Ixil - Chajul - 2016 Edition (No Drama - NT)

Ixil - Chajul - 2016 Edition (NT)

Tuulbʼaletz uvaʼ maʼtich ipal vet inqʼa qʼij inqʼae, tul xeʼt Xhun tiʼ ipaxsal viyolbʼal quBʼaal Tiuxh tu txʼavaʼ uvaʼ yeʼl xaol jeqlel s-tuul uvaʼ at tuulbʼal Judeea, Xhun, uvaʼ ok ibʼij s-aqʼol kuʼ xaol xeʼ aʼ. Tul ech nikich tal Xhun s-eche: —Itzʼavaq etibʼ t-inqʼa epaʼv, tan xeʼtiy vet vibʼant quBʼaal Tiuxh uvaʼ tu amlikaʼ viqʼesalil xoʼl inqʼa xaol, —chichich Xhun.
Aʼetz Xhune uvaʼ ech val u yol tzʼibʼamal ka s-tiʼ taʼn Isaiias, u qʼexsanich tetz viyol quBʼaal Tiuxh, s-eche:
—Een laʼ bʼen sichʼink
val u qul tu txʼavaʼ
uvaʼ yeʼl xaol jeqlel s-tuul
uvaʼ ech laʼ tal s-eche:
«Bʼanvaq etutxh
tiʼ ikʼulux tul
u quBʼaal Tiuxh,
eche ibʼanax tutxh
invaʼq bʼey.
Atz jikbʼavaq vetxumbʼal,
eche ijikbʼal
invaʼq palebʼal ok,»
—chich u yol.
Aʼichetz toksaʼm Xhun u chemich xiʼl tiʼ kameeyo. Tul tzʼuʼmich uvaʼ nikich jekʼon ok u toksaʼm Xhun s-tiʼ. Tul taʼn kuxh sakʼ tuchʼ taʼl kabʼ inqʼa t-vitz nikich tetxhbʼu Xhun s-vatzil itxʼix. Tul mam xaol nikich itzaj tuulbʼal u tenam Jerusaleen tiʼ tabʼil inqʼa yol uvaʼ nikich tal Xhun. Atetz xaol nikich itzaj tuulbʼal jankʼal Judeea. Atz at xaol inqʼa een jeqlich tziʼ u xaomla aʼ Jordaan, tul nikich tul tal uvaʼ atich Xhun. Tul nikich motx tal vet inqʼa xaol inqʼa ipaʼv te quBʼaal Tiuxh, ech ivatz jolt inqʼa xaol. Yaʼne nikich motx taqʼ vet kuʼ Xhun inqʼa xaol xeʼ u xaomla aʼ Jordaan.

Tiletz vet Xhun uvaʼ mamala inqʼa fariseeo tuchʼ inqʼa saduseeo nikich motx tul tal uvaʼ atich Xhun, tan aʼaqich isaʼ uvaʼ laʼich motx aqʼaxaq kuʼ xeʼ aʼ taʼn Xhun. Tul ech tal vet Xhun s-te s-eche: —¡Ex inqʼa ech vetxumbʼal, eche tiyiilaq kan! Aʼ nik etitzʼa uvaʼ tuchʼ kuxh vekuʼ xeʼ aʼ, tul ey vet el ex tzij vatz vikʼaʼnal quBʼaal Tiuxh, uvaʼ toq uloq setiibʼa tiʼ vetxumbʼal. Yeʼletza.{*} Pet jalpuvaq vetxumbʼal. Tul kʼutxhvaq uvaʼ qat etitzʼal vet etibʼ tiʼ ikʼutxhux bʼaʼnla txumbʼal. Tul ech ebʼan tiʼ ikʼutxhuxeʼ, eche viʼoq tzeʼ uvaʼ laʼ taqʼ bʼaʼnla ivatz.{*} Tul yeʼ laʼ utxhi ech laʼ etal tetaanima s-eche: «Tan aʼ Avraʼaam kʼuy qumam, echetz yeʼxhkam invaʼq laʼ ul s-qiibʼa,» chitunich ex. Tan oq laʼ isaʼ te quBʼaal Tiuxh, tul laʼ taqʼ bʼen inqʼa sivan inqʼae s-tijaq imam Avraʼaam.{*} Tan ech laʼ ulbʼel ex, eche laʼ ulbʼel inviʼoq u tzeʼ uvaʼ yeʼ nik taqʼ ivatz, uvaʼ bʼanel vet tutxh kʼoxbʼal tiʼ itzokʼox el inqʼa taqʼil tiʼ ivuʼl bʼen. Tan jatvaʼlxh u tzeʼ uvaʼ yeʼ nik taqʼ bʼaʼnla ivatz, tan laʼ juyili, atz laʼ ok t-xamal.{*}

Pet toq val sete, ex inqʼa xaol, tan bʼantan eche u vatineʼ, tan xeʼ aʼ kuxh nik vaqʼvat kuʼ ex s-tetxhlal vetitzʼat etibʼ t-inqʼa epaʼv. Pet koq naq uvaʼ yaʼn tul s-viʼ, tan aʼetz vet viTiuxhil Tiuxh laʼ taqʼ naq sete. Tan sibʼxh palnaʼq tiqleʼm naq sinviʼ. Tul jitoq inkʼulel laʼ viqʼo vichichʼ xaʼp naq.
Atz ech laʼ ul ibʼan naq, eche invaʼq u xaol uvaʼ atoʼk invaʼq tichubʼal triigo tiqʼabʼ. Tan bʼaxa tzij nik itichu u xaol vivatz u triigo tuchʼ u tichubʼal. Yaʼne nik ikol vet vibʼaʼnla triigo t-vikʼoay. Petetz vet u tiʼ triigo uvaʼ chʼis veteʼ, tan laʼ toksa vet xamal s-tiʼ. Echetz uvaʼe toq ul ibʼan naq u Vinaq. Tan laʼ ikol naq inqʼa niman tetz. Pet inqʼa yeʼ laʼ qeon naq, bʼantan yeʼl iyaʼebʼal imotxebʼal u kʼaxbʼichil laʼ motx tila, —xeʼt Xhun.


Yaʼne el vet bʼen Jesuus tuulbʼal Galileea, tul yekich vet Jesuus kʼatz Xhun tziʼ u xaomla aʼ Jordaan tiʼ ikuʼ xeʼ aʼ taʼn Xhun. Poro yeʼ nikich isaʼ Xhun taqʼax kuʼ Jesuus xeʼ aʼ. Pet aʼl ech tal Xhun s-eche: —Jit inkʼulel uvaʼ, aʼ in laʼ aqʼon kuʼ axh xeʼ aʼ. Pet aʼ, axh aqʼon kuʼ in, —xeʼt Xhun.
Tul ech tal Jesuus s-eche: —Antxhte uvaʼ nik aaleʼ. Pet tetxhal toq qunima jankʼal inqʼa jikla txhaq itzʼabʼal uvaʼ itzʼamal s-qiʼ taʼn quBʼaal Tiuxh, —xeʼt Jesuus.
Yaʼne ikuy vet Xhun taqʼax kuʼ Jesuus xeʼ aʼ. Iletz kuxh Jesuus nikich ijaʼul xeʼ u aʼ, tul til Jesuus ijaqp u amlikaʼ.{*} Tul ajtxh til Jesuus ikuʼl viTiuxhil Tiuxh s-tiibʼa, echxhte ixichʼan kuʼl invaʼq paraamuxh.
Yaʼne abʼil iyolon kuʼl val u qul t-amlikaʼ uvaʼ, ech tal s-eche: —Aʼetz vinKʼaole uvaʼe, uvaʼ kamxh in s-tiʼ. Tan aʼ uvaʼe, nik chiibʼisan vaanima, —xeʼt u qul.

Mihaino ny Tio 3