Kuxh 7

Uvaʼs talt quBʼaal Jesuus tiʼ kam uvaʼ nik yansan u xaol vatz quBʼaal Tiuxh

Tio 15.1-20

1Ibʼanetz paqul uvaʼ, aqʼbʼ jolol inqʼa fariseeo vatz Jesuus tuchʼ jolt inqʼa nikich txhusun vibʼekʼbʼal inqʼa tij imam Israeel, inqʼa eenaqich tzajnaʼql tu tenam Jerusaleen. Tul aqʼbʼ tiʼ tilix kam inqʼa nikich ibʼan Jesuus. 2-4Pet aʼetzxh nikich inima inqʼa fariseeo tuchʼ inqʼa tij imam Israeel inqʼa ibʼekʼbʼal uvaʼ jeqich tzaan taʼn inqʼa naʼyla kʼuy imam. Tan oq yeʼlich laʼ itxʼajaq iqʼabʼ bʼiitxhaqul tuul, tul yeʼlich laʼ utxh itxʼaʼoneʼ. Atz oq nikich tul vet t-kʼayibʼal, tul yeʼlich laʼ motx txʼaʼoni, oq yeʼl iqʼabʼ laʼich itxʼaj s-bʼaxa, eche uvaʼ nik tal inqʼa bʼekʼbʼal. Tul mam tel kuxh nikich motx inima inqʼa fariseeo tuchʼ inqʼa nikich txhusun ibʼekʼbʼal inqʼa qumol s-tijaq imam Israeel. Jankʼal eche vitxʼajt inqʼa kam uvaʼ nik tal inqʼa ibʼekʼbʼal, eche inqʼa ivaaso tetz ukʼbʼal aʼ, atz inqʼa ixhaalo, atz jankʼal inqʼa kamaq tetz inqʼa txhʼitxhʼxhtuʼ tetz txʼaʼonbʼal, atz itxʼaax inqʼa txhem, inqʼa qʼaʼlel ibʼanaxeʼ. Tul aʼ nikich motx titzʼa uvaʼ, aʼ nikich chiibʼisan quBʼaal Tiuxh tuchʼ inqʼa nikich motx ibʼaneʼ.

Tilaqetz veteʼ uvaʼ at jolol inqʼa nikich itxhus tibʼ kʼatz Jesuus uvaʼ yeʼaq motx itxʼaj iqʼabʼ vatz quBʼaal Tiuxh, eche uvaʼ nikich tal vibʼekʼbʼal inqʼa tij imam Israeel. Pet yiqxh motx kuxh txʼaʼon s-eche. Echetz nikich motx teesal iqʼije inqʼa nikich itxhus tibʼ kʼatz Jesuus taʼn inqʼa fariseeo, atz taʼn inqʼa nikich txhusun vibʼekʼbʼal inqʼa tij imam Israeel.{*}#7.2-4 Aʼetz nikich tal inqʼa fariseeo inimal jolol inqʼa bʼekʼbʼal uvaʼ jeqbʼamalich vet tzaan taʼn inqʼa kʼuy imam. Tul motxetz kuxh iyuj vet tuchʼ inqʼa bʼekʼbʼal uvaʼ tal quBʼaal Tiuxh te Moisees. Tul tira motx ijeqbʼa vet ka inqʼa bʼekʼbʼal s-bʼaʼn uvaʼs maʼtich ikam vet Moisees. Aʼetz vaʼl inqʼa bʼekʼbʼale, uvaʼ toksa inqʼa tij imam Israeel xoʼl inqʼa bʼekʼbʼal, uvaʼ tal ka quBʼaal Tiuxh te Moisees uvaʼ nik tal tu versiikulo kaʼvaʼl tetxhal topoon t-kajvaʼl. Aʼe tiʼ u txʼajo qʼabʼ tuchʼ vitxʼajax inqʼa kam etz vatz quBʼaal Tiuxh. Tan aʼ qeichaq taʼn uvaʼ txhaqpaq laʼ motx itxʼajtaq iqʼabʼ tuchʼ inqʼa kamaq tetz, tul aʼ nik motx ijetxhoʼk tibʼ vatz quBʼaal Tiuxh s-vatz. Atz aʼ yeʼ nik motx ikuy itzʼilut tibʼ s-vatz. Echetz s-tiʼile motx ijeqbʼa vet u txʼajoʼm. Tan nik motx itxʼaj iqʼabʼ txhaqpaq tex xoʼl inqʼa xaol, inqʼa jit niman tetz quBʼaal Tiuxh. Atz nik itxʼaj iqʼabʼ txhaqpaq tul t-kʼayibʼal. Tul nik motx itxʼaj inqʼa kamaq tetz, atz nik itxʼaj itxʼatxh.

5Yaʼne ech tal inqʼa fariseeo tuchʼ inqʼa nikich txhusun vibʼekʼbʼal inqʼa tij imam Israeel s-eche: —¡Kam s-tiʼil yeʼ nik inima txhaqnaq inqʼa bʼekʼbʼal, inqʼa jeqel tzaan taʼn inqʼa iqʼesal inqʼa kʼuy qumam! Tan yeʼ nik motx itxʼaj txhaqnaq vitzʼilla txhaq qʼabʼ vatz quBʼaal Tiuxh uvaʼs yeʼnaq txʼaʼonoq, —xeʼtaq te Jesuus.

6Tul ech tal Jesuus s-eche: —¡Kaʼvatz kuxh ex! Tan antxhte u yol uvaʼ itzʼibʼa ka Isaiias, u qʼexsanich tetz viyolbʼal quBʼaal Tiuxh s-naʼya, tiʼ inqʼa kʼuy emam. Tul antetzxh setiʼe nik talvat inqʼa yol inpaqte uvaʼ ech nik tal s-eche:

«U tenam uvaʼa,

tan oqxh ikam toksal inqʼij taʼn

tuchʼ inqʼa yol

uvaʼ nik teluʼl titziʼ.

Poro ech koqe,

tan sibʼ ateʼl inqʼa taanima

sinkʼatza,

tan yeʼ nik motx inima in.

7Niketz kuxh motx ibʼutxh tibʼ

tiʼ toksal inqʼij.

Tan nik kuxh motx itxhus

inqʼa ibʼekʼbʼal te inqʼa xaol,

tul aʼ nik motx taleʼ

uvaʼ, in nik alon inqʼa yol,»

chich u yol.#Isaiias 29.13

8Tul echatetz kuxh exe inqʼa s-txheel, tan aʼ yeʼ nik motx enima inqʼa ibʼekʼoʼm quBʼaal Tiuxh. Atz aʼxh txʼakel ok etitzʼabʼal tiʼ inimal inqʼa bʼekʼbʼal uvaʼ jeqel kuxh tzaan taʼn inqʼa kʼuy emam. [Tul aʼ kuxh nik enima itxʼaax inqʼa kam etz vatz quBʼaal Tiuxh, eche exhaalo, atz itxʼaax inqʼa evaaso tetz ukʼbʼal aʼ. Atz mamala tel kuxh nik ebʼanoʼk vatz quBʼaal Tiuxh uvaʼ yiqxh ex kuxh nik viʼtisan.] 9Tul tira nik eteesa iqʼij inqʼa ibʼekʼbʼal quBʼaal Tiuxh. Tul aʼ kuxh nik enima inqʼa bʼekʼbʼal uvaʼ jeqel kuxh tzaan taʼn inqʼa kʼuy emam. 10Tan ech itzʼibʼa ka Moisees s-eche: «Laʼ ooksa iqʼij atxutx abʼaal,» Atz: «Jaʼl uvaʼ laʼ alon yeʼbʼaʼn tiʼ itxutx ibʼaal, tul aʼetz uvaʼe, laʼ yatzʼax el. Tul yeʼxhabʼil invaʼq laʼ txumun,» chich u yol.#Eeksodo 20.12

11Pet ex, tan aʼ nik etxhus inqʼa xaol, s-tiʼ uvaʼ laʼ utxh talt te itxutx ibʼaal uvaʼ: «–Yeʼ laʼ utxh inlotxht vet axh. Tan jankʼal u puaq uvaʼ saʼ vaqʼ see, tan ‹korvaan› veteʼ, –chaq ex te etxutx ebʼaal,» chich etxhust inqʼa xaol, —xeʼt Jesuus. (Aʼ nik elkaʼp u yol ‹korvaan› s-eche: ‹Tetz vet quBʼaal Tiuxh vaʼn,› chiche.)

12Tul echat tal Jesuus s-eche: —Tzitzietz yeʼ nik ekuyvat ilotxht inqʼa xaol itxutx ibʼaal. 13Tul nik eteesa iqʼij inqʼa ibʼekʼbʼal quBʼaal Tiuxh tiʼ inimal inqʼa jeqel kuxh tzaan taʼn inqʼa kʼuy emam. Tul nik etxhus te inqʼa xaol. Tul mamala tel kuxh kam nik ebʼaneʼ tiʼ teesal iqʼij vibʼekʼbʼal quBʼaal Tiuxh, jankʼal eche tiʼ inqʼa qat vallaʼ, —xeʼt Jesuus.

14Yaʼne isaʼ tzaan Jesuus inqʼa tenam s-vatz. Tul ech tal Jesuus s-xoʼl s-eche: —Jankʼalxh ex, abʼivaq u yol uvaʼ toq valeʼ. Tul bʼenoq inuqul sete. 15Tan jit aʼ laʼ yansan taanima invaʼq xaol vatz quBʼaal Tiuxh, uvaʼ laʼ tetxhbʼu. Pet aʼ laʼ yansan u xaol vatz quBʼaal Tiuxh u yeʼbʼaʼn, uvaʼ laʼ tzaj tu taanima, tul laʼ eluʼl titziʼ. 16[Jaʼl ex, uvaʼ nik abʼin inqʼa yol uvaʼ nik valeʼ, tul bʼanvaq yaʼl tiʼ inimaleʼ,] —xeʼt Jesuus.

17Eletz vet el Jesuus vatz inqʼa xaol, tul pal vet ok Jesuus t-val u otzotz. Tul tabʼi vet inqʼa nikich itxhus tibʼ s-kʼatza kam talaxich u yol uvaʼ txumbʼalimal talt Jesuus xoʼl inqʼa xaol.

18Yaʼne ech tal Jesuus s-eche: —¡Echatetz kol txhan exe! ¿yeʼatetz kol nik ibʼen sete? Tan jankʼal uvaʼ laʼ tetxhbʼu invaʼq u xaol, tul jit aʼ uvaʼe, laʼ yansan vatz quBʼaal Tiuxh. 19Tan jit aʼ yek u etxhbʼubʼal t-taanima u xaol tiʼ iyansaleʼ. Pet aʼ yekl tu tuul, tul yekleʼl inpaqte, —xeʼt Jesuus. Aʼetz nik elkaʼpun u yole uvaʼ tal Jesuus, uvaʼ jankʼal kuxh inqʼa etxhbʼubʼal bʼaʼn kuxh vatz quBʼaal Tiuxh.#Vibʼanoʼm inqʼa Apoostol 10.12-15; 11.9

20Tul ech vaʼt u yol tal Jesuus tiʼ telaʼp viyol s-eche: —Kam u yeʼbʼaʼn nik teluʼl titziʼ u xaol, tul aʼetz nik ikʼutxhe uvaʼ kantxhaq uvaʼ at tu taanima. 21Ayaʼletz kuxh inqʼa kantxhaq uvaʼ nik itzaj tu taanima inqʼa xaol, tul yek nik tul vet inqʼa yaabʼla itzʼaʼm tiviʼ. Aʼe inqʼaa: yansa ibʼ tuchʼ uvaʼ jit ikʼulel tibʼ s-tuchʼ, atz tuchʼ kam tel kuxh yansaibʼil, yatzʼo ibʼ, 22elaqʼ, jiqʼal, atz inqʼa mamala yeʼbʼaʼn, subʼuʼm, atz inqʼa een kuxh titzʼabʼal tiʼ tatxhaʼv vitxhiʼoʼl, txhiʼanchil kʼuul, yolo ibʼ, oksa qʼijil, aj tial kʼuul tiʼ ibʼanax yeʼbʼaʼn. 23Ayaʼletzxh inqʼa yeʼbʼaʼne uvaʼ nik ibʼan inqʼa xaol, inqʼa een nik tzajk t-taanima. Aʼetz u yeʼbʼaʼne uvaʼ nik yansan vatz quBʼaal Tiuxh, —xeʼt Jesuus te inqʼa nikich itxhus tibʼ s-kʼatza.

Uvaʼs ikʼuqbʼat val u ixoq ikʼuul tiʼ quBʼaal Jesuus, val uvaʼ jitich tij imam Israeel

Tio 15.21-28

24Yaʼne el vet bʼen Jesuus tuulbʼal Galileea, tul yekich vet t-inqʼa txʼavaʼ tuulbʼal u tenam Tiiro, [atz tuulbʼal u tenam Sidoon]. Paletz vet ok Jesuus tuul val u otzotz, tan aʼich isaʼ uvaʼ yeʼxhabʼil invaʼq xaol laʼich abʼin itziulal u taqʼbʼeʼ. Poro yeʼxh utxh imuqt tibʼ Jesuus, tan tetxhal abʼil itziulal u taqʼbʼeʼ.

25Atichetz val u ixoq tzitzi uvaʼ atich valatz tal. Tul atich ok demoonio t-taanima u tal. Taʼnetzxh tabʼi vet u ixoq itziulal Jesuus, tul ul ijoqbʼa tibʼ vatz Jesuus tiʼ tabʼil bʼaʼnil s-te. 26Poro jitich tij imam Israeel u ixoq, tan aj Greesiaich u kʼuy imam. Tul een jeqlich tixoʼl u tenam Siiria tuchʼ u tenam Feniisia. Tul ijaq ixoq bʼaʼnil te Jesuus, tiʼ uvaʼ laʼich bʼen ituki el Jesuus demoonio t-taanima u tal.

27Tul ech tal Jesuus te u ixoq s-eche: —Aʼ toq inbʼaxabʼsavat taqʼax el inqʼa bʼaʼnil te vintenam, inqʼa tij imam Israeel, inqʼa txhaqel tzaan in s-xoʼl. Tan bʼaʼn koq uvaʼ, aʼ kuxh laʼ vaqʼvat el u bʼaʼnil te xaol uvaʼ jit tij imam Israeel. Tan aʼ inqʼa tij imam Israeel aj etz. Tan bʼane laʼ koq isaʼa uvaʼ, aʼ laʼ vaqʼvat vipaan inqʼa nitxaʼ te inqʼa talaq txʼiʼ, —xeʼt Jesuus.

28Tul ech tal u ixoq te Jesuus s-eche: —Echxhte, inBʼaal. Pet nikat isikʼ inqʼa talaq txʼiʼ inqʼa juyaq paan uvaʼ nik isilp kuʼ jaqʼ imeexha inqʼa nitxaʼ. Echatetz kuxh toq intxʼebʼte vabʼaʼnil, —xeʼt itzaqʼbʼ u ixoq.

29Yaʼne ech tal Jesuus s-eche: —Jikxh u yol uvaʼ qat aal tiʼ vakʼuqbʼat akʼuul s-viʼ. Pet quuxh; ey vet el u demoonio t-taanima vaval, —xeʼt Jesuus.

30Aqʼbʼetz vet u ixoq t-totzotz, tul maʼtich tel vet el u demoonio t-taanima u ixvaak. Tul xoklich vet u ixvaak viʼ txʼatxh; atz qʼuʼlich kuxh veteʼ uvaʼs taqʼbʼ vitxutx.

Uvaʼs ibʼant quBʼaal Jesuus bʼaʼn val u mem uvaʼ txhakaniche

31Eletz vet tzaan Jesuus tuulbʼal u mam tenam Tiiro, tul palat paʼl Jesuus tuulbʼal Dekaapolis, t-Laval Inqʼa Tenam. Atz tetxhal topoon Jesuus titziʼ u mam aʼ Galileea tuulbʼal Galileea. 32Tul iqʼol tzaan val u txhakan, uvaʼ kʼabʼel ixev tiʼ iyoloneʼ, tan tzaʼlichxh iyoloneʼ. Tul jaqax bʼaʼnil te Jesuus uvaʼ laʼich taqʼ jaʼ Jesuus iqʼabʼ tiviʼ u txhakan tiʼ ibʼant bʼaʼn.

33Yaʼne tiqʼo el Jesuus u txhakan s-junal xoʼl inqʼa xaol. Tul toksa Jesuus juunil viʼ iqʼabʼ t-jununil ixichin u txhakan. Tul itzubʼa Jesuus viʼ iqʼabʼ. Atz ikan Jesuus taqʼ u txhakan.

34Yaʼne saqin jaʼ Jesuus t-amlikaʼ. Tul jiqʼjotxh taanima Jesuus tiʼ itxumux ivatz u txhakan. Tul ech tal Jesuus t-viyolbʼal te vixichin u txhakan s-eche: —¡Efaata! —xeʼt Jesuus.

Ech nik elkaʼp u yol t-quyolbʼal u ‹efaata› uvaʼ arameeo tzʼibʼamal s-eche: ‹Jaqpen,› chiche.

35Tul yekich ibʼan vet bʼaʼn vixichin u txhakan. Tul jikxh nikich tabʼin veteʼ. Atz yekichat ibʼan vet bʼaʼn u taqʼ. Tul jikxh nikich iyolon veteʼ. 36Tul itiila bʼekʼu ka Jesuus te inqʼa xaol uvaʼ yeʼxh tal laʼich talvat tiʼ kame uvaʼ ibʼan Jesuus te u txhakan, uvaʼ bʼaʼnich veteʼ. Kʼuxhetz jatpaqul itiila bʼekʼu ka Jesuus te inqʼa xaol, poro aalxh motx ipaxsat el inqʼa xaol u yol tiʼ u mam kaebʼal aanima ibʼan Jesuus te u txhakan. 37Tul kaayichxh vet taanima inqʼa xaol. Tul ech nikich motx tal vet s-eche: —¡Aʼxh mam chiibʼebʼal nik ibʼan Jesuus! Tan ¡nik tabʼin vet inqʼa txhakan; atz nik iyolon vet inqʼa kʼabʼel ixev tiʼ iyoloneʼ! —chichich inqʼa xaol s-vatzaq.

Voafantina amin'izao fotoana izao:

Kuxh 7: ixlC

Asongadina

Hizara

Dika mitovy