Perjanjian Baru terjemahan Bahasa Melayu Maluku Utara

Melayu Maluku Utara

Perjanjian Baru Bahasa Melayu Maluku Utara @ Lembaga Alkitab Indonesia 2020

Orang-orang Yahudi dari aliran Farisi dengar kabar, banya orang so iko pa Yesus, deng kata, Dia so baptis orang lebe banya dari Yohanes. (Biar lagi dorang dengar kabar bagitu, tapi sebenarnya bukang Yesus yang kase baptis, tapi Dia pe murit-murit). Waktu Yesus tau orang-orang dari aliran Farisi so dengar kabar itu, Dia kaluar dari daera Yudea kong babale pigi di daera Galilea. Waktu Dia mo pigi di daera Galilea itu, Dia musti lewat di daera Samaria. Dia bajalang sampe di kota satu di daera Samaria, yang pe nama kota Sikhar. Kota itu dekat deng tana yang dulu Yakub so kase pa dia pe ana Yusuf. Di situ ada parigi satu yang orang sebut ‘parigi Yakub’. Yesus lala skali gara-gara Dia bajalang jao, jadi Dia dudu di parigi itu pe pinggir. Waktu itu, kira-kira jam dua blas siang, kong Yesus pe murit-murit ada pigi di kota untuk bili makanang.
Kong tara lama, ada parampuang Samaria satu datang mo batimba aer di parigi itu. Turus Yesus bilang pa dia, “Minta aer ka, Kita mo minum.”
Parampuang Samaria itu bilang pa Yesus, “Bapa, Bapa ini orang Yahudi to? Masa Bapa minta aer minum dari kita, orang Samaria?” (Dia bilang bagitu, barang orang Yahudi tara biasa batamang deng orang Samaria, karna orang Yahudi anggap dorang itu najis).
Turus Yesus bilang pa dia, “Kalu ibu tau sapa sebenarnya yang minta minum pa ibu, deng pe bagus apa itu yang Tuhan Allah mo kase pa ibu, pasti ibu yang mo bale minta minum pa Kita kong Kita mo kase aer yang bisa biking manusia hidup.”
Turus parampuang itu bilang, “Bapa, parigi ini dolom skali, baru Bapa tarada timba. Dari mana Bapa mo dapa aer hidup itu kong? Torang pe orang tua dulu-dulu Yakub yang kase parigi ini pa torang. Kong dia sandiri so minum dari parigi ini, bagitu lagi deng dia pe ana-ana deng dia pe binatang-binatang piara lagi. Masa Bapa ini lebe hebat dari torang pe bapa Yakub itu?”
Turus Yesus bilang pa dia, “Sapa saja yang minum aer dari parigi ini, pasti dia mo aus ulang. Tapi sapa saja yang minum aer yang Kita mo kase, dia tara akan aus lagi untuk slama-lamanya. Lebe-lebe lagi aer yang Kita mo kase pa dia, nanti mo jadi sama deng mata aer di dia pe dalam diri yang tara mo berenti-berenti, sampe dia bole dapa hidup deng Tuhan Allah slama-lamanya.”
Parampuang itu bilang pa Yesus, “Kalu bagitu, Bapa kase aer itu pa kita dulu, supaya kita so tara akan aus lagi kong so tara usa bale ulang kamari mo batimba di parigi ini.”
Tapi Yesus bilang pa dia, “Pigi suda, pangge ngana pe laki la ngoni dua datang kamari.”
Kong parampuang itu jawab, “Kita tara ada laki.”
Turus Yesus bilang pa dia, “Butul yang ibu bilang, ibu tarada laki, barang ibu so kawing lima kali, kong laki-laki yang skarang ada deng ibu itu lagi, bukang ibu pe laki. Jadi yang ibu ada bilang, ‘Kita tarada laki’, itu memang butul.”
Parampuang itu bilang pa Dia, “Oo, kita jadi tau skarang, Bapa ini nabi yang jaga kase turus Tuhan Allah pe pasáng. Kalu bagitu, kita mo tanya dulu. Torang orang Samaria pe orang tua dulu-dulu basambayang pa Tuhan Allah di gunung ini, tapi bikiapa kong ngoni orang Yahudi bilang, tampa orang basambayang itu musti di Yerusalem?”
Yesus bilang pa dia, “Ibu, percaya suda apa yang Kita bilang ini. Nanti ada dia pe waktu orang mo basambayang pa Tuhan Allah torang pe Bapa, bukang cuma di gunung ini, deng bukang lagi cuma di Yerusalem. Memang ngoni orang Samaria, ngoni basambayang pa Tuhan Allah, tapi ngoni tara tau sapa Dia sebenarnya. Torang orang Yahudi basambayang pa Tuhan Allah, kong torang tau sapa Dia sebenarnya. Barang, Dia yang Tuhan Allah janji mo kase slamat pa manusia itu yang datang dari torang orang Yahudi pe turunan. Nanti ada dia pe waktu, mala skarang ini suda dia pe waktu, orang yang basambayang yang butul pa Tuhan Allah, dorang mo basambayang iko Tuhan Allah pe Roh yang pimpin pa dorang, deng iko ajaran yang butul dari Tuhan Allah, karna Tuhan Allah cari orang-orang yang basambayang pa Dia macam bagitu. Barang, Tuhan Allah itu tara sama deng manusia pe badan, tapi Dia Roh, jadi orang-orang yang basambayang pa Dia, dorang itu musti basambayang iko Roh Kudus yang pimpin pa dorang deng iko yang butul dari Tuhan Allah.”
Turus parampuang itu bilang pa Yesus, “Kita tau, Mesias yang orang bilang Kristus itu akan datang. Dia itu Raja yang Tuhan Allah janji mo kase slamat pa manusia. Kong kalu Dia datang, Dia mo kase tau samua hal pa torang.”
Yesus bilang pa dia, “Kita yang ada bicara deng ngana ini, Kita ini suda Dia.”
Waktu Yesus masi bicara itu, Yesus pe murit-murit bale dari kota kong dorang herang, barang dong lia Yesus ada bicara deng parampuang. Tapi tara ada satu dari dorang yang barani batanya pa parampuang itu, “Ibu ada perlu apa?” Atau batanya pa Yesus, “Bikiapa kong Guru bicara deng dia?”
Kong parampuang itu kase tinggal dia pe tampayang di situ, turus dia pigi maso di kota kong bilang pa orang-orang di situ, “Mari suda, torang pigi lia Orang yang tau samua tentang kita. Kaapa Dia itu Mesias suda, Raja yang Tuhan Allah janji mo kase slamat pa manusia?” Turus orang-orang di kota itu kaluar kong pigi pa Yesus.
Waktu parampuang itu ada pigi di kota, Yesus pe murit-murit bilang pa Yesus, “Guru, makang suda.”
Tapi Yesus jawab, “Pa Kita ada makanang yang ngoni tara tau.”
Kong Dia pe murit-murit baku tanya, “Sapa yang so datang bawa makanang pa Dia?”
Yesus bilang pa dorang, “Kita pe makanang itu, Kita biking apa yang Tuhan Allah mau. Tuhan Allah itu yang utus pa Kita deng Kita musti kase abis Kita pe karja yang Dia suru Kita biking. Ngoni jaga bilang to, kalu so baambur bibit, tinggal ampa bulan lagi baru bapanen. Tapi Kita bilang pa ngoni, coba ngoni lia bae-bae ka sana kong lia itu orang-orang Samaria yang ada babadatang kamari. Dorang so siap mo percaya pa Kita. Jadi dorang itu bole sama deng tanaman yang so bakuning kong skarang suda so siap mo panen. Orang-orang yang bapanen pasti so mulai tarima dorang pe gaji kong dorang kase kumpul hasil kobong itu. Dorang deng orang-orang yang baambur bibit akan sama-sama basimore, barang sama-sama dapa hasil kobong. Hasil kobong yang ada panen itu, itu bole kase sama deng orang-orang yang so percaya kong dapa hidup deng Tuhan Allah slama-lamanya. Jadi butul suda yang ngoni jaga bilang bagini, ‘Ada yang pe karja baambur bibit, deng ada yang pe karja bapanen.’ Kita suru pa ngoni untuk bapanen di tampa yang ngoni tara perna baambur bibit. Orang-orang laeng so baambur bibit, kong ngoni yang datang pete dia pe hasil.”
Banya orang Samaria di kota itu yang jadi percaya pa Yesus karna parampuang itu kase tau pa dorang bagini, “Dia bilang pa kita samua yang kita so perna biking.” Jadi, waktu orang-orang Samaria itu sampe pa Yesus, dorang minta pa Dia supaya Dia tinggal deng dorang. Kong Yesus tinggal deng dorang di situ selama dua hari.
Di situ, lebe banya orang lagi yang jadi percaya pa Yesus karna dorang dengar apa yang Dia ajar. Dorang bilang pa parampuang itu, “Torang skarang percaya bukang cuma karna dengar apa yang ngana bilang, tapi karna torang sandiri so dengar dari Dia langsung kong torang so tau Dia itu memang butul-butul Orang yang mo kase slamat pa manusia dari dosa-dosa.”

Pe abis dua hari Yesus tinggal di kota Sikhar, Dia pulang di daera Galilea. Yesus sandiri so perna kase tau, “Tara ada nabi yang dapa hargai di dia pe kampong sandiri, termasuk Kita.” Tapi bagitu Yesus sampe di daera Galilea, orang-orang Galilea tarima pa Dia bae-bae. Barang, waktu dorang ada di kota Yerusalem untuk biking agama Yahudi pe hari raya, dong so lia samua yang Dia biking di Yerusalem.
Abis itu, Yesus bale lagi di Kana, di daera Galilea. Kana itu tampa yang Dia perna biking mujizat aer jadi anggur. Tara jao dari Kana, di kota Kapernaum, ada pegawai istana satu. Dia pe ana laki-laki ada saki. Waktu pegawai itu dengar Yesus so datang dari daera Yudea kong so sampe di daera Galilea, dia pigi pa Yesus kong minta supaya Yesus datang di kota Kapernaum la kase sembu dia pe ana, karna dia pe ana itu amper mati.
Yesus bilang pa dia, “Kalu ngoni tara lia mujizat-mujizat deng tanda-tanda yang kase tunju Kita pe kuasa, ngoni tara mo percaya.”
Turus pegawai itu bilang pa Yesus, “Bapa, mari suda iko deng kita, jang sampe kita pe ana mati.”
Kong Yesus bilang pa dia, “Pigi suda, ngana pe ana so sembu.”
Pegawai itu percaya deng apa yang Yesus bilang, kong dia pigi. Waktu pegawai itu masi di tenga jalang, dia pe orang-orang karja dusu pa dia kong kase tau, dia pe ana so sembu.
Pe dengar itu, pegawai itu tanya pa dorang, jam barapa dia pe ana mulai sembu.
Dorang jawab, “Kalamaring jam satu siang, dia so tara panas.”
Kong di situ, pegawai itu dapa inga, pas di jam bagitu Yesus sementara bilang pa dia, “Ngana pe ana so sembu.” Kong pegawai itu deng samua dia pe keluarga jadi percaya pa Yesus.
Yesus kase sembu ana itu, itu jadi Yesus pe mujizat yang kedua yang Dia biking di daera Galilea waktu Dia pulang dari daera Yudea.

Mihaino ny Yohanes 4