Maak Wahawu wáamimuu li éliibalayi inye
Wahawu wáamimuu li éliibalayi inye
Maak, Fiyeel laŋalooŋa’ min anaak akiic kulimaku kan ammuu li alobool (1 Fiyeel 5:13). Li okila Maak ábajummuu kulimaku kajakumuu boot mata kakiicaku kata Hulimahu unhe Hásuumaahu. Maak lajanjand alako anaboola ata Fool li bulokabu (Bakaanelabu 12:25). Li mal̥egenamu, Hulimahu unhu Hásuumaahu hakiicimuu, bakittenelabu bata ho búhihhiis kaanaku Maak lamammaat ban li ajuk wahawu wan akiicumuu.
Lakikkiic ho boot li kukelecenaku káfulumulomuu li huwaasen, mó mújimuu li ajok min átiiw kulimaku kakiicimuu li elobayi yan koonemuu alameyeŋ li yan koonemuu éebulo, ban li akitten múkaaniinamu mata kusuwifaku.
Wahawu wan Maak afañumuu, wo wommuu min áhiis bulokabu bata Yéesu: láhiisenoohiisen akila li bulok básufe, akila li kafaken bukan kásomute, okila foof li kaŋa’ kúmbuulu kafamut min akaan ko kumeeŋ, min ákuumen búsuk báamak. Li alob mata úhiisenum li bújahaalenum ban Yéesu akaane.
Wahawu wan Yéesu akaanumuu úhihhiis kaanaku Ateemit laam. Li mal̥egenamu, li hulimahu hútinaalahu Maak ayaane alob kaanaku Yéesu ammuu «Añool Ateemit» (1:1) ban, li húwuñenumahu hata Hulimahu unhu Hásuumaahu, anahaanawu ata kusollaaliyaku kata Lom, alakomuu tan ekuluwaayi li aan: «Mal̥egen ánayinaawu umme Añool Ateemit!» (15:39).
Uhíisenumawu unwu wájaahaleniyaawu, let an aano li huŋes kasal akaan wo: Yéesu lahahhaas aan fan álaam. Wahawu unwu újimuu, Maak li akitten buloŋabu bata Yéesu loon eenimuu kafale kata eketayi yoola: li Kútijaku kuŋen li kúhaajiyaku kútinaalaku, Yéesu lalollob ñameeŋe mata sílaamasu san ammuu li abaj. Kulimaku kakittenumuu mata éjowumayi yoola Gálile boot Súde, kuyilo kujoki foof loon ejow boot Yeelusalem ban ammuu li aket.
Maayeet mo, eketayi inyu elakolako kaciimanciim kásuume, mata Yéesu lakankaan kulimaku kan Esay alobumuu (Esay 53:12): labiibil boot «min asen buloŋabu boola bulako búhal boot li bukan kameeŋe» (10:45), ban li ayitowumul li eketayi loon okila humumool alobumuu.
Voafantina amin'izao fotoana izao:
Maak Wahawu wáamimuu li éliibalayi inye: cskDBL
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2008, Wycliffe Bible Translators, Inc. All rights reserved.