Kodaku

बारह झन चेला कुतय हुकूम वडकू राः बाद रे ईसु हेंकू राः गलील एरिया राः सहर ते चेचेड अवुर पपरचार लगड हेना वरिय चलो एना। बतिस्मा ए-मय एहुन्‍ना जेहेल रेय दोहोएन तोलोग मसीहा राः काम राः बारे तेय अँजोम तेडा, तहाँ हेंय ईसु न याःते होंबोरिय लगड चेला कुतयिय कुलतेडा। “भविस्यवक्‍ताकू लाय केडा हेना अनुसार ते मेजुः मेनाअय अनम हवे, किदो अले एटागी ले तँगिआ?” तहाँ ईसु कहनी तेडा, “जे-नपे ञेंलयड अँजोम यडा, हेना सींड़ सेनकोःते एहुन्‍ना थरे पे लाये, अंद्हाकू ञेंञेंल तना, लंगड़ाकू सेनियाडा, कुड़गाकू चिकानुः तना, अवुर बेहरा कू अअँजोम तना, गोजकोःकू जियोः तना, अवुर गरीब होड़कू बढ़ियाँः खभेरिय लाय वकू तना। आसीसिय ञाँमा हेंय, जे इंञ थरे बेगर संखा तेय बिसवास बगी तआ।”

एहुन्‍ना रेनकू चेलाकू चलोयन तहाँ, ईसु एहुन्‍ना राः बारे ते होड़कुय लायवा दोहो एनु, “अपे सुनहर ओत रे ची ञेंल पे सेनेना? होय ते हिलोः हेना सरफी किदो? फेर अपे ची ञेंल पे सेनेना? महगाँ दाम राः कपड़ा तुसींञ तडाय होड़ किदो? अँजोम पे, महगाँ दाम राः कपड़ा तुसींञ कू गड़ही रेकू दोहोना। हेनावर फेर ची ञेंल पे सेनेना? कनय भविस्यवक्‍ता किदो? हूँ, इंञ अपे थरे सही मेतेंञ कहनी यडा, भविस्यवक्‍ता वरी हो बडेअय ञेंञेंल पे सेनेना। नेय हें-नी हवे, हेंय राः बारे ते नआँ घयते लिखल इदाना, ‘अँजोम मी, इंञ इंञाअय दूत अम वरी मड़ंग तेंञ कुलियाडिया, अम वरी पहिल ते अमाः होरिय तयारा।’ इंञ अपे थरे सही मेतेंञ कहनी यडा, कोड़िकू वरी जनम केनकू मेंडे, बतिस्मा ए-माय एहुन्‍ना वरी बडे कनय बेगर पयदाआ। लेकिन सरग राज रे सींड़कू वरी होडीञाँय, एहुन्‍ना वरी होय बडे गिआ।” बतिस्मा ए-मय एहुन्‍ना पपरचारिय बोंहड़ी तेड वरी अबोह ले मेनते “भगवान अले राः जीवन रेय राजेआ” मेनते कहनी केते भगवान राः सीमा कू रखोआ, हेंकुकू हेले केचे यडा। अवुर भगवान रेनकू होड़कू दुख होकू सहो तेडा। नेकू हेले केके चेकू भगवान राजेःकू थरे अधिकार चलो लगड अखीर कू कोसीस तेडा। गोटा भविस्यवक्‍ताकू अवुर धरम नियम, एहुन्‍ना अँगम भगवान राः राज राः बारे ते लाय अगतेडा। अपे नआँ टेबोःपे मनोवे रेदो, भविस्यवक्‍ताकू लाय केडा, हेना राः अनुसार ते एलियाह मेजुः मेनाअय ने-नी हवे। जे लूतुर वनय, हेंय अँजोम जोमियू।
ईसु फे-रिय कहनी तेडा, “नआँ जुग रेनकू होड़कू करा घयगी अकू, काःतेंञ लाय वपेआ? हेंकू बाजार रे दुड़ूब कोःते एटाःकू थरे हाक हाक तेकू कहनियाँ, हेंकू चोंडिजकू घयगी अकू। अवुर नेकू चोंडिजकू न याःते हाक हाक तेकू कहनिया, ‘अले अपे लगड बसरी ले बजा तेडा, अवुर अपे मेने पे सुसून गना, अले अपे लगड दुख राः सीरिंग ले सिरिंग तेडा, अवुर अपे मेने पे ईयाम गना।’ नेन घयते बतिस्मा ए-मय एहुन्‍ना अवुर इंञ बना होड़ मेने पे बेस गडलिञाँ। बतिस्मा ए-मय एहुन्‍ना मेनेय ञूँ-जोम गना, अवुर अपे कहनी वया, ‘नेय थरे भूत इदाना’ मेनते। अवुर इंञ होड़ होपोन जोमुः चरोः तनाञूँ अवुर अपे कहनी वञाँ, हरहाअयू अवुर मतवाड़ी अयू, अवुर मलगुजारी तिलाकू अवुर पापी होड़कू रेनिय गति हवे मेनते। लेकिन गियान अपन काम ते सही साबित होयाआ।”


तहाँ ईसु जे सहर रे अखीर चमत्कार कामिय काम तडा, हेना रेनकुय दब-दिबो तेडकुआ, कहेकि हेंकू मन मेने कू मिड़ाः गडा। “ओह, खुराजीन रेनकू! ओह बयेतसदा रेनकू! अपे थरे सक्‍ति राः जो कामिंञ करो तेडा, हेना अनजातकू राः सूर अवुर सयदा रेंञ करो तेड रेदो, हेना रेनकू सुतरी बोरा घियाः कपड़ा ते उयू केनते अवुर तोरोज ते भुरा केनते, नीमित दो मन कू मिड़ाः गोत्तेड मेनू। लेकिन इंञ अपे थरेंञ कहनी यडा, न्याय होयाः चेका सूर अवुर सयदा रेनकू वरी हो अपे अखीर दंड पे ञाँमा। ए कफरनहूम रेनकू, अपे पसींद यडा, सरग राज अँगम ले सेनुआँ मेनते? नरक रे अपे दो पेंदी हनतेय लोजोर पेआ। अपे थरे सक्‍ति राः कामिंञ काम तेड हेना, सदोम रेंञ करो तेड रेदो, हेना रेनकू अबोह ले मेनते कू दोहोएन मेनू। लेकिन इंञ अपे थरेंञ कहनी यडा, न्याय होयाः चेका अपे सदोम देस रेनकू वरी हो अखीर दंड पे ञाँमा।”


हेनेन तोलोग ईसु कहनी तेडा, “ओ अपा, सरग अवुर धरती रेनिय मुवाँरू, इंञ अम धन्यावादिंञ ओवाम तना, कहेकि अम न टेबोः बुधमानकू अवुर चलहाँक होड़कू थरेम उकू तडा, लेकिन चोंडिजकू थरेम लाय केडा। हूँ, ओ अपा, कहेकि अम ने-ना बढ़ियाँ वडमिआँ।” न याःते कहनी केड राः बाद रे होड़कू थरेय कहनी तेडा, “इंञ अपुंञ सींड़ चीजिय जिमा वडिञाँ; भगवान होपोन काय हवे, हेना कनय मेने पपाड़िआ, अपुंञ भर पपाड़िआ; अवुर अपुंञ काय हवे, हेना कनय मेने पपाड़िआ, इंञ होपोन तू भर पपाड़िआ; अवुर जे जे होपोन तू तिःवाकू लगाडिय चहोआ, हेनेनकू भर पपाड़िआ।” “ए मेहनत यडकू अवुर बोझ ते दबो केनकू, सगोरकू इंञ थरे पे मेजुऊ; इंञ अपे आरामिंञ ओवा पेआ। ईञाः जुवा पे रीमू, अवुर इंञ वरी पे चेडुऊ; कहेकि इंञ मन रे नरम अवुर दीन गिआञूँ, अवुर अपे अपन मन रे आराम पे ञाँमा। कहेकि ईञाः जुवा सहज गिआ अवुर ईञाः बोझ हलुक गिआ।”

Mihaino ny मत्ती 11