Maak 14

Huhaanaahu hata élambaayi li hulob mata jamuk Yéesu

(Máciya 26:1-5; Lík 22:1-3; Saŋ 11:45-53)

1Muñeˈe li saŋo kunak kúl̥uba min kagaanaku kata Faakayi, li kata kúmbuuluwaku kakaanutimuu élebiil kúliiŋ. Huhaanaahu hata élambaayi li kaliikenemuu ésukayi eluwaayi ésukayi eluwaayi yata Móyiis, li kulako huŋes bútin mantee li kujok Yéesu an bahaasut kujow kumuk. 2Mata kunaanaak koon:

— Uyilaataal ujokaalool li hunakahu hata kagaanaku; mata ujokaalool nomuu, ésukayi fan ékiŋulowul boot li alolaal.

Anaale li aŋa’ eheeñ áyu li húkowahu hata Yéesu

(Máciya 26:6-13; Saŋ 12:1-8)

3Muñeˈe Yéesu li alako li ésukayi yan koonemuu Betani, li eluufayi yata Simoŋ an háhaayee ejoke, lajeˈe abah boot hutiñ, anaale akee li ánokenul. Anaalaawu ateefaay laakene ameeŋe eheeñ yaseele ŋáa’ yan koone naal. Li ahum ateefaayawu, min áyu eheeñayi li húkowahu hata Yéesu. 4Muñeˈe kukee li bukanabuku kalako tomuu súumutiil min koon:

— Kama muñowu wáa újimuu li aŋa’ eheeñayi inyu acooc? 5Eheeñayi inyu eyiliyeene éjulayi seel ŋáa’, min sídalam siŋali sen esukateenayi.

Muñeˈe li kutalen anaalaawu ŋáa’. 6Bale Yéesu li aaniil:

— Jikatool. Wáa újiye li joono li kayoken anaalaawu ummu? Lakankaan wah wajake ŋáa’ boot lí ínje. 7Mata fan jibaj nanoonan esukateen li bukuluul. Jiyilo jikaaniil majake nan jommuu li jifañ, bale ínje let ilako li bukuluul nanoonan. 8Anaalaawu lakankaan wahawu wan ayilimuu akaan. Layansaan aheeñen eniilayi yúmbaam akat to boot bil li kahokaku kúmbaam. 9Li mal̥egenamu fan ilobuul, tanootan tan Hulimahu Hásuumaahu huwaaleyi li adunaayi feh, fan kulob foof wahawu wan anaalaawu ummu akaanumuu, min awayil̥oyi.

Sudaas li aan éehe’ min abet Yéesu li kuŋen kata huhaanaahu hata élambaayi

(Máciya 26:14-16; Lík 22:3-6)

10Muñeˈe Sudaas Isikaaliyot, ammuu akee li kúgoomaku, li ajow ajuk huhaanaahu hata élambaayi mantee li abet Yéesu li kuŋeniil. 11Mal̥egen li kujanten Sudaas li ésuumansuum ló, ban li koon fan kusenool sídalam. Muñeˈe Sudaas li alako huŋes bútin bajake boot min abet Yéesu li kuŋeniil.

Yéesu li akaan kagaanaku kata Faakayi li kúgoomaku koola ló

(Máciya 26:17-25; Lík 22:7-14, 21-23; Saŋ 13:21-30)

12Muñeˈe li líiŋ li hunakahu hútinaalahu hata kagaanaku kata kúmbuuluwaku kakaanutimuu élebiil, nan bágalalaanabu bumukeyimuu boot li Faakayi kata Yéesu li kugel̥l̥enool koonool:

— Bay lufañe min jijow jilak sinaaŋasu sata kagaanaku kata Faakayi?

13Yéesu li aboñ bukan kúl̥uba li kúgoomaku koola min aaniil:

— Jijow boot li ésukayi. Fan jifam li ánayine atebe káyijum kata mal. Jinab li akila. 14Ban dán ánayinaawu ammuu li anoken, li joon akilumuu eluufayi: «Anahaanawu laane: “Káfitaku kúmbaam dán ínje li kúgoomaku kúmbaam jommuu li jitiñ sinaaŋasu sata Faakayi, kunkay?”» 15Jiloboolumuu loon muñaˈa, fan áhiisuul haatiya eluufayi káfit kawuŋe kafaleyi jak, kabaje wahawu feh wan éetimuu jokolaal li wo. Li káfitaku unku jommuu li jilak sinaaŋasu boot li alolaal.

16Mal̥egen kúgoomaku li kujow kúliiŋ li ésukayi, li kujuk wahawu feh loon Yéesu alobiilumuu, min kulak sinaaŋasu sata Faakayi.

17Muñeˈe li bil líiŋ kátiimaku, Yéesu li áliiŋul li kúgoomaku koola kuŋen di kúl̥ubaaku ló. 18Nan kubahumuu min kulako hutiñahu, Yéesu li aaniil:

— Li mal̥egenamu fan ilobuul, akee li bukuluul áamimee hutiñ dín dáno lí ínje, fan abetom li kuŋen bukan.

19Muñeˈe kúgoomaku li jokiil ŋáa’, min kunaak kugel̥l̥enool ano li ano koonool:

— Waa fíle, ínje?

20Yéesu li aaniil:

— Laalu akee li bukuluul kuŋen li kúl̥ubaaku. Anawu álu’muu kaŋenool li buyinjaayabu li mano lí ínje, akilamuu. 21Mal̥egen, Añool-An fan aket loon Bakiicelabu bulobumuu buya li akila, bale katek kujow kulako li anawu ammuu li abetool li kuŋen bukan. Haŋeene majak jakum anawu ummu abuki.

Húmbuulu li ejunk boot kawayil̥en

(Máciya 26:26-30; Lík 22:15-20; 1 Koolentiyeŋ 11:23-25)

22Muñeˈe nan kulakomuu hutiñahu, Yéesu li aŋa’ húmbuulu min asal Ateemit aban, li amuncul ho asen kúgoomaku koola ban li aaniil:

— Jiŋa’, laalu eniilayi yúmbaam.

23Yéesu li alaañen aŋa’ ejunk yata ébiiñ, min asal Ateemit aban, li aseniil yo kuhoboo foofiil feh. 24Muñeˈe li aaniil:

— Laalu húsimahu húmbaam, húsimahu halitenumuu húfaalumahu han Ateemit ajokumuu bukanabuku, háyuwimuu boot li bukan kameeŋe. 25Li mal̥egenamu fan ilobuul, kale let imit ilaañen ihob ébiiñ boot yok hunakahu nan emmuu ihob ébiiñ ewunkul li Jáyiiyaju jata Ateemit.

26Muñeˈe nan Yéesu alobumuu loon muñaˈa aban, li kukijen ukijenawu wata kasal Ateemit, li kúfu’ kujow boot bata Huyuuyahu hata unuunukenawu waaneyimuu Olíibiye.

Yéesu li alob aan Fiyeel fan abil aceeŋ aan lahaasool

(Máciya 26:31-35; Lík 22:31-34; Saŋ 13:36-38)

27Nan kúliiŋumuu bata huyuuyahu hata unuunukenawu waaneyimuu Olíibiye, Yéesu li aan kúgoomaku koola:

— Bukuluul foofuul feh fan jikat bo káyinenaku kan jibajumuu lí ínje, mata kikkiic kaanaku: «Fan itek amataawu imuk, min kúgalalaanaku kata bumatabu kuyiisoo.» 28Bale nan emmuu li iyitowumul li eketayi, fan ijow ló ijow ikobuul Gálile.

29Fiyeel li aanool:

— Manoo kaabuku feh kukat bo káyinenaku kan kubajumuu li awu, ínje let ikaan mo.

30Yéesu li aanool:

— Li mal̥egenamu fan ilobi, li ehukaayi unye humum yo yata síyaat, awu humumi fan uceeŋ ñoono ñáhaaji oon luhaasonhaas, tówum káyin kul̥ok búl̥ubut. 31Bale Fiyeel li ahaŋ malob li sembe aan:

— Maayeet min eete iket inaboo li awu, bale let iceeŋ een lihaasihaas. Kúgoomaku feh li kulob manolamu.

Yéesu li al̥aw tan koonemuu Getisemane

(Máciya 26:36-46; Lík 22:39-46)

32Muñeˈe Yéesu li kúgoomaku koola li kujow boot tan koone Getisemane, kúliiŋ li aaniil:

— Jibah taate mín ínje ijow il̥aw.

33Yéesu li aŋa’ Fiyeel buko li Saak, li Saŋ, ájowetum. Li tóŋ kaanool buyina li kákoli.

34Muñeˈe Yéesu li aaniil:

— Buyina báamak bookom bayilo bumukom. Jilako taate ban jakum jímooli.

35Yéesu li ayinno bo lóyi jakee, li ákuntuŋ min aŋa’ buulool aya teetaam, min al̥aw kaanaku nokoomuu loon kayiliyeenuma, ewaatuwayi inyu yata sílaamasu li ewuj wah bakaanutool. 36Li aan:

— Faafa, Atuubawom, bajut wah wayilo uheeki kakaan. Ulóyiyen ejunkayi inyu yata sílaamasu téetiwom. Bale jakum kaan loon ínje ifañumuu, bale loon awu ufañumuu.

37Nan Yéesu abanumuu kal̥awaku, li álaañul boot tan kúgoomaku koola kúhaaji kulakomuu áŋejul, li atookiil buko li kámooli. Muñeˈe li agel̥l̥en Fiyeel aanool:

— Simoŋ, waa kámooli? Ubanut uban bayili ulako to ewaatu yano awu bámooliwut? 38Jakum jímooli. Jil̥aw jakum bil jilo li jabunt. Buyinumabu bufañe, bale eniilayi égootogooto.

39Muñeˈe Yéesu li alaañen akat to kúgoomaku min ayinno bo áliiŋ, li alaañen al̥aw li kulimaku kanolaku. 40Nan abanumuu kal̥awaku, li amit álaañul áliiŋul, li atook kúgoomaku buko li kámooli, mata kámooliyaku kujokiijok ŋáa’ gay kuyilaat kuluuj. Kuhaasut buu kóomi li kulobool.

41Muñeˈe nan Yéesu álaañulumuu búhaajutabu, li aaniil:

— Kama jiloŋe li jímooli min jiyool̥o? Muñeˈe fite! Ewaatuwayi éliiŋe. Añool-An kubetool kuban li kuŋen kata kuhoofoola. 42Jiyito ujowaal. Jijuke! Anawu ammuu li abetom li kuŋen bukan láliiŋulo.

Kunahaanaku kata Kusuwifaku li kujok Yéesu

(Máciya 26:47-56; Lík 22:47-53; Saŋ 18:3-12)

43Muñeˈe nan alakomuu elobayi, Sudaas alakomuu akee li kúgoomaku li ayaan áliiŋul. Li ánaboolul li búsuk bajunkowulo síkundu li sigol. Bukanabuku umbuku huhaanaahu hata élambaayi, li kaliikenemuu ésukayi eluwaayi ésukayi eluwaayi yata Móyiis, li kunahaanaku kata ésukayi kúboñuliil. 44Sudaas ammuu li abet Yéesu li kuŋen bukanabuku umbuku, lalobiilob buu láatimuu akaan min kuhaasool. Laaniisaan: «Anawu an emmuu igaab kuŋenom, okilamuu. Jijokool jíjowetum, ban li jifooyool jak.» 45Muñeˈe nan Sudaas ayaane áliiŋulumuu, li ajow boot tan Yéesu alakomuu áliiŋ li aanool:

— Anahaan!

Ban li agaabool. 46Muñeˈe bukanabuku li kubil kujok Yéesu. 47Akee li bukanabuku kalako tomuu li Yéesu li áhoonul ékunduwayi yoola atek alokaawu ata anahaanawu ata élambaayi, afalen kanuu. 48Muñeˈe Yéesu li alobiil aaniil:

— Waa, jibil boot kajokom li síkundu li sigol ló loon eenimuu ínje ákuu?

49Hunakoohunak li bukuluul linaake ilako li eluufayi yata Ateemit, min inaak iliiken bukanabuku mata Ateemit, ban jijokutom. Bale wahawu unwu boot min ubaj min kulimaku kan Bakiicelabu bulobumuu kubaj.

50Muñeˈe kúgoomaku feh li kukat to Yéesu min kutey kuwuj. 51Li baj áfu’ akee águuyoolume hulaal bale, anaake anab li Yéesu. Kukee li kánayinaaku kalako tomuu li kufañeen kujok áfulawu, 52bale li akaten hulaalahu min atey maayiiñool awuj.

Li kújowetum Yéesu hákil huhaanaahu hata Kusuwifaku

(Máciya 26:57-68; Lík 22:54-55, 63-71; Saŋ 18:13-14, 19-24)

53Bukanabuku kajokumuu Yéesu, li kújowetumool boot bata anahaanawu ata élambaayi ban huhaanaahu hata élambaayi feh, li kunahaanaku kata ésukayi, li kaliikenemuu ésukayi eluwaayi yata Móyiis, kuwoogumuu. 54Fiyeel li alako lóyi min anaak ánabul li Yéesu, boot yok li ekaakayi yata eluufayi yata anahaanawu ata élambaayi. Nan áliiŋ dómuu, li abah áginnoo li kufooyaaku min alako kayiiño sambun.

55Muñeˈe huhaanaahu hata élambaayi li huhaanaahu feh hata Kusuwifaku, li kulako huŋes bukan kayilo kúmal kuya li Yéesu bájum li kuyili kumukool. Bale kubajut an. 56Bukan kameeŋe li kunaak kúmal kuya li Yéesu, bale kulimaku kooliil kunaakut kunaboo. 57Muñeˈe kukee li kuyito kúmal kuya li akila koon:

58— Jijamoojam li alob aan: «Injé fan ihum eluufayi inyu yata Ateemit, yan bukan kuteefumuu, ban li iŋa’ kunak kúhaaji min ilaañen iteef yakee yan kuŋen bukan kulet li kuteef.» 59Bale maayeet min bukanabuku umbuku kulobumuu loon muñaˈa, kulimaku kooliil kunaboolut.

60Muñeˈe anahaanawu ata élambaayi li ayito hákil bukanabuku feh, min agel̥l̥en Yéesu aanool:

— Kama waa, ulet li ubag? Kama wahawu wan bukanabuku umbuku kulobemuu li wo kuya li awu, buu?

61Bale Yéesu abagut. Alámbaawu ahaanawu li alaañen agel̥l̥enool aanool:

— Awu ommuu Afakenaawu, Añiilawu ata Ateemit asaleyimuu?

62Yéesu li aanool:

— Eéhe’, ínje emmuu Afakenaawu. Ban fan jibil jijuk Añool-An mabahe kaŋen kúli Ateemit ata Sembe, li abil li ufaalawu wata emitayi.

63Nan Yéesu alobumuu loon muñaˈa, anahaanawu ata élambaayi li ahaacul wañawu woola wan akila humumool aakenumuu, aban li aan:

— Laañut jokolaal min bukan kulobolaal kulim kuya li akila. 64Bukuluul humumuul jijame min agelumuu Ateemit. Buu jiyinoole?

Bukanabuku feh li koon tootook min aket. 65Muñeˈe kukee li buko li kútoŋ kumasenool, li kúmibool kúkil, min kutekool sínuka ban li koonool:

— Uhéboli ayi atekimuu.

Muñeˈe kufooyaabuku li kunaak kutekool siheejen.

Fiyeel li aceeŋ aan lahaase Yéesu

(Máciya 26:69-75; Lík 22:56-62; Saŋ 18:15-18, 25-27)

66Muñeˈe no unnu, Fiyeel okila teetaam li ekaakayi, akee li kugoloolaaku kata anahaanawu ata élambaayi li abil. 67Nan agoloolaawu áliiŋulumuu, li ajuk Fiyeel okila li kayiiño. Li ajukelool jow fit, li aanool:

— Awu foof lunaanaak unaboo li Yéesu ata ésukayi yata Nasalet.

68Muñeˈe Fiyeel li aceeŋ min aan:

— Ihaasut ban ínaanumut foof waa lulobe li wo.

Nan alobumuu loon muñaˈa aban, li áfu’ ajow alako li hugulubahu hata ekaakayi. No unnu káyin li kul̥ok. 69Agoloolaawu li ajukool, li alaañen aan bukanabuku kalako tomuu:

— Anáyinaawu ummu foof buko kunaake kunabumuu li Yéesu.

70Fiyeel li alaañen aceeŋ. Fiyowut, bukanabuku kalako tomuu li kulaañen koonool:

— Mal̥egen, awu foof bukuluulumuu, mata awu an ata etaamayi yata Gálile.

71Muñeˈe Fiyeel li anuu wah wajakut aya li okila humumool aan:

— Ihaasut ánayinaawu ummu an jilobemuu li akila.

72Nan alobumuu loon muñaˈa, káyin li kuyaan kul̥ok búl̥ubut. Muñeˈe li awayil̥o hulimahu han Yéesu alobool nomuu aanool: «Fan uceeŋ ñoono ñáhaaji oon luhaasonhaas tówum káyin kul̥ok búl̥ubut.» Muñeˈe Fiyeel li alako to jíl̥ok.

Voafantina amin'izao fotoana izao:

Maak 14: cskDBL

Asongadina

Hizara

Dika mitovy