GYƆNI 19

1Di saha ka Gɔmna Pailiti daa zaŋŋi Yisa n‑tisi ka ba zaŋŋi daari n‑feebi u. 2Ka soogyadima maa daa zaŋŋi goosi m‑paam, ka yɛtti, ni, naam zupiliga n nyɛ ka. Ba daa zaŋŋi ka m‑pili u zugu, ka zaŋŋi naam kparizeoo n‑yeeli u. 3Ba daa kyɛnni u saani na nti maanni u la ansarisi, ni, “Ndana, m Ba Izraɛli Naaba!”, ka lɔbri u pɛ'asi. 4Pailiti mun daa labi n‑yi n‑yɛli daadam maa, ni, “Tɔ! m mari u na nti ti ya, ni ya baŋŋi, ni, man bu nya u taaliseaa.” 5Ka Yisa daa yi na, ka u na pinni la goosi zupiliga maa, ka yɛ kparizeoo la. Ka Pailiti daa yɛli ba, ni, “Nnya doo maa!” 6Gyeeŋŋu kpamma maa mun daa nya u, ban ni ba Pirinsi dima maa, ka daa gbaai tasibu, ni, “Ya kpaasim u n‑tabli dɔpulli zugu! Kpaasim u!” Pailiti mun daa gyɛrigi n‑yɛli, ni, “Tɔ: ya deaam u n‑kpaasi ya mammansi! Man mun bu nya u taaliseaa ni n galim u.” 7Yɛhudiyadima maa daa labsi n‑yɛli “Ti mari la ti zaaligu ka di wulisi, ni, di sum ka u kpi, dama u zaŋŋi u maŋŋa n‑yɛtti, ni, Naawunni bii n nyɛ u.” 8Ka Gɔmna Pailiti ŋɔn daa ti wum lala maa, dabeem daa kpa u m‑paasi. 9Ka u daa mari Yisa n‑labi n‑kpɛ Baarikyi zɔŋŋu maa puuni m‑boosi u, ni, “Yɛni ka i yi na?”; ka Yisa daa bu labsi u seela. 10Ka u daa laa n‑yɛli u, “I ku tɔ'asi n‑ti ma? I bu mi, ni, m mari yiiko ni n kyɛ ka ba basi i, bee, ba kpaasi i n‑tabli dɔpulli zugu n‑ku i?” 11Ka Yisa yɛli u, “I ka yiiko n nin toaai, di yi pa la yiiko maa yi Naawunni saani na. Dinzugu ninvugsɔ ŋɔn figsi ma n‑ti i la nin deaai taalli n‑gaari i.” 12Di saha zaŋŋi n‑kyɛnna ka Pailiti yi boori sɔseaa ŋɔn nin dɔli m‑basi Yisa. Amaa Yɛhudiyadima maa daa tasiri n‑yɛtta, ni, “I yi basi doo wa di wulisiya, ni, i pa la Room NaaTitaari maa zɔa! ninvugsɔ ŋɔn yɛnni, ni, u nyɛ la naaba - tɔ! di daama za'asiri NaaTitaari la naam maa!”

13Gɔmna Pailiti ŋɔn daa wum lala, u daa mari Yisa n‑yi na, ka daa zini u sariya karibu bimbinni maa zugu. Bɛni ka ba daa boonni, ni, ‘Litɔsitɔroota’ la, ka ka yuuri Hibruuli ni daa nyɛ la ‘Gabbata’ - ka di gbinni “Kuga Ziiya” maa. 14Di saha maa n daa nyɛ Yakki-n‑Gaari Kyuu siri maaligu daari, ka di daa paai agbaa saha ka Pailiti daa yɛli Yɛhudiyadima maa, ni, “Ya nyama, ya Naa maa nŋɔa!” 15Ban mun daa tasi pampam n‑yɛli, ni, “Mari u m‑bakki! Kpaasim u n‑tabli!” Ka Pailiti daa boosi ba, ni, “Ammi, ya bu boori n ku ya Naaba maa?” Di saha ka gyeeŋŋu kpamma maa daa labsi n‑yɛli, “Ay! - Ti ka Naaba, m‑paasi Room NaaTitaari maa zugu!” 16Di saha ka Pailiti daa zaŋŋi Yisa n‑tisi ni ba ti ku u.

Dinzugu ba daa zaŋŋi Yisa 17n‑kyɛ ka u bugi u maŋtoori kum dɔpulli daari n‑kyaŋŋi nti paai ya'aseaa ban boonni “Zuguŋmaaŋŋu Ziiya”, di n nyɛ, Hibruuli ni, ‘Gɔligɔtta’ la. 18Bɛni maa ka ba daa kpaasi u n‑tabli dɔpulli maa zugu ka zaŋŋi ka n‑sa, ka laa n‑kpaasi niriba ayi m‑paasi u zugu, n‑zaŋŋi ba yinni dɔpulli n‑sa Yisa ya'ari wa sa, ka zaŋŋi kanla muna n‑sa u ya'ari wa sa, ka Yisa daa bɛ ba sunsukkuni. 19Gɔmna Pailiti daa pun sɔbi bunni n‑tabli dɔpulli maa saazugu, ni, “Yisa, Nazarɛti doo la, nŋɔa: Yɛhudiyadima Naaba.” 20Yɛhudiya niriba pam daa karim lala sɔppu maa, dama ban daa kpaasi Yisa seela ni Gyɛrusalɛm timpuuni daa bu wɔ'a; halli ba daa sɔbi ka Hibruuli yɛttɔ'a, ni Room yɛttɔ'a ni Griiktiri gba. 21Yɛhudiya gyeeŋŋu toondaandima maa mun daa yɛli Pailiti ni, “Ay! di sɔbi, ni, ‘Yɛhudiyadima Naaba’ amaa, ni ‘U yɛli u mammaŋŋa yɛla, ni, “Yɛhudiyadima Naaba n nyɛ ma.” ’ ” 22Ka Pailiti daa labsi n‑yɛli ba, ni, “Man ŋɔn sɔbi seem la, di sɔbiya!”

23Soogyadima anaasi maa ŋɔn daa kpaasi Yisa n‑naai, ba daa deaai u situra m‑puri bunaasi n‑tɔri taaba. U waari kparigu mun n daa nyɛ bunsuŋŋu, ka ba wugi ka bummunni ka bu sɛ ka tanni: 24ka ba daa yɛli taaba, ni, “Ya di kyɛ ka ti toaai ka n‑tɔri see ka ti tɔ tɛtɛ m‑baŋŋi ŋɔn ya deaai!” Lala ka din daa sɔbi n‑dooli siri daa niŋi, ni#:-

“Ba zaŋŋi n situra n‑tɔri n‑ti taaba

Ka tɔ la tɛtɛ n kyinkyinni zugu.”

Tɔ: soogyadima maa ŋɔn daa tum seem nla. 25Tɔ, ka pɔ'aba daa zɛ n‑tabi Yisa dɔpulli ziiya: u ma Mariama n daa bɛ ni, ni ŋɔn Mariama sunzɔ la; ni u tɔ'ama, Klɔpaasi pɔ'a; ni Mariama Magdala tiŋŋa pɔ'a la gba. 26Ka Yisa daa nya ka u ma n zɛya, ŋɔn ni u nyaandɔlisɔ ŋɔn daa wuri pam la gba. Ka u yɛli u ma maa, ni, “Nyama, m ma, i bii nŋɔa.” 27ka laa n‑yɛli doo maa, ni, “Nyama, i ma nŋɔa.” Ka di saha zaŋŋi n‑kyɛnna u nyaandɔla wa daa deaai Yisa ma u toori yiri maa ni.

28Tɔ: di daa niŋi lala, ka Yisa daa naayi ti baŋŋi, ni, u tum bunseelikam zaa n‑naai. Di saha ka u daa yɛli, “Kɔnyuuri m mari ma!” - ka yɛligu wa gba dɔli la din daa pun sɔbi n‑dooli Litaafi maa ni seem la. 29Di saha ka damiisiri n daa bɛ dukku ni n‑zɛ bɛni. Ka ba daa zaŋŋi sɔ'asu n‑niŋi daam maa ni n‑kusi ka n‑tabli bunni zugu n‑duusi m‑paai u noori, ni, u nyuuma. 30Ka Yisa ŋɔn daa nyu n‑naai maa, u daa yɛli, ni, “Di naaya!”, ka daa sunni u zugu n‑leebi bunni din ka ni.

31Dirindaari maa daa nyɛ Kyuu maa siri maaligu dabsiri, ka lala zugu ka Yɛhudiyadima maa daa bu boori la niriba n kpalim n‑tabli dɔpula maa ni ba ti kpi ka di bɛ la Kyuu la Vuusim Dabsiri maa ni, dama dabsitibsiri daari n‑daa la. Ka ba daa susi Gɔmna Pailiti, ni, u kyɛ ka ba kabsi niriba maa gbaya ka ba kpi yooma ka ba sigsi ba na. 32Di zugu ka soogyadima maa daa paai ba saani n‑kabsi doo yinni gbaya, ni ŋɔnla gba gbaya - dɔseeba ban daa la'am n‑kpaasi Yisa saani la. 33Amaa ban daa paai Yisa saani na nti nya ka u pun kpi ni maa, ba daa bu kabsi u gbaya. 34Amaa ba ninvugsɔ daa zaŋŋi u kpanni n‑kusi Yisa pulugri ka ziim daa toosi n‑yi na, ni koom m‑paasi. 35[Tɔ, ya bu nya? - ŋɔn yɛtti lahabaari wa n daa bɛ bɛni ka u nini nya. U lahabaari yɛligu wa nyɛ la yɛlimaŋni: u mammaŋŋa mi halli, ni, yɛlimaŋni n nyɛ di, ni ya gba ti niŋi yɛdda di zugu.] 36Anŋɔ zaa daa niŋi lala ni di kyɛ ka din daa sɔbi n‑dooli siri niŋi yɛlimaŋni, ni, “U kɔba muna - aseaa zaa ku kabsi.” 37Ka di laa n‑sɔbi yaasa, ni, “Ba nin gɔsi n‑nya ban daa kusi sɔ la.”

38Tɔ: dɔsɔ n daa bɛ ni ka u yuuri boonni Gyoosɛfi, ŋɔn daa yi Arimatii tiŋŋa la na. Ka ŋɔn Gyoosɛfi daa nyɛ sɔ ŋɔn daa dɔli la Yisa, amaa u daa sɔ'ai n‑dɔli ni, Yɛhudiyadima maa dabeem zugu. Ka Yisa kum nyaaŋŋa u daa kyɛ Pailiti saani na nti susi u, ni, u kyɛ ka u deaai Yisa ningbiŋŋu la n‑sɔ'ai. Ka Pailiti daa sakki n‑ti u. Ka Gyoosɛfi daa kyaŋŋi nti deaai ningbiŋŋu maa m‑bakki n‑kyaŋŋi. 39Nikɔdiimusi gba daa dɔli ŋɔn Gyoosɛfi n‑kyɛ na, ka u daa mari turaaliseesi ni kpanyuuma an mari nyunya'asa ka a ligri zoaai. U daa mari a pam gba. Nikɔdiimusi ŋɔn daa pun kyɛ Yisa saani na yuŋŋu la n‑daa la. 40Ba daa zaŋŋi Yisa ningbiŋŋu maa n‑vili n‑vili tampeela n‑niŋni turaali dima wa, hoo ba Yɛhudiyadima kum sɔ'abu kaari ŋɔn daa nyɛ seem. 41Ka gaadi daa bɛ bɛni, ziseaa ban daa ku Yisa la ni, ka gaadi maa puuni ka ba daa pun kyiibi tampifeoo gballi duu, amaa ka na bu zaŋŋi sɔ n‑sɔ'ai ka puuni. 42Bɛni ka ba daa zaŋŋi Yisa n‑dooli, dama ka daa bu wɔ'a: ba daa na kur teesiri la Yɛhudiyadima Kyuu maa siri maaligu dabsiri yɛla.

Voafantina amin'izao fotoana izao:

GYƆNI 19: maw

Asongadina

Hizara

Dika mitovy