Avar - 2008 Edition (Non-Drama - NT)

Avar - 2008 Edition (Drama - NT)

Гьениса вахъун Гӏиса ана живго гӏураб шагьаралде. Цадахъ гьесул муридалги рукӏана. Шамат къо тӏаде щварабго, Гӏисаца байбихьана синагогаялъуб халкъалда Аллагьасул рагӏи малъизе. Гьесухъ гӏенеккаразул гӏемерисел гӏажаиблъун хутӏун рукӏана. Гьез цоцазда абулеб букӏана:
– Кисагӏаги гьасие гьаб щвараб? Гьасулъ бугеб гьабго кинаб цӏодорлъи-гӏакъиллъи? Кингӏагидай гьасул квердасан гьадинал мугӏжизатал лъугьунел? Марямил вас цӏулал устар гурищ гьав? Якъубил, Юсупил, Ягьудал ва Симонил вац гурищ гьав? Гьанир нилъеда аскӏор гурищ гьасул яцал ругел?
Гьедин васвасаца ккун гьесда божичӏо гьел. Гьебмехалъ Гӏисаца абуна гьезда:
– Къимат-къадру гьечӏев авараг вукӏунаро; амма жиндирго инсул росдацаги, жиндирго гӏагарлъиялъги ва жиндирго рукъалъул агьлуялъги гьев рикӏкӏунаро.
Гьениб Гӏисада кӏвечӏо цониги мугӏжизат бихьизабизе. (Квер хъван цодагьалго чагӏи сах гьари гурони, батӏияб хӏалкӏолъиги гьесдасан тӏатинчӏо.) Хӏикмалъун вукӏана Гӏиса гьел божунгутӏиялда.

Цинги гьев хьвадана сверухъ ругел росабалъе, гьенибги халкъалда Рохалил хабар бицине. Хадуб гьес, ахӏун анцӏила кӏиявго чапаргун, кӏи-кӏиккун гьелги ритӏана. Хъубал жундузда тӏад ихтиярги кьуна Гӏисаца гьезухъе. Цохӏо гӏанса гурони, цадахъ щибниги: я квен-тӏех, я таргьа-къвачӏа, я рачлихъ бараб чвантиниб лъун гӏарац босугеянги лъазабуна Гӏисаца гьезда. Хьитал ретӏеян абуна, амма хисизе ретӏел цадахъ босугеянги малъана. Гӏисаца гьезда абуна:
– Нуж тӏад рещтӏарав гьоболги хисуге, гьеб шагьаралдаса къватӏире рахъинегӏан. Ваамма нуж къабулги гьаричӏони, ва нужер рагӏабазухъ гӏинги тӏамичӏони, гьениса къватӏире рахъунаго, нужерго хьитаздаса хӏурги кӏутӏун те. Аллагьасда цебе гьез жаваб кьезе букӏине хутӏа абе гьеб.
Гьел чапарзаби ана кантӏун Аллагьасде руссаян гӏадамазда лъазабизе. Чанги чиясул чорхолъа жундул рачахъана гьез. Даруяб нах бахун гӏемерал унтарал гӏадамал сахлъизаруна.

Гӏисал цӏар киса-кибего машгьурлъун букӏиндал, Гьерод ханасухъеги щолел рукӏана гьесул хӏакъалъулъ харбал. Цояз абулеб букӏана, хваралъуса вахъун вачӏарав Яхӏя авараг вугин гьев, ва гьединлъидал гьес рихьизарулел ругин гьал мугӏжизаталги. Цогидаз абулеб букӏана Иляс авараг вугин гьевилан. Некӏо заманаялда рукӏарал аварагзабиго гӏадинав авараг вугин гьевилан абулел чагӏиги рукӏана. Амма гьеб рагӏидал, Гьеродицани абуна, жинца бетӏер къотӏизабурав Яхӏя авараг вугин, хваралъуса вахъун вачӏун.
Гьеродица жинцаго кьун букӏана кквезеги ккун Яхӏя гвандинив тӏамейилан буюрухъ. Гьелъие гьадинаб гӏиллаги букӏана: Гьеродица лъадилъун ячун йикӏана жиндирго вац Филиппил чӏужу Гьеродиада. Амма Яхӏяца гьесда абулеб букӏана вацасул йикӏарай чӏужу дуца ячине бегьуларилан. Гьединлъидал гьесда ццин бахъун йигей Гьеродиадае бокьун букӏана Яхӏя чӏвазе. Амма гьелда гьеб гьабизе кӏвечӏо. Щайгурелъул Гьерод Яхӏякьа хӏинкъулаан. Гьесда лъалаан Яхӏя вацӏцӏадав ва мукъадасав чи вукӏин. Гьединлъидал цӏунун вукӏана гьев Гьеродица. Кигӏанго гьесул рагӏабаз рекӏел рахӏат хвезабулеб букӏаниги, Гьеродие бокьулаан Яхӏяхъ гӏенеккизе.
Ахирги цо санагӏатаб къо тӏаде щвана. Живго гьавураб къо кӏодо гьабун Гьеродица кӏудияб квана-гьекъей гьабуна, кинабго Галилеялъул къо-ас бугел чӏухӏбиги, бодул церехъабиги, бищунго хӏурматиял хӏакимзабиги ахӏун. Гьений тӏаде ячӏун Гьеродиадал яс кьурдана, Гьеродги гьесда аскӏор рукӏаралги цӏакъ рази гьаруна гьелъ. Гьеродица гьей ясалда абуна:
– Щиб дуе бокьаниги, гьаре дида, дица дуе кьела гьеб.
Цинги гьев гьелъие гьедана:
– Щиб дуца гьараниги, гьеб дуе дир сайигъат буго, хӏатта дир ханлъиялъул бащдаб букӏа абе гьеб.
Инеги ун, гьелъ жиндирго эбелалда гьикъана щибдай гьарилаян. Эбелалъ малъана Яхӏя аварагасул къотӏараб бетӏер гьарейилан. Гьебсагӏат, екерун ханасухъеги ун, ясалъ гьесда абуна:
– Дие бокьун буго Яхӏя аварагасул бетӏер, гъадрида жаниб лъун, гьабсагӏат дуца дихъе кьезе.
Хан цӏакъ пашманлъана. Амма гьалбадеридаги рагӏун гьедараб гьа хвезабиларилан гьелъие инкар гьабизе бокьичӏо. Гьебсагӏат ханас гӏащтӏичиясе амру гьабуна, Яхӏял къотӏараб бетӏерги босун вачӏайилан. Вортун ун, гвандинив вугев Яхӏял бетӏерги къотӏун, гъадриниб гьебги лъун вачӏана гӏащтӏичи. Цинги ясалъухъе кьуна гьес гьеб. Гьелъги босун жиндирго эбелалъухъе кьуна.
Гьеб хабар рагӏидал, Яхӏял муридаз гьесул жаназа, нахъеги босун, хабалъ букъана.

Дол чапарзаби Гӏисахъе тӏадруссана, ва жидецаго гьабурабщинабги халкъалда малъарабщинабги бицана гьез гьесда. Рачӏунелги унелги гӏадамазул гӏемерлъиялъ кӏалдиб квен лъезецин заман букӏинчӏелъул, Гӏисаца гьел чапарзабазда абуна:
– Гьанже нилъ гьазда аскӏоса цо гӏадан-чи гьечӏеб гӏалахалде рилълъина цодагьалъ хӏухьбахъи гьабизе.
Халкъалдаса ратӏалъун, росодаги рекӏун, цо гӏадан-чи гьечӏеб бакӏалде ана Гӏисаги гьелги. Амма гӏемерисел гӏадамазда рихьана гьел унел ва щал ругелали лъана. Гьединлъидал ралъдал рагӏалчӏван рекерун, киналго шагьараздаса гӏадамал ракъдадасан рекерана гьенире, ва, гьаздасаги цере дореги щун ратана. Гӏиса ракъдаде лъугьараб мехалъ, гьесда гьениб бихьана гӏемераб халкъ, ва гьев гурхӏана вехь гьечӏеб гӏи гӏадин ругел гӏадамазда; гьезда гӏемераб жо малъизе лъугьана гьев.
Маркӏачӏумех щолеб букӏиндал, Гӏисада аскӏоре рачӏун гьесул муридаз абуна:
– Гӏадан-чиго гьечӏеб бакӏ бугин гьаб, сордоги тӏаде щолеб бугин, нахъе айилан абе гьал гӏадамазда, гьанир сверухъ ругел росабалъ жидеего квание гӏамал гьабизе.
Гӏисаца гьезда абуна:
– Нужеца кваназаре гьел.
Гьез абуна:
– Гьал гӏорцӏизаризе чадихъ кӏинусго динар кьезейищха ниж инел?
Гӏисаца гьезда абуна:
– Чан чед нужехъ бугебали хал гьабун рачӏа, – ян.
Хал гьабун рачӏун гьез абуна:
– Щуго чедги кӏиго ччугӏаги буго, – ян.
Гьебмехалъ Гӏисаца гьезда лъазабуна гьел гӏадамал гӏурччинаб харда тӏад, кьера-кьерал гьарун, гӏодор чӏезареян. Гьелги нус-нусккун ва кӏикъоялда анцӏ-анцӏккун гӏодор чӏана. Гӏисаца щуябго чедги кӏиябго ччугӏаги кодобе босана, зобалаздехун вуссун кванде дугӏа гьабуна ва бек-бекун муридазухъе кьуна, халкъалъе бикьейилан. Цинги кӏиябго ччугӏаги бикьана киназдаго гьоркьоб. Киналго гӏорцӏизегӏан кванана. Нахъе хутӏараб чадилги ччугӏилги кесказул анцӏила кӏиго гьегь цӏезабуна. Бихьиназулцин кинавниги щуазарго чи вукӏана гьенив кваналев.

Цинги Гӏисаца жиндирго муридал ритӏана, гьеб халкъ жинца нахъе биччалалде, росодеги рахун, ралъдал добцояб рахъалда бугеб Бетсаидаялде цере-цере айилан. Халкъги нахъе битӏун, Гӏиса Аллагьасе гьари-дугӏаялъе магӏарде ана.
Маркӏачӏубер рукӏкӏараб мехалъ раса ралъдал бакьулъе щун букӏана. Цинги ралъдал рагӏалда живго цохӏо вукӏарав Гӏисада бихьана бадибехун пулеб кутакаб гьорода данде лъим ххазе ккун, гьезул тату хун букӏин. Жеги хъахӏлъи рехилалдего Гӏиса ралъдал лъеда тӏасан вилълъун гьезда аскӏове ана. Гьале гьев цоги рахъалдехун унев ватана гьезда хьолбохъан. Лъеда тӏасан вилълъун вачӏунев гьесда бер чӏвайдал, хваразул рухӏ бугилан ккун, росода рукӏаразул чӏахӏиял гьаркьал кӏанцӏана. Киназдаго вихьулев вукӏана гьев, ва киналго хӏинкъунги рукӏана. Гьебсагӏат Гӏисаца гьезда абуна:
– Дун вуго! Нуж расги хӏинкъуге! Къвакӏун чӏа!
Цинги гьев гьезда аскӏове росоде вахана. Гьебсагӏат гьуриги къатӏана. Дагьалги гӏажаиблъун, хӏикмалъун хутӏун рукӏана гьел. Доб чадил мугӏжизатгицин бичӏчӏун букӏинчӏелъулин гьезул ракӏ бицатго хутӏун букӏараб.

Ралъдал добаб рахъалде рахун, гьел щвана Геннесареталъул ракьалде ва якорь рехана. Цинги росодаса рещтӏун гьел ракъдаде лъугьана. Гьебсагӏат Гӏисаги лъан, гьенир рукӏарал гӏадамал рахъ-рахъалде рекерун ана, ва гьев вугин рагӏараб бакӏалде туртида лъун росун рачӏана гьез унтарал чагӏи. Гьедин, киве гьев щваниги – шагьараздаги, росабалъги, кулабаздаги, – росун рачӏун базар къотӏнор лъолаан унтарал чагӏи. Гьесул гӏабаялъул гӏертелалда квер хъвазегӏаги биччайилан гьарулаан гьез. Гьесда квер хъванщинав чиги сахлъулаан.

Mihaino ny Маркица бицараб Рохалил хабар 6