Ujuni 5
5
Pntaali pi Adam te kaban du Nowe na babukul
1Uko umpiiŧaniiŋ ţi pntaali pi Adam wii wi : unuur wi Naşibaţi aţakuŋ ñaaŋ, adola kë anaam na a. 2Wal mënţ ado baka kë bawo ñiinţ na ñaaţ, awul baka bnuura, aşë ţu baka katim aji « Bañaaŋ. »
3Wi Adam adoluŋ ŋşubal iñeen-week na iñeen ŋwajanţ (130), abuk napoţ anaamuŋ na a, aşë ţu'a katim ki Ŧet. 4Wi Ŧet abukiiŋ, Adam akak ado ŋşubal iñeen-week bakreŋ (800) abot abuk bapoţ biinţ na baaţ. 5Ŋşubal bŧi ŋi Adam adoluŋ ţi mboş ŋawo iñeen-week ŋyaaş kañeen-kaloŋ na iñeen ŋwajanţ (930). Wi wi aşaaŋ akeţ.
6Wi Ŧet adoluŋ ŋşubal iñeen-week na kañeen (105) aşë buk Enoş. 7Wi Enoş abukiiŋ, Ŧet akak aţo ŋşubal iñeen-week bakreŋ na paaj na uloŋ (807), abot abuk biinţ na baaţ. 8Ŋşubal bŧi ŋi Ŧet adoluŋ ţi mboş ŋawo iñeen-week ŋyaaş kañeen-kaloŋ na ŋşubal iñeen-na-ŋtëb (912). Wi wi aşaaŋ akeţ.
9Wi Enoş akaaŋ ŋşubal iñeen kañeen-kaloŋ (90) aşë buk Kenan. 10Wi Kenan abukiiŋ, Enoş akak aţo ŋşubal iñeen-week bakreŋ na iñeen-na-kañeen (815), abot abuk biinţ na baaţ. 11Ŋşubal bŧi ŋi Enoş adoluŋ ţi mboş ŋawo iñeen-week ŋyaaş kañeen-kaloŋ na ŋşubal kañeen (905). Wi wi aşaaŋ akeţ.
12Wi Kenan akaaŋ ŋşubal iñeen paaj-na-uloŋ (70) aşë buk Mahalalel. 13Wi Mahalalel abukiiŋ, Kenan akak aţo ŋşubal iñeen-week ŋyaaş bakreŋ na ŋşubal iñeen ŋbaakër (840) abot abuk biinţ na baaţ. 14Ŋşubal bŧi ŋi Kenan adoluŋ ţi mboş ŋawo iñeen-week ŋyaaş kañeen-kaloŋ na ŋşubal iñeen (910). Wi wi aşaaŋ akeţ.
15Wi Mahalalel akaaŋ ŋşubal iñeen-paaj na kañeen (65) aşë buk Yered. 16Wi Yered abukiiŋ, kë akak aţo ŋşubal iñeen week bakreŋ na ŋşubal iñeen ŋwajanţ (830) abot abuk biinţ na baaţ. 17Ŋşubal bŧi ŋi Mahalalel adoluŋ ţi mboş ŋawo iñeen-week bakreŋ na ŋşubal iñeen kañeen-kaloŋ na kañeen (895). Wi wi aşaaŋ akeţ.
18Wi Yered akaaŋ ŋşubal iñeen-week na iñeen paaj na ŋtëb (162) aşë buk Henok. 19Wi Henok abukiiŋ, Yered akak aţo ŋşubal iñeen-week bakreŋ (800) abot abuk biinţ na baaţ. 20Ŋşubal bŧi ŋi Yered adoluŋ ţi mboş ŋawo iñeen-week ŋyaaş kañeen-kaloŋ na iñeen paaj na ŋtëb (962). Wi wi aşaaŋ akeţ.
21Wi Henok akaaŋ ŋşubal iñeen-paaj na kañeen (65), aşë buk Matuŧalem. 22Wi Matuŧalem abukiiŋ, Henok awo na Naşibaţi aţaşa ŋşubal iñeen-week ŋyaaş ŋwajanţ (300) abot abuk biinţ na baaţ. 23Ŋşubal bŧi ŋi Henok adoluŋ ţi mboş ŋawo iñeen-week ŋwajanţ na iñeen-paaj na kañeen (365). 24Henok awo na Naşibaţi aţaşa kë Naşibaţi aşë jeja, bañaaŋ baankak awina, ţiki Naşibaţi aya na a.
25Wi Matuŧalem akaaŋ ŋşubal iñeen-week na ŋşubal iñeen bakreŋ na paaj-na-uloŋ (187) aşë buk Lamek. 26Wi Lamek abukiiŋ, Matuŧalem akak aţo ŋşubal iñeen-week ŋyaaş paaj-na-uloŋ na ŋşubal iñeen bakreŋ na ŋtëb (782) abot abuk biinţ na baaţ. 27Ŋşubal bŧi ŋi Matuŧalem adoluŋ ţi mboş ŋawo iñeen-week ŋyaaş kañeen-kaloŋ na iñeen paaj na kañeen-kaloŋ (969). Wi wi aşaaŋ akeţ.
28Wi Lamek akaaŋ ŋşubal iñeen-week na iñeen bakreŋ na ŋtëb (182) aşë buk napoţ ñiinţ. 29Awul napoţ mënţ katim ki Nowe, ţiki aji : « I, akţuuŋ iñen yi nun inoorfën ulemp na unoor. Mboş mi Naşibaţi afëpuŋ manţuuŋ un ulemp na unoor mënţ. » 30Wi Nowe abukiiŋ, Lamek akak aţo ŋşubal iñeen-week kañeen na ŋşubal iñeen kañeen-kaloŋ na kañeen (595). Abot abuk bapoţ biinţ na baaţ. 31Ŋşubal bŧi ŋi Lamek adoluŋ ţi mboş ŋawo iñeen-week ŋyaaş paaj-na-uloŋ na ŋşubal iñeen paaj-na-uloŋ na paaj-na-uloŋ (777). Wi wi aşaaŋ akeţ.
32Wi Nowe akaaŋ ŋşubal iñeen-week kañeen (500) aşë buk Şem, Ham na Jafet.
Voafantina amin'izao fotoana izao:
Ujuni 5: knf
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2014, Wycliffe Bible Translators, Inc. in cooperation with Le Groupe CIM-TBM, Senegal