If you have would like a copy of this version please contact info@davarpartners.org

Text: Garasia Adiwasi New Testament, CC-BY-SA-4.0, The Love Fellowship. -- Audio: Garasia Adiwasi New Testament Audio Bible, CC-BY-SA-4.0, Davar Partners International, The Love Fellowship, 2022

Garasia Adiwasi New Testament

Garasia Adiwasi Bible, by The Love Fellowship is licensed under Creative Commons Attribution-ShareAlike 4.0 License.

ઇસુ હેંના ટુંળા ન મનખં નેં ભાળેંનેં ડુંગોરેં થુંડોક ઇપેર સડેંનેં હેંનનેં હિકાડવા હારુ બેંહેંજ્યો, તે હેંના સેંલા હેંનેં કન આયા. તર વેયો એંમ કેંતો જાએંનેં હિકાડવા મંડ્યો.


“ધન્ય હે વેય, ઝી મન ન ગરિબ હે, કેંમકે પરમેશ્વર નું રાજ હેંનનુંસ હે.
ધન્ય હે વેય, ઝી દુઃખી હે, કેંમકે પરમેશ્વર હેંનનેં હિમ્મત આલહે.
ધન્ય હે વેય, ઝી ભુંળં હે, કેંમકે વેય ધરતી ન હકદાર થાહે.
ધન્ય હે વેય, ઝી ધર્મી જીવન જીવવા ની મુટી આહ રાખે હે, કેંમકે પરમેશ્વર હેંનની આહ પૂરી કરહે.
ધન્ય હે વેય, ઝી દયાળુ હે, કેંમકે પરમેશ્વર હેંનં ઇપેર દયા કરહે.
ધન્ય હે વેય, ઝેંનં ન મન સાફ હે, કેંમકે વેય પરમેશ્વર નેં ભાળહે.
ધન્ય હે વેય, ઝી મેળ કરાવવા વાળં હે, કેંમકે વેય પરમેશ્વર ન બેંટા-બીટી કેંવાહે.
ધન્ય હે વેય, ઝી તાજં કામં કરવા ને લેંદે બીજં મનખં દુવારા વિતાડવામ આવે હે, કેંમકે પરમેશ્વર નું રાજ હેંનનુંસ હે.
ધન્ય હે તમું, ઝર મનખં તમનેં મારી ઇપેર વિશ્વાસ કરવા ને લેંદે તમારી નિંદા કરે, અનેં તમનેં વિતાડે અનેં ઝૂઠ બુંલેં-બુંલેંનેં તમારી વિરુધ મ બદ્દી રિત ની ભુંડી વાતેં કે. તર તમું ખુશ અનેં રાજુ થાજો, કેંમકે તમારી હારુ હરગ મ મુંટું ઈનામ હે. વેય એંતરે હારુ એંવું કરહે કે હેંનવેં હેંનં ભવિષ્યવક્તં નેં હુંદા ઝી તમારી થી ઘણા ટાએંમ પેલા હેંતા, ઇવીસ રિતી થી વિતાડ્યા હેંતા.”


“તમું ઇની દુન્ય ન મનખં હારુ લુંણ નેં જેંમ હે. પુંણ અગર લુંણ નો હવાદ વગડેં જાએ, તે વેયુ ફેંર કઇની વસ્તુ થી ખારું કરવા મ આવહે? ફેંર વેયુ કઈનાસ કામ નું નહેં, હેંનેં બારતં ફેંકવા મ આવે હે, ઝાં મનખં ન પોગં મ કસરાએં જાએ હે. તમું ઇની દુન્ય ન મનખં હારુ ઇજવાળા નેં જેંમ હે. ઠીક ઇવીસ રિતી ઝી સેર ડુંગોર ઇપેર વહેંલું વેહ, વેયુ બદ્દનેં ભાળવા જડે હે. અનેં કુઇ મનખ સમની બાળેં નેં ટુંપલા હેંઠણ નહેં પુંણ હેંનેં ઉંસાઈ મ મેંલે હે. તર હેંનેં થી ઘેર ન બદ્દ મનખં નેં ઇજવાળું મળે હે. ઇવીસ રિતી તમારું ઇજવાળું મનખં નેં હામેં ભળાએ, કે વેય તમારં ભલાઈ ન કામં નેં ભાળેંનેં તમારા પરમેશ્વર બા ની ઝી હરગ મ હે મોંટાઈ કરે.”

“એંમ નહેં હમજો કે હૂં મૂસા ના નિયમં નેં, અનેં ભવિષ્યવક્તં ની સોપડજ્ય નેં મટાડવા હારુ આયો હે, નકમ્મું સાબિત કરવા નહેં, પુંણ પૂરુ કરવા આયો હે. કેંમકે હૂં તમનેં હાસ્સું કું હે, કે આકાશ અનેં ધરતી મટેં જાહે, પુંણ ઝર તક પવિત્ર શાસ્ત્ર ની બદ્દી ભવિષ્યવાણન્યી પૂરી નેં થાએ, તર તક પરમેશ્વર ના પવિત્ર શાસ્ત્ર મહું કઇસ નેં આં તક કે એક માતરો કે એક મીંડું હુંદું નેં મટે. એંતરે હારુ ઝી કુઇ ઇની નાની થી નાની આજ્ઞાવં મહી કઇનીક એક નેં હુંદું નેં પાળે, અનેં વેમેંસ બીજં મનખં નેં હુંદું હિકાડે, વેયુ હરગ ના રાજ મ બદ્દ કરતં નાનું કેંવાહે. પુંણ ઝી કુઇ ઇની આજ્ઞાવં નેં પાળહે, અનેં હેંનેં હિકાડહે, વેયુસ હરગ ના રાજ મ મુંટું કેંવાહે. કેંમકે હૂં તમનેં કું હે, કે અગર તમું મૂસા નું નિયમ હિકાડવા વાળં નેં અનેં ફરિસી ટુંળા ન મનખં કરતં વદેંનેં પરમેશ્વર ની આજ્ઞા માનહો, તર હરગ ના રાજ મ જાએ સકહો.”

“તમું હામળેં સુક્ય હે, પરમેશ્વરેં આપડં બાપ-દાદં નેં કેંદું હેંતું કે, કેંનેં યે માર નેં નાખવું, અનેં ઝી કુઇ એંવું કરહે, હેંનેં યહૂદી કસેરી મ સજ્યા મળહે. પુંણ હૂં તમનેં ઇયુ કું હે, કે ઝી કુઇ પુંતાના ભાઈ ઇપેર રિહ કરહે, હેંનો નિયા કરવા મ આવહે, અનેં ઝી કુઇ પુંતાના ભાઈ નેં નકમ્મો કેંહે હેંનેં મુટી સભા મ સજ્યા મળહે, અનેં ઝી કુઇ પુંતાના ભાઈ નેં કે અરે મુરખ, હેંનેં નરક ની આગ મ સજ્યા મળહે. અગર તું પુંતાનું દાન મંદિર ની વેદી ઇપેર લાવે, અનેં વેંહાં તું ઇયાદ કરે, કે કયાક મનખ ના મન મ મારી દુવારા કઇક વિરોધ હે. તે તારું દાન વેંહાંસ વેદી નેં હામેં સુંડ દે, અનેં જાએંનેં પેલ હેંના મનખ હાતેં મેંળભાવ કર, તર પસી પાસો આવેંનેં તારું દાન કર. ઝર તમારો વેરી તમનેં કુંરેટ મ લેં જાતો વેહ, તર રસ્તા મસ હેંનેં હાતેં તમું મેંળભાવ કર લો. એંતરે કે વેયો તમનેં જજ ના હાથ મ નેં હુંપેં, નેં તે જજ તમનેં જેલ મ નાખવા હારુ સપાઈ ના હાથ મ હુંપેં દેંહે. હૂં તમનેં હાસ્સું કું હે કે ઝર તક તમું પૂરો-પૂરો દંડ નેં ભરહો તર તક તમું જેલ મહં નેં સુટો.”

“તમું હામળેં સુક્ય હે, કે પરમેશ્વર ના વસન મ ઇયે આજ્ઞા હે, કે સિનાળવું નેં કરવું. પુંણ હૂં તમનેં ઇયુ કું હે, કે ઝી કુઇ કઇનીક બજ્યેર ઇપેર ખરાબ નજર નાખે વેયો પુંતાના મન મ હેંનેં થી સિનાળવું કરેં સુક્યો હે. અગર તારી જમણી આંખ તનેં પાપ કરવા નું કારણ બણે તે હેંનેં કાડેંનેં ફેંકેં દે. કેંમકે તારી હારુ એંમ કરવું ભલું હે, કે તારી બે આંખં મહી એક નકળેં જાએ, અનેં તારું આખુ શરીર નરક મ જાતું બસેં જાએ. અગર તારો હાથ તનેં પાપ કરવા નું કારણ બણે, તે હેંનેં કાપેંનેં ફેંકેં દે. કેંમકે તારી હારુ એંમ કરવું ભલું હે કે તારં બે હાથં મહો એક નેં રે અનેં તારું આખુ શરીર નરક મ જાતું બસેં જાએ.”


“મૂસા ના નિયમ મ, એંમ હુંદું કેંવા મ આયુ હેંતું, ઝી કુઇ પુંતાની બજ્યેર ના સુટા-સેંડા કરવા માંગે, તે હેંનેં સુટા-સેંડા નો લખાવટ આલે. પુંણ હૂં તમનેં એંમ કું હે, કે ઝી કુઇ પુંતાની બજ્યેર નેં ઝી સિનાળવું નેં કરતી વેહ, અનેં બીજા કઇનાક મતલબ થી સુટા-સેંડા કરે, તે વેયો હેંનેં સિનાળવું કરાવે હે. અનેં ઝી કુઇ હીની સુટા-સેંડા કરીલી બજ્યેર નેં પએંણે, વેયો પુંતે હેંનેં હાતેં સિનાળવું કરે હે.”

ફેંર ઇસુવેં કેંદું, “તમું હામળેં સુક્ય હે, પરમેશ્વરેં આપડં બાપ-દાદં નેં કેંદું હેંતું, ઝૂઠા હમ નેં ખાતં વેહ, પુંણ પ્રભુ પરમેશ્વર હારુ પુંતાના હમ પૂરા કરજો. પુંણ હૂં તમનેં કું હે, કેંરં યે હમ નેં ખાતં વેહ. નેં તે હરગ ના, કેંમકે વેયે પરમેશ્વર નેં બેંહવાની જગ્યા હે. નેં ધરતી ના, કેંમકે વેયે પરમેશ્વર નેં પોગ મેંલવા ની જગ્યા હે. નેં યરુશલેમ સેર ના, કેંમકે વેયુ મુંટા રાજા નું સેર હે. પુંતાના માથા ના હુંદા હમ નેં ખાતં વેહ, કેંમકે તમું એક વાળ નેં હુંદં ધોળો કે કાળો નહેં કરેં સક્તં. પુંણ તમારી વાત હાઓ ની હાઓ, કે ના ની ના વેહ. કેંમકે ઝી કઇ હેંનેં કરતં વદાર વાત વદે હે, વેયે ભુંડાઈ શેતાન ની તરફ થી થાએ હે.”


“તમું હામળેં સુક્ય હે, ઝી મૂસા ના નિયમ મ લખવા મ આયુ હે, આંખ ના બદલા મ આંખ, અનેં દાત ના બદલા મ દાત. પુંણ હૂં તમનેં એંમ કું હે કે ભુંડાઈ નો બદલો નેં લેંવો. પુંણ ઝી કુઇ તમારા જમણા ગાલ ઇપેર થાપલ વાએ, તે હેંનેં મએં બીજો ગાલ હુંદો ફેંરવેં દો. અગર કુઇ તમારી કન થી જબર જસ્તી કરેંનેં તમારો કુંટ લેંવા સાહે, તે હેંનેં બુસટ હુંદું લેં લેંવા દો. ઝી તમનેં એક કિલોમીટર લેં જાવા હારુ જબર-જસ્તી કરે, તે હેંનેં હાતેં બે કિલોમીટર જાતં રો. ઝી કુઇ તમારી કન માંગે, હેંનેં આલો. અનેં ઝી કુઇ તમારી કન ઉસીનું લેંવા સાહે, હેંનેં ના નહેં કો.”


“તમું હામળેં સુક્ય હે, ઝી મૂસા ના નિયમ મ લખવા મ આયુ હે, પુંતાના પાડુસી ઇપેર પ્રેમ રાખવો, અનેં પુંતાના વેરી ઇપેર વેર રાખવો. પુંણ હૂં તમનેં એંમ કું હે કે પુંતાનં વેરજ્ય ઇપેર હુંદો પ્રેમ રાખો, અનેં પુંતાનેં વિતાડવા વાળં હારુ પ્રાર્થના કરો. હેંમ કરવા થી તમું પુંતાના હરગ વાળા પરમેશ્વર બા ન બેંટા-બીટી કેંવાહો. કેંમકે વેયો તાજં અનેં ભુંડં મનખં બેય ઇપેર દાડો ઉગાડે હે. અનેં હીવીસ રિતી તાજું કરવા વાળં અનેં ભુંડું કરવા વાળં બેય ઇપેર વરહાત હુંદો પાડે હે. કેંમકે અગર તમું તમાર હાતેં પ્રેમ રાખવા વાળં હાતેંસ પ્રેમ રાખો, તે પરમેશ્વર તમનેં ઈનામ નેં આલે. કેંમકે વેરો લેંવા વાળા હુંદા તે એંવુંસ કરે હે.
અગર તમું ખાલી પુંતાના હગા-વાલા નેંસ નમસ્તે કરો, તે બીજં મનખં અનેં તમારા મ હું ફરક હે? કેંમકે ઝી પરમેશ્વર ના નિયમ નેં નહેં માનતં વેય હુંદં એંવુંસ કરે હે. એંતરે હારુ હમેશા વેયુ કામ કરો ઝી તાજું હે, ઝેંવો તમારો હરગ વાળો બા હમેશા ઝી તાજું હે, વેયુસ કરે હે.”

Mihaino ny મત્તિ 5