aMatiyu 3
3
aYohana aner abatisma ne a nye aYeso Iren
1Nizen iyong aYohana aner abatisma #3.1: aBatisma: fa: Akanang Ike̱re̱ Ikak, kaye̱e̱r nafarap'e nakak. be̱ a san kutaas rife̱ Adakunom katse ni iben aYahuda. 2Ne a fe̱ ye, “Shishing yin kuse yin, kamok rigwo̱m kaza #3.2: Rigwo̱m Kaza: fa: Akanang Ike̱re̱ Ikak, kaye̱e̱r nafarap'e nakak. m be̱ bubarak.”
3Ayu ne a nye aya Ishaya aner kuzarap tá fe̱ itak wu ye,
“Kuto̱ aner akak yis kaye̱e̱r katse ye,
‘Nye yin Agwo̱m Ágwo̱m iren,
ku nye yin iren'e cop.’ ”
4Ares aYohana'me tá tes a nye be nakuyo̱ng arakumi, ne a rosom kudun kukpa nutin wu. Naya wu nye kubep be ashi ritong. 5Ánerawe aUshalima be áfe íwo̱p aYahuda cice̱r áfe a tá se nikyim Isho̱ng aUrdun ame cice̱r be̱s nufu. 6Á be̱s ne á taas rine̱n ba ne a ku nye ba abatisma ni Isho̱ng aUrdun ame.
7Nizen wu tá di áner aFarisi be áner aSadusi whe̱re̱ tá be̱s naro̱ wu tá se be kunye abatisma'me, a fe̱ be ba ye, “Yin naban áfomong, angan tá tak yin ye, i ru ku teng yin amok Adakunom a tà saase e̱? 8Nye yin itomong i tana tonong ye yin n shishing yin kuse yin. 9Sang yin tu wo̱k yin ace yin be kuto̱ro̱ng ye, ‘Ibrahim nye ada yir’ baꞌ. Won ta ka tak yin, Adakunom ta kyem a sok ata na nong a tin nye Ibrahim inoon. 10Kanu kate̱m se ritin kakon'e, koakye kakon ka ta tes kutes kutek baꞌ, a tà te̱me̱ng a ta te nuro̱ng.
11“Mi ta nye yin abatisma be ashi nong i ta tonong ye yin n shishing yin kuse yin. Amma aner a tana be̱ nama mi ti nar be kukyem, aya mi tana kyem i ra akpatak wu gum baꞌ. A tà ka nye yin abatisma be Kabik Kazhe̱l'e ne kuro̱ng. 12Kube wu se nubo̱k wu. A tà tas áwhe̱'me ne a korok iwe̱ng'e kaye̱e̱r ingme̱ ne a shosh awhe̱'me be kuro̱ng kuya sang ku tana ku baꞌ.”
aBatisma aYeso
(aMar 1.9-11; aLuk 3.21-22)
13Nizen iyong aYeso dorok na aGalili a ta be ni Isho̱ng aUrdun nong aYohana tá su ku nye abatisma. 14aYohana shim a tú ku roon'e, iyong a fe̱ ye, “Gye̱r ke mi be̱ nufuan nong wan tin nye abatisma, ne wan bun i be̱ nunaan ingya a?”
15Amma aYeso fe̱ be wu ye, “I se gye̱r ta nye yir anong; kamok be anong ne a tá shining yir ike̱ng iya Adakunom ta shim.” Ayong aYohana tú ku shim'me.
16Kum a tá fa nye aYeso abatisma ame ne a wuruk kaye̱e̱r ashi'me, ne kaza wor ka karak ne a di Kabik Adakunom kyo̱ndi abo̱p ti tiik ni wu. 17Ne kuto̱ kukak wuruk naza ye, “Wan ne inye Igon'i kaya mi ta shim. Mi fok kusas wu dide̱ng.”
Voafantina amin'izao fotoana izao:
aMatiyu 3: izrNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Wycliffe Bible Translators, Inc
