Aepa Gemae 2
2
1 #
Sam 33:6
Gotiʼa ina kavaʼmo huno kokuʼnanagi mopagi muki haneʼniya yanagi huno alo huno hano huʼniye. 2#Hat 20:9-11; Hi 4:4Gotiʼa napa seveni afinaʼmo ageyana muki aliʼyaʼamo alagi hano higeno agetenoʼaeʼmo maino haga leʼniye. 3#Aiy 58:13Gotiʼa muki yaʼamo alo huno hano huteno ani afinaʼmo maino haga leʼniyaʼmofeʼmo seveni afinaʼmo alino auleno ateteno alino aote maleʼniye. 4Ala kava neʼmo Gotiʼa ina kava huno kokuʼnanagi mopagi muki yanagi huno afa yatetiʼmo alo huʼniye.
Gotiʼa Atamuʼe Iviʼeʼmo alo huʼniya gemae
Gotiʼa mopaʼe kokuʼnaʼeʼmo alo huʼniya afinaʼmo 5yosagi kahaugi neʼyanagi huno ohaneʼniye. Hogoteno koʼmo ma mopafiʼmo alino ategeno ailino eminoʼmeʼniyaʼmofeʼmae. Mago hoyamo alino vaisiya vekamo oʼmaiʼniye. 6Koʼmo oʼaiʼniyaʼmonanafa ma mopafiʼmo muki haopalegamo aniʼmoʼa hiyakana huno mopafatiʼmo afole aiteno uno haiʼnigeno mopamoʼmo lanitani huʼniye. 7#Aep 3:19,23; Yop 33:4; 1 Ko 15:45Ala kava neʼmo Gotiʼa mopamo aliteno ve kanomo alo huʼniye. Agaemo agoʼya katalapiʼmo avamusamo aino fu huʼnigeno afaʼa maisiya vekamo ha maleʼniye.
8 #
Aiy 51:3; Aep 3:23-24; 4:16 Ala kava neʼmo Gotiʼa Ineni kotega yegemo haine neʼeya haopalegamo mago hoyamo vai maleteno ani hoyafiʼmo alo huʼniya vekamo ateʼniye. 9#Aep 3:22; Le 2:7; 22:2,14Gotiʼa alu yosa alu yosamo ageʼa hapaʼye huteʼa alagepa hisigeʼa nesaya yosa alagamo aesiya yosamo mopafatiʼmo alino afole aino ateʼniye. Hoya folagapiʼmo mago haneʼniya yosamoʼmo afaʼa maisaya yaʼmo apamisiya yosamo haneʼniye. Inagi mago yosaʼeʼmo haneʼniyana alagepa kavaʼe hosu kavaʼeʼmo alino apave lisigeʼa afiteʼa agesaya yosamo haneʼniye.
10Inagi ani hoyafiʼmo aniʼmo amisiyafeʼmo Ineni kotegatiʼmo mago aniʼmo uno lamino ani hoyafiʼmo uneno huʼniye. Ani anipatiʼmo alino fako huno loleʼe loleʼe aniʼmo haneʼniye. 11-12Napa vani aniʼmo agiʼamo Pisoni aniʼmoʼa Havila koʼmo aino vego huno uno lamiʼniye. Havila koteʼmo kanale goli yafaʼmo hanege mago yosamo anuʼamoʼmo kanale atumo neʼaiya yosamo hanege mago aeto agufa yafaʼmo miyaʼamoʼmo magoʼe huno uno haiʼniya yafaʼmo agiʼamo kaniliyani yafaʼmo hanege huʼniye. 13Napa tu aniʼmo agiʼamo Gihoni aniʼmoʼa Kusi koʼmo aino vego huno uno lamiʼniye. 14Napa tali aniʼmo agiʼamo Taigilisi aniʼmoʼa yegemo haine neʼeya kotega Asiliya haopalegamo uʼniye. Napa fo aniʼmo agiʼamo Yufiletisi anine.
15Inagi Ala kava neʼmo Gotiʼa ani alo huʼniya vekamoʼmo yagaisiyafeʼmo Ineni kotega haneʼniya hoyaleʼmo avaleno ateʼniye. 16Gotiʼa ha painoʼaeʼmo, kagaemo muki mani hoyafiʼmo haneʼniya yosa alagaʼamo afaʼa negane. 17#Aep 3:1,3,11,17; 3:3,19; Lo 6:23Neganaʼmonanafa alagepa kavaʼe hosu kavaʼeʼmo alino apave lisigeʼa afiteʼa agesaya yosa alagamo ma haneʼniyanagi oʼno. Nesana afinaʼmo ago alagi faligane, huno ha paiʼniye.
18 #
1 Ko 11:8-9
Inagi Ala kava neʼmo Gotiʼa hunoʼaeʼmo, mani vekamo agaiʼageʼmo maisiyana kanale osugiye. Nagaemo ha maesiyafeʼmo mago afaluʼamoʼmo alo huguve. 19-20#Aep 1:20,24; Sam 8:6Huno huteno Gotiʼa mopamo aliteno yagagafagi muki alu afu alu afugi namagi huno alo huʼniye. Gotiʼa ani vekamoʼmo apakiʼapimo apatesiyafeʼmo muki yaʼamo apavalelino eʼniye. Inagi ani vekamoʼmo muki yaʼaeʼmo magoke magoke huno apaki apateteno nama anagaʼeʼmo apaki apateʼniye. Agaemo muki yuna yafeʼmo apaki apatege muki afela yafeʼmo apaki apatege muki nama anagafeʼmo apakimo apatege huʼniye. Ani vekamoʼmo haiya agufa apakimo apateʼnifi ani apakiʼapigeʼmo alagi haneʼniye. Haneʼniyaʼmonanafa ani yaʼafatiʼmo Atamuʼeʼmo mago afaluʼamo yaʼmo huno maiʼneno ha maesiya vekamo oʼmaiʼniye. 21#1 Sam 26:12Inagi Ala kava neʼmo Gotiʼa ve kanomo havaesiyafeʼmo alino havaeno ateʼnigeno alagi au kaleno alagi huʼniye. Au kaleʼnigenoʼaeʼmo Gotiʼa ve kanomo haipa ayamufamo aliteno ani kateʼmo maleno akanino ateʼniye. 22#1 Ko 11:8-9,12Inagi Ala kava neʼmo Gotiʼa ani ayamufaletiʼmo a kanomo alo huteno ve kanolegamo avalelino eʼniye. 23#Aep 29:14; Ef 5:28-30Ve kanomoʼmo a kanomo agetenoʼaeʼmo ina ge huno huʼniye. Ayamufaʼamo nagae nayamufamo hanege ameʼamo nagae nameʼmo hanege huʼniye. Gotiʼa ve kanofatiʼmo a kanomo alo huno ateʼniyaʼmofeʼmo apakaemo, ane, huʼa apaki aegae, huno huʼniye. 24#Mt 19:5Huʼniyaʼmofeʼmo ani kavaʼmo afole aisiyafeʼmo ve kanomoʼmo itaʼafoʼalaʼmoganimo anataleno uno aʼaʼeʼmo aliʼana lokaesaʼagenoʼaeʼmo magoke anakufamo hamalegaiye. 25#Aep 3:7Ve kanoʼe a kanoʼeʼmo anakufalagaʼageʼmo maiʼnaʼaʼmonanafa anavagagemo osuʼniye.
Voafantina amin'izao fotoana izao:
Aepa Gemae 2: kyg2013
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2013, Wycliffe Bible Translators, Inc. All rights reserved.