If you have would like a copy of this version please contact info@davaraudiobibles.org

Limbu Old Testament

अक्‍खेलॽरिक् साङ्‌ग्राम्‍पेदाङ् नु इक्‍सादिङ् खाम्‍बेक् हे़क्‍क्‍याङ् खे़ॽयो के़वाॽबा के़रे़क् चोःक्‍मा चुरे़॥
निङ्‌वाॽफुमाङ्‌ङिल्‍ले़ चोःक्‍मा के़बोङ्‌बा के़रे़क् याःम्‍बक्‍हाॽ नुसिगेक्‍पा ये़न्‍नो चोगुसुरु, खे़ल्‍ले़चोगुल्‍ले़ नुसिगेक्‍पा ये़न्‍नो खुने़ॽ चोगुबा के़रे़क् कुयाःम्‍बक्‍हाॽलाम् नाःम्‍सिङ्॥ खे़ब्‍याङ् निङ्‌वाॽफुमाङ्‌ङिल्‍ले़ नुसिगेक्‍पा ये़न्‍निन् हाङ्‌वा मुॽइसाम् पिरु हे़क्‍क्‍याङ् खे़न् सेसेबा चोगु, थेआङ्‌भे़ल्‍ले़ हाबा खे़न् ये़न्‍नो नावागे़न् चइःत् चोगुबा के़रे़क् याःम्‍बक्‍हाॽओनु खुने़ॽ नाःम्‍सिङ्‌लो॥

ताङ्‌साङ् नु खाम्‍बेःक्‍मान् नावागे़न् चइःत् पोःक्‍खे़बा पोधक्‍हाॽ हाबा कन्‍लो॥
यहवे दाङ्‌बा निङ्‌वाॽफुमाङ्‌ङिल्‍ले़ ताङ्‌साङ्‌बान् नु खाम्‍बेःक्‍मान् नावागे़न् चइःत् चोगुबा ये़न्‍नो इक्‍सादिङ् खाम्‍बेःक्‍मो सिङ्‌बुङ् लुङ्‌बुङ् होःप्‍ते़॥ हे़क्‍क्‍याङ् खाम्‍बेःक्‍मो लत्‍थिक्‍काङ् याःन्‍सुङ् मे़ल्‍लिङ्‌ङे वये़, थेआङ्‌भे़ल्‍ले़ यहवे दाङ्‌बा निङ्‌वाॽफुमाङ्‌ङिल्‍ले़ आल्‍ल थारिक् वहित् मे़न्‍धाए वये़ हे़क्‍क्‍याङ् खाम्‍बेःक्‍मान् के़धोःङ्‌बा के़अःक्‍पा मना हाःत्ताङ् होःप्‍ते़रो॥ कर इक्‍सादिङ् खाम्‍बेःक्‍मोलाम् वहःङ्‌हाॽ पुन्‍दे़ लःन्‍दे़आङ् खाम्‍बेःक्‍मान् के़रे़क् वरक्‍खु॥
खे़ब्‍याङ् यहवे दाङ्‌बा निङ्‌वाॽफुमाङ्‌ङिल्‍ले़ खाम्‍बेःक्‍मोबा खाम्‍मोलाम् मे़न्‍छाम् याप्‍मि चोगु, हे़क्‍क्‍याङ् खे़ल्‍ले़ कुन्‍बोओ हिङ्‌मन्‍ले़न् साःङ्‌गुगे़न् सक्‍मा मुःत्तु पिरु॥ हे़क्‍क्‍याङ् मे़न्‍छाम् याप्‍मिन् कुहिङ्‌वे़त् मना पोःक्‍खे़रो॥
यहवे दाङ्‌बा निङ्‌वाॽफुमाङ्‌ङिल्‍ले़ नाम्‍गे़त् पिसाङ् अदनओ लत्‍छा सिङ्‌सेॽइक् थिक् चोगु, हे़क्‍क्‍याङ् खुने़ॽ चोगुबा मे़न्‍छाम् याप्‍मिन् खे़ॽयो युक्‍खु॥ हे़क्‍क्‍याङ् ओमे़प्‍मे़ल्‍ले़ नुबा के़धाःप्‍पा नु चामाल्‍ले़ कुजागे़नुॽबा कुजाॽ के़धोःक्‍पा के़रे़क् परिक्‍पा सिङ्‌बुङ्‌हाॽ यहवे दाङ्‌बा निङ्‌वाॽफुमाङ्‌ङिल्‍ले़ खाम्‍बेःक्‍मोलाम् लिङे़र याःन्‍दु॥ खुने़ॽ सिङ्‌सेॽइक्‍के़ल्‍ले़ कुलुम्‍मो ने़त्तिगे़न् हिङ्‌मन्‍ले़ सिङ्‌बुङ् हे़क्‍क्‍याङ् नुबा नु ताप्‍फे़ःम्‍बा ने़हिनिङ्‌वाॽ आबिबिबा सिङ्‌बुङ्‌ङाङ्‌ लेःत्तु॥
सिङ्‌सेॽइक्‍के़न् वरङ्‌मारे़ लागि अदनलाम् वहःङ्‌धिक् कुक्‍से़ लःन्‍दे़आङ् ने़स्‍से़, हे़क्‍क्‍याङ् खे़प्‍मोलाम्‍बा लिसि कुलक्‍को से़रे़आङ् ने़स्‍से़॥ थिक्‍सिगेक्‍पा वहःङ्‌ङिल्‍ले़ कुमिङ् पिसोन, कन् वहःङ्‌ङिन् हाबिला लाजेन् के़रे़क् कबुर वगु, खे़प्‍मो साम्‍म्‍याङ् खोदे़त्‍लो॥ खे़न् लाजेॽओबा साम्‍म्‍याङ्‌ङिन् नुबा चोक्॥ खे़प्‍मो कुनाम्‍गे़नुॽबा आङ्‌घिक्‌वा नु ओनिक्‍स् मे़प्‍मनाबा माङ्‌लुङ् खोदे़त्॥ निसिगेक्‍पा वहःङ्‌ङिल्‍ले़ कुमिङ् गिहोन, कुस लाजेॽ के़बोङ्‌बार के़गुङ्‌बा वहःङ्‌ङिन् हाबा कन्‍लो॥ सुम्‍सिगेक्‍पा वहःङ्‌ङिल्‍ले़ कुमिङ् ताइग्रिस, हाबा कन् वहःङ्‌ङिन् अस्‍सुररे़ नाङ्‌गे़न् पिसाङ् वगुरो॥ हे़क्‍क्‍याङ् लिसिगेक्‍पा वहःङ्‌ङिल्‍ले़ कुमिङ् युफ्रेतिसरो॥
यहवे दाङ्‌बा निङ्‌वाॽफुमाङ्‌ङिल्‍ले़ मे़न्‍छाम् याप्‍मिन् अदन सिङ्‌सेॽइक्‍को तेॽरुआङ् खे़न् अःक्‍मा साःक्‍मा नु कोमारे़ लागि खे़ॽयो युक्‍खु॥ हे़क्‍क्‍याङ् यहवे दाङ्‌बा निङ्‌वाॽफुमाङ्‌ङिल्‍ले़ मे़न्‍छाम् याप्‍मिन् इङ्‌जाङ् पिरुआङ् मे़त्तु, “चप्‍चि मे़न्‍जोःक्‍के सिङ्‌सेॽइक्‍को के़युङ्‌बा के़रे़क् सिङ्‌बुङ्‌ङिल्‍ले़ कुजाॽहाॽ चामा के़सुक्‍तुॽ, कर नुबा नु ताप्‍फे़ःम्‍बा ने़हिनिङ्‌वाॽ आबिबिबा सिङ्‌बुङ्‌ङिल्‍ले़ कुजाॽइन् मे़न्‍जाए़ॽ, थेआङ्‌भे़ल्‍ले़ आत्तिन् ये़न्‍नो खे़न् के़जःॽ खे़ने़ॽ से़क्‍खाए के़सिरो॥”
यहवे दाङ्‌बा निङ्‌वाॽफुमाङ्‌ङिल्‍ले़ पाःत्तु, “मे़न्‍छाम् याप्‍मिन् एःक् वाॽमा नुबा मेःन्॥ आङ्‌गाॽ खे़ल्‍ले़ कुलागि लाॽरुमा कुभाॽबाङ्‌धिक् चोगुङ् पिरुङ्‌ॽ॥”
यहवे दाङ्‌बाल्‍ले़ के़रे़क् ताम्‍भुङ् थक्‍साहाॽ हे़क्‍क्‍याङ् ताङ्‌साङ्‌बो के़बे़बा के़रे़क् पुसाहाॽ खाम्‍मोलाम् चोगुसिआङ् मे़न्‍छाम् याप्‍मिःल्‍ले़ थेधे मिङ् खे़ङ्‌हाॽ वाःत्तुसिइ फाॽआङ् ओमे़त्‍छे़ खे़ङ्‌हाॽ मे़न्‍छाम् याप्‍मिःल्‍लो तारुसि॥ हे़क्‍क्‍याङ् मे़न्‍छाम् याप्‍मिःल्‍ले़ के़रे़क् कुहिङ्‌वे़त् थक्‍सापुसाहाॽ आक्‍तङ्‌बा मिङ् वाःत्तुसि हाबा हे़क्‍तङ्‌बाए खे़ङ्‌हाॽरे़ खुन्‍छिॽ मिङ् पोःक्‍खे़॥ अक्‍खेलॽरिक् मे़न्‍छाम् याप्‍मिःल्‍ले़ए के़रे़क् हिम्‍थक्‍साहाॽ, ताङ्‌साक्‍को के़बे़बा पुसाहाॽ हे़क्‍क्‍याङ् के़रे़क् ताम्‍भुङ् थक्‍साहाॽ मिङ् वाःत्तुसि॥
कर आदम्‍मिल्‍ले़ कुलागि खुने़ॽ खे़म्‍दु लाॽरुबा कुभाॽबाङ् हाःत्ताङ् खोमे़दे़त्ते़न्॥
खे़ल्‍ले़चोगुल्‍ले़ यहवे दाङ्‌बा निङ्‌वाॽफुमाङ्‌ङिल्‍ले़ मे़न्‍छाम् याप्‍मिन् मुरुक्‍खुरुक् इप्‍से़र याःन्‍दु, हे़क्‍क्‍याङ् खे़न् इप्‍से़आङ् ने़स्‍से़ल्‍ले़ खे़ल्‍ले़ कुबिम्‍बाहाॽओनु लत्‍थिक् लःत्तुआङ् खे़न् लःत्तुबा ते़न्‍नो ने़क्‍साःल्‍ले़ थिम्‍सुबिरु॥ खे़ब्‍याङ् यहवे दाङ्‌बा निङ्‌वाॽफुमाङ्‌ङिल्‍ले़ खे़न् मे़न्‍छाम् याप्‍मिओलाम् लःत्तुबा कुबिम्‍बे़न् मे़न्‍छुमाधिक् चोगुआङ् मे़न्‍छाम् याप्‍मिओ खे़न् तारु॥
मे़न्‍छाम् याप्‍मिःल्‍ले़ पाःत्तु,
“कङ्‌ग आङ्‌गाॽ आये़प्‍पाल्‍ले़ कुये़प्‍पा नु
आने़क्‍साःल्‍ले़ कुने़क्‍सारो॥
खुने़ॽ मे़न्‍छुमा मे़प्‍मा पोङ्‌लो॥
थेआङ्‌भे़ल्‍ले़ खे़ङ्‌ग ये़म्‍बित्‍छालाम् लःप्‍मनामा वये़रो॥”
कल्‍ले़चोगुल्‍ले़ मे़न्‍छाम् याप्‍मिःल्‍ले़ कुम्‍बा कुम्‍मासि ले़रुसिआङ् कुमेःत्तिन्‍नु तङ्‌लो, हे़क्‍क्‍याङ् खे़ङ्‌हाॽ लत्‍छा थक् पोङ्‌सिरो॥ मे़न्‍छाम् याप्‍मिन् नु कुमेःत्तिन् ने़प्‍माङ् ले़क्‍चाॽबुधुक् वये़छि, हे़क्‍क्‍याङ् मे़नुःन्‍दे़छिन्॥

Mihaino ny तोलिङ्‌सोमु 2