Maak 5

Yéesu li afaken an an uyinum wajakut újufowe

(Máciya 8:28-34; Lík 8:26-39)

1Muñeˈe Yéesu li kúgoomaku koola li kuŋej kalimben kaaka kata húwajahu hata Gálile, li etaamayi yata kata Gelasa. 2Nan Yéesu ayaane áwalowulumuu li busaanaabu, ánayine akee an buyinum bajakut bújufowe, li áfulumul li kuyaak kawoki li hugisa abil kufam. 3Anáyinaawu li kalemaku kahokemuu lajeˈe akin. Bajut an ayiliwool ajenk, maayeet li baseel. 4Mata ñameeŋe bukanabuku fan kuŋa’ useel min kujenkool, bale li acac useelawu feh. Bajut an abaje sembe ayilo ágooten ánayinaawu ummu. 5Anáyinaawu ummu li anaak ajow alako nanoonan li kuyaakaku#5:5 Kuyaak: Kusuwifaku naanaŋ fan kuwok úgool̥ li kuyuuyaku min kuhok ló bukanabuku kooliil kaketumuu, ban li kuŋa’ kugisa min kúhimen kánokenumaku kata huyaakahu li kuyuuyaku, bajut etihunaka bajut ehuka, min anaak akaaw butiya, ban li anaak aŋa’ kuyitik min acokenoolo.

6Muñeˈe nan ánayinaawu ajeˈe aŋandenumuu Yéesu, li atey ajow ákuntuŋ hákilool, 7ban li alob butiya aan:

— Yéesu, Añiil ata Ateemit ata Haatiya, waa lufañe lí ínje? Liyaaki li kajawaku kata Ateemit, jakum úlaatenom.

8(Anáyinaawu lalollob kulimaku unku, mata Yéesu laanoosaan: «Buyinum bajakut, úfu’ li ánayinaawu ummu!») 9Muñeˈe Yéesu li agel̥l̥en ánayinaawu aanool:

— Kama kajawi buu?

Anáyinaawu li aanool:

— Kajawom «Jameeŋ», mata óloli jimemmeeŋ.

10Muñeˈe ánayinaawu li ayaakoo Yéesu ŋáa’ aanool jakum akesoo uyinumawu wajakutumuu úfu’ li etaamayi inyu.

11Muñeˈe li baj to bútefoo hulijahu bumat báamak bata sifulugun balakowe kahoof. 12Uyinumawu wajakutumuu li uyaakoo Yéesu woonool:

— Ubonket úkatoli min jijow jíjufo sifulugunasu unsu.

13Mal̥egen Yéesu li akat wo min ujow. Uyinumawu wajakutumuu li uyaan úfulul li ánayinaawu ujow újufo sifulugunasu. Bumatabu bubaje sifulugun salehene sínjunne soono síl̥uba. Sifulugunasu unsu feh, li siyaan síwubbenoolumul haatiya hulijahu, siliiŋowul sijow silo li húwajahu, min síjim dó feh.

14Muñeˈe kánayinaabuku kalakomuu humatahu hata sifulugunasu, li kutey kujow kúhebul kakinumuu li ésukayi li kakinumuu li bujalabu umbu. Bukanabuku kata ésukayi li kujow kujuk wahawu wabajumuu. 15Muñeˈe nan bukanabuku kúliiŋumuu tan Yéesu alakomuu, li kujuk to ánayinaawu an uyinumawu wajakutumuu újufoweenumuu mabahe, akila makaanowe wañ, ban okila mágiilowe. Ekole li ejokiil. 16Bukanabuku kamaatumuu wahawu wabajumuu, li kukitten kaabuku wahawu wabajumuu ánayinaawu an uyinumawu wajakutumuu újufoweenumuu, li wabajumuu foof sifulugunasu. 17Muñeˈe bukanabuku li kuyaakoo Yéesu koonool áfu’ li ésukayi yooli.

18Muñeˈe nan Yéesu alakomuu kájufowaku li busaanaabu, ánayinaawu an uyinumawu wajakutumuu újufoweenumuu li ayaakoolool mantee li akatool min anab li akila. 19Yéesu akatutool min ánabul li akila, bale li aan ánayinaawu:

— Ulaañ úbalo. Ujow bata bukani, ujow ukitteniil wahawu feh wan Amaaŋenawu akaanumuu boot li awu, li foof buu labajumuu káyiyen li awu.

20Mal̥egen ánayinaawu li ajow boot Dekafool#5:20 Dekafool: yo yommuu «sísukasu kuŋenayi», ajow ayiiŋen bo wahawu feh wan Yéesu akaanumuu boot li akila. Bukanabuku feh li kusego ŋáa’.

Yéesu li afaken anaale ásomute, ban li ayiten jísungute jata Jáyilis jaketeene

(Máciya 9:18-26; Lík 8:40-56)

21Muñeˈe nan Yéesu alaañenumuu alimb li busaana boot kageb kaaka húwajahu, búsuk báamak li bubil búguutool akila baloŋe li katantaku. 22Anáyine akee li kunahaanaku kata eluufayi yata kal̥awaku, an koone Jáyilis li áliiŋul. Nan ajukumuu Yéesu, li ákuntuŋ hákilool, 23min ayaakoo Yéesu ŋáa’ aanool:

— Jísungutaaju júmbaam junju li eket. Liyaaki, úbil uŋa’ kuŋeni uwalen li akila kayitee li afak li kásomutaku min aloŋ.

24Mal̥egen Yéesu li ajow kunaboo. Búsuk báamak li bunab li akila, gay bukanabuku li kunaak kuñuññoo téetiwool.

25Muñeˈe li baj li búsukabu anaale áfululo huña ban afosowut ho jow baj simit soono kuŋen li síl̥uba. 26Anaalaawu ummu lálallaam ŋáa’ li kuŋen kata kubuntena kameeŋe. Li buko labane sídalamasu soola feh, ban akoyut. Kásomutaku koola li kunaak kuhaŋ mahaŋen. 27Anaalaawu li ajam li kulob mata Yéesu, li abilumul li búsukabu kata búsol Yéesu, ajow ago’ kañaku koola. 28Anaalaawu ummu lakankaan mo, mata lanaanaak aan li buyinumool: «Iyiliyeenumuu igo’ wañawu woola bale, fan ifak.» 29Mal̥egen nan anaalaawu agolumuu wañawu wata Yéesu, huñaahu hoola li huyaan huban to, ban li ahaas li eniilool aan lafake li kásomutaku koola. 30Muñeˈe Yéesu li ayaan ahaas li eniilool kaanaku babbaj sembe sáfule li akila. Li átiiwowul li tut búsukabu, ban li agel̥l̥en aan:

— Ayimaa agole wañawu wúmbaam?

31 Kúgoomaku koola li koonool:

— Awu lujuke min búsukabu buñuññemuu li awu, li ugel̥l̥en oon: «Ayimaa agolom?»

32Bale Yéesu li agegoo téetiwool boot min ajuk anawu agoloolumuu. 33Anaalaawu li ákoli ban li anaak ateelen, mata lahaase wahawu wabajoolumuu. Muñeˈe li abil ákuntuŋ hákil Yéesu min alobool mal̥egenamu feh. 34Yéesu li aanool:

— Añoolom, káyinenaku kooli kufakeni. Ujow li kásuumaay ban li ufak li kásomutaku kooli.

35Nan Yéesu alakomuu elobayi, kukee li kúfulumul bata Jáyilis kubil koon Jáyilis:

— Jísungutaaju jooli jikete. Wáa újiye li umit oono li kayoken Anahaanawu?

36Bale emmuu Yéesu ákaanumut kulimaku unku, li aan Jáyilis:

— Sákoli, awu úyinen bale.

37Yéesu akatut an min anab li akila ábute li Fiyeel, li Saak li Saŋ ammuu atuyawu ata Saak. 38Nan kúliiŋumuu bata Jáyilis, Yéesu li ajuk min ésukayi égul̥uñoo muñowu, min bukanabuku kulako jíl̥ok, ban li kunaak kúluulen butiya. 39Muñeˈe Yéesu li anoken li eluufayi áliiŋ li aaniil:

— Wáa újiye kágul̥uñoolaku unku li kubaj? Wáa újiye li joono li búluulen? Jísungutaaju jiketut, jímoolimooli bale.

40Bukanabuku li kulako él̥uu Yéesu. Muñeˈe Yéesu li akaaniil feh kúfu’ li eluufayi, min aŋa’ sibukoolaasu sata jísungutaaju bale, li kúgoomaku koola kúhaaji, min kunoken li káfitaku dán jísungutaaju jilakomuu. 41Nan Yéesu áliiŋumuu, li átuk jísungutaaju li kaŋen ban li aan jo:

— «Talita kúmi#5:41 Kulimaku unku kulim kata elobayi yata Aalameyeŋ!» (Yo yommuu: «Tóom, uyito, ínje ilobi mo!»)

42Mal̥egen jísungutaaju li jiyaan jiyito min jijow. (Simit kuŋen li síl̥uba jibaje). Bukanabuku kalako tomuu feh li kúsego ŋáa’. 43Bale Yéesu li anuulooliil aaniil jakum bil kulob mo an, aban li aaniil kusen jísungutaaju jitiñ.

Voafantina amin'izao fotoana izao:

Maak 5: cskDBL

Asongadina

Hizara

Dika mitovy