Mateo 14

Ikꞌuén Juan Bautista

(Mr. 6:14-29; Lc. 9:7-9)

1A̱ndá ti ña̱o a, la chꞌin Herodes, ti nkexro kꞌue̱to̱an Galilea, mé kuíhin chꞌan kuènté ti kjuaxroan kjuasin chꞌin Jesús. 2Ndá nixje̱he̱ chꞌan ti sin tjejóko chꞌan, ndáchro chꞌan:

―Tíha la kjá Juan Bautista tsíxechón kixin chónta kjuachaxin tjasin ti kjuaxroan a ―ichro chꞌin Herodes.

3 # Lc. 3:19, 20. *Herodes mé ti nkexro tsíkꞌe̱to̱an kixin tsotsé sin ti chꞌin Juan la sinchentetoxín sin cadena la tsjakꞌechjina. Mé xi̱kaha kóhen kixin xi̱kaha tsíkjanchia ti tjan Herodías, ichjién ti chꞌin Felipe, sa̱vé ti chꞌin Herodes. 4#Lv. 18:16; 20:21.*Kixin chꞌin Juan tsíndáchro: “Kohya kjuachaxin tsochonta ti tjan í, éxi ichjián.”

5Ndá chꞌin Herodes tjinkaon chrókꞌóñá ti chꞌin Juan, kjánchó chráko̱nhe̱n chꞌan ti chojni kixin kaín sin la kjuíkosáyehe sin ti chꞌin Juan kixin nixja chꞌan itén Díos. 6A̱ndá ti ña̱o kié chꞌin Herodes, la ti xje̱en tjan Herodías mé ité tjan nkayakon ti sin kóchjina la imá kóxríhi̱n ti chꞌin Herodes nkexrín ité tjan. 7La ndáchro chꞌan:

―Díos tetsjehe kixin tsotjahá kaín ti nkehe tsjanchia ―ichro chꞌan. 8Ndá sa̱o kjuanchankíhi tjan ìñé tjan, ndá ti ìñé tjan ndáchro kixin tsoxranchia ikja ti chꞌin Juan, ndá xi̱kaha kjuanchia tjan, ndáchro tjan:

―Chje̱héni ikja ti chꞌin Juan Bautista tsjakꞌenkáya ijnko plato ―ichro tjan.

9Ndá ti rey Herodes la imá kꞌuává chꞌan kixin ó sa̱o kjuínchenohe chꞌan Díos kixin xi̱kaha tsjajon chꞌan ti nkehe tsjanchia tjan, la kuíhin kaín ti sin tsíkóchjina. Ndá kjónté kꞌue̱to̱an chꞌan kixin xi̱kaha tso̱hen, 10la kꞌue̱to̱an chꞌan kixin tsochrijin ikja ti chꞌin Juan techjína ndo̱echjiso. 11Ndá ti ó kjui̱ka̱o sin ti ikja chꞌin Juan tjenkáya ijnko plato la kjuajon sin, kuákja ti tjan tjarisoá, ndá jehe tjan sákjuikehen tjan ti ìñé tjan.

12Ndá ikjui ti sin kꞌuájiko chꞌin Juan la kuakitsje sin ti cuerpo kuènté chꞌan la kjua̱vá sin. Ndá ti ó kjuixin, la sákjuichenka sin chꞌin Jesús ti nkehe kóhen.

Inꞌó mil chojni kjónie

(Mr. 6:30-44; Lc. 9:10-17; Jn. 6:1-14)

13A̱ndá ti ó kuíhin chꞌin Jesús kixin xi̱kaha kóhen, la kꞌui̱tꞌótjen chꞌan jehó chꞌan ijnko ntabarco la sákjuí chꞌan ijnko nonte kohya ninkexró. La ti ó kaín chojni kuíhin nketí itjen chꞌan la kꞌuaxrjexín sin chjasén sin, la to̱tó sin sákjuichréhe̱ sin chꞌan. 14Ndá ti kꞌuínkaji̱nxi̱n chꞌin Jesús ti ntabarco, ndá kꞌuíkon chꞌan kixin itsjé chojni kꞌuejó ntiha, la kui̱konoéhe̱ chꞌan sin la kjuínchekito̱he chꞌan jína kaín ti sin níhi. 15Ndá ti ó kóndanonte, la ti sin kꞌuájiko chꞌan la kóchjina, ndáchro:

―Ó kóndanonte la kohya nkehe chjinaxón ntihi. Ícha jína chrónixjehé sin kixin sáchrokjui sin ijnko chjasin chjinaxón, chrókꞌue̱na sin nkehe chrókjonie sin ―ichro ti sin kꞌuájiko chꞌan.

16Ndá kjuáte̱he chꞌin Jesús, ndáchro:

―Náhí. Ticháxi̱nhña sátsji sin. Jahara chje̱héra sin nkehe sinie sin ―ichro chꞌan.

17A̱ndá jehe sin kjuáte̱he sin, ndáchro sin:

―Ntihi la jehó chóntani inꞌó nio̱tja̱ la ko yaá koche ó ―ichro sin.

18Ndá chꞌin Jesús ndáchro:

―Xrákoara ntihi ti nkehe.

19Ndá kꞌue̱to̱an chꞌan kixin kaín sin tsꞌejótja̱xi̱n sin ti siín kaxi. Ndá kuákja chꞌan ti nio̱tja̱ la ko ti koche la tsjehe chꞌan nka̱jní la chjéhe chꞌan Díos kjuasáya. Ndá kóchrítꞌo̱ chꞌan ti nio̱tja̱, la chjéhe chꞌan ti sin kꞌuájiko chꞌan, ndá jehe sin kꞌóxika̱ye̱he sin nkojnko ti chojni siín ntiha. 20La kaín sin kjónie sin jína la kókje̱he sin, la ti ó kjuixin kjónie sin, ndá ti sin kꞌuájiko chꞌin Jesús la kjuenájín sin kaín ti to̱tꞌo̱ nio̱tja̱ tsíxehe̱ la kaón teyó ntaxra. 21Mé xi̱kaha kjónie inꞌó mil chojnindoa, la ti síchjin la ko chájan la kuákjahya sin kuentá nkekja̱ín.

Jesús ixri chritaón nda̱ñao

(Mr. 6:45-52; Jn. 6:16-21)

22Ndá chrꞌéxi̱n kꞌue̱tue̱hen chꞌin Jesús ti sin kꞌuájiko chꞌan kixin tsi̱tꞌótjen sin ti ntabarco la tsꞌatsínka sin ti íjnko tóhe nda̱ñao. A̱ndá jehe chꞌan la ntahó kuito̱he chꞌan, nixje̱he̱ chꞌan ti sin kꞌuejó ntiha. 23Ndá ti ó kjuixin nixje̱he̱ chꞌan kaín ti sin a, la chrìin chꞌan ijnko ijna̱ jehó chꞌan, kixin tsonixje̱he̱ chꞌan Díos. La kjónté ó kꞌuíxin tie la jehó chꞌin Jesús itjen ntiha. 24La ti ntabarco la ó kjuíji nko̱siñe nda̱ñao. La kjuankíxin chjéhe xri̱nto̱ la síkjaminkí ti ìnta̱, tꞌitja̱ton ti ntabarco la xitjahya itji. 25A̱ndá ti ó na̱ndóye, la chꞌin Jesús sákjuichréhe̱ chꞌan ti jehe sin. To̱tó chꞌan tjitaón chꞌan ti nda̱ñao kóchjina chꞌan ti tjejó sin. 26Landá ti ó kꞌuíkon ti sin kꞌuájiko chꞌan kixin tetjitaón chꞌan ìnta̱, la imá chrákon sin la kꞌóyako sin, ndáchro sin:

―¡Kjuachani! ―ichro sin.

27La chꞌin Jesús tuénxín nixje̱he̱ chꞌan sin, ndáchro chꞌan:

―Tóxakuanhñara. Janhan kjuihá, chrakonhñara ―ichro chꞌan.

28Ndá chꞌin Pedro ndáchro:

―Ìnchéni, ti chaxín jaha la této̱an kixin tsjixíni to̱téni chritaón ìnta̱ hasta ti itjen jaha ―ichro chꞌan.

29Ndá chꞌin Jesús ndáchro:

―Xrákia.

Ndá chꞌin Pedro tuénxín kꞌuínkaji̱nxi̱n chꞌan ti ntabarco, la kjuankíxin ikjuí chꞌan chritaón ti nda̱ñao, sákjuí chꞌan ti itjen chꞌin Jesús 30Ndá xrína̱hña kónohe chꞌan kixin imá chjéhe xri̱nto̱ la síchriká ti ìnta̱, ndá imá chrákon chꞌan la kjuankíxin kꞌuaniánkí chꞌan ìnta̱, la kꞌóyako chꞌan, kꞌuéya chꞌan, ndáchro chꞌan:

―¡Ìnchéni, nchekaáni! ―ichro chꞌan.

31Ndá tuénxín itsé chꞌin Jesús itja ti chꞌin Pedro la ndáchro chꞌan:

―¿Nkekuènté chaxínhña titekaoan? ¿Nkekuènté nkoko̱ahya kjuénka̱yáxian?

32La ti ó yóí sin kꞌui̱tꞌótjen sin ti ntabarco la tuénxín kꞌuixratá ti xri̱nto̱. 33La kaín ti sin tjejóyá ti ntabarco la kꞌuejóxin sin tochꞌin sin nkayakon chꞌin Jesús la ndáchro sin:

―Chaxín jaha ti Xje̱en Díos ―ichro sin.

Jesús kjuínchekito̱he jína ti chojni níhi siín Genesaret

(Mr. 6:53-56)

34Ndá ti ó kꞌuatsínka sin ti nda̱ñao la kjuíji sin Genesaret. 35Ndá ti chojni tjejó ntiha la kjuátso̱an sin kixin tíha la chꞌin Jesús, la tuénxín sákjuichronka sin kuenté chjasin la ko ti chjinaxón ntiha, la kaín sin kjui̱ka̱o sin chojni níhi ti itjen chꞌan. 36La chrónoéhe̱ sin chꞌan kixin chrókjuajon chꞌan kjuachaxin kixin, kjónté chrínta ti iké chꞌan ó, chrókuákóxi̱n sin, ndá kaín ti sin níhi kuákóxi̱n ti iké chꞌan la kuito̱he sin jína.

Voafantina amin'izao fotoana izao:

Mateo 14: poeNTplus

Asongadina

Hizara

Dika mitovy