Mpiin 31
31
Jakob aah san nyan Labann do pu na aabɔr
1Le Jakob ŋun ke Labann aajapɔtiib bui ke, “Jakob gaa tite aawan mɔmɔk a. Waah kpa tiwan nimɔk na nyan ni tite yaan ponn ni la.” 2Jakob nan ki kan ke uweeja Labann aa nan ki gee waabɔr ke waah nan gee u njan pu na. 3Le Uwumbɔr nan bui Jakob ke, “Gir kun aate, ni aado yaab aatiŋ ni. M ga li bi aa chee.”
4Nima pu na, Jakob nan tun ti bui Rachel ni Lea ke bi keln ni u waah bi kpaa tiwakor timoor ni nin chee na. 5Baah fuu ni na le u bui bi ke, “M bee ke nite aa ki gee maabɔr ke waah nan gee mi njan pu na; tɔ, nte Aawumbɔr bi m chee. 6Nimi bilee bee, ni nyi ke m tun lituln sakpen tii nite. 7Le n‑yoonn pam, u jin mi pem pem ki kpeln waah ba ga pa mi pu na nfum kipiik pu. Uwumbɔr mu aa kii ke u bii mi. 8N‑yoonn mu nite Labann ti bui ke, ‘Iŋoob i ye ichachal na ye min yee na’ kan, see i mɔmɔk ga maa kina ŋmeen la. U yaa ti ki bui ke, ‘Iŋoob i lul mbɔmbɔm ni mpepem na ye min yee na’ kan, see i mɔmɔk ga maa kina ŋmeen la. 9Ni kan ke nite aah ji mi pem pem pu na, le Uwumbɔr di waapiih ni iŋoob di tii mi.
10“Buyoonn tiwakor ngbaan nan piin ki bi maa na, le m daŋ tidaŋ, le ki kan ke iŋoja i nan bi dur ininkpel na nan ye i lul mbɔmbɔm ni mpepem na la. 11Uwumbɔr aatuun nan len m chee tidaŋ ponn ni ki yin mi ke, ‘Jakob’. Le m kii ke, ‘M sɔ.’ 12Le u bui mi ke, ‘Lik, iŋoja i mɔmɔk bi dur ininkpel na ye ibɔnbɔn, ni ichachal la. Min le cha ni ŋani kina, ba pu? m kan Labann aah ŋani si pu na. 13Min le ye Uwumbɔr u nan dan aa chee Betel aatiŋ ni, nin chee aa nan di litakpal ŋum, ki di nkpan kpir li pu ki di tii mi, ke aa li teer mbɔr, ki nan ki puu tipuur tii mi na. Dandana wee, gor saawan mɔmɔk, ki gir buen baah nan ma si kitiŋ ki ponn ni na.’”
14Le Rachel ni Lea gar Jakob ki bui ke, “Taa ki kpa lifaal libaa ti ji tite chee. 15U ŋani ti mu ke taah ye biwɔwɔm le na. U di timi kooh a, le dandana wee u jin tipar ngbaan doo a. 16Le Uwumbɔr aah gaa waawankpal li ki di tii sin Jakob na, ye ti ni timi aabim yaan la. Uwumbɔr yaa bui ke aa ŋa pu na kan, ŋa kina.”
17-18Nima pu na, Jakob nan gor u ki gir ute do, Kanaann aatiŋ ni. U nan di waabim ni upuutiib ki di kaan laakumii tiib pu, le ki pue loln nsan, ki peer waawakor, ni waah kan tiwan nimɔk Mesopotamia aatiŋ ngbaan ni na di buen. 19Labann nan buen waawakor chee timoor ni, u ti chee waapiih aakor pu, le waah kaa bi buyoonn na, Rachel sun waawaa ŋi nan bi lichiln ni na. 20Jakob nan ŋmann Labann, le kaa cha u nyi ke u ga nya udo. 21U nan yoor waawan mɔmɔk le ki san mala buen. U nan ti puur Yufrates aamɔɔl, le ki piin ki cha ŋijoo aatiŋ ki bi yin ki ke Gilead na ni.
Labann aah paan Jakob pu pu na aabɔr
22Naah ti saa iwiin itaa daal na, le bi tuk Labann ke Jakob san a. 23Le Labann yoor waajab ki paan Jakob pu ki ti saa iwiin ilole daal, le ki ti pii u ŋijoo aatiŋ Gilead ni. 24Kinyeek ngbaan le Uwumbɔr nan dan Labann chee tidaŋ ni, le ki bui u ke, “Aa li nyi ki taa ŋa Jakob nibaa.” 25Jakob ni waanib nan bi lijool libaa paab, le Labann mu ni waajab nan bi liken paab, Gilead aatiŋ ni.
26Le Labann baa Jakob ke, “Ba ŋa aa ŋmann mi, ki yoor mbisatiib ke saah ton butɔb le ki gaa bi na? 27Ba ŋa aa ŋmann mi ki loon san, kaa tuk mi? Aa yaa ba tuk mi kan, m ba ga cha m ni maanib yoor tiwangbaakaan le ki li gaa ilahn ki kpa mpopiin ki cheen nimi. 28Hali, saa cha m moor n‑yaabitiib ni mbisatiib aatakpin#31.28, 55: Israel yaab nan dooni tɔb kina le ki mɔk ngeehn. ki chɔi bi. Saah ŋa pu na, ni naahn kijɔrk aatuln la. 29M ba kpa mpɔɔn ke m ŋa si bakaa, le kinyeek na, aate Aawumbɔr fe sur mi ke m li nyi m ŋa si bakaa ubaa. 30M bee ke aanimbil man aa gir kun, nima pu le aa san. Ba ŋa aa sun maadichal ni aawaa?”
31Jakob nan giin bui u ke, “M san ijawaan ki dak ke nibaakan aa ga gaa aabisatiib m chee la. 32Aa mu yaa kan unii u joo saawaa na kan, ku udaan ngbaan. Ti mɔmɔk sɔ do, timi aanib bee le ga li ye biseeraadam, lik m ni maanib aawan mɔmɔk ponn ni, ki nyan saawan aah ye ni na mɔmɔk.” Jakob aa nan nyi ke upuu Rachel le sun ute Labann aawaa.
33Le Labann nan koo Jakob aadiik ni ki biln, ki koo Lea mu, ni baanaagbiipiib bilee na aadir ponn ni ki biln, kaa kan waawaa ngbaan. Le u koo Rachel aadiik mu ni. 34Rachel le nan yoor ŋiwaa ngbaan ki di bɔr laakumii aajal taab, waadiik ni, le ki kal li pu. Le Labann nan biln kidiik ponn ni, ni kookoo, kaa kan ŋi. 35Rachel nan bui ute ke, “Uninkpel, taa gee liŋuul m pu, m fu tipiir la, nima pu le maan ŋmaa fii sil aanimbiin ni.” Le Labann nan biln, kaa kan waawaa ngbaan.
36Kina pu na, Jakob aasui nan fii, waa ki ŋmaa chuu ubaa, le ki baa Labann ke, “M tee ŋa si ba aabakaa. M tee bii nkaal mulamu aan aa kpa nsan ke aa paan ni m pu? 37Dandana wee aa biln timi aawan mɔmɔk ni, aa kan saawan nilani? Nyan ni siin, aan saanib ni maanib mɔmɔk kan ni, ki bee u ye mbamɔndaan na. 38M bi aa chee ki ti saa ŋibin moninko le na, le ki joo saawakor mɔmɔk ti ŋa si tinyoor, m mu aa ŋman saapiih ubaa. 39N‑yoonn mumɔk tipeewanbir yaa nan ti chuu saawakork kibaa na kan, ni nan ye min le aafalaa. Maa nan yoor taakpab ti mɔk si ke naa ye maataani. N‑yoonn mumɔk unaayuk yaa nan ti sun saawakork kibaa kinyeek, bee nwiin pu na kan, see min le ga teen si. 40N‑yoonn pam le nwiin nan gbaa mi, le tiwoor mu ŋun mi kinyeek, maa ŋmaa geeni. 41M nan jin kina aafalaa ŋibin moninko ŋi jer aan m nan bi aa chee na. M nan tun lituln tii si ŋibin kipiik ni ŋinaa, aabisatiib bilee bee pu, le ki tun lituln ŋibin ŋiloob, maawakor ngbaan pu. Falaa umina mɔmɔk ponn ni, aa nan kpeln saah ba ga pa mi pu na nfum kipiik pu. 42Ni yaa kaa ye Uwumbɔr u nte Aisak ni n‑yaaja Abraham nan dii na nan bi m chee kan, kina m ba nyan aado nkuun la. Uwumbɔr aah kan maafalaa ngbaan, ni maah tun tii si pu na, le kinyeek na u fe bui si mbamɔn.”
Jakob ni Labann aah puu tipuur tii tɔb pu na aabɔr
43Labann nan bui Jakob ke, “Mpiibim bimina ye mbisatiib la, le min le yeh baabim ni tiwakor timina mɔmɔk. Mbamɔn, tiwan nimɔk bi do na ye maawan la. Le maah kaan ŋmaa gaa mbisatiib ni baabim na kan, 44m gor ke m ni si ŋa kimɔbaan. Cha ti kuun ŋitakpal bil nibaa chee aan ni li teer timi kimɔbaan ngbaan aabɔr.”
45Nima pu na, Jakob nan yoor litakpal libaa le ki di ŋum, ke bi li teer kimɔbaan ngbaan aabɔr. 46U nan bui waanib ngbaan ke bi kuuni ŋitakpal ki nan di bil libuul libaa ni. Le bi nan kal ŋitakpal ngbaan chee ki jin tijikaar. 47Labann aaliin ponn ni u nan yin nima chee ke, Jegar Sahadufa.#31.47: Labann aaliin ni, Jegar Sahadufa aatataa le ye ke “ŋitakpal ŋi kuun dɔ ki teer timi na.” Le Jakob mu aaliin ponn ni, u yin nima chee ke Galeed,#31.47: Jakob aaliin ni, Galeed aatataa le ye ke “ŋitakpal ŋi kuun dɔ ki teer timi na.” 48Le Labann bui Jakob ke, “Ŋitakpal ŋi ti kuun bil na le ga cha ti li teer kimɔbaan ngbaan.” Nima le cha bi yin nima chee ke Galeed. 49Le Labann ki bui ke, “Uwumbɔr li lik ti mɔmɔk bilee, taah ga yakr tɔb chee pu na, ubaa taa ŋa uken bakaa.” Nima pu na, bi nan ki yin nima chee ke Mispa.#31.49: Mispa aatataa le ye ke “nin chee bi ga li lik na.” 50Labann nan ki bui ke, “Aa yaa ŋa mbisatiib bee bakaa, bee aa yaa ki yoor bipiib kpee bi pu kan, hali m yaa kaa nyi kan, teer ke Uwumbɔr waa si. 51Ŋitakpal ŋi m kuun bil do na, ni litakpal li ŋum na le ye nteerm mu bi m ni sin aakaasisik ni na. 52Tiwan nilee ngbaan le ga li teer timi. M kii ke nwiin mbaa daal, maan lakr ŋitakpal ŋee pu jer ke m nan ban si kijaak, aa mu taa ŋa kina. 53Aayaaja Abraham Aawumbɔr ni n‑yaaja Nahor Aawumbɔr le ga li ye timi aabɔjir.” Le Jakob aate Aisak Aawumbɔr aayimbil pu, u mu nan puu ke u mu ga li joo tipuur ngbaan. 54U nan kɔr kiwakork ki toor kitork, lijool ngbaan paab, le ki nan chɔi waanib ngbaan, le bi dan nan jin tijikaar. Baah jin doo na, le bi mɔmɔk kpaan doon lijool ngbaan paab. 55Naah woln kichakpiik ni na, le Labann moor uyaabitiib ni ubisatiib aatakpin ki ŋa tinyoor ŋa bi pu, le ki chɔi bi, le ki gir kun udo.
Voafantina amin'izao fotoana izao:
Mpiin 31: xonB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©1998, 2014 Wycliffe Bible Translators, Inc. All rights reserved.