghaʼà nɨ ɨ̀ lə̀ kɨnə mbə njyə̂ ngẅùunə, Yěsû à lə lòo ntəəmə̀ nshwəŋə̀ amwuə ngyə̀ ntɨ̀ŋnə̀ lo, “Njyə̀ nchyə ɨ̀ tə mbəla mmə ndzaŋə̀ a ŋwùə̀, a tô ambo mɨ̀ŋə̀ nnô nchyə. 38Ŋwùə̀ ɨ̀tsùmə̀ wa nɨ à nùŋə̀nə ntɨŋmə̀ e aŋunə mɨ̀ŋə̀, mɨnchyə nɨ mɨ ma ŋŋâ a nɨ̀chyə̂mbyə̂ tyiʼə̀ furə̀ amwuə ze.” 39À lə̀ shwəŋə̀ a lenə nshwəŋə̀ la Àzhwùə̀ Nẅùə̀ zhyə̀ nɨ pànə̀ pyə̀ nɨ pɨ nùŋə̀nə ntɨŋmə̀ aŋunə ze ghǎ kẅiirə̀. A lə̀ kɨ pə nkwùə̀ ghu, Nẅùə̀ a pirə̀ e Àzhwùə̀ ghu tɨ ŋâ ntiinə Yěsû à lə̀ pirə̀nə e tɨ koʼò ndèrə̀ a nɨ̀pwuurə̀ lo kẅiirə̀ àghuʼtə̀ e.
Pànə̀ pɨ̀ghu lə̀ pə mɨ̀ntswùə̀ mɨ̀ntswùə̀
40Nkwùə̀ nɨ pobə lə̀ zuʼnə àshwəŋnə̀ Yěsû, pobə pɨ̀tse lə̀ pìʼnə̀ a nɨ shwəŋə̀ lo, “A nkǔŋə nkuŋə, ŋònə̀ wə̀ a ngàŋə̀ ntwuumə̀ Nẅùə̀.”
41Pɨ̀tse pànə̀ shwəŋə̀ lo, “La Ghù Ndzoʼnə wa.”
Pɨ̀tse chi mbyiitə̀ lo, “Mbə̀ʼə Ghù Ndzoʼnə wa a furə̀ a Galìlyə̂? 42Ka àŋwàʼnə̀ Nẅùə̀ a shwəŋə̀ la lo, Ghù Ndzoʼnə wa à ghǎ furə̀ la amwuə ngẅàrə̀ Dàfirə̀, amwuə Bethlehem, amwuə mbòmpə àlaʼà za nɨ Dàfirə̀ à chyə̂nə amwuə la?” 43Lenəla pànə̀ pɨ̀ghu lə̀ ghàpə̀ ntyiʼə̀ a mɨ̀ntswùə̀ mɨ̀ntswùə̀ ntii Yěsû. 44Pobə pɨ̀tse lə̀ tàʼà lo kô e, la ka ŋònə̀ nɨ mbə̀ʼə a pètə̀ e.
Ka pɨ̀Jew pə ghobə nɨ àpyiimə̀ ntɨŋmə̀ aŋunə Yěsû
45Pànə̀ pyə̀ nɨ pɨ lə̀ mənə mbyabə̀ Ndâ Mɨ̀shwàʼà Nẅùə̀ lə̀ kẅirə̀ ndèrə̀ ambo pɨ̀fò màʼà Nẅùə̀ pobə pɨ̀Farìsî, pobə pyiitə̀ ambo pobə lo, “A ghɨ̀rə̀ àkə ka nɨ̀ lòo a wɨghə a ye ntô?”
46Pànə̀ nɨ pɨ lə̀ mənə mbyabə̀ Ndâ Mɨ̀shwàʼà Nẅùə̀ kẅùə̀ lo, “Pəə pirə̀ mə a wəə tɨ zəənə̀ a ŋònə̀ ɨ̀tse nɨ à wa nshwəŋnə̀ tsaʼa ŋònə̀ wə̀.”
47Pɨ̀Farìsî pa kẅùə̀ lo, “Njiilo à kɨ fɨ̀kə̀ a wɨghə? 48Àtwuə̀ àtse kə̀ ŋwùə̀ Farìsî ɨ̀tse à nùŋə̀ ntɨŋmə̀ e aŋunə ze? 49Ka àpùŋə̀ pànə̀ zə̀ a zhyə̂ a ghobə a mbòomə Mǔsî; Nẅùə̀ à chyâ mə ndòonə̀ àtwuə̀ pobə.”
50Nikòdemùsə̀ à lə̀ pə taʼà ŋwùə̀ ɨghobə ɨ̀tse nɨ à lə̀ pyə̀ mə ngə̀ ambo Yěsû, mbyiitə̀ ambo pobə lo, 51“Mbə̀ʼə ka pə̀ənə̀ chyâ wəənə̀ ɨ̀sàʼa aŋunə ŋwùə̀ tɨghu pə̀ənə̀ pyə̀ ndzuʼù àshwəŋnə̀ e.”
52Pobə kẅùə̀ ambo ze lo, “Wə̀ kɨ nfurə̀ àzô la Galìlyə̂? Naŋə̀ ɨ̀shìʼnə̀, ngàŋə̀ ntwuumə̀ Nẅùə̀ à laʼa mə nfurə̀ e amwuə Galìlyə̂ apə̀.” 53[Lenəla, pobə furə̀ alyiʼə ghu, ŋwùə̀ moʼo moʼo a tyiʼə̀ ndèrə̀ a ndâ ze].
Voafantina amin'izao fotoana izao:
Jònə 7: pny
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Cameroon Association for Bible Translation and Literacy
