Yoni 7
7
Yesu aganaʼamogimo gemo ha paiʼnaya gemae
1 #
Yo 5:18
Mago afinaʼmo utegeʼapaeʼmo Yu vayaʼmogi Yesuʼmo kamiti amagigune, huʼa huʼnayaʼmofeʼmo Yutiya kotegamo umenitata osuno Galeliya kotegageʼmo umenitata huʼniye. 2#Mon 23:34Yu vayaʼmogi hoyalega nopiʼmo neʼmaiya hopa afinaʼmo ago hogo huʼnigeʼapaeʼmo 3Yesu aganaʼamogi huʼapaeʼmo, Gekamo neʼafiya vayaʼmogi aliʼyakamo agesayafeʼmo mani kotetiʼmo ataleka Yutiya kotegamo uvo. 4Mago vekamoʼmo muki vayaʼmogimo aliʼyaʼamo agesayafeʼmo hauʼnigenoʼaeʼmo fala kino noʼmaifa afole yatekeʼmo maiʼneno aliʼyaʼmo neʼaliye, huʼa ha paiʼnae. 5#Mt 13:55; Ap 1:14Aganaʼamogiʼeʼmo agaefeʼmo apakesa afiʼa fatago osuʼnayaʼmofeʼmae. 6#Yo 2:4Yesuʼa hunoʼaeʼmo, nagae afinaʼmo hemenimo afole oʼaiʼniye. Lapakae afinaʼmo muki afinaʼamo haneʼniye. 7#Yo 15:18Ma mopafi vayaʼmogimo lapakaefeʼmo afaʼa alagi apaini osugae. Nagaemo hosu kavaʼapieʼmo gemo aeʼna hakalo huʼna hapa nepauvaʼmofeʼmo nagaefeʼmo apaini nehae. 8-9Lapakaemo hopa afinaʼmogeʼa aliʼa anupa huʼa maisayategamo viyo. Hemenimo nagae afinaʼmo alagi afole oʼaiʼniyaʼmofeʼmo oʼuguve, huno hapa paiteno Galeliya kotegamo maiʼniye.
Yesuʼmo hopa afinaʼmo aliʼa anupa huʼa maiʼnayategamo uno maiʼniya gemae
10Aganaʼamogi hopa afinaʼmo aliʼa anupa huʼa maiʼnayategamo utagenoʼaeʼmo Yesuʼa afole kateʼmo oʼuʼnifa kesi katetiʼmo uʼniye. 11#Yo 11:56Yu vayaʼmogi kahauya huʼnayana oʼageʼapaeʼmo, ani vekamo haiyateʼmo maiʼniye, huʼa ge huʼa apafi geʼnae. 12Muki asole vayaʼmogimo agaefeʼmo sumi huʼa ge huge afige huʼapaeʼmo, alagepa vekamae, huʼa huge, haʼao, vayaʼai apakesamo nefaiya vekamo maiʼniye, huʼa huge huʼnae. 13#Yo 9:22; 12:42; 19:38; 20:19Yu vayaʼaifeʼmo koli huʼnayaʼmofeʼmo vayaʼai apaulagaleʼmo agaefeʼmo ava gemo osuʼnae. 14Hopa afinaʼmo eno folaga huʼniya afinaʼmo Yesuʼa Yu vayaʼai alopa mono nopiʼmo uno haino aepa faino alino apaya maleʼniye. 15#Mt 13:54; Lu 2:47Yu vayaʼmogimo afiʼa hapau aiteʼapaeʼmo, ani vekamo sukulu osuʼniyana haiya kava huno Goti mukufi gemo ageteno nehiye, huʼa huʼnae. 16#Yo 12:49; 14:10Yesuʼa hunoʼaeʼmo, aliʼna apaya neʼmalova gemo nagaiʼni gemo ohaneʼnifa Gotiʼa alino nateʼnigeʼna emineʼnova vekamo geʼamo haneʼniye. 17Ina lagimo Gotiʼa hauʼniya kavaʼmo hisayafeʼmo hapauʼnisifigeʼna aliʼna apaya neʼmalova geeʼmo huʼapaeʼmo Gotitegatiʼmo eʼnifi agaiʼa aipafatiʼmo nehifi huʼa afaʼa afigae. 18#Yo 5:44; 8:50Mago vekamoʼmo agaiʼa aipafatiʼmo ge nehisiyana agaiʼa agiʼaleʼmo aliʼa asaga huʼa atesayafeʼmo haʼye huʼnigeno kahauya nehiye. Mago vekamoʼmo alino ateʼnigeno emineʼniya vekamo agiʼaleʼmo aliʼa asaga huʼa atesayafeʼmo hauʼnisiyana lama ge vekamo maiʼnigeno aigofe gemo aipafiʼmo alagi ohaneʼniye. 19#Ap 7:53; Lo 2:21-24Moseseʼa keʼaepa gemo ago alino lapamiʼniyaʼmonanafa lapakaepatiʼmo magoke vekamoʼa ani gemo alagi akame osuʼniye. Na kava huʼnogetapaeʼmo kamiti namagisayafeʼmo nehae, huno apafi geʼnigeʼapaeʼmo 20#Yo 8:48,52; 10:20muki asole vayaʼmogimo huʼapaeʼmo, kaipafiʼmo hosu aune vekamo maiʼniye. Ina laʼmo kamagisiyafeʼmo nehiye, huʼa afi geʼnagenoʼaeʼmo, 21#Yo 5:16nagaemo magoke aliʼyaʼmo aliʼnogetapa agetetapaeʼmo muki vayaʼamogitapamo ageta lapau aiʼnae. 22#Mon 12:3; Aep 17:9-13Moseseʼa hunoʼaeʼmo, ve mafaʼnetapimogi apakufamo lagauta apateyo, huno lapa paiʼniye. Moseseʼa ani kavaʼmo alino aepa ofaiʼnifa lapakinago vayaʼmogigeʼmo hogoteʼa aliʼa aepa faiʼnae. Moseseʼa hunoʼaeʼmo, apakufamo lagauta apateyo, huno lapa paiʼniyaʼmofeʼmo Sapati afinaʼmo mafaʼne anagaʼai apakufamo lagauta neʼapatae. 23#Yo 5:8-10,16Lapakaemo Mosese keʼaepa gemo amagitapa oʼatalesayafeʼmo mafaʼne anagaʼai apakufamo lagauta neʼapatae. Sapati afinaʼmo apakufamo lagauta neʼapatayaʼmonanafa nagaemo Sapati afinaʼmo mago vekamo muki agufaʼamo alagi aliʼna alagepa huʼna ateʼnovaʼmofeʼmo na kava higetapaeʼmo lapaipamo letapa neʼnatae. 24#Mon 19:15; Aiy 11:3-4; Yo 8:15Amega apakufaʼalekeʼmo apaketetapa alita fako osutapa apaketa alagepa hutetapaekeʼmo alita fako hiyo.
Ani vekamo Kalaisi vekamo maiʼnifiye, huʼa huʼnaya gemae
25 #
Yo 5:18
Mago Yulusalemu taonifiʼmo maiʼnaya vayaʼmogi, ani vekamo kamitimo amagigune, huʼa vege huʼnaya vekamo maiʼnifiye. 26Ageyo, huʼa, agaemo afole yateʼmo maiʼnenoʼaeʼmo gemo aeno hakalo huno hapa nepaigeʼapaeʼmo gemo nosae. Mesaiya vekamo maiʼniye, huʼa ageʼnafiye. 27#Yo 7:41; 9:29Hiyaʼmonanafa Mesaiya vekamo esigeʼapaeʼmo haiya kotegatiʼmo eʼnifi huʼa afaʼa oʼagegayaʼmonanafa muki vayaʼamogita ani vekamo eʼniya koʼamo ago ageʼnone, huʼa huʼnae. 28#Mt 11:27; Yo 8:55Yesuʼa alopa mono nopiʼmo alino apaya malenoʼaeʼmo alopa gefatiʼmo hapa painoʼaeʼmo, nagetetapa emineʼnova koʼmo ago ageʼnafiye. Nagaiʼnimo nagesamo afiʼna eminoʼmeʼnofa alino nateʼnigeʼna emineʼnova vekamo lama geʼageʼmo nehiya vekamo lapakaemo alagi oʼageʼnae. 29Agaemo alino nateʼnigeʼna agaetegatiʼmo emiʼneʼnovaʼmofeʼmo ageʼnove, huno hapa paiʼnigeʼapaeʼmo 30#Yo 7:44; 8:20; 13:1atafauʼa kalavusi huʼa atesayafeʼmo huʼnayaʼmonanafa agae afinaʼmo afole oʼaiʼniyaʼmofeʼmo mago vekamoʼa atafausiya kaʼmo ohaneʼniye. 31#Yo 2:23; 8:30; 10:42; 11:45; 12:11,42Asole ve aʼnemogimo agaefeʼmo apakesamo afiʼa fatago huteʼapaeʼmo, Mesaiya vekamo enoʼaeʼmo magoʼe huno noʼagona agufa aune kavaʼmo huteno ani vekamo aeno agasegaifiye, huʼa huʼnae.
Ati vayaʼmogimo kalavusi huʼa atesayafeʼmo huʼnaya gemae
32Ani agufa gemo huteʼa sumi huʼa nehageʼapaeʼmo Falasi mono vayaʼmogimo afiʼnae. Afiteʼapaeʼmo apakaeʼe mono huʼa neʼapataya vayaʼaiteʼmo yagaiʼa neʼapataya vayaʼmogiʼeʼmo ati vayaʼmogi kalavusi huʼa atesayafeʼmo aliʼa apateʼnageʼa uʼnae.
33 #
Yo 13:33
Yesuʼa hunoʼaeʼmo, nagaemo lapakaeʼeʼmo aise afinaʼmo maiteʼna alino nateʼnigeʼna emineʼnova vekalegamo halate uʼna haiguve. 34#Yo 8:21; 13:36; 17:24Nagesayafeʼmo kahauya hugayaʼmonanafa oʼnagegae. Uʼna haiʼna maisuva koteʼmo afaʼa utapa ohaigae, huno hapa paiʼnigeʼapaeʼmo 35Yu vayaʼmogi apakaiʼapimo huʼapaeʼmo, haiya kotegamo visiyafe hunoʼaeʼmo kahauya hutapa oʼnagegae, huno nehiye. Agaemo vayatimo atagu faeʼa uʼa Galiki nofi vayaʼeʼmo lokaeʼa maiʼnaya kotegamo uno alino apaya malesiyafeʼmo nehifiye. 36Agaemo hunoʼaeʼmo, kahauya hutapa nagesayafeʼmo hugayaʼmonanafa kahauya hutapa oʼnagegae. Uʼna haiʼna maisuva kotegamo afaʼa uta ohaigae, huno huʼniya gemo aepaʼamo na agufa gemo huʼniye, huʼa huteʼa ge huge afige huʼa maiʼnae.
Afaʼa maisaya yaʼmo alino neʼapamiya anifeʼmo huʼniya gemae
37 #
Mon 23:36; Aiy 55:1; Yo 4:10,14 Hopa afinaʼmo hano hugefeʼmo huʼniya afinaʼmo henagaʼamo alopa afinaʼmo afole aiʼnigenoʼaeʼmo Yesuʼa he tino alopa gefatiʼmo hapa painoʼaeʼmo, mago vekamoʼa anifeʼmo hauʼnisiyana eno nagaetegatiʼmo aniʼmo neno. 38#Aiy 58:11; Sak 14:8Nagaefeʼmo apakesamo afiʼa fatago nehaya vayaʼai apaipafatiʼmo alopa aniʼmo afaʼa maisaya yaʼmo alino neʼapamiya aniʼmo havai teteno aino vali lamigiye, huno aeno hakalo huno hapa paiʼniye. 39#Yo 16:7; 20:22; Ap 2:4Yesuʼa Goti Aunemeʼamo agaefeʼmo apakesamo afiʼa fatago nehaya vayaʼmogi alisaya Aunemeʼaeʼmo ava gemo huno hapa paiʼniye. Ani afinaʼmo Yesuʼa he tino kokuʼnapiʼmo uno haino ha le konali yaʼamo oʼaliʼniyaʼmofeʼmo Goti Aunemeʼamo emi noʼmeʼniya afinaʼmae. 40#Yo 6:14Asole vayaʼmogi ani gemo afiteʼapaeʼmo, lama ge nehune, huʼa, Gotitegati gemo alinineno aeno hakalo huno hapa nepaiya vekamo egaiye, huʼa huʼnaya vekamo ani vekamo maiʼniye, huʼa huʼnae. 41#Yo 1:46; 4:29Mago vayaʼamogi huʼapaeʼmo, Mesaiya vekamo maiʼniye, huʼa huʼnageʼapaeʼmo mago vayaʼamogi huʼapaeʼmo, haʼao, Mesaiya vekamo Galeliya kotegatiʼmo oʼmegaiye. 42#Sam 89:3-4; Mka 5:2; Mt 2:5-6Goti mukufiʼmo avoʼmo kae maleʼniya gemoʼmo hunoʼaeʼmo, Mesaiya vekamo yagaino neʼapateya kini vekamo Nevini vayapati vekamo maiʼneno Metelehamu taonifiʼmo Neviniʼa maiʼniya taonifatikeʼmo afole aigiye, huno huʼniye, huʼa huʼnae. 43#Yo 9:16Ani gemo huteʼa aliʼa fako huʼa apaote apaote huʼa maiʼnae. 44#Yo 7:30Mago vayaʼmogi huʼapaeʼmo, atafaugune, huʼa huʼnayaʼmonanafa magoke vekamoʼa oʼatafauʼniye.
Yu vayaʼai monoteʼmo yagaiʼa neʼapataya vayaʼmogi apakesa afiʼa fatago osuʼnaya gemae
45 #
Yo 7:32
Ati vayaʼmo halate atagi neʼa eʼnageʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼe Falasi mono vayaʼmogiʼeʼmo, na kava higetapaeʼmo avalelitapa oʼmeʼnae, huʼa ge huʼa apafi geʼnageʼapaeʼmo, 46#Mk 1:22ani vekamoʼa aeto agufa gemo huʼniya agufa gemo muki vayaʼmogimo nosae, huʼa hapa paiʼnageʼapaeʼmo 47Falasi vayaʼmogi huʼapaeʼmo, lapakaeʼeʼmo lapakesamo faiʼnifiye. 48#Yo 12:42Monoteʼmo yagaiʼa neʼapataya vayapati vayaʼmogimofi Falasi mono vayapati vayaʼmogimofi huʼa geʼamo neʼafigetapa apakeʼnafiye. 49Lagaemo geʼamo noʼafunaʼmonanafa afa vayaʼmo keʼaepa gemo aepaʼamo oʼafiʼnaya vayaʼmo lifana huno apateʼniya vayane, huʼa huʼnae. 50#Yo 3:1-2Mago Falasi vekamo apakaeʼeʼmo magokepi lokaeno maiʼniya vekamoʼa hogoteno Yesutegamo uʼniya vekamo Nikonimasiʼa hunoʼaeʼmo, 51#Loa 1:16Lagaemo keʼaepa getimo akame hisunafeʼmo fiku agoti huta atetetaeʼmo, hosu kavaʼmo huʼniye, huta osisuna agufa kavaʼmo haneʼniye. Hogoteta avayafatiʼmo hisiya gemo afiteta nehiya kavaʼmo ageteta alita fako hisuna agufa kavaʼmo haneʼniye, huno hapa paiʼnigeʼapaeʼmo 52#Yo 7:41-42Kagaemo Galeliya kotega vekamo maiʼnapiye. Magoke vekamo Gotitegati gemo alinineno aeno hakalo huno hapa nepaiya vekamoʼa Galeliya kotegatiʼmo afole oʼaiʼniye. Kagaemo kahauya huka ageka lekana paika afiyo, huʼa ha paiteʼa 53ataleʼa noʼapilegamo uʼeʼa huʼnae.
Voafantina amin'izao fotoana izao:
Yoni 7: kyg2013
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2013, Wycliffe Bible Translators, Inc. All rights reserved.
