Yemba - 2017 CABTAL (NT) Non Drama

Yemba - 2017 CABTAL (NT) Drama

Yɛɛ́so a le gē efhó á ndo lekwɛ̄t esóʼo, mía nnɔ alāʼ á gɔ́ nzem nzhɛ̄nɛ á yí. Mmɔʼ ŋgaŋ kaʼpáp, á lɛ ntshóte nnɛ̄t mé lezēŋ tsí, ńtswíʼte á mvhɔ yí, ńdé á mbū yí ŋ́gɛ: «Mɛkwáŋ, o kuūʼ á leghʉ meŋ etēe, éyi o ó kɔŋ. » Yɛɛ́so á lɛ nnā apū, ḿpfēŋ á yí, ńdé ŋ́gɛ: «Meŋ á kɔŋ, tʉɛ̄. » Kaʼpáp á lɛ mmī ánɛ yí, efʉʼ mɛ́t efʉʼ mɛ́t. Yɛɛ́so á piŋ ndé á mbū yí ŋ́gɛ: «Pá á wú á lepū eshúŋ anu jʉɔ mɛ́t, á mbū ŋiŋ. Ké ŋgʉ̄ɔ ntswīi nnɛ̄t ju, á mbū nnɔŋ‑epɔʼ, ḿbiŋ nnɔ̄ŋ ntií epɔʼ zīi, lepé Mɔɔ́sɛ é zɛtteé ŋ́gɛ, ŋgaŋ kaʼpáp a tʉɛ, á nɔŋ. O eghʉ̄ épúp, ńdɔk ntswī á légɛ, o ó te. »


Yɛɛ́so á gʉɔ tɛ ndɛ̄ ŋgē ekó á tésɔŋ Kafaanawum, mmɔʼ ŋge á gɔ́ éwú, ŋ́gɔ́ á tɛŋgyā ncu epuɔ Lóma, é shʉʼ mbúʼ mbū á mbū yí, ŋ́gɛ: «Mɛkwáŋ, mmɔʼ méŋkhʉ̄ ga a nɔɔ̄ŋ á mba, a te zɛ́t ŋkūʼɔ á leŋɛnnɛ ɛ́, ḿbú ŋgɔ́ si njʉ́ɔ ŋgʉɔ̄ʼ tɛʼ. » Yɛɛ́so á pwɛt á mbū yí ŋ́gɛ: «Meŋ wūɔ, meŋ a egʉɔ eghʉ a etē lɛ́?» Tɛŋgyā ncu á zéŋ ndé ŋ́gɛ: «Mɛkwáŋ, meŋ te kūʼ yīi, o gɔ ezíʼ tɛ ŋkó á ŋgyā meŋ ɛ́. Táʼ, o lɛ ndé ŋ́gɛ méŋkhʉ̄ ga a etē, mbɔ a a te. Meŋ ndʉ́ɛ́ páʼa melaʼ mīi, meŋ á si njúʼɔ azá á mbū epuɔ pīi, pɔ́ é mvhɔ meŋ. Ńzéŋ ŋgwɛ̄ azá emɔ̄ʼ wɔ maʼ‑ncu, pɔ́ nɔŋ njúʼɔ á mbū meŋ. Meŋ toó mmɔʼ ŋgaŋ, á gʉɔ lɛ glɛ. Ńtswī ŋ́gɛ mmɔʼ a eshʉ̄ʼ, á shʉʼ lɛ glɛ. Ńdé á mbū méŋkhʉ̄ ga ŋ́gɛ, a eghʉ̄ azō, á ghʉ lɛ glɛ. » Yɛɛ́so á júʼ páʼ a á lé épúp, á kʉʼne á yí tɛʼ. Á lé á mbū epuɔ pīi, é nnɔŋ nzhɛ̄nɛ á yí ŋ́gɛ: «Meŋ a shúŋ á wɛ́ á kwaʼ anuúnē, meŋ ndaá mbú njʉ́ɔ ŋiŋ Islaɛl, á fɛ́ nnɛ̄t ŋgyá á mbū meŋ, páʼ ŋge wuɔ la á. Á épúp tɛ́ meŋ shúŋɔ á wɛ́ ŋ́gɛ, epuɔ tɛ nzáne, é shʉʼ efhó á meshhʉ̄ meshhʉ̄ á ndo esī atsetsáʼ, éshʉʼ ekó á ntē ŋgɔŋ eswhī, á athʉ́ lephū, pɔ́ a wɔ maŋgānjʉʼ pímpɛ, á Ablaham, mbɔɔ Izak, mbɔɔ Yakɔ́p, e ejhʉ́ á mía lekāk. Mɛ́ epiŋ mmāʼ epuɔ pīi, ŋgɔŋ eswhī jʉɔ mɛ́t, e é nzi ŋgɔ́ ezɔp, á apɛ́, á ntē nzém, ájʉʼ zīi mɛ́ é éwú ndaa mpfɛ́tɛ mesɔŋ. » Yɛɛ́so á shúŋne épúp, ḿbēkne nnɛ̄t, ńdé á mbū tɛŋgyā wɔ maʼ‑ncu wɔ̄ ŋ́gɛ: «Piŋ nzem mé mba ju. Páʼ o ó fɛ́ nnɛ̄t ju ŋgyá á mbū Ndém lā, ajū mīi o ó si ntsáa, á tó ndeŋ ndeŋ páʼ o ó si ntsáa épúp. » Méŋkhʉ̄ tɛŋgyā ncu, á lɛ ntē efʉʼ mɛ́t efʉʼ mɛ́t.


Yɛɛ́so á fhó á ajʉʼ mɛ́t, ŋgʉ̄ɔ mé mba Piɛ, ŋ́kó éwú, ńdɛ ŋgē ekó á ŋgyā, ńjʉ́ɔ ŋgém Piɛ á nɔŋ á ekó, nnɛ̄t é nɔŋ ŋkɔ́ʼɔ á yí. Yɛɛ́so á kímne apū zí, nnɛ̄t é lɛ nzáʼa. Á lɛ ndū á esī efāʼ azō, ńdɔk ŋghī á yí.


Á kó ŋgɔ́ eseéŋ‑njhʉ̄, mɛ́ lɔk epuɔ tɛ nzáne pīi, mesī é lē ŋgɔ á wɔ́p, éshʉʼ njʉ́ɔ á Yɛɛ́so. Á lɔk ndaʼ ashuŋne, ńjūŋ mesī ánɛ pɔ́p, ŋ́ghʉ̄, megaŋ agɔ metsem é pú ntē. Ŋ́ghʉ̄ épúp, á lɔk mbō páʼ Izayi ntswi‑ŋke Ndém a le lé ŋ́gɛ: «Yí mé le tswíʼ melɔ́ʼ mímpɛ mbīʼ, yí mé zéŋ efhó ánɛ pímpɛ, éfók megɔ mímpɛ mbīʼ. »


Yɛɛ́so á jʉ́ɔ páʼ mía nnɔ alāʼ a á cúʼte á lezēŋ yí, ńtswī mé nnɔ yí ŋ́gɛ, pɔ́ a pɔ́p e etó ntshi, ŋ́gʉ̄ɔ mé nzéŋ mmɔʼ. Mmɔʼ ŋkɛʼte‑mbé Ndém, á tshóte nnɛ̄t mé lezēŋ tsí, ńdé á mbū yí ŋ́gɛ: «Nziʼnɛ, o púu ŋgʉ̄ɔ tɛ ŋkó egɔ́ lɛ́, meŋ egɔ́ áa nzem wu. » Yɛɛ́so á pwɛt á mbū yí ŋ́gɛ: «Membapndo é wɛɛ̄ membhʉ̄ mɔ́p. Meséŋ é wɛ meŋka mɔ́p. Táʼ, Méŋ‑Ŋiŋnɔŋ wuɔ á piŋ te wɛ̄ azí ajʉʼ zīi, a gɔ enáŋ éwú ú. » Mmɔʼ ŋiŋ ánɛ nnɔ yīi, é nɔŋ nzhɛ̄nɛ á yí, á lé á mbū yí ŋ́gɛ: «Mɛkwáŋ, tsɔ́ʼɔtsɔ̄ʼ, lɛ nzwíʼte meŋ eshʉ̄ʼ nzīi mvhɔ, ńtúŋ á mɔʼɔ́ ga, tɛ́ eshʉʼ ŋgɔ́ á nzem wu. » Yɛɛ́so á pwɛt á mbū yí ŋ́gɛ: «Shʉʼɛ ŋgɔ́ á nzem meŋ. Ńcʉ́ʼ, epuɔ pīi é nzi ŋgɔ́ mepfhō, e etúŋ mepfhō pɔ́p. »


Yɛɛ́so á zíʼ ŋkó á ntē amɔ̄ʼ akɛnūʼ, nnɔ yí é zhɛne á yí, ŋ́kó azɔ́p éwú. Pɔ́ nɔŋ ŋgʉ̄ɔ, mmɔʼ mía mía afēm á veŋne ntúʼ á ndo ntshi, tɛ ŋghʉ̄, ntshi é pú ncʉ́ʼɛ ŋgɔ̄ áa ŋkápte akɛnūʼ. Yɛɛ́so á piŋ nnɔ̄ŋ ndíi. Nnɔ yí é tshóte nnɛ̄t mé lezēŋ tsí, ńzīɛ á yí, ńdé á mbū yí ŋ́gɛ: «Mɔʼɔ́ wek, lɛ ŋghʉ̄ ḿpɛ e etswɛ́t. Ḿpɛ é mi mbōo. » Á pwɛt á mbū pɔ́p ŋ́gɛ: «Pɛ cɔʼɔ akɔ̄? Lefɛ̄ nnɛ̄t wɛ ŋgyá á mbū meŋ a te kʉɔ́k e?» Ńdé épúp, ńdū á esī ntshí á ajʉʼ, ńcɔ́k afēm pɔ́ ntshi. Ejʉʼ é pwɛ́t lɛ jɔʼ. Pɔ́ jʉ́ɔ épúp, á pú ŋkʉ̄ʼne á wɔ́p tɛʼ, pɔ́ lé ŋ́gɛ: «Eziɛ́ ntií ŋiŋ e é páʼa ŋgɔ́ ejʉɔ, tɛ afēm pɔ́ ntshi, é gɔ́ ega njúʼu nchu yí í?»


Yɛɛ́so á gʉɔ tɛ ŋkó ezi mmɔʼ nzéŋ ntshi, á alāʼ epuɔ Ŋgadala, emɔ̄ʼ epuɔ mémpīa é fhó ajʉʼ zīi, mɛ́ gɛ ntúŋɔ mepfhō éwú, éshʉʼ ntswɛ́tte á yí, mbɔ mesī é lē ŋgɔ á wɔ́p. Ŋ́gáʼ, tɛ ŋgɔ́ yīi, ŋiŋ a le gɔ́, a á le kūʼ á lelɔk ajʉʼ mɛ́t, ńzápa nzhɛ ɛ́. Pɔ́ shʉʼ épúp, ńdɛ nzī á legaʼte mé ŋghi teté ŋ́gɛ: «Méŋ Ndém, o tswíi akɔ̄ á mbū pek ē? O kɛɛ́ eshʉʼɛ ega páʼā, ŋ́gɔ̄ áa nté njhʉ̄ enéŋ á wék ánɛ ŋgʉɔ̄ʼ kɛ?»
Á le gē egɔ́ épúp, mmɔʼ mía akɛt mekúna, á gɔ́ mmɔʼ eshhʉ̄ mpfɛ́tɛ etsō. Mesī mɛ́t é swíŋte á Yɛɛ́so, ńdé ŋ́gɛ: «Páʼ o gʉɔ mé njuūŋ pek lā, tswiī pek egʉɔ ŋkó ánɛ akɛt mekúna zi. » Á lé á mbū pɔ́p ŋ́gɛ: «Pɛ etó ŋgʉɔ ŋkó éwú. » Mesī mɛ́t, é lɛ efhó ánɛ epuɔ mɛ́t ntó, ŋ́gʉɔ ŋkó ánɛ mekúna pwɔ̄. Akɛt mekúna jɔ̄ á fɛ́ ŋkʉŋɛ́, ŋgʉ̄ɔ á mía, ḿbú ŋkwhʉ́te á ntē ntshi. Mepfɛnne‑mekúna é jʉ́ɔ épúp, ŋ́kʉ ŋgʉ̄ɔ mé tésɔŋ, ḿbɛ́te ajūɔ tsem zīi á tɔ́k, éshúŋ epuɔ. Ńzéŋ eshúŋ epuɔ páʼ, á tsia épúp, tɛ́ epuɔ pīi mesī é ŋgɔ́ ánɛ pɔ́p, é te. Tésɔŋ ntsem á pú ntó eshʉʼ ntswɛ́tte á Yɛɛ́so. Ńdɛ ŋgē ejʉ́ɔ á yí, éswíŋte á yí ŋ́gɛ, a efhó á alāʼ pɔ́p ŋgʉ̄ɔ.

Mihaino ny Matío 8