If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

መና ጎዳይ ሄዋፐ ጉየ ኖሀ ሀዋዳን ያጌዳ፤ “ኔን ነ ሶ አሳ ኡባና ማርካብያ ግዶ ገላ፤ አያዉ ጎፐ፥ ታን ሀ ዎድያ የለታ ግዶን ኔን ጽሎ ግዴዳዋ በኣድ። ኔን ጌሻ ግዴዳ መህያነ ዶኣ ኡባፐ አ ቆሙዋፐ ቆሙዋፐ አቱማዋነ ማጫዋ ላፑኑዋ ላፑኑዋ፥ ጌሻ ግደና መህያነ ዶኣ ኡባፐ አ ቆሙዋፐ ቆሙዋፐ እት አቱማዋነ እት ማጫዋ፥ ቃይ ሳሉዋ ካፉዋፐ አ ቆሙዋፐ ቆሙዋፐ አቱማዋነ ማጫዋ ላፑኑዋ ላፑኑዋ ኦደ፥ ሳኣ ኡባ ቦላን ዱማ ዱማ ዘረይ ሸምፑዋና አታና ማላ ኔናና አካደ ገላ። አያዉ ጎፐ፥ ላፑን ጋላሳፐ ጉየ፥ ታን ኦይታሙ ጋላሳነ ኦይታሙ ቃማ ሀ ሳኣ ቦላን እራ ቡክሳና፤ ያታደ ታን መዳ መታ ኡባ ሳኣ ቦላፐ ይሳና” ያጌዳ።
ኖሄ መና ጎዳይ አ አዛዜዳ ኡባባ ኦዳ።
ባሻ ሃይ ሀ ሳኣ ቦላ ዬዳ ዎደ፥ ኖሄ ላይይ ኡሱፑን ጼታ። ኖሄ፥ አ አቱማ ናናይ፥ አ ማቻታነ አ ናና ማቼቱ ባሻ ሃፐ አታናዉ ማርካብያ ግዶ ገሌድኖ። ጌሻ መህያፐነ ዶኣፐ፥ ጌሻ ግደና መህያፐነ ዶኣፐ፥ ካፉዋፐነ ቢታና ጎሸትያዋንቱ ኡባፐ ጾሳይ ኖሀ አዛዜዳዋዳንካ አቱማዌነ ማጫዌ ላኡዋ ላኡዋ ግድ፥ ኖሄኮ ዪደ ማርካብያ ግዶ ገሌድኖ። ላፑን ጋላሳፐ ጉየ፥ ባሻ ሃይ ሀ ሳኣ ቦላን ዬዳ።
ኖሄ ኡሱፑን ጼቱ ላይ ደእና፥ ላኤን አግናን፥ ታማነ ላፑን ጋላሳን፥ ሄ ጋላሳን ቢታ ግዶን ደእያ ዎልቃማ ጪማ ፑልቱዋ ኡባይ ቂ አጌዳ፤ ሳሉዋን ደእያ ሃ ፐንገቱካ ዶየት ዎድኖ፤ እራይ ሀ ሳኣ ቦላን ኦይታሙ ጋላሳነ ኦይታሙ ቃማ ቡኬዳ። ሄ ጋላሳን ኖሄነ አ አቱማ ናናይ፥ ሴመ፥ ካመነ ያፌት፥ ኖሄ ማቻታነ አ ናና ሄዛቱዋ ማቻቱ እትፐ ማርካብያ ግዶ ገሌድኖ። ኡንቱንቱነ ዶኣ ኡባፐ ባረ ቆሙዋን ቆሙዋን፥ መህያ ኡባፐ ባረ ቆሙዋን ቆሙዋን፥ ሳኣና ጎሸትያዋንቱ ኡባፐ ባረ ቆሙዋን ቆሙዋን፥ ካፉዋ ኡባፐ ባረ ቆሙዋን ቆሙዋን፥ ኡንቱንቱና እትፐ ገሌድኖ፤ ደኡዋ ሸምፑዋና ደእያዋንቱ ኡባይ ላኡዋ ላኡዋ ግድ፥ ኖሄኮ ዪደ ማርካብያን ገሌድኖ፤ ጾሳይ ኖሀ አዛዜዳዋዳን፥ መታ ኡባፐ አቱማዋነ ማጫዋ ግዲደ፥ ማርካብያ ግዶ ገል ስሞዋን፥ መና ጎዳይ ማርካብያ ፐንግያ ጎርዴዳ።
ባሻ ሃይ ኦይታሙ ጋላሳ ሳኣ ቦላን ቡኪደ ጋምኤዳ፤ ሃይ ዳሪደ፥ ማርካብያ ቢታፐ ፑደ ደንዳ። ሃይ ቢታ ቦላን ሎይ ዳርና፥ ማርካቢ ሃ ቦላን ቶከቴዳ። ሳሉዋፐ ጋርሳና ደእያ ቃ ደረቱ ኡባይ ምተታና ጋካናዉ፥ ሃይ ሀ ሳኣ ቦላን ሎይ ዎልቃፐ ዳሬዳ። ሃይ ደረቱዋ ጼራፐ አደ፥ ታማነ እቼሹ ዋ ጋካናዉ ቶኬዳ። ያትና ሳኣ ቦላን ሸምፑዋና ቃጽያ መታቱ ኡባይ: ካፉ፥ መሂ፥ ዶአይ፥ ሳኣ ቦላን ሻምእ ግያ መታ ኡባይነ አሳይ ኡባይ ሀይቄዳ። ኤ፥ መላ ቢታ ቦላን ደእያ፥ ባረ ሲያን ደኡዋ ሸምፑዋ ሸምፕያ ኡባይካ ሀይቄዳ። ሀ ሳኣን ፓጻ ደእያባይ ኡባይ: አሳይ፥ መሂነ ዶአይ፥ ቢታና ጎሸትያ መታቱነ ሳሉዋ ካፎቱ ኡባይካ ሳኣፐ ዬድኖ። ኖሄ ጻላላይነ አናና ማርካብያ ግዶን ደእያዋንቱ አቴድኖ። ሄ ሃይ ጼታነ እሻታሙ ጋላሳ ጋካናዉ ሳኣ ቦላን ጋምኤዳ።

Mihaino ny ዶመ 7