Génesis 5
5
Kain ni bachrjeninxin Adán
(1 Cr. 1:1-4)
1Ko ngain xroon jiꞌi jitaxin ni bachrjeninxin Adán. Are Ndo Dio binchechjian thi xii, binchechjian Ndo inchin jeꞌe Ndo. 2Ko binchechjian xii ko nchrii ko binchenchaon Ndo. Ko ngain nchaꞌon jeꞌe na̱ kunchjian na̱, jeꞌe Ndo binchegiꞌin Ndo na̱ «chujni.»
3Ko are Adán bechunda naa renkia ko kan ko the nano, guan naa xeꞌen ko anto dixexin xan jeꞌe ko binchegiꞌin xan Set. 4Kuthimejan are guan Set, Adán xra bechon jni renkia nano, kai bechunda icha xeꞌen xan xii ko xan nchrii. 5Ko Adán bechon na̱a̱ renkia ko kan ko the nano ko beꞌen.
6Ko are Set bechunda naa renkia ko naꞌo nano, guan xeꞌen biꞌin Enós. 7Kuthimejan are guan Enós, Set xra bechon jni renkia ko yaato nano, kai bechunda icha xeꞌen xan xii ko xan nchrii. 8Ko Set bechon na̱a̱ renkia ko theyoo nano ko beꞌen.
9Ko are Enós bechunda noo kan ko the nano, guan xeꞌen biꞌin Cainán. 10Kuthimejan are guan Cainán, Enós xra bechon jni renkia ko thenaꞌo nano, kai bechunda icha xeꞌen xan xii ko xan nchrii. 11Ko Enós bechon na̱a̱ renkia ko naꞌo nano ko beꞌen.
12Ko are Cainán bechunda nii kan ko the nano, guan xeꞌen biꞌin Mahalaleel. 13Kuthimejan are guan Mahalaleel, Cainán xra bechon jni renkia ko yoo kan nano, kai bechunda icha xeꞌen xan xii ko xan nchrii. 14Ko Cainán bechon na̱a̱ renkia ko the nano ko beꞌen.
15Ko are Mahalaleel bechunda nii kan ko naꞌo nano, guan xeꞌen biꞌin Jared. 16Kuthimejan are guan Jared, Mahalaleel xra bechon jni renkia ko kan ko the nano, kai bechunda icha xeꞌen xan xii ko xan nchrii. 17Ko Mahalaleel bechon jni renkia ko noo kan ko thenaꞌo nano ko beꞌen.
18Ko are Jared bechunda naa renkia ko nii kan ko yoo nano, guan xeꞌen biꞌin Enoc. 19Kuthimejan are guan Enoc, Jared xra bechon jni renkia nano, kai bechunda icha xeꞌen xan xii ko xan nchrii. 20Ko Jared bechon na̱a̱ renkia ko nii kan ko yoo nano ko beꞌen.
21Ko are Enoc bechunda nii kan ko naꞌo nano, guan xeꞌen biꞌin Matusalén. 22Kuthimejan are guan Matusalén, Enoc xra bechon inchin nii renkia nano ko anto bagithikaon Ndo Dio, kai bechunda icha xeꞌen xan xii ko xan nchrii. 23Ko Enoc bechon nii renkia ko nii kan ko naꞌo nano. 24Ko ixin anto bagithikaon Enoc ngain Ndo Dio, ikjanꞌa na̱ bikon na̱ ixin sabikao Ndo Dio.
25Ko are Matusalén bechunda naa renkia ko noo kan ko yaato nano, guan xeꞌen biꞌin Lamec. 26Kuthimejan are guan Lamec, Matusalén xra bechon yaato renkia ko noo kan ko yoo nano, kai bechunda icha xeꞌen xan xii ko xan nchrii. 27Ko Matusalén bechon na̱a̱ renkia ko nii kan ko na̱a̱ nano ko beꞌen.
28Ko are Lamec bechunda naa renkia ko noo kan ko yoo nano, guan naa xeꞌen. 29Ko binchegiꞌin xan Noé, ko ndachro: «Xan jiꞌi sincheꞌe xan ixin sinthujugaꞌa ná ixin kain xra nthoꞌo ná ngain nunthe jiꞌi, thi nunthe Ndo Dio binchetsingataꞌa thi jianꞌa.» 30Kuthimejan are guan Noé, Lamec xra bechon naꞌo renkia ko noo kan ko thenaꞌo nano, kai bechunda icha xeꞌen xan xii ko xan nchrii. 31Ko Lamec bechon yaato renkia ko nii kan ko theyaato nano ko beꞌen.
32Ko are Noé bechunda naꞌo renkia nano, jeꞌe ubechunda nii chjan ko mee xan Sem, xan Cam ko xan Jafet.
Voafantina amin'izao fotoana izao:
Génesis 5: plsNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2017, Wycliffe Bible Translators, Inc. All rights reserved.