Madiu 22
22
Gwae hegehegedi hai 'e'ahaina weyahina
(Luke 14:15-24)
1Caigeda wete gwae hegehegedi Yesu 'i'ebwaediya, 'igwae, 2“Yehoba 'ina loina gide kini 'aigeda 'ai 'ipaihoweya natuna meloheyana 'ina hai weyahina. 3Coinega 'ina topaihowao 'ihesumanediya ma taiyawedi taudi 'ihenuwa laguwediya sitoedima 'ai 'oina, ta sitauya sabi toedima, ma hesi tomotaiyedi kini 'ina bwau silogwahateya.
4“Coinega tupwana wete 'ina topaihowao 'ihesumanediya ma taudi 'ihenuwa laguwediya sihegwaediya wete 'abehega, ‘Bada 'ina 'ai 'igibubu pwaiya. Cina bulumakau madoudi ma 'ina bulumakau yauyaubodi 'ihunu pwaidiya ma 'e'ahai mabwaiyana 'i'atububuya. Wanaoma ma tatauya natunaina 'ina hai 'e'ahaina wa'ai.’
5“Ta taudi geya sinaoma, ma hesi sipili 'waiha, ta hali tupwa ma hali tupwa 'oidiya sitauya. Caigeda loheya 'ina tanoha 'itauya, 'aigeda loheya 'ina paihowa 'oina 'itauya, 6ma tupwadi wete bada 'ina topaihowao si'abiyahidiya, ma si'abihe mwadinediya, ta silohe'amasidiya.
7“Coinega kiniina 'igamwasowala moisa, ta 'ina tolo'alehao 'ihesumanediya, ta tolohe'amasaedi simutudiya, ma 'idi 'asa sigabuya.
8“Ma kiniina 'ina topaihowao 'oidiya 'igwaeya, ‘Hai 'e'ahaina 'atu'atububuina, ma hesi taudi yahenuwa laguwediya geya sawasawahina ma sinaoma. 9Coinega 'eda 'oidiya wasakowasi ma 'eguma taiyawedi walobediya watoedima ma hai 'e'ahaina si'ai.’
10“Coinega silatuwa 'edai ma tomota baibaiwadi sihe'autedima, tupwadi togala ma tupwadi tobwebwe'adi, ma 'oinega hai 'ana hadaina silohemaheya.
11“Tutaina kini 'inaoma taumanao sabi 'itadi, ta loheya 'aigeda 'i'ita lobeya, tauna geya hai 'ana 'ale'o 'i'ote, 12'oinega 'ihesilaleya, 'igwaeya, ‘Ciyagu, togidega hai 'ale'oina geya 'u'ote, ma to'ehega 'uluhuma?’ Ma loheyaina geya sawasawahina ma hesilala bewa 'ihemaise. 13Coinega kiniina 'ina topaihowao 'ihegwaediya, ‘Loheya bewa wa'abiyahi, ma nimana ma 'aena wapaidi, ma waula latuwe tupwa guguyou 'oina, ma nage 'oina tomota sidou ma sihesala'i'ita muya 'oinega.’
14“Weyahina tomota mabwaiyadi Yehoba 'ina henuwalagu silobeya, ma hisahisadimo 'ihesinuwediya.”
Takesi kini Sisa weyahina
(Maki 12:13-17; Luke 20:20-26)
15Ma Palisiyao siboidimo si'eto'autama, ta siloina togidega ma hesilalega si'abowe, ma Yesu 'ina pui siloba.
16Coinega loina silobeya, ma 'adi tomuliyao ma Helodi 'ina bodao ba'idadiyao sihesumanediya Yesu 'oina, ta sigwae, “Bada 'asanapu pwaigowa 'abehega 'owa tohe'ita moisa, ta Yehoba 'ina nuwatuhu 'uhe'itae moisa, ma wete tomota 'idi waiwai weyahina geya 'umatauta, ma tuwa gwae moisa 'uhehepwaile mahemahetena tomota mabwaiyadi 'oidiya. 17Coinega bewa tuwa 'uhegwaemai, togidega sawasawahina ma kini Sisa weyahina takesi talagu, bo geya?”
18Ma Yesu 'idi nuwatuhu galana 'isanapuya, 'oinega 'igwae, “Comi to'abo! To'aha weyahina watohotohogau? 19Ma hana maneina takesi weyahina wahe'itegau.” Coinega mane 'aigeda si'ebwaeya, 20ta Yesu 'ihegwaediya, 'igwae, “Wahegwaegau, mane bewa 'oina taiya ma'ama'ayauna ma sanina?”
21Ma sigwaeya, “Kini Sisa.”
Coinega Yesu 'ihegwaediya, “Cehe, gide. Coinega 'eguma kini 'ina ginaula wa'ebwae kini 'oina, ma 'eguma Yehoba 'ina ginaula Yehoba 'oina wa'ebwae.”
22Yesu 'ina gwae sanasanapuna hedade sihesagoheya, ta geya 'idi 'ebe gwaemo, 'oinega si'ebesineya ma sihawasiya.
To'amasa 'idi toholo hila
(Maki 12:18-27; Luke 20:27-40)
23Nage sabweloina 'oina tupwana Sadusiyao, taudi geya sihemisa to'amasa 'idi toholo hila weyahina, sinaoma ta Yesu 'oina sihesilala, 24sigwaeya, “Bada, Mosese 'ina loina 'igwaeya, ‘Ceguma loheya mamwanena ma geya natudimo ma loheyaina 'i'amasa, loheyaina tasina hiwapeina ba'idana sihai, ma 'oinega 'eguma wahine 'ihenatuna natunao to'amasaina hesuwahenao.’
25“Caigeda loheya matasinao sikisi ba'idamao 'amiyamiya, ta loheyaina 'ihaiya ma 'i'amasa, ma geya natunamo, ma to'amasaina tasina deinega hiwapeina ba'idana sihaiya, 26ma tasinaina wete 'i'amasa, ma tauna wete geya natunamo. Ma gide tuwa tasinao mabwaiyadi hiwapeina sihaihai, 27ma mulidiyega wahine wete 'i'amasa. 28Coinega toholo hila 'ana sauga wahineina to loheya nata mwanena moisa? Weyahina mabwaiyadi sihai pwaiya.”
29Ma Yesu hesilala bewa 'ihemaiseya, 'igwae, “Bewa 'imi pui, weyahina Buki He'asisi geya wasanapu, ma wete Yehoba 'ina waiwai geya wasanapu.
30“Toholo hila 'ana sauga tomota sahena sihaihai ma hesi 'idi miya gide aneloseyao galewa. 31Ma Yehoba 'ina gwae 'oimiya toholo hila weyahina Buki He'asisi 'oina 'igwaeya,
32‘Taugu Ebalahamo 'ina Yehoba, ma Aisake 'ina Yehoba, ma Yakobo 'ina Yehoba.’
Yehoba geya tomota 'ama'amasidi 'idi Yehoba, ma hesi tomota mayawasidi 'idi Yehoba, 'oinega babadaedi mayawasidi bewa tuwa simiyamiya.”
33Yesu 'ina gwae bewa boda sihesagoheya ma'idi yaliyaya 'ina he'ita waiwaina weyahina.
Loina madouna
(Maki 12:28-34; Luke 10:25-28)
34Eeta Palisiyao sihesagoha pwaiya 'abehega Yesu Sadusiyao 'idi hesilala 'ihemaiseya ta geya 'aigeda wete 'idi 'ebe gwaemo, 'oinega Palisiyaowedi Yesu 'oina sinaoma, 35ta 'oidiyega 'aigeda loina 'ana tosanapu Yesu 'oina 'ihesilala sabi tohoina, 'igwae, 36“Tohe'ita, loina mabwaiyana 'oidiyega to loina madouna?”
37Ma Yesu 'igwaeya, “‘Cino Bada Yehoba 'uhelauwe 'ateu ma yaluyaluwau ma 'ino nuwatuhu mabwaiyadi 'oidiyega.’ 38Bewa loina nugenugetana ma madouna. 39Ma 'aigeda wete loina madouna gide bewa 'igwaeya, ‘Ciyamwao 'uhelauwedi, gide 'uboi 'uhelau hilego.’
40“Loina 'eluwaedi, loina mabwaiyana ma palopitao 'idi gwae mabwaiyadi huhudi.”
To'abihetena tauna Debida 'ina susu
(Maki 12:35-37; Luke 20:41-44)
41Tutaina Palisiyao si'eto'autama ta Yesu 'ihegwaediya, 42'igwae, “Togidega To'abihetenaina Keliso, taiya 'ina susuwega 'ilatuma?” Ma sigwaeya, “Debida.”
43Coinega Yesu 'igwaeya, “Togidega ta 'oinega mwalo Yaluyaluwa Tabuna Debida 'i'abihe sanapuya ma Debida To'abihetenaina 'i'ahwa badaeya, 'igwae,
44‘Yehoba 'ina gwae 'igu bada 'oina, 'igwaeya: Cigu 'ebeulega 'umiyatoi ma 'ana siga 'a 'alehao yalagu dobihedi 'aheu gabulena.’
45“Ceguma Debida 'ina bada To'abihetenaina, togidega hede ta Debida 'ina susuwega muliyetega To'abihetena 'ilatuma?”
46Yesu 'ina hesilala bewa geya 'aigeda wete taiya sawasawahina ma 'ihemaise, ta tuta muliyetega Yesu simatauteya, 'oinega geya 'aigeda taiya 'itoho ma 'ihesilala hila Yesu 'oina.
Voafantina amin'izao fotoana izao:
Madiu 22: bddNT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 1991, Wycliffe Bible Translators, Inc. All rights reserved.
