Jowulu - 2022 WBT (NT) Non Drama

Jowulu - 2022 WBT (NT) Drama

Niŋ na, Pilati tu kí Yesu pa, tu kí i ntiŋ bwɔ shuulinŋ na. Surudashi kiri i cii tan ye ntiŋ ŋununa bunfila a. Kí i jɛrɛbi sinaŋ kilɛn bo ntiŋ yɛɛra. Kí i ta tu-ri ntiŋ ɲaanfɛ, kí i ǹʼbi-ri tu : « Á Co, Yawutu ri wɔ masa », kí i gbɛta ri bo-ri ntiŋ cufɛ.
Pilati i a pwulu po tanŋ ki ra, ntiŋ i ǹʼbi Yawutu kiri tɛ tu : « Míŋ a ǹʼbi tu kí po ntiŋ wu taanna kwumaŋ, nwɔma ábɛɛ i ǹʼtɔ tu míŋ kilɛn ŋuŋ kila ntiŋ na kì. »
Kí po-i Yesu wu tanŋ ki ra waarinŋ wɔ̀ ru, cii bunfila ki fa jɛrɛbi sinaŋ kilɛn ki i ji ntiŋ sun, Pilati tu kí tɛ : « Koŋ ki i kaa. » Nka Kirinŋ tɛ sarakawɔrɔtɔnŋ kiri ŋununtiŋ kiri fa Kirinfusinaŋ ki ɲaannasuutɔnŋ kiri ɲaniŋ bili-i Yesu sun mani wɔ̀ ru, kí i ǹʼbi tu : « Á wú kpinkpi, á wú kpinkpi! »
Niŋ na, Pilati tu kí tɛ : « Ábɛɛ yɛrima kiri ntiŋ pa kpinkpi suu ki sun, sabu míŋ pɔlimaŋ kila ntiŋ na nwɔ̀ a ntiŋ kilɛn ŋuŋ po kì. »
Yawutu kiri i ntiŋ nupwulu tu : « Sariya i yibɛɛ gbɛ, ŋì i kɛɲɛ niŋ sariya ki wu, ntiŋ kakan-i ntiŋ i kilɛn, sabu ntiŋ a yɛri ji-i Kirinŋ Danshuru u. »
Pilati niŋ wulu kiri rama-i waarinŋ wɔ̀ ru, ǹʼbɛɛ i bo ntiŋ wɔ kɛmi ki sun. Ntiŋ i a pwulu de awɔ masafu ki ru, ntiŋ i ta Yesu ranɔri : « Miŋ po-a da? » Nka Yesu ntiŋ nupwulu kili kì. Niŋ na, Pilati i ǹʼbi Yesu tɛ tu : « Miŋ nʼkaan-na wulubi mínki tɛ wa? Miŋ i ji ǹʼtɔ-a tu so míŋ gbɛ ŋí i miŋ pani walima ŋí i miŋ kpinkpi suu sun wa? »
Yesu i ntiŋ nupwulu tu : « So dantenŋ miŋ gbɛ míŋ sun kì, duu nwɔ̀ wɔri-i miŋ tɛ ŋì i po kirinpɔlila, niŋ ki ra konwɔtiŋ míŋ de-i miŋ gbɛfɛ, niŋ wɔ bijɛ ki fwuu-u mɔɔn ki sun. »
Kabi niŋ mani nu, Pilati wuru ǹʼtɛ a i Yesu panimaŋ ceeli. Nka Yawutu kiri i arì bo fali sun, kí i ǹʼbi-ri tu : « A miŋ ntiŋ pani, miŋ a ji Ɔrɔmu masa ki wɔ wɔshuru u kili kì, sabu konwɔtiŋ i a yɛri ji-a masa a, nintiŋ i Ɔrɔmu masa ki ɲa a. »
Pilati niŋ wulu kiri rama-i waarinŋ wɔ̀ ru, ntiŋ tu kí po ta Yesu wu taanna, ntiŋ i ta sɔɔ awɔ kiti kwuru waalinŋ ki sun mani nu, nwɔ̀ ramɔni-i kwɔ ra, kí i ǹʼdɔri-ri tu « Gabata » Iburuwulu ki ru. Niŋ sisarifuluntɔnŋ ki wuru Jonbikɔ ɲaannabyɛ ki sanɲaanna ki i. Sunŋ nukwulu ki sun, Pilati i ǹʼbi Yawutu kiri tɛ tu : « Ábɔɔ masa ki i kaa. »
Kí i fali, kí i ǹʼbi tu : « Á wú kilɛn, á wú kilɛn, á wú kpinkpi suu sun! »
Pilati tu kí tɛ : « Áwɔ masa ki yɛrima ki kilɛn suu sun wa? »
Sarakawɔrɔtɔnŋ kiri ŋununtiŋ kiri tu masa tɔri arìbɛɛ gbɛ Ɔrɔmu masa ki kɔɔtɛ kì. Ntiŋ i Yesu wɔri kí tɛ, tu kí ta ntiŋ kpinkpi suu ki sun, kí i ntiŋ pa tiri.


Yesu yɛri ki i a kpinkpisuu ki shi. Kí i ta so mani bɛɛ ru, nwɔ̀ tɔ ki kɔri ki i tu Ŋununwɔmaŋ, ŋì dɔri-ri Iburuwulu ki ru tu Gologota. Surudashi kiri i Yesu kpinkpi suu ki sun niŋ fa koŋ fuuli tɔri, ǹʼbɛɛ i ji ntiŋ pantɛ, ǹʼtɔri ki i ji ntiŋ nɔrintɛ, Yesu i ji kí faninmwuŋ.
Pilati i sɛbɛ tan lɔ kpinkpisuu ki ra cuunŋ. Ntiŋ ǹʼsɛbɛ wuru tu : YESU NANSARɛTITɔNŋ, YAWUTU KIRI Wɔ MASA KI. Yawutu kiri mwɔɔnna i niŋ sɛbɛ tanmaan ki kali, sabu mani ki nari-ri kili ki ra kì. Niŋ sɛbɛ ki tan wuru Iburuwulu lu, niŋ fa Latɛnwulu fa Girɛkiwulu lu.
Sarakawɔrɔtɔnŋ kiri ŋununtiŋ kiri i ǹʼbi Pilati tɛ tu : « Miŋ kakan-ni ŋi i ǹʼsɛbɛ tu Yawutu kiri wɔ masa kì, nka miŋ kakan wuru-i ŋi i ǹʼsɛbɛ tu ‹ weŋ ka tu afinŋ i Yawutu kiri wɔ masa a. › »
Pilati i kí rupwulu : « Míŋ nwɔ̀ sɛbɛ kɔ-i, niŋ sɛbɛ-i. »
Surudashi kiri Yesu kpinkpi kɔ-i suu ki sun waarinŋ wɔ̀ ru, kí i ntiŋ wɔ juulinŋ kiri lu arì tɛ, lumaŋ pyiiraŋ, koŋ fɔn tenŋ tenŋ fa awɔ, kí i ntiŋ wɔ jɛrɛbi sinaŋ ki shi sɛbɛ. Myɛ saa wuru niŋ jɛrɛbi ki ra kì, ǹʼtan wuru juulinŋ cii tenŋ i, ŋì i shi ǹʼyɛta ki ra fɔ ǹʼfɛ. Surudashi kiri i ǹʼbi arìmaŋ tɛ, yi fa niŋ jɛrɛbi sinaŋ ki rugbɛri kì, yi ǹʼbaalinŋ bili yimaŋ tɛ, konwɔtiŋ tenŋ a ǹʼshi, nintiŋ i tɔ. Niŋ ma-i, Kirinŋ wɔ wulu sɛbɛ ki ru wulu ki i nafaa tu :
« Kí mɔ́ɔ́n juulinŋ kiri lu-i arìmaŋ tɛ,
kí i ńʼwɔ jɛrɛbi sinaŋ ki baalinŋ bili arìmaŋ tɛ. »
Surudashi kiri i niŋ bi ki ma.
Yesu ɲiŋ ki fa a pwanmari ki, niŋ fa Kulopasi wɔ mari Mariyamu, ŋì i bo Makidala Mariyamu sun, nini tu wuru Yesu kpinkpisuu ki kankantɛ. Yesu a ɲiŋ ki fa a dintɛ kalindaŋ ki tu ja-i arìmaŋ tɔntɛ, ntiŋ i ǹʼbi a ɲiŋ ki tɛ tu : « Míŋ ɲiŋ, ábɛɛ danshuru ki i kaa. »
Ntiŋ i ǹʼbi niŋ kalindaŋ ki tɛ tu sɛbɛ : « Miŋ ɲiŋ ki i kaa. » Ŋì i shi niŋ shikaŋ ki ra, niŋ kalindaŋ ki i Yesu ɲiŋ ki shi bo awɔ kaniŋ ki sun.


Niŋ bataa kɔɔtɛ, Yesu ǹʼtɔ-i tu finŋ ki fɔn bataa rafaa waarinŋ wɔ̀ ru, ntiŋ tu : « Jumwunu i míŋ wu. »
Ntiŋ niŋ bi-i, nwɔma nwɔ̀ bi-i Kirinŋ wɔ wulu sɛbɛ ki ru, niŋ i nafaa.
Dunfɛnŋ lɔmaan duŋ faa bɛɛ wuru nmaŋ, ǹʼbɛɛ i fwuu kɔli isope bali la, ntiŋ i niŋ de niŋ dunfɛnŋ lɔmaan ki ru, ntiŋ i niŋ shi ye Yesu tɔnŋ ki ra. Yesu niŋ dunfɛnŋ lɔmaan ki firi-i waarinŋ wɔ̀ ru, ntiŋ tu : « Dɔnsaŋ ǹʼbataa rafaa-a. »
Ntiŋ i a ŋuniŋ ki shuuli, ntiŋ i a ɲini ki wɔri.
Niŋ sisarifuluntɔnŋ ki wuru fu-a Yawutu kiri wɔ Nufaan jibi wu, ninwɔ̀ fa ǹʼpyɛ kiri wuru tenŋ i kì. Yawutu kiri wuru ǹʼtɛ konkwuu i tu kpinkpisuu ki sun niŋ Nufaan jibi ki sun kì, niŋ ki ra, kí i Pilati rafɛ tu koŋ kpinkpimaan kiri kanŋ kiri yali, tu kí kwuu kiri i jɛri san jirinŋ kiri ra. Shuru fuuli wɔ̀ri kpinkpi wuru Yesu fan, surudashi kiri i niŋ koŋ jɔnɔ ki kanŋ kiri yali, kí i ǹʼkoŋ fuluntɔnŋ ki kanŋ kiri yali sɛbɛ. Kí so-i Yesu sun waarinŋ wɔ̀ ru, kí i ta fa ntiŋ beeni-i kɔ, niŋ ki ra, kí ntiŋ kanŋ kiri yali kili kì. Nka surudashi ki bɛɛ tenŋ i awɔ tama sɔɔ, niŋ i ntiŋ bu a yalaka kɛlinŋ tenŋ tɛ. Mìŋ manaanŋ tenŋ ki ru, cunŋ fa ju i wulu po niŋ ta ki ra.
Konwɔtiŋ i ka wulu kari bi-a, nintiŋ yɛrima ki ɲaniŋ tu-i yìrì ra, ntiŋ wɔ wulu ki i sɛli i. Ntiŋ ǹʼtɔ-i tu afinŋ nwɔ̀ bi-a, tu niŋ sɛli i. Ntiŋ i yìrì bi-a ábɛɛ tɛ, nwɔma ábɛɛ yɛrima kiri i bili yìrì ra. Ka bataa ma-i, nwɔma Kirinŋ wɔ sɛbɛ ki i wulu wɔ̀ bi-a, niŋ i nafaa, sabu ǹʼbi wuru tu : « Ǹʼwɔ ki tɔri dantenŋ a na yali kì. » Ǹʼbi-i Kirinŋ wɔ sɛbɛ ki ru sɛbɛ tu : « Kí mínwɔ̀ bu-i, kí ɲaniŋ na tu míŋ na. »


Niŋ bi kiri kɔɔtɛ, Yusufu wɔ̀ wuru po-a Arimate, ntiŋ i ji wuru Yesu wɔ kalindaŋ ki bɛɛ i du ru, sabu ntiŋ wuru kɛni-na Yawutu kiri jɛŋ. Niŋ i ta Pilati rafɛ, tu ntiŋ i Yesu kwuu ki wɔri a tɛ, a i ǹʼjɛri san kpinkpisuu ki ra. Pilati i a tu, Yusufu i ta Yesu kwuu ki jɛri san kpinkpisuu ki ra. Nikodɛmu wɔ̀ tiri wuru Yesu cɛfan cii ki ru, niŋ i na kinidifinŋ kwuru fuuli ɲaanmimaan wu arìmaŋ nu, ninwɔ̀ wuru miri fa alowɛsi, ǹʼbataa bomaan ki amaŋ sun, niŋ wuru-ra so culo kɔniŋ fa byinŋ sun. Kí i Yesu kwuu ki shi, kí i juulinŋ fɔ minimini ǹʼsun, kí i kinidifinŋ kiri bo ǹʼsun, ŋì i kɛɲɛ Yawutu kiri wɔ konkwuu yeka ɲaan ki wu. Kí Yesu kpinkpi wuru suu ki sun mani wɔ̀ ru, jirinŋ ji bɛɛ wuru niŋ mani ki tɔntɛ, ta ŋunaŋ bɛɛ wuru niŋ mani ki ru, koŋ ye ja-ri nwɔ̀ ru sun kì. Miŋ tu niŋ jibi ki wuru Yawutu kiri wɔ Nufaan jibi ki sanɲaanna ki i, kí i Yesu kwuu ki ye niŋ mani ki ru, sabu niŋ ta ki myɛ wuru kí tɛ.

Mihaino ny Yuhana 19