Yoni 18
18
Yesuʼmo atafauʼa kalavusi huʼa ateʼnaya gemae
(Mt 26:47-56; Mk 14:43-50; Lu 22:47-53)
1 #
Mt 26:36
Nunumuʼmo ago hutegeʼapaeʼmo Yesuʼe geʼamo neʼafiya vayaʼeʼmo nopatiʼmo ataleʼa lamiʼa mago ani kalokalopamo agiʼamo Kitaloni kalokalopamo lakaeʼa yosa hoyafiʼmo uʼa maiʼnae. 2#Lu 21:37Apakaemo muki afinaʼmo uʼa ani haopalega aliʼa anupa huʼa maiteʼa eteʼa huʼnayaʼmofeʼmo Yutasiʼa kutulu yaʼmo aliʼniya vekamoʼmo ago ageʼniye. 3#Yo 7:45Yosa hoyafiʼmo maiʼnageʼapaeʼmo mono huʼa neʼapataya vayaʼaiteʼmo yagaiʼa neʼapataya vayanagi Falasi vayanagi gamani ati vayanagi alopa mono noteʼmo neʼyagaiya ati vayanagi huʼa aliʼa apateʼnageʼa uʼnae. Ata kani aeʼa alige lamufi kani aeʼa alige kayoʼmo alige naipemo alige hutageno Yutasiʼa apavalelino eʼniye. 4Eʼa avaʼyi huʼnagenoʼaeʼmo Yesuʼa agaiʼa agufaleʼmo afole aisiya kavaʼmo ago ageʼniyaʼmofeʼmo apakaetegamo uno hapa painoʼaeʼmo, Lapakaemo ina laʼmo agesayafeʼmo kahauya hulita neʼae, huno ge huno apafi geʼnigeʼapaeʼmo, 5Yesuʼa Nasalasa taonifi vekamo agesunafeʼmo neʼone, huʼa ha paiʼnagenoʼaeʼmo, ani vekamo nagaemo maiʼnove, huno hapa paiʼniye. Yutasiʼa kutulu yaʼmo aliʼniya vekaʼeʼmo magokepi he tiʼa maiʼnae. 6Yesuʼa hunoʼaeʼmo, ani vekamo nagaemo maiʼnove, huno hapa nepaigeʼapaeʼmo apakamelegatiʼmo apaune heʼa uʼa mopafiʼmo asagauʼa aiʼnae. 7Halate Yesuʼa hunoʼaeʼmo, ina laʼmo agesayafeʼmo kahauya hulitapa neʼae, huno apafi geʼnigeʼapaeʼmo, Yesuʼa Nasalasa taonifi vekamo agesunafeʼmo neʼone, huʼa ha paiʼnagenoʼaeʼmo, 8Nagaemo, ani vekamo maiʼnove, huʼna ago lapa paiʼnove. Lapakaemo nagaemo nagesayafeʼmo eʼnayaʼmofeʼmo mani vayaʼmo afaʼa apatalegeʼa viyo, huno hapa paiʼniye. 9#Yo 17:12Yesuʼa hogoteno nunumuʼmo hunoʼaeʼmo, apavaleka namiʼnana vayapatiʼmo magoke vekamo ataleʼnogeno uno afela oseʼnifa mukiʼamo afaʼa maiʼnae, huno huʼniya gemo afole aisiyafeʼmo ani gemo huʼniye. 10#Lu 22:38Saimoni Pitaʼa naipeʼamo asagino hogote vekamo mono huʼa neʼapataya vayaʼaiteʼmo yagaino neʼapateya vekamo aliʼyaʼamo neʼaliya vekamo lamaga haopale agesamo heno lafe huno ataleʼniye. Ani vekamo agiʼamo Malakasiʼae. 11#Mt 26:39Yesuʼa Pitafeʼmo hunoʼaeʼmo, naipekamo halate anoʼafiʼmo faika falu kao. Afoʼnimoʼmo namiʼniya kapufi aniʼmo oʼnesufiye, huno ha paiʼniye.
Yesuʼa avaleliʼa Anasitegamo uʼnaya gemae
12Inagi gamani ati vayanagi apakaeteʼmo yagaino neʼapateya vekagi alopa mono noteʼmo neʼyagaiya ati vayanagi huʼa Yesuʼmo atafauʼa ayatalateʼmo nofi kiʼa ateʼnae. 13Hogoteʼa Anasi notegamo avaleliʼa uʼnae. Ani kafugamo hogote vekamo mono huʼa neʼapataya vayaʼaiteʼmo yagaino neʼapateya vekamo agiʼamo Kaiyafasiʼae. Kaiyafasi ayemoʼamoʼmo Anasiʼae. 14#Yo 11:49-51Hogoteno Kaiyafasiʼa Yu vayaʼmogimo hisaya kavafeʼmo, magoke vekamoʼa muki vayaʼmogitalefeʼmo falino latesigeta hano osuta afaʼa maisunana kanale hugiye, huno hapa paiʼniye.
Pitaʼa Yesufeʼmo oʼageʼnova vekae, huno huʼniya gemae
(Mt 26:69-70; Mk 14:66-68; Lu 22:55-57)
15 #
Yo 20:3; 21:20; Ap 3:1; Mt 26:58 Yesuʼa avaleliʼa uʼnageʼanaeʼmo Saimoni Pitaʼe mago vekamo geʼamo neʼafiya vekaʼeʼmo apakame huʼana uʼana noteʼmo avaʼyi huʼnaʼae. 16Pitaʼa kegiʼya malaga hiʼyanaleʼmo maiʼnigeno alu vekamo hogote vekamo mono huʼa neʼapataya vayaʼaiteʼmo yagaino neʼapateya vekamoʼa alu vekamo ageʼniyaʼmofeʼmo ani vekamo Yesuʼeʼmo kegiʼya yuʼilagamo uʼana haiʼnaʼae. Ani vekamoʼa halate lamino hiʼyanale neʼyagaiya aʼmafaʼneʼeʼmo ha paiteno Pitaʼa avalelino uno haiʼniye. 17Ani aʼmafaʼnemoʼa Pitafeʼmo hunoʼaeʼmo, kagaemo ani vekamo geʼamo neʼafina vekamo maiʼnapiye, huno afi geʼnigenoʼaeʼmo Pitaʼa, haʼao, huno ha paiʼniye. 18Yasimo hapauʼnigeʼapaeʼmo aliʼyaʼmo neʼaliya vayaʼe alopa mono noteʼmo neʼyagaiya ati vayaʼeʼmo hokanufa atamo kaeteʼa he tiʼa loto huʼa maiʼnae. Pitaʼeʼmo uno magokepi he tiʼa ataleʼmo loto huʼa maiʼnae.
Hogote vekamoʼmo Yesufeʼmo ge huno afi geʼniya gemae
(Mt 26:59-66; Mk 14:55-64; Lu 22:66-71)
19Kumatega maiʼnageno hogote vekamoʼmo Yesufeʼmo ge huno afinoʼaeʼmo, gekamo neʼafiya vayaʼmo haiya agufa vayaʼmo maiʼnae, huno ge huno afi ge, na agufa gemo alika apaya neʼmalane, huno ge huno afi ge huʼnigenoʼaeʼmo 20#Mt 26:55; Yo 7:26muki afinaʼmo vaya apaulagaleʼmo maiʼneʼnaeʼmo aeʼna hakalo huʼna hapa paiʼnove. Nagaemo aliʼa anupa huʼa maiʼnayategamo uʼna alopa mono nopinagi muki asole mono nopinagi huʼna aliʼna apaya maleʼnove. Mago gemo fala okiʼna muki geʼamo huʼna afole aiʼna hapa paiʼnove. 21Na kava higekaeʼmo ge huka nafi nekane. Geʼnimo aliʼna apaya maleʼnova vayaʼmogimo ani gemo ago afiʼnayanagi ge huka apafi go, huno ha paiʼnigeno 22#Ap 23:2mago ati vekamoʼa ayaʼmo alino ataleliʼneno amagitenoʼaeʼmo, hogote vekaeʼmo ani agufa gemo nehapiye, huno huʼniye. Yesuʼa geʼaleʼmo aeno atagaina huno ha painoʼaeʼmo, hosu gemo huʼnisuvana ani hosu geʼnimo aeka hakalo huvo. 23Alagepa gemo huʼnisuvana na kava higekaeʼmo neʼnamagine, huno ha paiʼniye. 24Inagi Yesu ayateʼmo nofi kiʼa ateʼnagenoʼaekeʼmo hogote vekamo Anasiʼa Kaiyafasitegamo alino ateʼnigeno uʼniye.
Pitaʼa halate hunoʼaeʼmo, oʼageʼnova vekae, huno huʼniya gemae
(Mt 26:71-75; Mk 14:69-72; Lu 22:58-62)
25Yesufeʼmo ge huno afi geʼnigenoʼaeʼmo Pitaʼa ataleʼmo he tino loto huno maiʼniye. Apakaemo huʼapaeʼmo, kagaeʼeʼmo geʼamo neʼafiya vayapati vekamo maiʼnapiye, huʼa afi geʼnagenoʼaeʼmo, haʼao, nagaemo ani vayapati vekamo oʼmaiʼnove, huno hapa paiʼniye. 26#Yo 18:10Mago vekamo hogote vekamo aliʼyaʼamo neʼaliya vekamo agesamo Pitaʼa heno lafe huʼniya vayapati vekamoʼmo Pitafeʼmo hunoʼaeʼmo, agaeʼeʼmo yosa hoyafiʼmo maiʼnanageʼna kageʼnofiye, huno afi geʼnigenoʼaeʼmo 27#Yo 13:38halate, haʼao, huno ha nepaigenoʼaeʼmo kokolemoʼmo age aiʼniye.
Yesuʼmo avaleliʼa Pailatitegamo uʼnaya gemae
(Mt 27:1-2,11-14; Mk 15:1-5; Lu 23:1-5)
28Saufamo kotilamiyapiʼmo Kaiyafasi notegatiʼmo Yesuʼmo avaleliʼa ala gamani vekamo notegamo uʼnayaʼmonanafa hopa afinaʼmo Pasova neʼyaʼmo nesayafeʼmo apakesa afiteʼapaeʼmo, fiku yanageno lagufamo alino hosu huno lategaiye. Yu nofi vekamo oʼmaiʼniyaʼmofeʼmo noʼafiʼmo uta ohaigune, huʼa huteʼa agotimo nehaya nopiʼmo uʼa ohaiʼnae. 29Inagi Pailatiʼa kumatega uno lamino, ani vekamo na agufa kavatetifeʼmo agoti hutapa atesayafeʼmo nehae, huno apafi geʼnigeʼapaeʼmo, 30hosu kavaʼmo osuʼniyesinana kagaetegamo afaʼa avalelita oʼmeʼnonesine, huʼa ha paiʼnagenoʼaeʼmo, 31#Yo 19:6-7; Ap 18:15Pailatiʼa hunoʼaeʼmo, kanalenagi avalelitutapa keʼaepa getapiletiʼmo agoti hutapa ateyo, huno hapa paiʼnigeʼapaeʼmo, gamani vayaʼmogitapamo, agoti hutapa apatetetapaeʼmo kamiti oʼapamagiyo, hutapa laha paiʼnae. Lagae agotilegageʼmo apavalelitapa eyo, hutapa ago laha paiʼnae, huʼa ha paiʼnae. 32#Mt 20:19; Yo 3:14; 12:33Yesuʼa hogoteno hunoʼaeʼmo, ani agufa kavaʼmo huʼna faliguve, huno huʼniya gemo afole aisiyafeʼmo ani agufa kavaʼmo afole aiʼniye. 33Pailatiʼa halate agoti nopiʼmo uno haino Yesufeʼmo hunoʼaeʼmo, Yu vayaʼaiteʼmo alaʼapimo yagaika neʼapatana kini vekamo maiʼnapiye, huno afi geʼnigenoʼaeʼmo, 34Kagaikamo kagesa afika ani gemo nehapi Yu vayaʼmogimo nava gemo huʼa kaha paiʼnagekaeʼmo nehane, huno afi geʼnigeno 35#Yo 1:11Pailatiʼa hunoʼaeʼmo, Yu nofi vekamo maiʼnofiye. Haʼao, Yu vekamo oʼmaiʼnove. Kagae nofi vayaʼmogiʼe mono huʼa neʼapataya vayaʼaiteʼmo yagaiʼa neʼapataya vayaʼmogiʼeʼmo kalavusi huʼa kateteʼa kavaleliʼa eʼnagi kagaemo na agufa kavaʼmo huʼnane, huno afi geʼnigeno 36Yesuʼa hunoʼaeʼmo, Ma mopafi vayaʼmogi ala vayaʼapimo maiʼneʼa yagaiʼa neʼapataya kava huʼna yagaiʼna noʼapatove. Ani agufa kavaʼmo huʼna yagaiʼna neʼapatovesinana aliʼyaʼnimo neʼaliya vayaʼmogimo navaleli eʼa Yu vayaʼmo oʼapamisayafeʼmo kamemo huʼnaesinaʼmonanafa ma mopafi vayaʼmogi ala vayaʼapimo yagaiʼa neʼapataya agufa kavaʼmo huʼna yagaiʼna oʼapateʼnove, huno ha paiʼnigeno 37#1 Ti 6:13; Yo 8:47Pailatiʼa hunoʼaeʼmo, ani gemo huʼnanaʼmofeʼmo ala vekaʼapimo yagaika neʼapatana kini vekamo maiʼnapiye, huno afi geʼnigenoʼaeʼmo, he, ani gemo alagi lama gemo nehane. Itaʼnimoʼmo alino nateʼnigeʼnaeʼmo magoke kavaʼmo huʼna lama geleʼmo ha maesuvafeʼmo ma mopafiʼmo afole aiʼnove. Muki vayaʼmo lama gemo ao vayaʼmogi geʼnimo neʼafiye, huno ha paiʼnigeno 38Pailatiʼa hunoʼaeʼmo, ani lama gemo na agufa geeʼmo huʼnane, huno afi genoʼaeʼmo Pailatiʼa halate kumatega uno lamino Yu vayaʼaifeʼmo, amagisuva kavaʼmo aepaʼamo oʼageʼnove. 39Oʼageʼnovaʼmonanafa lapakaemo amuse hisayafeʼmo nagaemo Pasova afinaʼmo kafugaʼae kafugaʼaeʼmo kalavusi huʼnaya vayapatiʼmo magoke vekamo hatu maeʼna ateʼnogeno ute ute nehae. Nehuvaʼmofeʼmo nagaemo alatapimo yagaino nelapateya kini vekamo afaʼa atesugeno lapakaetegamo visifiye, huno apafi geʼnigeʼapaeʼmo 40alopa gefatiʼmo huʼapaeʼmo, agaemo alagi ategeno oʼvisigeka Malamasikeʼmo ategeno vino, huʼa ha paiʼnae. Malamasiʼa vayaʼmo apamagiteno kumaya neʼaliya vekamo maiʼniye.
Voafantina amin'izao fotoana izao:
Yoni 18: kyg2013
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2013, Wycliffe Bible Translators, Inc. All rights reserved.
