Maatteeo 2

Heerinniook ꞌcĩg ĩĩn ꞌgeeꞌnyiak

1Baa ĩĩn Ẽrõõdẽ#2:1 Ẽrõõdẽ: Ĩĩn ciee habu Ẽrõõdẽ Cobbi baa adiim aruk Yeesu baa nga arrittiaa thõng. Tigiil thõõth cĩnnĩ ꞌBuuhaa cĩ Maatteeo 2:1-8; ꞌLuuka 1:5. Urutaa baa adaahĩ nẽẽnĩ, ikia ĩĩ ngeerĩnĩ Ẽrõõdẽ Antipa habu, baa aggameek Yõaannẽ Yeesu baattithimo. Tigiil thõõth cĩnnĩ ꞌBuuhaa cĩ Maatteeo 14:1; Maarko 6:14; ꞌLuuka 3:1; Dtiicanĩ cĩg ꞌThooyyiahu 4:27. Ma baa urutaa cĩ Ẽrõõdẽ Antipa, ikia aau habuui umwaa ꞌcĩ haĩ Ẽrõõdẽ Agirippa, ngeertĩ loholeec cĩ Ẽrõõdẽ Cobbi. Tigiil thõõth cĩnnĩ ꞌBuuhaa cĩ Dtiicanĩ cĩg ꞌThooyyiahu 12:1-13:1. habu irkitaa ꞌcĩ arrittaanĩ Yeesu Bẽtẽlẽma looccaa cĩ ꞌJudeea. Nẽ waathinnioohĩĩ nĩĩcag, iita uppwaatta ꞌgeeꞌnyiaha ũgẽẽgĩ ꞌcĩg au ĩĩcĩ uruto hiita hõdõlanit ꞌJeruꞌthalẽm. 2Baa nẽ iita ijinit ꞌgeeꞌnyiaha niccieeg eet cĩg ꞌJudeei ĩĩttĩk, “Aaĩ loholeec baa aĩ arrittiaa hĩĩ habu cĩ ꞌJudeei ho ngaana? Baa hacĩnaanna coobooc cĩnnĩ uppwaanna ĩĩcĩ uruto nẽ ꞌyioko, hauunna haĩ hiita hubuluꞌthia ĩnõõnnõ.”

3Ma baa athĩhĩ habuui Ẽrõõdẽ thõõth icci hoti ho, ikia upuppud ꞌthĩnĩt cĩnnĩ gẽrrẽẽt hĩ eet cĩg ꞌJeruꞌthalẽmĩ vẽlẽk. 4Ma ho, ikia ũtũvva Ẽrõõdẽ makayyiook cĩg paadĩrꞌnyaannu hĩ ꞌlimmanniook cĩg nyattal cĩ Mũũꞌtha nẽ ijin ĩhõõggõ ĩĩnnĩk, “Arrittiaa Krĩstõ ngaana?”

5Ẽdẽcĩ nẽẽg ĩnõõnnõ anneek, “Arrittiaa nẽẽ Bẽtẽlẽma looccaa cĩ ꞌJudeea, hĩ baa ẽhẽẽd põrõvẽtaacĩ aĩ,

6“ ‘Niig eeta cĩg Bẽtẽlẽmĩ looccaa cĩ ꞌJudeea,

iiginnu niig tiirik gẽrrẽẽt ꞌtaaũnnioohĩĩ cĩg ꞌJudeea vẽlẽk.

Aku hatĩ ẽẽtĩ ꞌcĩ ĩĩn habu ꞌtaaũnaa cunuung ko. Ĩĩn hatĩ nẽẽ tũhayyioohit cĩ eet cĩgannĩg Ĩꞌthĩraẽl.’ ”#Tigiil ꞌBuuk cĩ Miika 5:2

7Nĩngĩtĩ avvaanĩ Ẽrõõdẽ ꞌgeeꞌnyiak ꞌcĩg au ĩĩcĩ uruto ho ĩĩcĩ burki nẽ ijin ꞌthaa ꞌcĩ baa uppwaannakĩ ĩhõõggõ cõõbõõcĩ ho. 8Ma ho, ĩꞌthooĩk ĩhõõggõ bẽtẽlẽma nẽ ĩĩnnĩk, “Õõt da atarrabatta ĩdõlĩ tĩho nẽ ma ummudiaau, iita uduktaahaangu hĩdĩĩkoothong, hátĩ hũũk hala naa buúk ĩnõõnnõ.”

9Ma baa ĩthĩhĩt ꞌgeeꞌnyiaha niccieeg thõõth ꞌcĩ aduha habuui Ẽrõõdẽ ho ẽlẽk, iita ũtũngteek ĩnõõnnõ, nĩngĩtĩ õõĩ. Baa uwwattẽẽkĩ ĩhõõggõ cõõbõõcĩ baa acinoothi nẽẽg ĩĩcĩ uruto, ĩꞌthõng hũũk hĩbĩl ngaatĩ baa aayyi ĩdõlĩ ho. 10Ma baa acĩn nẽẽg coobooc nicci ho, iita accamattoothĩk gẽrrẽẽt.

11Ma baa õdõlanit nẽẽg ꞌcieeth tĩho, iita ummuddiaak nẽẽg ĩdõlĩ tĩho hĩ aattĩnnĩ Maria nĩngaata, nĩngĩtĩ akannẽẽkĩ huruꞌnyia nẽ alaacõ ĩnõõnnõ. Ma ho, itikta ꞌbaaninit ꞌcĩ ĩĩn ꞌdaab hĩ mõhõõkac hĩ ngõrrõ umwa ꞌcĩ õꞌngõlĩ ẽmmẽdĩ ꞌcĩ haĩ ꞌmiira. 12Ma baa urutaa cĩnnĩ, ikia othoothĩk Nyekuci ꞌgeeꞌnyiak niccig honoothittatõõ, hiittiõõ hõllõngaa obodoothi hĩ Ẽrõõdẽ tarĩ. Nĩngĩtĩ õbõdõõꞌthĩ nẽẽg looccaa cĩnĩĩng ꞌgõõlaa umwaanĩ ĩĩcĩ ꞌrĩĩng.

Ũũhĩ Yothebo loholeec Ijjiba

13Ma baa oboddioothĩ ꞌgeeꞌnyiaha niccieegi, ikia uppwaannak aajĩlõ cĩ Makayyiookto Yothebo honoothittatõõ nẽ ĩĩnnĩk, “Tĩnga hataman! Viri loholeec hĩ aattĩnnĩ bĩtĩ Ijjiba! Bĩĩt awwuaaĩ ĩĩca ĩꞌthõng, huduhaahi naa kõr ꞌcĩ hatĩ õbõdaanĩ, hĩnĩngĩtĩ adiim Ẽrõõdẽ aruk loholeec.” 14Nĩngĩtĩ ĩꞌngaannĩ Yothebo baalin niccia noho nẽ ivviri loholeec hĩ aattĩnnĩ ũũhĩ Ijjiba, 15ĩĩcĩ baa õõ aattiyyi ĩꞌthõng hadaak Ẽrõõdẽ. Nĩngĩtĩ aku ĩĩnnĩ thõõth cĩ Makayyiookto baa ẽhẽẽd põrõvẽtaacĩ dĩdĩ baa aĩ, “Hũtũvva naa loholeec caannĩ hũtũngeek Ijjib.”#Tigiil ꞌBuuk cĩ Hoꞌthẽa 11:1

Uruk Ẽrõõdẽ lõhõlĩ ꞌcĩg kidicig

16Ma baa ammũda Ẽrõõdẽ ngaatĩ ĩggõõlĩ ꞌgeeꞌnyiaha ĩnõõnnõ thõng ko, ikia ĩlĩĩlĩ gẽrrẽẽt, nĩngĩtĩ aduhaakĩ athegereeꞌnya cĩgĩnnĩg huruhit lõhõlĩ ꞌcĩg hidicig ꞌcĩg maacĩg, ꞌcĩg aattĩg Bẽtẽlẽma hĩ ꞌcĩg õbõhõõ nĩngaata vẽlẽk, ꞌcĩg ĩĩn irkiꞌnyia cĩggĩĩng ꞌramma hĩ ꞌcĩg nga ĩĩn ĩdõlẽẽt vẽlẽk. Baa adticaniini nẽẽ thõõth baa aduhaak ĩnõõnnõ ꞌgeeꞌnyiaha.

17Nĩngĩtĩ aku ĩĩnnĩ thõõth baa Makayyiookto dĩdĩ, baa aduha põrõvẽtaacĩ ꞌJeremia aĩ,

18“Athĩhĩ eeta ulwa ꞌcĩ arruuẽnĩ ngaaĩ ꞌtaaũnaa cĩ Raama,

ulwa hĩ ĩlaali,

arruui Rakĩlẽ,#2:18 Rakĩlẽ: Ĩĩn ꞌthaara ꞌcĩg haĩ Rakĩlẽ ho ꞌthaar cĩg ngaa ꞌcĩ hatĩ horumwa aruk Ẽrõõdẽ lõhõlĩ cĩggĩĩng hadaahito.

hũtũbũr ngaatĩ amammaayaniini,

hĩnĩngĩtĩ ucuddia lohollia hĩ lõõcĩ ꞌthĩĩ.”#Tigiil ꞌBuuk cĩ ꞌJeremia 31:15

Õbõdõõthĩ Yothebo Naaꞌtharẽta

19Ma baa adaak Ẽrõõdẽ, ikia uppwaannak aajĩlõ cĩ Makayyiookto Yothebo honoothitatõõ baa nga aaĩ nẽẽ Ijjiba 20nẽ ĩĩnnĩk, “Tĩnga bõdĩ loholeec hĩ aattĩnnĩ looccaa cĩ Ĩꞌthĩraẽlĩ. Adaahito eeta baag adiim aruk ĩnõõnnõ.”

21Nĩngĩtĩ ĩꞌngaannĩ Yothebo nẽ ũũhĩ loholeec hĩ aattĩnnĩ Ĩꞌthĩraẽla. 22Ma baa athĩhĩ nẽẽ aĩ ĩĩ, ngeertĩ Ẽrõõdẽ ꞌcĩ haĩ Arkelao habu cĩ ꞌJudeea ho, ikia itingõlĩ ngaatĩ õkõõĩ looccaa cĩ ꞌJudeea. Baa aku adukiaak ĩnõõnnõ thõõth honoothittatõõ hũũk looccaa cĩ ꞌGalileea. 23Ma ho, õõt õlõmanit nẽẽg ꞌtaaũnaa cĩ Naaꞌtharẽtĩ, looccaa cĩ ꞌGalileea. Nĩngĩtĩ aku ĩĩnnĩ thõõth cĩ Makayyiookto dĩdĩ, baa aduha põrõvẽtaacĩ aĩ, “Aũ hatĩ eeta ĩnõõnnõ anneek, eet cĩ Naaꞌtharẽtĩ.”

Voafantina amin'izao fotoana izao:

Maatteeo 2: did

Asongadina

Hizara

Dika mitovy