Mateo 21

Jesús kꞌuíxehen Jerusalén

(Mr. 11:1-11; Lc. 19:28-40; Jn. 12:12-19)

1Ndá ti ó kóchjina sin Jerusalén, kjuíji sin ti chjasin intsí itꞌin Betfagé itjen chjinaxón ti ijna̱ Olivo. Ndá chꞌin Jesús kꞌue̱tue̱hen chꞌan yaá ti sin kꞌuájiko chꞌan, 2ndáchro chꞌan:

―Sátjira ti chjasin intsí itjen tóhe. La ntiha tsꞌitjára ijnko kolócho tjechroé la ko ijnko kolóchóxjan. Tjasinta̱nke̱héra va, la tsjíkua̱nara va ntihi. 3A̱ndá ti nkojín nkexro tsjanchankí nkekuènté tjasinta̱nke̱héra va la ndáchrora kixin Ìnchéni ticháxi̱hin va, kjánchó chrꞌéxi̱n la ó tsjikaáni va, ichrora ―ichro chꞌin Jesús.

4Mé xi̱kaha kóhen kixin tsoxiteyá ti nkehe ndáchro ti nkexro kꞌuéchronka itén Díos ósé, ndáchro:

5 # Zac. 9:9. *Ndáchera ti chojni chjasin Sión:

“Tsjehéra ó ikui ti Rey kuèntára.

Nkehya chꞌan, la tjekjen chꞌan ijnko kolócho,

ijnko kolóchóxjan, xje̱en ijnko kolócho tamá nkehe.”

6Ndá ti yaá sin la sákjuí sin la kjuínchexiteyá sin ti nkehe kꞌue̱to̱an chꞌin Jesús. 7Ndá kjui̱ka̱o sin ti kolócho la ko ti xje̱en va la kuakitsje sin ti ika tꞌitsáte sin la kjuínchekamá sin va, ndá kjuákꞌekjen chꞌin Jesús. 8Ndá itsjé chojni kuakitsje sin ti ika tꞌitsáte sin la kjuendoá sin tinkákꞌekjínxi̱n sin ti nti̱a tsꞌatsínka chꞌin Jesús. Iso sin la xraá sin kajni la ko chaon ntayoa tsíkóchríjin sin la tinkákjasin sin ti nti̱a tsꞌatsínka chꞌan. 9#Sal. 118:25, 26.*A̱ndá kaín ti chojni sítaón nti̱a la ko ti chojni chréhe̱ nóton chꞌin Jesús la kjuankíxin itsje sin, ndáchro sin:

―Chjéheni kjuasáya ti nkexro kꞌuaxrjeníxin David. Jína ti nkexro kjui̱xi̱n kjuachaxíen ihni̱é Ìnchéni. Chjéheni kjuasáya Díos itjen nkaya nka̱jní ―ichro sin, itsje sin.

10Ndá ti ó kꞌuíxehen chꞌin Jesús Jerusalén, la kaín ti chojni tjejó ntiha kóxakohen sin kjuanchankí sin, ndáchro sin:

―¿Xá nkexro tíhi? ―ichro sin.

11Ndá íso sin kjuáte̱he, ndáchro:

―Ti nkexro í mé Jesús, ti nkexro chronka itén Díos, tsíkji̱xi̱n Nazaret nonte Galilea ―ichro sin.

Jesús kjuínchetjóá ti ni̱nko

(Mr. 11:15-19; Lc. 19:45-48; Jn. 2:13-22)

12A̱ndá chꞌin Jesús kꞌuíxehen ti ni̱nko, la kuakitsje chꞌan kaín ti chojni nchekji nkehe la ko ti chojni tꞌe̱na nkehe. La kꞌóxítjen chꞌan ti mesa tjinkíxin sin chichaon la ko ti silla tjejókjen ti chojni nchekji kontóá. 13#Is. 56:7; Jer. 7:11.*La ndáchro chꞌan:

―Ndáchro xroon itén Díos: “Ti ndo̱na#21:13 ndo̱na mi casa mé itꞌin nchia tsochjéxini Díos kjuasáya.” A̱ndá jahara, tsíkji̱chꞌénara itjue̱é xíche̱e ―ichro chꞌin Jesús.

14Ndá nkaxehen ni̱nko mé kóchjina iso chojni tꞌikonhña la ko iso chojni xitjahya itji la kjuínchekito̱he chꞌan jína. 15A̱ndá ti sin ncha̱tꞌá tꞌe̱to̱an la ko ti sin tjako ley kꞌuíkon sin kaín ti nkehe kjua̱ko̱xi̱n chꞌan la ko kuíhin sin kixin iso chájan itsje sin nkaxehen ni̱nko, ndáchro sin: “Chjéheni kjuasáya ti nkexro tsíkꞌaxrjeníxin ti Rey David”, ichro sin. Ndá kuíhin ti sin ncha̱tꞌá xi̱kaha, la imá kónínkaon sin 16#Sal. 8:2.*la nixje̱he̱ sin ti chꞌin Jesús, ndáchro sin:

―¿Á tihín ti nkehe itsje ti chájan ní? ―ichro sin.

Ndá ndáchro chꞌin Jesús:

―Jeén, kui̱ha̱n, ¿xá kjui̱nchekuáxinhñara ti xroon itén Díos? Ndáchro:

Jaha kjuánjua kjuachaxin kixin ti chájan la ko ti ixjan na̱xa̱ takí

mé tsotsje sin la tsjikosáyana sin

―ichro chꞌin Jesús.

17Ndá kuíto̱he chꞌan sin, la kꞌuaxrjexín chꞌan Jerusalén la sákjuí chꞌan Betania la ntiha ko̱kꞌéexin chꞌan.

Jesús kónínkakohen ijnko inta to higo

(Mr. 11:12-14, 20-26)

18A̱ndá ti ó kóña̱o la ikjan sin Jerusalén la ti ó kꞌuejóyá sin nti̱a, la chꞌin Jesús ikꞌuén chꞌan kjinta. 19Ndá kꞌuíkon chꞌan itjen ijnko nta tꞌóna to higo chrínta nti̱a. La sákjuitsjehe chꞌan ti inta, la kꞌuíkon chꞌan kixin chontahya ninkehó ito, jehó chaon yoa ó chónta. A̱ndá ndáche chꞌan ti inta:

―Jaha nkochríxín í tsꞌónahña ito.

Ndá ti inta la tuénxín xámá. 20A̱ndá ti sin kꞌuájiko chꞌin Jesús kꞌuíkon sin xi̱kaha kóhen ti inta, la chrákon sin kjuanchankí sin:

―¿Nkekuènté kixin tuénxín xámá ti inta tꞌóna to higo i? ―ichro sin.

21 # Mt. 17:20; 1Co. 13:2. *Ndá kjuáte̱he chꞌin Jesús, ndáchro:

―Chaxín ndáxrja̱n kixin ti chaxín tsitekáonra Díos la jehya jehó ti inta a xi̱kaha chrókjui̱chꞌehéra. Náhí. Kja̱xin chrókjuachara chrókꞌuétue̱hénra ti ijna̱ i, chróndáchrora: “Sátjixian ntihi tíkjia̱nkiá nda̱ñao”, la xi̱kaha chrókóhen. 22Ti chaxín titekáonra Díos, la kaín ti nkehe tsjanchehéra chꞌan la tsꞌayéhéra ―ichro chꞌin Jesús.

Ti kjuachaxin chónta Jesús

(Mr. 11:27-33; Lc. 20:1-8)

23Ndá chꞌin Jesús kꞌuíxehen chꞌan ti ni̱nko. Ndá ti ó tetjako chꞌan, la kóchjina iso ti sin ncha̱tꞌá tꞌe̱to̱an la ko iso ti sin táda judío tꞌe̱to̱an la kjuanchankíhi sin chꞌan, ndáchro sin:

―¿Nke kjuachaxin chonta kixin xi̱kaha ichꞌe tíhi? La ko, ¿nkexro tjáha ti kjuachaxin kixin xi̱kaha chꞌe? ―ichro sin.

24Ndá kjuáte̱he chꞌin Jesús, ndáchro:

―Kja̱xin janhan tsjánchánkíhara ijnko nkehe; ti tsjate̱hera, la janhan tso̱tjo̱nkara nke kjuachaxin chonta kixin xi̱kaha itꞌa̱. 25¿Nkexro kꞌue̱tue̱hen ti chꞌin Juan kixin tsi̱ki̱te chꞌan chojni? ¿Á Díos ní o̱ chojni ó? ―ichro chꞌin Jesús.

Ndá jehe sin ikjo kícho sin, ndáchro sin:

―Ti tsondáchroni kixin Díos tsíkꞌe̱tue̱hen ti chꞌin Juan, ndá tsjanchankí chꞌan nkekuènté kuitekakuenhñani chꞌan. 26A̱ndá ti tsondáchroni kixin chojni ó tsíkꞌe̱tue̱hen chꞌan, la chrakoni kixin kaín sin la titekaon sin kixin chꞌin Juan la nixja itén Díos ―ichro sin.

27A̱ndá kjuáte̱he sin, ndáche sin ti chꞌin Jesús:

―Noehñani nkexro tsíchrꞌán chꞌan ―ichro sin.

Ndá chꞌin Jesús, ndáchro:

―Kja̱xin janhan tso̱xrja̱nkahya nkexro kjuajon kjuachaxin kixin xi̱kaha itꞌa̱ ―ichro chꞌan.

Jesús kjuíncheyóe̱xin éxi yaá xjan

28Ndá chꞌin Jesús ndáchro:

―¿Nkehe tjénka̱yáxinra? Ijnko chojni chónta yaá xje̱en, la ijnko ña̱o nixje̱he̱ chꞌan ijnko ti xjan, ndáchro chꞌan: “Xje̱eni, sátjia ichꞌe ixra̱ ti no̱nte̱eni takjíña ti to uva siín”, ichro chꞌan. 29Ndá kjuáte̱he ti xjan ndáchro: “Náhí, tjinkakonhñani itsjini ntiha.” A̱ndá chrꞌéxi̱n la kjuinkí chꞌan ti nkehe kjuénka̱yáxin chꞌan la sákjuikjichꞌe chꞌan ixra̱. 30A̱ndá ti chꞌin táda la chrꞌéxi̱n sákjuitsjehe chꞌan ti íjnko xjan la kja̱xin xi̱kaha kꞌue̱tue̱hen chꞌan la ti ixjan la ndáchro: “Jeén, ó sátsjini”, ichro chꞌan. Landá chaxínhña ikjuí chꞌan ―ichro chꞌin Jesús.

31Ndá kjuanchankí chꞌin Jesús ndáchro:

―¿Nkexéhe ti yaá xjan kjuínchexiteyá ti nkehe kꞌue̱tue̱hen ti itꞌé?

Ndá ndáchro sin:

―Ti xjan sa̱o ―ichro sin.

Ndá ndáchro chꞌin Jesús:

―Chaxín ndáxrja̱n kixin ti sin nchekjènki̱ la ko ti chojnichjin chónta nchónhña chojnindoa la ícha sa̱oxín sin tsꞌixehen sin ti itjen ti kjuachaxin tꞌe̱to̱axín Díos ke ti jahara. 32#Lc. 3:12; 7:29, 30.*Kixin chꞌin Juan Bautista mé ikui kixin tsja̱ko̱hara nkexrín chrókꞌuejora, ndá jahara la kuitekákonhñara ti nkehe chrónka chꞌan. A̱ndá ti sin nchekjènki̱ la ko ti chojnichjin chónta nchónhña chojnindoa mé kuitekaon sin. A̱ndá jahara, kjónté kꞌuíkonra xi̱kaha, la kjuitóxi̱nhñara ti nkehe tjénka̱yáxinra la ko kuitekákonhñara ―ichro chꞌin Jesús.

Ti chojni chꞌe xra̱ nduáhya tjenka̱yáxin

(Mr. 12:1-12; Lc. 20:9-19)

33 # Is. 5:1, 2. *Ndá chꞌin Jesús ndáchro:

―Tihínra ijnko nkehe si̱ntayóa̱xián. Ijnko nkexro mé kjue̱nka̱xin itsjé nta to uva ti no̱nte̱e. La kjuíchꞌénehe chꞌan korra la ko ijnko tòye̱ kixin tsꞌéña sin ti ito uva. La kja̱xin kjuíchꞌéna chꞌan ijnko tja̱tꞌo̱ noi kixin tsi̱tꞌótjen chꞌan tsotsjehe chꞌan nkuíxín.

’A̱ndá chrꞌéxi̱n kjuínchekjen chꞌan ti nonte a iso ti sin ichꞌe xra̱, ndá sákjuí chꞌan ikjín. 34A̱ndá ti ó kjuixraká ti ña̱o tsotjá sin ti ito, ndá ichrꞌán chꞌan iso ti chojni chꞌehe chꞌan ixra̱ kixin tsjikjanchehe sin ti sin tꞌayakohen ti nonte a, ti ito tóhen chꞌan tókan. 35Kjánchó ti sin tꞌayakohen ti nonte la itsé sin ti chojni a, la kjuate sin, íjnko la kꞌóñá sin a̱ íjnko la ixro̱ kjuatexín sin. 36A̱ndá chrꞌéxi̱n la ti ìnché ti nonte la xíchrꞌán chꞌan íso chojni, a̱ndá ti sin tꞌayakohen ti nonte la kja̱xin xi̱kahó kjuíchꞌehe sin.

37’Ndá áxri kjuénka̱yáxin chꞌan ndáchro chꞌan: “Tsochrꞌán ti xja̱na, kjá ti ó tsꞌikon sin kixin jehe chꞌan la tsochóntehe sin kjuasàya”, ichro chꞌan. 38Kjánchó ti ó kꞌuíkon ti sin tꞌayakohen ti nonte ti xje̱en chꞌan, la ómó kjuénka̱yáxin sin ndáchro sin: “Ti chꞌin i la jehe chꞌan tsíto̱ehe chꞌan kaín ti nkehe i. Méxra̱ tsꞌóñáni chꞌan kixin jeheni tsíto̱ekoni kaín ti nkehe kuènté chꞌan”, ichro sin. 39Ndá xi̱kaha itsé sin ti nkexro a, la kuakitsjexín sin ti nonte la kꞌóñá sin chꞌan ―mé xi̱kaha ichro chꞌin Jesús.

40Ndá kjuanchankí chꞌin Jesús, ndáchro:

―Nkehe tjénka̱yáxinra ti ó itsi ìnché ti nonte la, ¿nkehe sichꞌehe chꞌan ti chojni tꞌayakuenxín ti nonte?

41Ndá kjuáte̱he sin, ndáchro sin:

―Kjá ti ó itsi chꞌan la tsi̱konòehña chꞌan ti chojni kjuénka̱yáxin ti nkehe jínahña la tsꞌóñá chꞌan sin la tsjeyá chꞌan ókjé chojni sinchekjen chꞌan ti nonte. Tsjeyá chꞌan ijnko chojni jína kixin tsjajon ti ito tsákja chꞌan ti ó tsixraká ti ña̱o tsotjá sin ―ichro sin.

42 # Sal. 118:22, 23. *Ndá ndáchro chꞌin Jesús:

―Xá kjui̱nchekuáxinhñara ti xroon itén Díos tsíkjin sin ósé, ndáchro:

Ti ixro̱ náxrjónhña kuíto̱enta ti sin chꞌéna tja̱tꞌo̱,

mé ijie la kꞌóna ti ixro̱ imá tjetoan.

Mé xi̱kaha kjua̱ko̱xi̱n Ìnchéni Díos,

la tíha mé ijnko kjuaxroan ijié kꞌuíkoni.

43Ndá ndáchro chꞌin Jesús:

―Tjo̱nka̱ra kixin Díos la tsakítsjahara ti kjuachaxin kuènté chꞌan, la tsochjéhe chꞌan ti sin chaxín jína chꞌe xra̱. 44Ti nkojín nkexro tsꞌitsínka chritaón ti ixro̱ i la tso̱kuen la ti tsꞌánótjen ti ixro̱ tsoxratja ijnko chojni la tsꞌóna inche ―ichro chꞌin Jesús.

45A̱ndá ti ó kuíhin ti sin ncha̱tꞌá tꞌe̱to̱an la ko ti sin fariseo xi̱kaha ndáchro chꞌin Jesús, la kienxín sin kixin kaín ti ndáchro chꞌan, la kjuíncheyóe̱xin chꞌan kixin ti jehe sin. 46Landá tjinkaon sin chrókjuinchekjasóte sin ti chꞌin Jesús, kjánchó chráko̱nhe̱n sin ti chojni kixin kaín sin titekaon sin kixin chaxín ti nkehe nixja chꞌin Jesús la kuènté Díos.

Voafantina amin'izao fotoana izao:

Mateo 21: poeNTplus

Asongadina

Hizara

Dika mitovy